ʻe he huhuʻí ʻa e hala ki ha toetuʻu ʻa e maté ki he māmani foʻou ʻa e ʻOtuá. ʻE kau ai ʻa e kau sevāniti faitōnunga ʻa e ʻOtuá ʻa ia naʻa nau mate ki muʻa ke totongi ʻe Sīsū ʻa e huhuʻí pea naʻa mo e tokolahi naʻa nau mate ʻi he taʻeʻilo pea naʻe ʻikai te nau lotu kiate Iá. ʻOku pehē ʻe he Tohi Tapú: “ʻE faifai pea hoko ha toetuʻu ʻa e angatonu mo e angahala fakatouʻosi.” (Ngāue 24:15) ʻI he taimi ko iá, makatuʻunga ʻi he huhuʻí ʻe foaki ai ʻe Sihova ki he faʻahinga talangofua kotoa ʻo e tangatá, ʻa e moʻui taʻengatá. (Sione 3:​36) Naʻe fakamatala ʻe Sīsū tonu: “Naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” (Fakaʻītali ʻamautolu; Sione 3:​16) Ko e ngaahi ʻaonga kotoa ko ení ʻe tafe mai ia ki he faʻahinga ʻo e tangatá koeʻuhi ko hono tokonaki mai ʻe he ʻOtuá ʻa e feilaulau huhuʻí.

Kae kehe, ko e tafaʻaki tuʻu-ki-muʻa fekauʻaki mo e huhuʻí, ʻoku ʻikai ko e ngaahi ʻaonga ʻoku tau maʻu mei aí. Ko e meʻa ʻoku mahuʻinga angé ko e meʻa ʻoku fai ʻe he huhuʻi ʻa Kalaisí ki he huafa ʻo Sihová. ʻOku fakamoʻoniʻi ai ko Sihová ko ha ʻOtua ʻo e fakamaau totonu haohaoa, ʻa ia ʻoku lava ke ne feangainga mo e faʻahinga angahalaʻia ʻo e tangatá pea kei maʻa ai pē mo māʻoniʻoni. Kapau naʻe ʻikai fakataumuʻa ʻa e ʻOtuá ke tokonaki mai ʻa e huhuʻí, naʻe ʻikai mei malava ha hako ʻo ʻĀtama, naʻa mo ʻĪnoke, Noa, mo ʻĒpalahame, ke ʻaʻeva mo Sihova pe hoko ko hono kaumeʻa. Naʻe ʻiloʻi eni ʻe he tokotaha-tohi-sāmé peá ne tohi ai: “Ka ne ke nofo, ʻe Iaa, ke lama kovi, ko hai ha taha ʻe tuʻu, Atonai?” (Sāme 130:3) He totonu moʻoni ē ke tau fakamālō fakatouʻosi kia Sihova ʻi hono fekauʻi mai ʻa hono ʻAlo ʻofaʻangá ki he māmaní pea kia Sīsū ʻi heʻene foaki loto-lelei ʻa ʻene moʻuí ko ha huhuʻi maʻatautolú!​—Maake 10:45.

Ko e ʻUlungāanga Leleí ʻOkú Ne ʻOmai ʻa e Fua

ʻI HA kiʻi motu ʻikai mamaʻo mei he matāfanga ʻo e fakatonga ʻo Siapaní, naʻe kamata ako Tohi Tapu ai ha faʻē mo haʻane fānau iiki ʻe toko tolu mo e Kau Fakamoʻoni ʻa Sihová. ʻI he sio ki he meʻá ni, naʻe kamata ai ʻa e ngaahi kaungāʻapi ʻi he feituʻu mamaʻo mo mātuʻaki piki ko ia ki he tukufakaholó ke hanga kehe mei he faʻeé ʻi ha taimi pē naʻa nau sio ai kiate ia. “Ko e meʻa naʻe fakalotomamahi ange ʻi heʻenau hanga kehe meiate aú ko e ʻikai te nau anga-fakakaumeʻa ki hoku husepānití mo ʻeku fānaú,” ko ʻene fakamatalá ia. Neongo ia, naʻá ne tala ange ki heʻene fānaú: “Kuo pau ke tau lea fakafeʻiloaki ki hotau ngaahi kaungāʻapí koeʻuhi pē ko Sihova.”​—Mātiu 5:​47, 48.

ʻI ʻapí, naʻá ne akoʻi ai ʻene fānaú ke nau anga-fakaʻapaʻapa neongo hono fakataleʻi kinautolú. ʻI heʻenau fononga heʻenau ʻaʻahi maʻu pē ki he vai vela ʻi he feituʻú, naʻe ʻahiʻahiʻi ai ʻe he fānaú ʻenau ngaahi lea fakafeʻiloakí ʻi he kaá. ʻI heʻenau hū ki he falé, naʻe ui fiefia maʻu pē ʻa e fānaú, “Konnichiwa!”​—“Mālō e lelei!” Naʻe hokohoko atu anga-kātaki ʻa e fāmilí ʻi he lea fakafeʻiloaki ki he tokotaha kotoa naʻa nau fetaulakí, neongo ia naʻe kei momoko ai pē ʻa e tali mai ʻa e ngaahi kaungāʻapí. Neongo ia, naʻe ʻikai lava ke taʻefakatokangaʻi ʻe he kakaí ʻa e ʻulungāanga lelei ʻa e fānaú.

Naʻe faifai pē, ʻo tali “Konnichiwa” ange ʻa e kaungāʻapi ʻe taha pea mo ha toe kaungāʻapi ʻe taha. ʻI he ngataʻanga ʻo e taʻu ʻe ua, naʻe fai ai ʻe he meimei tokotaha kotoa pē ʻi he koló ʻa e tali ki he ngaahi lea fakafeʻiloaki ʻa e fāmilí. Naʻa nau toe kamata ke lea fakafeʻiloaki fakaekinautolu pea nau hoko ai ʻo anga-fakakaumeʻa ange. Naʻe loto ʻa e tokoni pule koló ke fakalāngilangiʻi ʻa e fānaú ʻi honau ngafa ʻi he liliu ko ení. Ka naʻe fakapapauʻi ange ʻe heʻenau faʻeé kiate ia ko ʻenau fai pē ia ʻe kinautolu ʻa e meʻa ʻoku totonu ke fai ʻe he kau Kalisitiané. Ki mui ai, ʻi ha feʻauhi lea ʻa e koló kotoa, naʻe fakamatala ai ʻa e foha ʻe taha ki he founga ʻo hono akoʻi ʻe heʻene faʻeé ʻa e fāmilí ke nau lea fakafeʻiloaki anga-fakakaumeʻa ki he niʻihi kehé ʻo tatau ai pē pe ko e hā ʻa ʻenau talí. Ko ʻene leá naʻá ne ikuna ʻa e pale ʻuluakí pea naʻe pulusi ia ʻi he nusipepa fakakoló. ʻI he ʻahó ni, ʻoku fiefia ʻaupito ʻa e fāmilí ʻi hono fakatupu ʻe he muimui ʻi he ngaahi tefitoʻi moʻoni faka-Kalisitiané ʻa e ngaahi ola lelei ko iá. Ko hono vahevahe atu ʻa e ongoongo leleí ki he niʻihi kehé ʻoku faingofua lahi ange ʻi he taimi ʻoku anga-fakakaumeʻa ai ʻa e kakaí.