Ko e Meʻa Eni Naʻe Fakataumuʻa ki Ai ʻa e ʻOtuá?
LAU ha faʻahinga nusipepa pē. Sio ʻi he televīsoné, pe fanongo ki he letioó. ʻOku lahi fau ʻa e ngaahi talanoa fekauʻaki mo e faihiá, taú mo e tautoitoí! Fakakaukau atu ki hoʻo ngaahi faingataʻaʻia pē ʻaʻaú. Mahalo pē ko e puke pe ko e mate ʻa ha taha ʻofeina ʻokú ne fakatupunga haʻo mamahi lahi. Te ke ongoʻi nai ʻo hangē ko e tangata lelei ko Siopé, ʻa ia naʻá ne pehē naʻá ne “bito i he bubutuu [pe mamahí].”—Siope 10:15, PM.
ʻEke hifo kiate koe:
Ko e meʻa eni naʻe fakataumuʻa ʻe he ʻOtuá kiate au pea ki he toenga ʻo e faʻahinga ʻo e tangatá?
Ko fē ʻe lava ke u maʻu mei ai ha tokoni ke fekuki ai mo hoku ngaahi palopalemá?
ʻOku ʻi ai ha ʻamanaki ʻe faifai ange pea tau sio ki ha melino ʻi he māmaní?
ʻOku ʻomai ʻe he Tohi Tapú ʻa e ngaahi tali fakafiemālie ki he ngaahi fehuʻi ko ení.
ʻOKU AKOʻI ʻE HE TOHI TAPÚ ʻO PEHĒ ʻE ʻOMAI ʻE HE ʻOTUÁ ʻA E NGAAHI LILIU KO ENÍ KI HE MĀMANÍ.
“Te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia.”—Fakahā 21:4
“Toki hopo ʻa e heke hange ha tia.”—Aisea 35:6
“ʻE toki fakaava ʻa e mata ʻo e kui.”—Aisea 35:5
‘Ko e kakai kotoa pe ʻoku ʻi he ngaahi faʻitoká, . . . te nau ʻalu atu mei ai.’—Sione 5:28, 29
“ʻOku ʻikai ha nofo ai te ne pehe, ʻOku ou mahaki.”—Aisea 33:24
“Ke mafola mai ʻa e koane ʻi he fonua.”—Sāme 72:16
MAʻU ʻAONGA MEI HE MEʻA ʻOKU AKOʻI ʻE HE TOHI TAPÚ
ʻOua ʻe siʻaki fakavave ʻo pehē ko e meʻa ʻoku ʻomai ʻi he ngaahi peesi ki muʻá ko ha fakakaukau fakaefakaʻamu pē. Kuo talaʻofa ʻa e ʻOtuá te ne ʻomai ʻa e ngaahi meʻá ni, pea ʻoku fakamatalaʻi ʻe he Tohi Tapú ʻa e founga te ne fai ai iá.
Ka ʻoku fai ʻe he Tohi Tapú ʻa e meʻa lahi ange ia ʻi he meʻa ko iá. ʻOkú ne ʻomai ʻa e kī ki hoʻo maʻu ha moʻui fakafiemālie moʻoni naʻa mo e ʻi he taimi ní. Fakakaukau angé ʻi ha mōmeniti fekauʻaki mo hoʻo ngaahi loto-moʻuá mo e faingataʻaʻiá tonu. ʻOku kau nai ki ai ʻa e ngaahi meʻa fakapaʻanga, ngaahi palopalema fakafāmili, mole ʻa e tuʻunga moʻui leleí, pe ko e mate ʻa ha tokotaha ʻofeina. ʻE lava ke tokoniʻi koe ʻe he Tohi Tapú ke ke feangainga mo e ngaahi palopalema he ʻaho ní, pea ʻe lava ke ne ʻomai ʻa e fakanonga ʻaki hono tali ʻa e ngaahi fehuʻi hangē ko ení:
Ko e hā ʻoku tau faingataʻaʻia aí?
ʻE lava fēfē ke tau fekuki mo e ngaahi loto-moʻua ʻi he moʻuí?
ʻE lava fēfē ke tau ʻai ʻetau moʻui fakafāmilí ke fiefia ange?
Ko e hā ʻoku hoko kiate kitautolu ʻi he taimi ʻoku tau mate aí?
ʻE faifai ange pea tau toe sio ki he faʻahinga naʻa tau ʻofa ai kuo nau maté?
ʻE lava fēfē ke tau fakapapauʻi ʻe fakahoko ʻe he ʻOtuá ʻene ngaahi talaʻofa ki he kahaʻú?
Ko e moʻoniʻi meʻa ko ia ʻa hoʻo lau ʻa e tohi ko ení ʻoku fakahaaʻi ai te ke saiʻia ke ʻiloʻi ʻa e meʻa ʻoku akoʻi ʻe he Tohi Tapú. ʻE tokoniʻi koe ʻe he tohí ni. Fakatokangaʻi ange ko e ngaahi palakalafí ʻoku ʻi ai ʻa e ngaahi fehuʻi fehoanakimālie. Kuo fiefia ʻa e laui miliona ʻi hono ngāueʻaki ʻa e founga fehuʻi mo e talí ʻi he fetalanoaʻaki ki he Tohi Tapú mo e Kau Fakamoʻoni ʻa Sihová. ʻOku mau fakatauange te ke pehē mo koe foki. ʻOfa ke ke maʻu ʻa e tāpuaki ʻa e ʻOtuá ʻi hoʻo maʻu he taimí ni ʻa e hokosia fakafiefia mo fakafiemālie ʻo e ako ki he meʻa ʻoku akoʻi moʻoni ʻe he Tohi Tapú!