ʻOkú Ke Poto?

ʻI HONO fakanofo ʻa e kau fakamaau ki ʻIsilelí, naʻe feinga mālohi ʻa Mōsese ke maʻu aiha “kau tangata fakapotopoto mo poto pea mo taukei.” (Teutalonome 1:​13, NW) Ko e taukeí, ʻa ia ʻoku haʻu fakataha mo e taʻumotuʻá, naʻe ʻikai ko e tuʻungá pē ia. Naʻe toe mahuʻinga ʻa e fakapotopotó pea mo e potó.

Ko ha tokotaha ʻa ia ʻoku poto ʻokú ne fakahaaʻi ʻa e fakafuofua lelei ʻi he leá pea ʻi he ʻulungāngá. Fakatatau ki he Webster’s Ninth New Collegiate Dictionary, ko e tokotaha potó ʻoku toe “malava ia ke maluʻi ʻa e fakapulipulí ʻi he ʻiloʻilo.” ʻIo, ʻoku ʻi ai ʻa e “ʻaho ke lea,” pea ʻoku ʻi ai ʻa e “ʻaho ke silongo,” pea ko e tokotaha potó ʻoku mahino kiate ia ʻa e faikehekehé. (Koheleti 3:7) ʻOku faʻa ʻi ai ʻa e ʻuhinga lelei ke hanganaki fakalongolongo ai, he ʻoku pehē ʻe he Tohitapú: “Ka lahi ha lea ʻe ʻikai hala ha angahala: ka ko ia ʻoku fakamaʻumaʻu hono loungutu ko e poto ia.”—Palovepi 10:19.

ʻOku tokanga lahi ʻa e kau Kalisitiané ke nau poto ʻi heʻenau ngaahi feangaingaʻakí. Ko e tokotaha ʻoku lea lahi tahá pe mālohi tahá ʻoku ʻikai ke hoko maʻu pē ia ko e tokotaha ʻoku mahuʻinga pe fiemaʻu tahá. Manatuʻi, ko Mōsesé naʻe “malohi ia i he lea,” ka naʻe ʻikai te ne lava ke taki ola lelei ʻa e puleʻanga ʻo ʻIsilelí kae ʻoua kuó ne fakatupulekina ʻa e kātakí, angavaivaí, mo e mapuleʻi-kitá. (Ngāue 7:​22, PM) Ko ia ai, ko e faʻahinga ko ia kuo tuku ki ai ʻa e mafai ki he niʻihi kehé kuo pau ke nau feinga tautefito ke anga-fakanānā pea ke fakahaaʻi ha laumālie fakaʻatuʻi.​—Palovepi 11:2.

Ko e faʻahinga ko ia kuo tuku ki ai ʻe Sīsū Kalaisi “ene mea kotoabe” ʻoku fakamatalaʻi kinautolu ʻi he Folofola ʻa e ʻOtuá ko e “tamaioeiki agatonu mo boto.” (Mātiu 24:​45-47, PM, fakaʻītali ʻamautolu.) ʻOku ʻikai te nau lele muʻa taʻefakanānā ʻia Sihova ʻi ha tuʻunga loto-ʻoho; pea ʻoku ʻikai te nau fakatōtōmui ʻi he taimi ʻoku māʻalaʻala ai ʻa e tataki ʻa e ʻOtuá ʻi ha meʻa. ʻOku nau ʻiloʻi ʻa e taimi ke lea aí pea mo e taimi ke tatali fakalongolongo ai ki ha fakamāʻalaʻala lahi angé. Ko e kotoa ʻo e kau Kalisitiané ʻoku nau failelei ʻo ʻikai ngata pē ʻi he faʻifaʻitaki ki heʻenau tuí kae toe pehē foki ki hono fakamoʻoniʻi ʻoku nau poto, ʻo hangē ko ia ko e kalasi tamaioeikí.​—Hepelu 13:7.

Te Ke Tali Lelei ha ʻAʻahi?

Naʻa mo e māmani faingataʻá ni, ʻe lava ke ke maʻu ʻa e fiefiá fakafou he ʻilo totonu mei he Tohitapú ʻo kau ki he ʻOtuá, ko hono Puleʻangá, mo ʻene taumuʻa fakaofo ki he faʻahinga ʻo e tangatá. Kapau te ke tali fiefia ha toe fakamatala pe te ke loto ke ʻaʻahi atu ha tokotaha ke fai ha ako Tohitapu taʻetotongi mo koe ʻi ho ʻapí, kātaki tohi ki he International Bible Students Association, Box 673, Apia, Samoa, pe ko ha tuʻasila feʻungamālie ʻa ia ʻoku hā ʻi he peesi 2.