Naʻe mali ʻa ʻĒpalahame mo Sela ʻi ha ngaahi taʻu lahi. Naʻá na liʻaki ʻa hona ʻapi fiemālie ʻi ʻUá peá na nofo ʻi ha tēniti. Ka naʻe ʻikai ke lāunga ʻa Sela, he naʻá ne falala kia Sihova.

Naʻe fiemaʻu lahi ʻe Sela ke ʻi ai haʻane tama ko ia naʻá ne tala ange kia ʻĒpalahame: ‘Kapau ʻe ʻi ai ha tama ʻa ʻeku sevāniti ko Hekaʻaá, ʻe hangē pē ia ko haʻaku tamá.’ Naʻe faifai pē ʻo maʻu ʻe Hekaʻā ha tamasiʻi. Ko hono hingoá ko ʻIsimeʻeli.

ʻI he ngaahi taʻu lahi ki mui ai, ʻi he taʻu 99 ʻa ʻĒpalahame pea taʻu 89 ʻa Selá, naʻe ʻi ai ʻena kau ʻaʻahi ʻe toko tolu. Naʻe fakaafeʻi kinautolu ʻe ʻĒpalahame ke nau mālōlō ʻi ha lalo ʻakau pea ʻoatu haʻanau meʻakai. ʻOkú ke ʻiloʻi pe ko hai ʻa e kau ʻaʻahí? Ko e kau ʻāngelo! Naʻa nau tala ange kia ʻĒpalahame: ‘ʻI he taimi ko ení ʻi he taʻu kahaʻú, ko koe mo ho uaifí ʻe ʻi ai homo foha.’ Naʻe fanongo ki ai ʻa Sela mei he loto tēnití. Naʻá ne kata ʻiate ia pē mo fakakaukau: ‘ʻE lava moʻoni koā ke u maʻu ha tama neongo ʻeku fuʻu motuʻá?’

ʻI he taʻu hono hokó, naʻe fāʻeleʻi ai ʻe Sela ha tamasiʻi, ʻo hangē pē ko e meʻa naʻe palōmesi ange ʻe he ʻāngelo ʻa Sihová. Naʻe fakahingoa ia ʻe ʻĒpalahame ko ʻAisake, ʻa ia ʻoku ʻuhingá ko e “Kata.”

ʻI he taʻu nima nai ʻa ʻAisaké, naʻe sio ʻa Sela kia ʻIsimeʻeli ʻokú ne fakakataʻaki ʻa ʻAisake. Naʻá ne loto ke maluʻi ʻa ʻene tamá, ko ia naʻá ne ʻalu kia ʻĒpalahame ʻo kole ange ke ne fekau ʻa Hekaʻā mo ʻIsimeʻeli ke na mavahe. ʻI he ʻuluaki taimí, naʻe ʻikai ke loto ʻa ʻĒpalahame ke fai pehē. Ka naʻe tala ange ʻe Sihova kia ʻĒpalahame: ‘Fanongo kia Sela. Te u tokangaʻi ʻe au ʻa ʻIsimeʻeli. Ka ʻe hoko moʻoni ʻa e ngaahi palōmesí fakafou ʻia ʻAisake.’

Naʻe nofo ʻa Lote mo ʻĒpalahame ko e tokoua ʻo ʻene tamaí, ʻi he fonua ko Kēnaní. Naʻe faai atu pē ʻo tokolahi ʻaupito ʻa e fanga manu ʻa ʻĒpalahame mo Loté ʻo ʻikai ʻi ai ha feituʻu feʻunga kiate kinautolu kotoa. Naʻe pehē ange ʻe ʻĒpalahame kia Lote: ‘Heʻikai kei lava ke ta nofo fakataha ʻi ha feituʻu ʻe taha. Fili muʻa pe ko fē ʻa e tafaʻaki te ke fie ʻalu ki aí, pea te u ʻalu au ki he tafaʻaki ʻe tahá.’ Naʻe ʻikai ke siokita ʻa ʻĒpalahame, ʻikai ko ia?

Naʻe sio ʻa Lote ki ha konga fakaʻofoʻofa ʻo e fonuá naʻe ofi ki ha kolo ko Sōtoma. Naʻe lahi ai ʻa e vaí pea pehē ki he musie lanu matá. Ko ia naʻá ne fili ʻa e feituʻu ko iá pea hiki ki ai mo hono fāmilí. Naʻe faifai pē ʻo nau nofo ʻi he kolo ko Sōtomá.

Ko e kakai ʻo Sōtomá mo e kolo ofi ki ai ko Komolá naʻa nau kovi ʻaupito. Ko hono moʻoní, naʻa nau mātuʻaki kovi ʻo fakapapauʻi ai ʻe Sihova ke fakaʻauha ʻa e ongo kolo ko iá. Ka naʻe loto ʻa e ʻOtuá ke fakahaofi ʻa Lote mo hono fāmilí, ko ia naʻá ne fekauʻi atu ai ha ongo ʻāngelo ke na fai ha fakatokanga kiate kinautolu: ‘Fakavavevave! Hū ki tuʻa mei he koló ni! ʻE fakaʻauha ia ʻe Sihova.’

Naʻe ʻikai ke mavahe ʻa Lote he taimi pē ko iá. Naʻá ne fakatuotuai. Ko ia naʻe puke ʻe he ongo ʻāngeló ʻa e nima ʻo Loté, ko hono uaifí, mo hono ongo ʻofefiné ʻo fakavaveʻi kinautolu ki tuʻa mei he koló, ʻo na pehē: ‘Lele! Hola koeʻuhi ko hoʻomou moʻuí, pea ʻoua ʻe sio ki mui. Kapau te mou sio ki mui, te mou mate!’

ʻI heʻenau aʻu ki ha kolo ko Soa, naʻe ʻai ʻe Sihova ke ʻalu hifo ha ʻuha afi mo e sūlifa ki Sōtoma mo Komola. Naʻe fakaʻauha ʻosi ʻa e ongo kolo ko iá. ʻI he talangataʻa ʻa e uaifi ʻo Loté kia Sihova peá ne sio ki muí, naʻá ne liliu ai ʻo hoko ko ha pou māsima! Ka naʻe hao ʻa Lote mo hono ongo ʻofefiné koeʻuhí naʻa nau talangofua kia Sihova. ʻOku pau pē naʻa nau loto-mamahi ʻaupito ʻi he talangataʻa ʻa e uaifi ʻo Loté. Ka naʻa nau fiefia ʻi heʻenau fanongo ki he fakahinohino ʻa Sihová.