ʻOku ʻikai ke vahe ʻa ʻemau kau faifekau ʻi heʻemau kautahá. ʻI hono kehé, hangē ko ia naʻe fai ʻi he taimi naʻe kamata ai ʻa e fakatahaʻanga Kalisitiané, ʻoku fakanofo ʻa e kau ʻovasia taau “ke tauhi ʻa e fakatahaʻanga ʻa e ʻOtuá.” (Ngāue 20:28) Ko e kau mātuʻa ko ení ko e kau tangata matuʻotuʻa fakalaumālie ʻoku nau takimuʻa ʻi he fakatahaʻangá mo fai ʻa e tauhí, “ʻo ʻikai fai fakafatongia pē, ka ʻi he loto-lelei ʻi he ʻao ʻo e ʻOtuá; ʻo ʻikai ʻi he ʻofa ki ha meʻa ʻoku maʻu taʻefaitotonu, ka ʻi he loto-vēkeveke.” (1 Pita 5:1-3) Ko e hā ʻa e ngāue ʻoku nau fai maʻamautolú?

ʻOku nau tokanga kiate kimautolu pea maluʻi kimautolu. ʻOku tataki mo tokoni ʻa e kau mātuʻá ke maluʻi fakalaumālie ʻa e fakatahaʻangá. ʻI hono ʻiloʻi kuo tuku kiate kinautolu ʻe he ʻOtuá ʻa e fatongia mahuʻinga ko ení, ko e kau mātuʻá ʻoku ʻikai te nau puleʻi ʻa hono kakaí, ka ʻi hono kehé, ʻoku nau tokoni ki haʻamau lelei mo e fiefia. (2 Kolinitō 1:24) Hangē pē ko e tokanga fakamātoato ʻa ha tauhi-sipi ki heʻene sipi taki taha, ʻoku feinga ʻa e kau mātuʻá ke nau ʻiloʻi ʻa e mēmipa tāutaha kotoa pē ʻo e fakatahaʻangá.​—Palōveepi 27:23.

ʻOku nau akoʻi kiate kimautolu ʻa e founga ke fai ai ʻa e finangalo ʻo e ʻOtuá. ʻI he uike kotoa pē, ʻoku tokangaʻi ai ʻe he kau mātuʻá ʻa e ngaahi fakataha ʻa e fakatahaʻangá koeʻuhí ke ʻai ke mālohi ʻemau tuí. (Ngāue 15:32) Ko e kau tangata līʻoa ko ení ʻoku nau toe takimuʻa ʻi he ngāue fakaʻevangelioó, ngāue fakataha mo kimautolu pea akoʻi kimautolu ʻi he tafaʻaki kotoa pē ʻo e ngāue fakafaifekaú.

ʻOku nau ʻomai kiate kimautolu ʻa e fakalototoʻa fakafoʻituitui. Koeʻuhi ke tokangaʻi ʻa ʻemau ngaahi fiemaʻu fakalaumālie tāutahá, ʻoku ʻaʻahi mai nai ai ʻa e kau mātuʻa fakalotofonuá ki homau ʻapí pe ʻi he Fale Fakatahaʻangá ke ʻomai ʻa e tokoni mo e fakafiemālie mei he Folofolá.​—Sēmisi 5:14, 15.

Tānaki atu ki heʻenau ngāue ʻi he fakatahaʻangá, ko e tokolahi taha ʻo e kau mātuʻá ʻoku toe ʻi ai ʻenau ngaahi ngāue fakamāmani mo e ngaahi fatongia fakafāmili ʻoku fiemaʻu ki ai ʻa honau taimí mo ʻenau tokangá. Ko e fanga tokoua ngāue mālohi ko ení ʻoku nau tuha mo ʻemau fakaʻapaʻapá.​—1 Tesalonaika 5:12, 13.

• Ko e hā ʻa e fatongia ʻo e kau mātuʻa ʻi he fakatahaʻangá?

• ʻI he ngaahi founga fē ʻoku fakahāhā ai ʻe he kau mātuʻá ʻa e mahuʻingaʻia fakafoʻituitui ʻiate kimautolú?

ʻOku fakamatala ʻa e Tohi Tapú ki he kulupu ʻe ua ʻo e kau tangata Kalisitiane ʻa ia ʻoku nau tokangaʻi ʻa e ngaahi fatongia ʻi he fakatahaʻangá—ko e ‘kau mātuʻa mo e kau sevāniti fakafaifekau.’ (Filipai 1:1) ʻI he tuʻunga lahi, ʻoku ʻi ai ha fanga tokoua tokolahi pehē ʻoku nau tauhi ʻi he fakatahaʻanga taki taha. Ko e hā ʻa e ngāue ʻoku fai ʻe he kau sevāniti fakafaifekaú ke tau maʻu ʻaonga mei aí?

ʻOku nau tokoni ki he kulupu ʻo e kau mātuʻá. Ko e kau sevāniti fakafaifekaú ko e kau tangata fakalaumālie, alafalalaʻanga mo ngāue mālohi, ko e niʻihi ʻoku nau kei siʻi ange, pea ko e niʻihi ʻoku nau taʻumotuʻa ange. ʻOku nau tokangaʻi ʻa e ngaahi ngāue mahuʻinga ka ʻoku faʻa fai tuʻumaʻu fakaekautahá mo e ngaahi ngāue fakaesino ʻa ia kuo pau ke fakahoko ʻi he fakatahaʻangá. ʻOku fakaʻatā ai heni ʻa e kau mātuʻá ke nau tokangataha ki he ngaahi fatongia fakafaiakó mo fakatauhisipí.

ʻOku nau fai ʻa e ngaahi ngāue ʻaonga. ʻOku vaheʻi ʻa e kau sevāniti fakafaifekau ʻe niʻihi ke nau hoko ko e kau fakanofonofo ke nau talitali lelei ʻa e tokotaha kotoa ʻoku aʻu mai ki he ngaahi fakatahá. ʻOku tokangaʻi nai ʻe he niʻihi ʻa e naunau fakaleʻolahí, ko e tufaki ʻo e ʻū tohí, ko e paʻanga ʻa e fakatahaʻangá, pea mo hono vaheʻi ʻa e feituʻu ngāue fakamalangá ki he ngaahi mēmipa ʻo e fakatahaʻangá. ʻOku nau toe tokoni ki hono tokangaʻi ʻa e Fale Fakatahaʻangá. ʻE kole ange nai ʻe he kau mātuʻá kiate kinautolu ke nau fai ha tokoni ki he kau taʻumotuʻá. Ko e hā pē ʻa e ngaahi fatongia ʻoku ʻoange ki he kau sevāniti fakafaifekaú, ko ʻenau loto-lelei ke fakahoko ení ʻoku nau maʻu ai ʻa e fakaʻapaʻapa ʻa e tokotaha kotoa.—1 Tīmote 3:13.

ʻOku nau fokotuʻu ha faʻifaʻitakiʻanga lelei ʻi he tuʻunga ko e kau tangata Kalisitiane. ʻOku fili ʻa e kau sevāniti fakafaifekaú koeʻuhí ko honau ngaahi ʻulungaanga lelei fakalaumālié. ʻI he taimi ʻoku nau fai ai ʻa e ngaahi konga ʻi he ngaahi fakatahá, ʻoku nau ʻai ai ke mālohi ʻa ʻemau tuí. ʻI he takimuʻa he ngāue fakamalangá, ʻoku nau fakaʻaiʻai ke mau toe faivelenga ange. Koeʻuhí ko ʻenau fie ngāue fāitahá, ʻoku nau pouaki ai ʻa e fiefia mo e fāʻūtaha. (ʻEfesō 4:16) ʻI he faai mai ʻa e taimí, ʻe lava nai ai ke nau taau foki ke ngāue ko ha kau mātuʻa.

• Ko e kau tangata fēfē ʻa e kau sevāniti fakafaifekaú?

• ʻOku anga-fēfē tokoni ʻa e kau sevānití ki he fakatahaʻangá ke lele leleí?