Naʻe ʻi ai ha kāinga ʻo ʻIlisapesi ko ha kiʻi fefine ko Mele, ʻa ia naʻe nofo ʻi he kolo ko Nāsaletí ʻi Kāleli. Naʻe fakamaʻu ʻa Mele mo Siosifa, ʻa ia ko ha tufunga. ʻI he māhina ono ʻa e feitama ʻa ʻIlisapesí, naʻe hā ai ʻa e ʻāngelo ko Kepalelí kia Mele. Naʻá ne pehē: ‘Mālō e lelei, Mele. ʻOku ʻofeina lahi koe ʻe Sihova.’ Naʻe ʻikai ke mahino kiate ia ʻa e meʻa naʻe ʻuhinga ki ai ʻa Kepalelí. Naʻá ne tala ange leva: ‘Te ke feitama pea fāʻeleʻi ha tamasiʻi, pea te ke ui ia ko Sīsū. Te ne pule ko e Tuʻi. Ko hono Puleʻangá ʻe tuʻu ʻo taʻengata.’

Naʻe pehē ange ʻe Mele: ‘Ka ʻoku teʻeki ai ke u mohe mo ha tangata. ʻE lava fēfē ke u maʻu ha tama?’ Naʻe pehē ʻe Kepaleli: ‘ʻOku ʻikai ha meʻa ʻe faingataʻa kia Sihova. ʻE hoko mai kiate koe ʻa e laumālie māʻoniʻoní, pea te ke maʻu ha tama. Ko ho kāinga ko ʻIlisapesí kuo feitama foki mo ia.’ Naʻe pehē ange ʻe Mele: ‘Ko e sevāniti au ʻa Sihova. ʻOfa ke hoko kiate au ʻa e meʻa tofu pē kuó ke leaʻakí.’

Naʻe ʻalu ʻa Mele ki ha kolo ʻi he ʻotu moʻungá ke ʻaʻahi kia ʻIlisapesi. ʻI he fakalea ʻa Mele kiate iá, naʻe ongoʻi ʻe ʻIlisapesi ʻoku punopuna ʻa e kiʻi pēpeé ʻi loto ʻiate ia. ʻI heʻene fonu ʻi he laumālie māʻoniʻoní, naʻá ne pehē: ‘ʻE Mele, kuo tāpuakiʻi koe ʻe Sihova. Ko ha monū ia ke ʻi heni ʻi hoku ʻapí ʻa e faʻē ʻa hoku ʻEikí.’ Naʻe pehē ʻe Mele: ‘ʻOku ou fakahīkihikiʻi ʻa Sihova ʻaki hoku lotó kotoa.’ Naʻe nofo ʻa Mele mo ʻIlisapesi ʻi he māhina ʻe tolu, peá ne toki foki ki hono ʻapí ki Nāsaleti.

ʻI hono ʻiloʻi ʻe Siosifa naʻe feitama ʻa Melé, naʻá ne loto ke fakangata ʻa ʻena fakamaʻú. Ka naʻe hā ha ʻāngelo ʻi ha misi kiate ia ʻo ne pehē: ‘ʻOua te ke ilifia he mali mo iá. Kuo ʻikai te ne fai ha meʻa ʻoku hala.’ Ko ia naʻe ʻave ʻe Siosifa ʻa Mele ki hono ʻapí ʻo ne hoko ko hono uaifi.

Naʻe tuʻutuʻuni ʻa e pule ʻo e Puleʻanga Loma ko Sisa ʻAokositusí, ke foki ʻa e kau Siu kotoa pē ki he fonua naʻa nau tupu aí ke lēsisita kinautolu. Ko ia naʻe fononga ai ʻa Siosifa mo Mele ki Pētelihema, ʻa ia naʻe haʻu mei ai ʻa e fāmili ʻo Siosifá. Naʻe ofi ki he taimi ke fāʻele ai ʻa Melé.

ʻI heʻena aʻu ki Pētelihemá, ko e feituʻu pē naʻe lava ke maʻu ʻo na nofo aí ko ha fale ʻoku tauhi ai ʻa e fanga manú. Ko e feituʻu ia naʻe fāʻeleʻi ai ʻe Mele ʻa ʻene tama ko Sīsuú. Naʻá ne kofu ia ʻaki ha konga tupenu molū pea fakatokoto lelei ia ʻi ha ʻaiʻanga kai ʻo e manú.

Naʻe mohe ʻi tuʻa ʻi he poʻulí ha kau tauhi-sipi, ofi ki Pētelihema, ʻo leʻohi ʻenau fanga sipí. Fakafokifā pē, naʻe tuʻu ha ʻāngelo ʻi muʻa ʻiate kinautolu pea naʻe takatakai ʻiate kinautolu ʻa e maama ʻo e lāngilangi ʻo Sihová. Naʻe ilifia ʻa e kau tauhi-sipí, ka naʻe pehē ange ʻe he ʻāngeló: ‘ʻOua ʻe ilifia. ʻOku ou haʻu mo ha ongoongo fakafiefia. Kuo ʻaloʻi ʻa e Mīsaiá ʻi he ʻahó ni ʻi Pētelihema.’ ʻI he taimi pē ko iá, naʻe hā ai ha kau ʻāngelo tokolahi ʻi he langí, ʻo nau pehē: ‘Kolōlia ki he ʻOtuá ʻi langi, pea ko e melinó ki māmani.’ Naʻe pulia leva ʻa e kau ʻāngeló. Naʻe fēfē ʻa e tali ki ai ʻa e kau tauhi-sipí?

Naʻe fepehēʻaki ʻe he kau tauhi-sipí: ‘Tau ō he taimí ni ki Pētelihema.’ Naʻa nau fakavave atu ʻo ʻilo ʻa Siosifa mo Mele ʻi he fale ʻoku tauhi ai ʻa e fanga manú mo ʻena pēpē naʻe toki fāʻeleʻí.

Naʻe ʻohovale ʻa e tokotaha kotoa pē naʻe fanongo ʻi he meʻa naʻe tala ʻe he ʻāngeló ki he kau tauhi-sipí. Naʻe fakakaukau lahi ʻa Mele ki he ngaahi lea ʻa e ʻāngeló pea naʻe ʻikai ʻaupito ke ngalo ʻiate ia. Naʻe foki ʻa e kau tauhi-sipí ki heʻenau fanga sipí, mo nau fakamālō kia Sihova ʻi he meʻa kotoa naʻa nau sio mo fanongo ki aí.