Hili ʻa e malanga ʻa Sīsū ʻi he taʻu nai ʻe taha mo e konga, naʻe ʻi ai ha fili mahuʻinga ke ne fai. Ko hai te ne fili ke ngāue vāofi mo iá? Ko hai te ne akoʻi ke takimuʻa ʻi he fakatahaʻanga Kalisitiané? Ke fai ʻa e fili ko ení, naʻe fiemaʻu ʻe Sīsū ʻa e tataki ʻa Sihová. Ko ia naʻá ne ʻalu ki ha moʻunga ʻa ia ʻe lava ke ne nofo toko taha ai, pea naʻá ne lotu ʻi he pō kakato. ʻI he pongipongí, naʻe ui mai ʻe Sīsū ʻa e niʻihi ʻo ʻene kau ākongá peá ne fili ʻene kau ʻapositolo ʻe toko 12. Ko hai ʻa e hingoa ʻokú ke manatuʻí? Ko honau hingoá ko Pita, ʻAnitelū, Sēmisi, Sione, Filipe, Pātolomiu, Tōmasi, Mātiu, Sēmisi ko e foha ʻo ʻAlefiusi, Tatiusi, Saimone, pea mo Siutasi ʻIsikaliote.

Naʻe fononga mo ia ʻa e toko Tahauá. Hili ʻene akoʻi kinautolú, naʻe fekauʻi kinautolu ke nau ō ʻo malanga. Naʻe ʻoange ʻe Sihova kiate kinautolu ʻa e mālohi ke nau tuli ʻa e fanga tēmenioó pea fakamoʻui ʻa e kakai naʻe puké.

Naʻe ui ʻe Sīsū ʻa e toko Tahauá ko hono ngaahi kaumeʻa, pea naʻá ne falala kiate kinautolu. Naʻe pehē ʻe he kau Fālesí ko e kau ʻapositoló naʻa nau taʻeako mo māʻulalo. Ka naʻe akoʻi kinautolu ʻe Sīsū ki heʻenau ngāué. Naʻa nau ʻia Sīsū ʻi he ngaahi taimi mahuʻinga taha ʻo ʻene moʻuí, hangē ko ia ʻi he ki muʻa ke ne maté pea ʻi he hili ʻene toetuʻú. ʻI he hangē ko Sīsuú, ko e tokolahi taha ʻo e toko Tahauá naʻa nau haʻu mei Kāleli. Naʻe mali ʻa e niʻihi ʻo kinautolu.

Ko e kau ʻapositoló ko e kau tangata taʻehaohaoa naʻa nau fai ʻa e ngaahi fehālaaki. ʻI he taimi ʻe niʻihi naʻa nau lea taʻefakakaukau pea nau fai ha ngaahi fili kovi. ʻI he taimi ʻe niʻihi naʻe ʻikai te nau kātaki. Naʻe aʻu ʻo nau fakafekiki pe ko hai naʻe mahuʻinga angé. Ka ko e kakai lelei kinautolu naʻa nau ʻofa kia Sihova. Te nau hoko ko e makatuʻunga ke langa hake ai ʻa e fakatahaʻanga Kalisitiané hili ʻa e mavahe ʻa Sīsuú.

Hili hono fili ʻe Sīsū ʻa e kau ʻapositolo ʻe toko 12, naʻá ne ʻalu hifo mei he moʻungá ki ha feituʻu naʻe fakatahataha ai ha fuʻu kakai. Naʻa nau haʻu mei Kāleli, Siutea, Tāia, Saitoni, Sīlia, mo e tafaʻaki ʻe taha ʻo Sioataní. Naʻa nau ʻomi ʻa e kakai naʻa nau faingataʻaʻia ʻi he ngaahi mahakí mo e niʻihi ʻa ia naʻe fakamamahiʻi ʻe he fanga tēmenioó. Naʻe fakamoʻui kotoa kinautolu ʻe Sīsū. Hili iá naʻá ne tangutu hifo ʻi he veʻe moʻungá ʻo kamata ke ne malanga. Naʻá ne fakamatalaʻi ʻa e meʻa kuo pau ke tau fai kapau ʻoku tau loto ke hoko ko e ngaahi kaumeʻa ʻo e ʻOtuá. Kuo pau ke tau ʻiloʻi ʻoku tau fiemaʻu ʻa Sihova pea ako ke ʻofa kiate ia. Ka heʻikai lava ke tau ʻofa ki he ʻOtuá kapau ʻoku ʻikai ke tau ʻofa ki he kakaí. Kuo pau ke tau anga-lelei mo faitotonu ki he tokotaha kotoa, ʻo aʻu ki hotau ngaahi filí.

Naʻe pehē ʻe Sīsū: ‘ʻOku ʻikai feʻunga ke ke ʻofa pē ki ho ngaahi kaumeʻá. ʻOku toe fiemaʻu foki ke ke ʻofa ki ho ngaahi filí pea fakamolemoleʻi ʻa e kakaí mei ho lotó. Kapau ʻoku loto-mamahi ha taha ʻiate koe, ʻalu leva kiate ia ʻo kole fakamolemole. Fai ki he niʻihi kehé ʻa e meʻa ʻokú ke loto ke nau fai atu kiate koé.’

Naʻe toe ʻoange ʻe Sīsū ki he kakaí ʻa e faleʻi lelei fekauʻaki mo e meʻa fakamatelié. Naʻá ne pehē: ‘ʻOku mahuʻinga ange ke hoko ko ha kaumeʻa ʻo Sihova ʻi hono maʻu ha paʻanga lahi. ʻE lava ke kaihaʻasi ʻe ha kaihaʻa ʻa hoʻo paʻangá, ka heʻikai lava ke kaihaʻasi ʻe ha taha hoʻo kaumeʻa mo Sihová. Tuku ʻa e hohaʻa fekauʻaki mo e meʻa te ke kai, inu, pe tuí. Sio atu ki he fanga manupuná. ʻOku fakapapauʻi maʻu pē ʻe he ʻOtuá ʻoku nau maʻu ha meʻa feʻunga ke kai. Heʻikai ʻai koe ʻe he hohaʻá ke toe lōloa ange hoʻo moʻuí ʻaki ha ʻaho ʻe taha. Manatuʻi, ʻoku ʻiloʻi ʻe Sihova ʻa e meʻa ʻokú ke fiemaʻú.’

Naʻe teʻeki ʻaupito ke fanongo ʻa e fuʻu kakaí ki ha taha ʻokú ne malanga ʻo hangē ko Sīsuú. Ko honau kau taki lotú naʻe ʻikai te nau akoʻi ange ʻa e ngaahi meʻa ko ení. Ko e hā naʻe hoko ai ʻa Sīsū ko ha faiako lahi peheé? Koeʻuhí ko e meʻa kotoa pē naʻá ne akoʻí naʻe haʻu meia Sihova.