Naʻe Loto-Toʻa ʻa e ʻIlamutu ʻo Paulá

Tau ako angé fekauʻaki mo ha kiʻi talavou naʻá ne fakahaofi ʻene faʻētangatá. Ko e faʻētangata ʻa e kiʻi talavoú ko e ʻapositolo ko Paulá. ʻOku ʻikai ke tau ʻilo ʻa e hingoa ʻo e kiʻi talavoú ka ʻoku tau ʻiloʻi naʻá ne fai ha ngāue loto-toʻa ʻaupito. Te ke saiʻia ke fanongo ki he meʻa naʻá ne faí?—

Naʻe ʻi he pilīsoné ʻa Paula ʻi Selusalema. Naʻe puke pōpula ia koeʻuhí ko ʻene malanga fekauʻaki mo Sīsū. Naʻe fehiʻa ʻa e kau tangata kovi ʻe niʻihi ʻia Paula, ko ia naʻá nau faʻu ha palani kovi. Naʻa nau pehē: ‘Tau kole ki he ʻeikitaú ke ʻomi ʻe heʻene kau sōtiá ʻa Paula ki he fakamaauʻangá. Te tau ʻalu ʻo toi ʻi he halá pea ʻi he taimi ʻe fakalaka hake ai ʻa Paulá, te tau tāmateʻi ia!’

Naʻe fanongo ʻa e ʻilamutu ʻo Paulá ki he palani ko ení. Ko e hā te ne faí? Naʻá ne ʻalu ki he pilīsoné ʻo tala kia Paula fekauʻaki mo e palaní. ʻI he taimi pē ko iá, naʻe tala ange ʻe Paula kiate ia ke tala ki he ʻeikitaú fekauʻaki mo e palani kovi ko ení. ʻOkú ke fakakaukau naʻe faingofua ki he ʻilamutu ʻo Paulá ke lea ki he ʻeikitaú?— ʻIkai, koeʻuhi ko e ʻeikitaú ko ha tangata mahuʻinga ia. Ka naʻe loto-toʻa ʻa e ʻilamutu ʻo Paulá ke lea ki he ʻeikitaú.

Naʻe ʻilo lelei ʻe he ʻeikitaú ʻa e meʻa ke faí. Naʻá ne ʻomai ha kau tau ko e kau sōtia ʻe toko 500 nai ke maluʻi ʻa Paula! Naʻá ne tala kiate kinautolu ke ʻave ʻa Paula ki Sesalia he pō ko iá. Naʻe hao moʻui ʻa Paula?— ʻIo, naʻe ʻikai malava ʻa e kau tangata koví ke ʻohofi ia! Ko ʻenau palani koví naʻe ʻikai lava.

Ko e hā ʻe lava ke ke ako mei he talanoa ko ení?— Te ke lava mo koe foki ke ke loto-toʻa ʻo hangē ko e ʻilamutu ʻo Paulá. ʻOku tau fiemaʻu ke hoko ʻo loto-toʻa ʻi he taimi ʻoku tau talanoa ai ki he niʻihi kehé fekauʻaki mo Sihová. Te ke loto-toʻa pea hokohoko atu ʻa e lea fekauʻaki mo Sihová?— Kapau te ke fai ia, te ke fakahaofi nai ai ha moʻui ʻa ha taha.