Naʻe akoʻi ʻe ʻĒpalahame ʻa hono foha ko ʻAisaké ke ʻofa kia Sihova pea ke ne falala ki he ngaahi palōmesi kotoa ʻa Sihová. Ka ʻi he taʻu 25 nai ʻa ʻAisaké, naʻe fiemaʻu ʻe Sihova ke fai ʻe ʻĒpalahame ha meʻa ʻa ia naʻe faingataʻa ʻaupito ke ne fai. Ko e hā nai ia?

Naʻe tala ʻe he ʻOtuá kia ʻĒpalahame: ‘ʻAve muʻa ho foha pē ʻe tahá pea foaki ia ko ha feilaulau ʻi ha moʻunga ʻi he fonua ko Molaiá.’ Naʻe ʻikai ʻiloʻi ʻe ʻĒpalahame ʻa e ʻuhinga naʻe fiemaʻu ai ʻe Sihova ke ne fai iá. Ka naʻá ne kei talangofua pē kia Sihova.

Pongipongia he ʻaho hono hokó, naʻe ʻave ai ʻe ʻĒpalahame ʻa ʻAisake mo e ongo sevāniti ʻe toko ua ʻo nau ō ki Molaia. Hili ʻa e ʻaho ʻe tolu, naʻe lava ke nau sio atu ki he ʻotu moʻungá mei he mamaʻó. Naʻe tala ange ʻe ʻĒpalahame ki heʻene ongo sevānití ke na tatali ai ka ne ʻalu mo ʻAisake ke fai ha feilaulau. Naʻe ʻoange ʻe ʻĒpalahame ʻa e fefié kia ʻAisake ke ne toʻo, pea naʻe toʻo ʻe ʻĒpalahame ha hele. Naʻe ʻeke ʻe ʻAisake ki heʻene tamaí: ‘Ko fē ʻa e manu ki he feilaulaú?’ Naʻe tali ange ʻe ʻĒpalahame: ‘ʻE hoku foha, ʻe tokonaki mai ia ʻe Sihova.’

ʻI heʻena aʻu atu ki he moʻungá, naʻá na fokotuʻu ai ha ʻōlita. Pea naʻe haʻi ʻe ʻĒpalahame ʻa e ongo nima mo e vaʻe ʻo ʻAisaké peá ne tuku ia ki he ʻōlitá.

Naʻe toʻo hake ʻe ʻĒpalahame ʻa e helé. ʻI he taimi pē ko iá, naʻe ui kiate ia ʻa e ʻāngelo ʻa Sihová mei langi: ‘ʻĒpalahame! ʻOua naʻá ke tāmateʻi ʻa e tamasiʻí! Ko eni ʻoku ou ʻiloʻi ʻokú ke tui ki he ʻOtuá he naʻá ke loto-lelei ke feilaulau ʻaki ho fohá.’ Naʻe sio atu leva ʻa ʻĒpalahame ki ha sipi tangata naʻe fihia mai hono meʻatuí ʻi he vaó. Naʻá ne vete fakavave ʻa ʻAisake ka ne feilaulau ʻaki ʻa e sipi tangatá.

Talu mei he ʻaho ko iá mo hono ui ʻe Sihova ʻa ʻĒpalahame ko hono kaumeʻa. ʻOkú ke ʻiloʻi hono ʻuhingá? Naʻe fai ʻe ʻĒpalahame ha meʻa pē naʻe fiemaʻu ʻe Sihova ke ne fai, naʻa mo e taimi naʻe ʻikai ai te ne mahinoʻi ʻa e ʻuhinga naʻe fiemaʻu ai ʻe Sihova ke ne fai iá.

Naʻe toe leaʻaki ʻe Sihova ʻene palōmesi kia ʻĒpalahamé: ‘Te u tāpuakiʻi koe, pea te u ʻai ke tokolahi hoʻo fānaú, pe hakó.’ Naʻe ʻuhinga ení ʻe tāpuakiʻi ʻe Sihova ʻa e kakai leleí fakafou ʻi he fāmili ʻo ʻĒpalahamé.

Naʻe taʻu 40 ʻa ʻAisake ʻi heʻene mali mo Lepeká. Naʻá ne ʻofa lahi ʻiate ia. Naʻe faifai pē ʻo ʻi ai ʻena fānau ʻe toko ua​—ko e ongo māhanga tangata.

Naʻe ui ʻa e tamasiʻi lahí ko ʻĪsoa, pea ko e siʻí ko Sēkope. Naʻe saiʻia ʻa ʻĪsoa ʻi he nofo ʻi tuʻá, pea naʻá ne poto ʻi he tulimanú. Ka naʻe saiʻia ʻa Sēkope ke nofo pē ʻi ʻapi.

ʻI he taimi ko iá, naʻe foaki ki he foha lahi tahá ʻa e lahi taha ʻo e kelekelé mo e paʻangá ʻi he mate ʻa ʻene tamaí. Naʻe ui ia ko ha tofiʻa. ʻI he fāmili ʻo ʻAisaké, naʻe toe kau ki he tofiʻá ʻa e ʻi ai ha kaunga ki he palōmesi naʻe fai ʻe Sihova kia ʻĒpalahamé. Naʻe ʻikai ke fuʻu tokanga ʻa ʻĪsoa ki he ngaahi palōmesi ko iá, ka naʻe ʻiloʻi ʻe Sēkope naʻe mahuʻinga ʻaupito ia.

ʻI he ʻaho ʻe taha naʻe haʻu ai ʻa ʻĪsoa ki ʻapi ʻokú ne helaʻia lahi ʻi haʻane tulimanu ʻi he ʻahó kotoa. Naʻá ne nāmuʻi ʻa e meʻatokoni ifo naʻe ngaohi ʻe Sēkopé peá ne pehē ange: ‘ʻOku ou fuʻu fiekaia! ʻOmi ha meʻi meʻa mei he supo kulokula ko ená!’ Naʻe pehē ʻe Sēkope: ‘Te u ʻoatu, ka ke ʻuluaki palōmesi mai ʻe lava ke u maʻu ho tofiʻá.’ Naʻe pehē ange ʻe ʻĪsoa: ‘ʻOku ʻikai te u tokanga au ki hoku tofiʻá! ʻE lava ke ke maʻu ia ʻe koe. ʻOku ou fiemaʻu pē ʻe au ke u kai.’ ʻOkú ke pehē naʻe fakapotopoto ʻa e meʻa naʻe fai ʻe ʻĪsoá? ʻIkai. Naʻe foaki ʻe ʻĪsoa ha meʻa mahuʻinga ʻaupito, ki ha poulu supo pē.

ʻI he motuʻa ʻaupito ʻa ʻAisaké, naʻe aʻu ki he taimi ke ne tāpuakiʻi ʻa hono foha lahí. Ka naʻe tokoniʻi ʻe Lepeka ʻa Sēkope, ko e foha siʻisiʻí, ke ne maʻu ʻa e tāpuakí. ʻI hono ʻiloʻi ʻe ʻĪsoá, naʻá ne ʻita lahi peá ne faʻufaʻu ke tāmateʻi ʻa hono tokoua māhangá. Naʻe loto ʻa ʻAisake mo Lepeka ke maluʻi ʻa Sēkope, ko ia naʻá na tala ange ki ai: ‘ʻAlu ʻo nofo mo e tuongaʻane ʻo hoʻo faʻeé, ʻa Lēpani, kae ʻoua ke holo hifo ʻa e ʻita ʻa ʻĪsoá.’ Naʻe fanongo ʻa Sēkope ki he faleʻi ʻa ʻene ongo mātuʻá peá ne hola koeʻuhi ko ʻene moʻuí.