ʻOua ʻe Tuku ke Mole ʻa Hoʻo ʻUluaki ʻOfá
1 Ko Sīsū ne fakalāngilangiʻí naʻá ne akonaki ki he fakatahaʻanga ʻEfesō he ʻuluaki senitulí: “ʻOku ai ha meʻa ʻoku ou koviʻia ai kiate koe; ko hoʻo hiki mei hoʻo ʻuluaki ʻofa.” (Fkh. 2:4) ʻOku hā mahino, naʻe mole mei he tokolahi ʻa ʻenau ʻuluaki ʻofa kia Sihová. ʻI he taimi naʻa tau ako ai ʻa e moʻoní, naʻe hoko ʻo mālohi ʻetau ʻofa ki he ʻOtuá mo e kaungāʻapí, pea naʻe ueʻi ai heni kitautolu ke vahevahe atu ʻetau ʻamanaki ne toki maʻu foʻoú ʻi he faivelenga. Ko e hā te ne taʻofi ʻa e mole ʻa ʻetau ʻuluaki ʻofá pea mo ʻetau faivelenga ʻi he ngāue fakafaifekaú?
2 Ako Fakafoʻituitui pea Maʻu ʻa e Fakatahá: ʻI heʻetau ʻuluaki ako ʻa e moʻoní, ko e hā naʻá ne ueʻi kitautolu ke maʻu ʻa e ʻofa ki he ʻOtuá mo e kaungāʻapí? ʻIkai nai ko e ngaahi meʻa kotoa naʻa tau ʻilo fekauʻaki mo Sihova mei heʻetau ako ʻa e Tohi Tapú? (1 Sione 4:16, 19) Ko ia ai, ke “to e tupulekina ʻo lahi hake ʻaupito” ʻetau ʻofá, kuo pau ke hokohoko atu ʻetau maʻu ʻa e ʻilo totonú, ʻo kumi “ae gaahi mea loloto i he Otua.”—Fili. 1:9-11; 1 Kol. 2:10, PM.
3 Ko hono tauhi maʻu ha tōʻonga ʻo e ako fakafoʻituitui tuʻumaʻú ʻe lava ke hoko ia ʻo faingataʻa moʻoni ʻi he ngaahi ʻaho fakaʻosi ko ʻeni ʻoku lahi ai ʻa e loto-moʻuá mo e ngaahi fakahohaʻá. (2 Tim. 3:1) Kuo pau ke tau vaheʻi ha taimi ke maʻu ai ʻa e meʻakai fakalaumālié. ʻOku toe mātuʻaki mahuʻinga foki ʻa e maʻu maʻu pē ʻa e ngaahi fakataha ʻa e fakatahaʻangá, tautautefito ʻi heʻetau “sio ki he fakaofiofi mai ʻa e ʻaho.”—Hep. 10:24, 25.
4 Ko e Ngāue Fakafaifekaú: ʻOku tokoniʻi kitautolu ʻe he kau faivelenga ki he ngāue fakafaifekaú ke kei tauhi ʻetau ʻuluaki ʻofa ki he ʻOtuá. ʻI heʻetau malangaʻi ʻa e ongoongo leleí, ʻoku fakamanatu mai ai kia kitautolu ʻa e ngaahi talaʻofa anga-ʻofa ʻa Sihová, pea ʻoku tokoni ia kia kitautolu ke tauhi ai pē ke mālohi ʻetau ʻamanakí mo ʻetau ʻofá. Ko hono akoʻi ʻa e ngaahi moʻoni ʻo e Tohi Tapú ʻoku fiemaʻu ki ai ʻa ʻetau fai ha fekumi ke tau mahinoʻi lelei ia, pea ʻoku fakaivimālohiʻi ai heni ʻetau tuí.—1 Tim. 4:15, 16.
5 ʻOku taau mo Sihova ʻa e meʻa kotoa pē, ʻo kau ai ʻetau ʻofá. (Fkh. 4:11) ʻOua ʻe tuku ke mōlia atu hoʻo ʻofá. ʻAi ke mālohi ai pē ʻa hoʻo ʻuluaki ʻofá ʻaki hoʻo ako fakafoʻituitui fakamātoato ʻa e Tohi Tapú, maʻu maʻu pē ʻa e fakatahá, pea faivelenga ʻi hono tala ki he niʻihi kehé ʻa e meʻa ʻokú ke ʻofa lahi taha aí.—Loma 10:10.