Lolotonga ʻa e laʻalaʻaá, naʻe tala ʻe Sihova kia ʻIlaisiā: ‘ʻAlu ki Salepita. ʻE ʻoatu ai ʻe ha uitou ha meʻakai kiate koe.’ ʻI he matapā ʻo e koló, naʻe sio ai ʻa ʻIlaisiā ki ha uitou ʻoku fai ʻene tufi fefie. Naʻá ne kole ange ha ipu vai kiate ia. ʻI heʻene hū ke ʻomi iá, naʻe ui atu ʻa ʻIlaisiā kiate ia: ‘ʻOmai muʻa maʻaku ha meʻi mā.’ Ka naʻe tala ange ʻe he uitoú: ‘ʻOku ʻikai haʻaku mā ke u ʻoatu. ʻOku ou maʻu ha mahoaʻa mo ha lolo feʻunga ke ngaohiʻaki ha kiʻi meʻakai maʻaku mo ʻeku tamá.’ Naʻe tala ange ʻe ʻIlaisiā: ‘Kuo palōmesi ʻa Sihova kapau te ke ngaohi ha mā maʻaku, ko hoʻo mahoaʻá mo e loló heʻikai ke ʻosi kae ʻoua kuo toe tō mai ha ʻuha.’

Ko ia naʻe ʻalu ʻa e uitoú ki hono ʻapí ʻo ngaohi ha mā maʻá e palōfita ʻa Sihová. Hangē pē ko e talaʻofa ʻa Sihová, naʻe ʻi ai maʻu pē ʻa e meʻakai ʻa e uitoú mo ʻene tamá ke na kai lolotonga ʻa e taimi laʻalaʻaá. Naʻe fonu ai pē ʻa ʻene siā mahoaʻá mo e loló.

Hili iá naʻe hoko ha meʻa fakalilifu. Naʻe puke lahi ʻa e tamasiʻi ʻa e uitoú ʻo ne mate. Naʻá ne kole tokoni kia ʻIlaisiā. Naʻe toʻo ʻe ʻIlaisiā ʻa e tamasiʻí meiate ia ʻo ne fua ki ha loki ʻi ʻolunga ʻi hono falé. Naʻá ne fakatokoto ia ʻi ha mohenga peá ne lotu: ‘ʻE Sihova, ʻai muʻa ke moʻui ʻa e kiʻi tamá ni.’ ʻOkú ke ʻiloʻi ʻa e ʻuhinga naʻe hoko ai ko ha meʻa fakaofo ʻa hono fai ia ʻe Sihová? Koeʻuhí hangē ko ia ʻoku tau ʻiló, naʻe teʻeki ai ke toe moʻui ha taha mei he maté ki muʻa. Pea ko e uitou ko ení mo ʻene tamá naʻe ʻikai ko ha ongo ʻIsileli kinaua.

Ka naʻe toe moʻui ʻa e tamasiʻí, pea naʻe kamata ke ne mānava! Naʻe pehē ange ʻe ʻIlaisiā ki he uitoú: ‘Vakai! Kuo moʻui ʻa hoʻo tamá.’ Naʻá ne fiefia lahi peá ne pehē kia ʻIlaisiā: ‘Ko ha tangata moʻoni koe ʻa e ʻOtuá. ʻOku ou ʻiloʻi ení he ʻokú ke leaʻaki pē ʻa e meʻa ʻoku tala atu ʻe Sihova ke ke leaʻakí.’

Naʻe lava ke sio ʻa Tuʻi ʻĒhapi mei he matapā-teke ʻo hono palasi ʻi Sisililí ki ha ngoue kālepi ʻa ha tangata ko Nēpote. Naʻe fiemaʻu ʻe ʻĒhapi ʻa e ngoue kālepi ko ení, peá ne feinga ke ne fakatau ia meia Nēpote. Ka naʻe ʻikai loto ʻa Nēpote ke ne fakatau ange ia he naʻe tapui ʻi he Lao ʻa Sihová ke fakatau atu ha kelekele fakafāmili. Naʻe tokaʻi ʻe ʻĒhapi ʻa Nēpote ʻi heʻene fai ʻa e meʻa totonú? ʻIkai. Naʻe ʻita lahi ʻa ʻĒhapi. Naʻá ne loto-mamahi ʻaupito ʻo ʻikai te ne hū ki tuʻa mei hono loki mohé, pea ʻikai te ne fie kai.

Naʻe tala ange ʻe he kuini fulikivanu ko Sisipelí, ʻa e uaifi ʻo ʻĒhapí kiate ia: ‘Ko koe ʻa e tuʻi ʻo ʻIsilelí. ʻE lava ke ke maʻu ha meʻa pē ʻokú ke fiemaʻu. Te u ʻomi ʻa e kelekele ko iá maʻau.’ Naʻá ne fai ha tohi ki he kau mātuʻa ʻo e koló, ʻo tala ange kiate kinautolu ke nau tukuakiʻi ʻa Nēpote naʻá ne laukovi ki he ʻOtuá pea tolomakaʻi ia ke ne mate. Naʻe fai ʻe he kau mātuʻá ʻa e meʻa naʻe tala ange ʻe Sisipeli ke nau faí, pea naʻe pehē ange leva ʻe Sisipeli kia ʻĒhapi: ‘Kuo mate ʻa Nēpote. Maʻu ʻe koe ʻa e ngoue kālepí.’

Naʻe ʻikai ko Nēpote pē taha ʻa e tokotaha tonuhia naʻe tāmateʻi ʻe Sisipelí. Naʻá ne tāmateʻi ʻa e kakai tokolahi naʻa nau ʻofa kia Sihova. Naʻá ne lotu ʻaitoli pea fai mo e ngaahi meʻa kovi kehe. Naʻe vakai mai ʻa Sihova ki he meʻa kovi kotoa naʻe fai ʻe Sisipelí. Ko e hā te ne fai kiate iá?

Hili ʻa e mate ʻa ʻĒhapí, naʻe hoko ʻa hono foha ko Siholamé ko e tuʻí. Naʻe fekauʻi atu ʻe Sihova ha tangata ko Sehu ke ne tauteaʻi ʻa Sisipeli mo hono fāmilí.

Naʻe heka atu ʻa Sehu ʻi heʻene salioté ki Sisilili, ʻa ia naʻe nofo ai ʻa Sisipelí. Naʻe haʻu saliote ʻa Siholame ke fakafetaulaki kia Sehu peá ne ʻeke ange: ‘ʻOku ʻi ai ha melino ʻi hota vahaʻá?’ Naʻe pehē ange ʻe Sehu: ‘ʻOku ʻikai ha melino lolotonga ʻoku fai ʻe hoʻo faʻeé, ʻa Sisipeli, ʻa e ngaahi meʻa fulikivanú.’ Naʻe feinga ʻa Siholame ke afeʻi ʻa ʻene salioté ʻo ne hola. Ka naʻe fanaʻi ʻe Sehu ʻa Siholame ʻaki ha foʻi ngahau, ʻo ne mate.

Naʻe ʻalu leva ʻa Sehu ki he palasi ʻo Sisipelí. ʻI heʻene fanongo pē ʻoku haʻu ʻa Sehú, naʻá ne vali hono matá, ʻai hono ʻulú, pea tatali ʻi ʻolunga ʻi he veʻe matapā-teké. ʻI he aʻu atu ʻa Sehú, naʻe ʻikai te ne talitali lelei ia. Naʻe kaila hake ʻa Sehu ki heʻene kau sevāniti naʻe tuʻu ʻi hono tafaʻakí: “Lī hifo ia!” Naʻa nau tekeʻi hifo ʻa Sisipeli ʻi he matapā-teké, ʻo ne tō ki lalo ʻo mate.

Hili iá, naʻe tāmateʻi ʻe Sehu ʻa e foha ʻe toko 70 ʻo ʻĒhapí pea fakamaʻa ʻa e fonuá mei he lotu Pēali. ʻOku lava ke ke sio heni ʻoku ʻiloʻi ʻe Sihova ʻa e meʻa kotoa pē, pea te ne tauteaʻi ʻi he taimi totonu ʻa e faʻahinga ʻoku nau fai ʻa e ngaahi meʻa ʻoku koví?