Naʻe ʻi ha fonua ʻi he hahake ʻo ʻIsilelí ʻa e kakai naʻa nau tui ʻe lava ke tataki kinautolu ʻe he ngaahi fetuʻú. ʻI he pō ʻe taha, naʻe sio ai ha kau tangata mei he Hahaké ki ha meʻa naʻe hā ʻo hangē ha foʻi fetuʻu ngingilá naʻe ngaʻunu ʻi he langí, pea naʻa nau muimui ai. Naʻe taki kinautolu ʻe he “foʻi fetuʻú” ki Selusalema. Naʻe kamata ke ʻeke ʻe he kau tangatá ki he kakaí: ‘Ko feʻia ʻa e tamasiʻi ʻa ia ʻe hoko ko e tuʻi ʻo e kau Siú? Kuo mau omi ke punou kiate ia.’

ʻI he fanongo ʻa Hēlota, ko e tuʻi ʻo Selusalemá, fekauʻaki mo ha tuʻi foʻoú, naʻá he hohaʻa lahi. Naʻá ne ʻeke ki he houʻeiki taulaʻeikí: ‘ʻOku pehē koā ʻe ʻaloʻi ʻi fē ʻa e tuʻi ko ení?’ Naʻa nau tala ange: ‘Naʻe pehē ʻe he kau palōfitá ʻe ʻaloʻi ia ʻi Pētelihema.’ Ko ia naʻe ui mai ʻe Hēlota ʻa e kau tangata mei he Hahaké peá ne tala ange: ‘Mou ō ki Pētelihema ʻo kumi ʻa e kiʻi tama ko ení. Pea mou foki ʻo tala mai ʻa e feituʻu ʻokú ne ʻi aí. ʻOku ou loto mo au foki ke punou kiate ia.’ Ka ko ha foʻi loi ia.

Naʻe kamata ke toe ngaʻunu ʻa e “foʻi fetuʻú.” Naʻe muimui ai ʻa e kau tangatá ki Pētelihema. Naʻe tuʻu ʻa e “foʻi fetuʻú” ʻi ʻolunga ʻi ha fale pea naʻe hū ki loto ʻa e kau tangatá. Naʻa nau ʻiloʻi ai ʻa Sīsū mo ʻene faʻeé, ʻa Mele. Naʻa nau punou ki he tamasiʻí pea ʻoange kiate ia ha meʻaʻofa ko e koula, ʻinisēnisi hinehina, mo e mula. Naʻe fekauʻi moʻoni ʻe Sihova ʻa e kau tangatá ni ke nau kumi ʻa Sīsū? ʻIkai.

ʻI he pō ko iá, naʻe tala ʻe Sihova ʻi ha misi kia Siosifa: ‘ʻOku loto ʻa Hēlota ke tāmateʻi ʻa Sīsū. ʻAve ho uaifí mo ho fohá pea mou hola ki ʻIsipite. Nofo ai kae ʻoua ke u tala atu kuo sai ke mou toe foki.’ ʻI he taimi pē ko iá, naʻe ʻalu ʻa Siosifa mo hono fāmilí ki ʻIsipite.

Naʻe tala ʻe Sihova ki he kau tangata mei he Hahaké ke ʻoua te nau toe foki kia Hēlota. ʻI hono ʻiloʻi ʻe Hēlota naʻe ʻikai te nau toe foki angé, naʻá ne ʻita lahi. Koeʻuhi ko e ʻikai lava ke ne ʻilo ʻa Sīsuú, naʻá ne tuʻutuʻuni ke tāmateʻi ʻa e fanga kiʻi tamaiki tangata kotoa pē ʻi Pētelihema naʻa nau taʻu tatau mo Sīsuú. Ka naʻe hao ʻa Sīsū, naʻá ne nofo mamaʻo ʻi ʻIsipite.

Naʻe faifai pē ʻo mate ʻa Hēlota. Naʻe tala ʻe Sihova kia Siosifa: ‘ʻOku sai he taimí ni ke mou foki.’ Naʻe foki ki ʻIsileli ʻa Siosifa, Mele, pea mo Sīsū, pea nau nofo ʻi he kolo ko Nāsaletí.

Naʻe nofo ʻa Siosifa mo Mele ʻi Nāsaleti mo Sīsū pea mo hona ngaahi foha mo e ʻofefine. Naʻe tauhi ʻe Siosifa hono fāmilí ʻaki ʻene ngāue ko ha tufunga, pea naʻá ne akoʻi kinautolu ʻo fekauʻaki mo Sihova mo ʻene Laó. Naʻe ō maʻu pē ʻa e fāmilí ki he sinakoké ke lotu pea ʻi he taʻu taki taha ki Selusalema ki he Pāsová.

ʻI he taʻu 12 ʻa Sīsuú, naʻe fononga lōloa ai ʻa hono fāmilí ki Selusalema ʻo hangē ko ia ʻoku nau faʻa faí. Naʻe fonu ʻa e koló ʻi he kakai naʻa nau omi ke kātoangaʻi ʻa e Pāsová. Hili iá, naʻe kamata ke fononga ʻa Siosifa mo Mele ki ʻapi, ʻo na fakakaukau naʻe fononga fakataha mo kinautolu ʻa Sīsū. Ka ʻi heʻena kumi ia ʻi honau kāingá, naʻe ʻikai lava ke na maʻu ia.

Naʻá na toe foki ki Selusalema, peá na kumi ʻi he ʻaho ʻe tolu ʻa hona fohá. Naʻe faifai pē peá na ō ki he temipalé. Naʻe ʻi ai ʻa Sīsū, ʻokú ne tangutu ʻi loto ʻi he kau faiakó, ʻo fanongo lelei mo ʻeke ha ngaahi fehuʻi lelei. Naʻe mālieʻia ʻa e kau faiakó ʻia Sīsū pea kamata ke nau ʻeke kiate ia ha ngaahi fehuʻi. Pea naʻa nau ʻohovale ʻi heʻene talí. Naʻe lava ke nau sio naʻá ne mahinoʻi ʻa e Lao ʻa Sihová.

Naʻe hohaʻa ʻaupito ʻa Siosifa mo Mele. Naʻe pehē ʻe Mele: ‘Tamasiʻi, kuó ma kumi koe he feituʻu kotoa pē! Naʻá ke ʻalu ki fē?’ Naʻe pehē ange ʻe Sīsū: ‘ʻOku ʻikai koā te mo ʻiloʻi kuo pau ke u ʻi heni ʻi he fale ʻo ʻeku Tamaí?’

Naʻe foki ki ʻapi ʻa Sīsū mo ʻene ongo mātuʻá ki Nāsaleti. Naʻe akoʻi ʻe Siosifa ʻa Sīsū ke ne ngāue ko ha tufunga. ʻOkú ke pehē ko e tokotaha fēfē ʻa Sīsū ʻi heʻene kei siʻí? ʻI heʻene tupu haké, naʻe lahi ʻa e poto naʻe maʻu ʻe Sīsuú pea naʻe ʻofeina ia ʻe he ʻOtuá mo e kakaí.