Koeʻuhi ke fai homau lelei tahá ke talaki ʻa e “ongoongo lelei” ki he “puleʻanga mo e matakali mo e lea mo e kakai kotoa pē,” ʻoku mau faʻu ai ʻa e ʻū tohi ʻi he lea ʻe 750 tupu. (Fakahā 14:6) ʻOku anga-fēfē ʻemau lavaʻi ʻa e ngāue faingataʻa ko ení? ʻOku mau fai ia ʻi he tokoni ʻa ha kau ngāue hiki tohi fakavahaʻapuleʻanga mo ha kulupu ʻo e kau liliu lea līʻoa​—ko e Kau Fakamoʻoni ʻa Sihova kotoa.

Ko e muʻaki konga tohí ʻoku teuteuʻi ia ʻi he lea faka-Pilitāniá. ʻOku tokangaʻi ʻe he Kulupu Pulé ʻa e ngāue ʻa e Potungāue Hiki-Tohi ʻi homau ʻuluʻi ʻapitanga ʻi he māmaní. ʻOku fokotuʻutuʻu ʻe he potungāue ko ení ʻa e ngaahi ngāue ʻa e kau hiki-tohi ʻoku ngāue ʻi he ʻuluʻi ʻapitangá pea ʻi he ngaahi ʻōfisi vaʻa kehekehe. Ko hono maʻu ha kau ngāue hiki-tohi kehekehé ʻoku malava ai ke mau ngāue ki he ngaahi kaveinga ʻi he ngaahi anga fakafonua kehekehe, ʻa ia ʻokú ne ʻai ʻa ʻemau ʻū tohí ke fakamānako fakavahaʻapuleʻanga.

ʻOku ʻave ʻa e konga tohí ki he kau liliu leá. Hili hono fakaleleiʻi pea tali ʻa e fakamatala kuo hikí, ʻoku ʻave fakaʻilekitulōnika ia ki he ngaahi timi ʻo e kau liliu lea takatakai he māmaní, ʻa ia ʻoku nau liliu, vakaiʻi, pea lau mo siofi ʻa e kalama ʻo e konga tohí. ʻOku nau feinga mālohi ke filifili ʻa e “ngaahi foʻi lea totonu ʻo e moʻoní” ʻa ia ʻe maʻu ai ʻa e ʻuhinga kakato ʻo e lea faka-Pilitāniá ʻi heʻenau leá.​—Tangata Malanga 12:10.

ʻOku fakavaveʻi ʻe he ngaahi komipiutá ʻa e ngāué. ʻOku ʻikai lava ʻe ha komipiuta ʻo fetongi ʻa e kau hiki-tohi mo e kau liliu lea fakaetangatá. Kae kehe, ko ʻenau ngaahi ngāué ʻe lava ke fakavaveʻi ia ʻaki hono ngāueʻaki ʻa e ngaahi tikisinale kuo fakahū ki he komipiutá, mo e ngaahi fakamatala fakaefekumi. Kuo faʻu ʻe he Kau Fakamoʻoni ʻa Sihová ha Sisitemi Pulusi Fakaʻilekitulōnika ʻi he Ngaahi Lea Lahi (MEPS) ʻa ia ʻe lava ke fakahū ʻa e konga tohí ʻi he ngaahi lea ʻe lauingeau, ʻo fakatahaʻi mo e fakatātā ʻoku ʻomai aí, pea fokotuʻutuʻu fakapeesi ki hono pulusí.

Ko e hā ʻoku mau fai kotoa ai ʻa e feinga ko ení, naʻa mo e ʻi he ngaahi lea ʻoku leaʻaki pē ʻe he kakai ʻe laui afe siʻi? Koeʻuhí ko e finangalo ia ʻo Sihová “ke fakahaofi ʻa e faʻahinga kakai kotoa pē pea ke nau aʻusia ha ʻilo totonu ki he moʻoní.”​—1 Tīmote 2:3, 4.

• Ko e hā ʻa e ngāue ʻoku kau ki hono hiki ʻo ʻemau ʻū tohí?

• Ko e hā ʻoku mau liliu ai ʻemau ʻū tohí ki he ngaahi lea lahi faú?

ʻOku pulusi pea tufaki taʻetotongi ʻe heʻemau kautahá ʻa e ngaahi Tohi Tapu mo e ʻū tohi kehe ʻe laui teau miliona ʻi he taʻu taki taha. ʻOku mau langa mo tokangaʻi ʻa e ngaahi Fale Fakatahaʻanga mo e ngaahi ʻōfisi vaʻa. ʻOku mau tokoniʻi ʻa e laui afe ʻo e kau ngāue Pēteli mo e kau misinale, pea ʻoku mau tokonaki ʻa e tokoni ʻi he ngaahi taimi ʻo e fakatamakí. Ko ia te ke fifili nai, ‘ʻOku fakapaʻanga fēfē kotoa eni?’

ʻOku ʻikai te mau vahe hongofulu, ʻeke totongi ki haʻamau ngāue, pe tānaki paʻanga. Neongo ko e ngaahi fakamole ki hono poupouʻi ʻemau ngāue fakaʻevangelioó ʻoku lahi, ʻoku ʻikai te mau kole paʻanga. Laka hake ʻi ha senituli he kuohilí, ko e ʻīsiu hono ua ʻo e makasini Taua Leʻo naʻe pehē ai ʻoku mau tui ʻoku mau maʻu ʻa e poupou ʻa Sihová pea “ʻe ʻikai ʻaupito te mau kōlenga pe tautapa ki he tangatá ki ha poupou”​—pea kuo ʻikai ʻaupito ke mau fai pehē!​—Mātiu 10:8.

Ko ʻemau ngaahi ngāué ʻoku poupouʻi ia ʻaki ʻa e ngaahi tokoni loto-fiefoaki. ʻOku houngaʻia ʻa e kakai tokolahi ʻi heʻemau ngāue fakaeako Tohi Tapú pea ʻoku nau fai ʻa e tokoni ki ai. Ko e Kau Fakamoʻoní tonu ʻoku nau foaki fiefia ʻa honau taimí, iví, paʻangá mo e ngaahi koloa kehé ki hono fai ʻa e finangalo ʻo e ʻOtuá ʻi he kotoa ʻo e māmaní. (1 Kalonikali 29:9) ʻI he Fale Fakatahaʻangá pea mo ʻemau ngaahi ʻasemipilī mo e ngaahi fakataha-lahí, ʻoku ʻi ai ʻa e ngaahi puha tokoni ʻoku tuku ki ai ʻa e tokoni ʻa e faʻahinga ʻoku nau loto ke fai ha ngaahi tokoní. Pe ʻoku lava ke fai ʻa e tokoní ʻo fakafou ʻi heʻemau uepisaiti, jw.org. ʻI he tuʻunga lahi tahá, ko e paʻanga ʻoku maʻú ko e haʻu ia mei he kakai ʻoku ʻikai ke nau tuʻumālie, ʻo hangē pē ko e uitou masiva ko ē naʻe fakaongoongoleleiʻi ʻe Sīsū ʻa ia naʻá ne lī ha ongo kiʻi foʻi koini ʻi he puha paʻanga he temipalé. (Luke 21:1-4) Ko ia ai, ʻe lava maʻu pē ke “tuku mavahe ha meʻa” ʻe ha taha pē ke foaki “ʻa e meʻa tofu pē ko ia kuó ne fakapapauʻi ʻi hono lotó.”​—1 Kolinitō 16:2; 2 Kolinitō 9:7.

ʻOku mau tuipau ʻe hokohoko atu hono hanga ʻe Sihova ʻo ueʻi ʻa e loto ʻo e faʻahinga ko ia ʻoku nau loto ke ‘fakalāngilangiʻi ia ʻaki ʻenau ngaahi meʻa mahuʻingá’ ʻi hono poupouʻi ʻa e ngāue ʻo e Puleʻangá, koeʻuhí ke malava ʻo fakahoko ʻa hono finangaló.​—Palōveepi 3:9.

• Ko e hā ʻokú ne ʻai ʻemau kautahá ke kehe mei he ngaahi lotu kehé?

• ʻOku ngāueʻaki fēfē ʻa e ngaahi tokoni loto-fiefoakí?