Fanongonongo

◼ Tohi ke tuʻuaki ʻi Siulai mo ʻAokosi: ʻE tuʻuaki nai ha polosiua peesi 32 pē ʻoku feʻungamālié. Sepitema: Ko e Fakapulipuli ʻo e Fāmili Fiefiá. Ki ha toe tuʻuaki ʻe taha, te ke fakaʻaliʻali nai ʻa e polosiua Hanganaki Leʻo! ʻOkatopa: Ko e ongo makasini Taua Leʻo mo e ʻĀ Hake! ʻO ka hā mai ha mahuʻingaʻia, tuʻuaki ʻa e polosiua Fiemaʻu, ʻo fai ha feinga makehe ke kamata ha ngaahi ako Tohi Tapu.

◼ Kamata ʻi Sepitema, ʻe fai ai ʻe he kau ʻovasia sēketí ʻa e malanga maʻá e kakaí kuo fakakaveinga “Ko e Hā ke Tataki Ai ʻe he Tohi Tapú?”

◼ ʻOku fokotuʻu mai ko e ngaahi tohi kole ki he ngāue tāimuʻa tuʻumaʻú ke ʻave ia ki he ʻōfisi vaʻá ʻo ʻikai toe siʻi hifo he ʻaho ʻe 30 ki muʻa ʻi he ʻaho naʻe kole ke kamata aí. ʻOku totonu ke vakaiʻi ʻe he sekelitali ʻo e fakatahaʻangá ʻa e ngaahi fōmú ke fakapapauʻi ʻoku nau kakato. Kapau ʻe ʻikai lava ʻa e kau tohi kolé ʻo manatuʻi ʻa e ʻaho totonu ʻo ʻenau papitaisó, ʻoku totonu ke nau fakafuofuaʻi ʻa e ʻahó pea tauhi hano lēkooti. ʻOku totonu ke hikiʻi ʻe he sekelitalí ʻa e ʻaho ko ení ʻi he kaati Congregation’s Publisher Record (S-21).

◼ ʻOku totonu ke fakapapauʻi ʻe he kau sekelitali ʻo e fakatahaʻangá ʻoku nau maʻu ha Pioneer Appointment Letter (S-202) maʻá e tāimuʻa tuʻumaʻu taki taha ʻi he fakatahaʻangá. Kapau ʻoku teʻeki ai, kātaki ʻo tohi ki he ʻōfisi vaʻá.

Tokoniʻi Hoʻo Fānaú Ke Nau Fakalakalaka ʻi he Ngāue Fakafaifekaú

¹ ʻOku fua ʻe he ngaahi mātuʻa Kalisitiané ʻa e fatongia mafatukituki ʻo hono akoʻi ʻenau fānaú ki he ngāue fakafaifekaú mei ha taʻu siʻi. ʻE aʻusia nai eni ʻi ha ngaahi founga kehekehe. Ko e fānau ʻe niʻihi ʻoku nau malava ʻo lau maʻuloto ha konga Tohi Tapu feʻungamālie naʻa mo e ki muʻa ke nau malava ʻo lautohí. ʻE lava ke uesia mālohi ʻe he meʻá ni ʻa e kau fanongó. ʻI he tupu ʻa e fānaú ʻo kiʻi lalahi angé, ʻe lava ke nau fai ʻa e meʻa lahi ange ʻi he ngāue fakafaifekaú. ʻE lava fēfē ke tokoniʻi ʻe kimoutolu ngaahi mātuʻá ʻa hoʻomou fānaú ke nau kau ʻi hono fai ha fakamoʻoní? Mahalo ʻe tokoni lahi ange ʻa e ngaahi fokotuʻu hoko haké.

² Hili ha fakafeʻiloaki, te ke leaʻaki nai ʻo pehē:

◼ “Ko ʻeku tamasiʻí, ko [hono hingoá], ʻokú ne maʻu ha konga Tohi Tapu mohu ʻuhinga ʻokú ne saiʻia ke ke fanongo ki ai.” ʻE leaʻaki nai ʻe hoʻo kiʻi tamá: “Ko e konga Tohi Tapu ko eni ʻi he Sāmé naʻá ne akoʻi mai kia au ʻa e huafa ʻo e ʻOtuá. [ʻOku lau pe leaʻaki maʻuloto ʻe he kiʻi tamá ʻa e Sāme 83:18.] Ko e ngaahi makasini ko ení ʻoku fakamatala ai ʻo fekauʻaki mo e meʻa ʻe fai ʻe Sihova ko e ʻOtuá maʻa kitautolú. ʻE sai pē ke u tuku ia maʻau?” ʻE lava ke ke fakaʻosi ʻa e fetalanoaʻakí ʻaki hoʻo fakamatalaʻi ʻa e founga ʻoku poupouʻi ai ʻa e ngāue ʻi māmani lahí.

³ Pe te ke ʻahiʻahi nai ʻa e fakaofiofi ko ení:

◼ “Mālō e lelei. ʻOku ou akoʻi ʻeku taʻahiné, ko [hono hingoá], ke ne fakahaaʻi ʻa e mahuʻingaʻia ki he niʻihi kehe ʻi he koló. ʻOkú ne saiʻia ke vahevahe atu kia koe ha pōpoaki Fakatohitapu nounou.” ʻE lava ke ne lea ʻo pehē: “Ko e founga ʻe taha ʻoku ou saiʻia ai ke tokoniʻi ʻa e kakaí ko hono vahevahe atu ʻa e ʻamanaki ʻi he Tohi Tapú fekauʻaki mo e kahaʻú. [ʻOku lau pe leaʻaki maʻuloto ʻe he kiʻi tamá ʻa e Fakahā 21:4.] Ko e ngaahi makasini ko ení ʻoku fakamatala ai ki he meʻa ʻe fai maʻa kitautolu ʻe he Puleʻanga ʻo e ʻOtuá. ʻOku ou tui te ke fiefia ʻi hono lau kinautolú.”

⁴ Ko hono ngāueʻaki hokohoko ha tuʻuaki faingofuá ʻoku fakaʻatā ai ʻa e fānaú ke nau maʻu ʻa e falala ki heʻenau malava ke vahevahe atu ʻa e pōpoaki ʻo e Puleʻangá. Ko e ngaahi konga ʻahiʻahi ʻoku fakatefito ʻi he lea mahino mo e leʻo-lahi feʻungá te ne teuʻi kinautolu ke nau lea ʻi ha ngaahi tuʻunga kehekehe. Ko e teuteu lelei ki muʻá mo e fakaongoongolelei loto-moʻoní te ne tokoniʻi ai ʻa e fānaú ke nau fakahaaʻi ʻenau tuí.

⁵ ʻAki ʻa e fakalototoʻa ko iá, kuo taau ai ʻa e fānau tokolahi ke hoko ko ha kau malanga teʻeki papitaiso. He fiefia moʻoni ia ke sio ki heʻetau fānaú ʻoku nau fai ʻa e fakalakalaka ʻi he ngāue fakafaifekau faka-Kalisitiané!—Sāme 148:​12, 13.