Ko e Haʻu Moʻoni ʻa e Ongoongo Leleí mei he ʻOtuá?

1. Ko hai ʻa e Faʻutohi ʻo e Tohi Tapú?

Ko e ongoongo lelei ko ia ʻe moʻui taʻengata ʻa e kakaí ʻi he māmaní ʻoku hiki ia ʻi he Tohi Tapú. (Saame 37:29) ʻOku faʻu ʻa e Tohi Tapú ʻaki ʻa e fanga kiʻi tohi iiki ange ʻe 66. Naʻe ngāueʻaki ʻe he ʻOtuá ʻa e kau tangata faitōnunga ʻe toko 40 nai ke nau hiki ia. Ko e ʻuluaki ngaahi tohi ʻe nimá naʻe hiki ia ʻe Mōsese ʻi he taʻu ʻe 3,500 nai kuo maliu atú. Ko e tohi fakamuimuí naʻe hiki ia ʻe he ʻapositolo ko Sioné ʻo laka hake ʻi he taʻu ʻe 1,900 kuo maliu atú. Ko e ngaahi fakakaukau ʻa hai naʻe hiki ʻe he kau hiki Tohi Tapú? Naʻe fetuʻutaki ʻa e ʻOtuá mo e kau hiki Tohi Tapú fakafou ʻi hono laumālie māʻoniʻoní. (2 Sāmiuela 23:2) Naʻa nau hiki ʻa e ngaahi fakakaukau ʻa e ʻOtuá, ʻikai ko haʻanau ngaahi fakakaukau ʻanautolu. Ko ia ko Sihova ʻa e Faʻutohi ʻo e Tohi Tapú.​—Lau ʻa e 2 Tīmote 3:16; 2 Pita 1:20, 21.

Sio ʻi he vitiō Ko Hai ʻa e Faʻutohi ʻo e Tohi Tapú?

2. ʻE lava fēfē ke tau fakapapauʻi ʻoku moʻoni ʻa e Tohi Tapú?

ʻOku tau ʻilo ʻoku mei he ʻOtuá ʻa e Tohi Tapú koeʻuhi ʻoku totonu ʻene tomuʻa tala fakaikiiki ʻa e kahaʻú. Heʻikai lava ʻe ha tangata ke ne fai ia. (Siosiua 23:14) Ko e ʻOtua Māfimafi-Aoniú pē ʻoku malava ke ne tomuʻa tala totonu ʻa e kahaʻu ʻo e faʻahinga ʻo e tangatá.​—Lau ʻa e ʻAisea 42:9; 46:10.

Te tau ʻamanekina ko ha tohi mei he ʻOtuá ʻe makehe, pea ʻoku pehē ia. Ko e laui piliona ʻo e ngaahi tatau ʻo e Tohi Tapú kuo tufaki ʻi he ngaahi lea ʻe lauingeau. Neongo ʻene motuʻá, ʻoku fehoanaki ʻa e Tohi Tapú mo e saienisi kuo fakapapauʻí. Pehē foki, naʻe ʻikai ke fepakipaki ʻa hono kau hiki-tohi ʻe toko 40.a ʻIkai ngata aí, ʻoku fataki ʻe he Tohi Tapú ʻa e fakaʻilonga hā mahino ko ia ko e ʻofa ʻa e ʻOtuá, pea ʻokú ne kei maʻu ʻa e mālohi ke liliu ʻa e moʻui ʻa e kakaí ke lelei ange. Kuo fakatuipauʻi ʻe he ngaahi moʻoniʻi meʻa ko ení ʻa e laui miliona ko e Tohi Tapú ko e Folofola ʻa e ʻOtuá.​—Lau ʻa e 1 Tesalonaika 2:13.

Sio ʻi he vitiō ʻE Lava Fēfē Ke Tau Fakapapauʻi ʻOku Moʻoni ʻa e Tohi Tapú?

3. ʻOku fekauʻaki ʻa e Tohi Tapú mo e hā?

ʻOku fakahangataha ʻa e Tohi Tapú ki he ongoongo lelei ʻoku ʻi ai ha taumuʻa anga-ʻofa ʻa e ʻOtuá ki he faʻahinga ʻo e tangatá. ʻOku fakamatala ʻa e Folofolá ki he founga naʻe mole ai ʻa e monū ko ia ʻo e tangatá ke moʻui ʻi ha māmani palataisí ʻi he kamata mai ʻa e hisitōlia ʻo e faʻahinga ʻo e tangatá pea mo e founga ʻe faai atu pē pea toe fakafoki mai ai ha palataisí.​—Lau ʻa e Fakahā 21:4, 5.

ʻOku toe ʻi he Folofola ʻa e ʻOtuá ʻa e ngaahi lao, ngaahi tefitoʻi moʻoni, mo e faleʻi. Tānaki atu ki ai, ʻoku lēkooti ʻe he Tohi Tapú ʻa e hisitōlia ʻo e ngaahi feangainga ʻa e ʻOtuá mo e faʻahinga ʻo e tangatá—ko ha hisitōlia ʻokú ne fakaeʻa mai ʻa e ʻulungaanga ʻo e ʻOtuá. Ko ia, ʻoku malava ʻe he Tohi Tapú ke ne tokoniʻi koe ke ke ʻiloʻi ʻa e ʻOtuá. ʻOkú ne fakamatalaʻi mai ʻa e founga ʻe lava ke ke hoko ai ko hono kaumeʻá.​—Lau ʻa e Saame 19:7, 11; Sēmisi 2:23; 4:8.

4. ʻE lava fēfē ke ke mahinoʻi ʻa e Tohi Tapú?

ʻE tokoniʻi koe ʻe he polosiua ko ení ke ke mahinoʻi ʻa e Tohi Tapú ʻaki hono ngāueʻaki ʻa e founga tatau pē ko ia naʻe ngāueʻaki ʻe Sīsuú. Naʻá ne lave taha taha ki ha ngaahi konga Tohi Tapu pea fakamatalaʻi “ʻa e ʻuhinga ʻo e Folofolá.”​—Lau ʻa e Luke 24:27, 45.

Ko e ngaahi meʻa siʻi pē ʻoku fakatoʻoaloto tatau mo e ongoongo lelei mei he ʻOtuá. Neongo ia, ʻoku ʻikai tokanga ki ai ʻa e kakai ia ʻe niʻihi, pea aʻu ʻa e niʻihi ia ʻo ʻita ai. ʻOua ʻe loto-siʻi. Ko hoʻo ʻamanaki ke maʻu ʻa e moʻui taʻengatá ʻoku fakatuʻunga ia ʻi hoʻo ʻai ke ke ʻiloʻi ʻa e ʻOtuá.​—Lau ʻa e Sione 17:3.