Naʻe ʻikai ke ngata pē ʻi he lava ke fakamoʻui ʻe Sīsū ʻa e kau puké mo fokotuʻu hake ʻa e maté ka naʻe toe lava foki ke ne puleʻi ʻa e matangí mo e ʻuhá. Hili ʻene lotu ʻi he moʻungá, naʻe sio hifo ʻa Sīsū ki he Tahi Kālelí ʻoku tō ai ha matangi. Naʻe ʻi honau vaká ʻene kau ʻapositoló, ʻoku nau feinga mālohi ke ʻaʻalo ʻi he matangí. Naʻe ʻalu hifo ʻa Sīsū ʻo kamata ke ne lue ʻi he fukahi tahí ki honau vaká. ʻI he sio ʻa e kau ʻapositoló ki he tokotaha ʻoku lue ʻi he fukahi tahí, naʻa nau ilifia. Ka naʻe tala ange ʻe Sīsū: ‘Ko au pē ia. ʻOua ʻe ilifia.’

Naʻe pehē ange ʻe Pita: ‘ʻEiki, kapau moʻoni ko koe, fekau mai ke u ʻalu atu kiate koe.’ Naʻe tala ʻe Sīsū kia Pita. ‘Haʻu kiate au.’ Ko ia ʻi he lotolotonga ʻo e matangí, naʻe hifo ʻa Pita mei he vaká ʻo ne lue ʻi he fukahi tahí kia Sīsū. Ka ʻi heʻene ofi atu kiate iá, naʻe sio ʻa Pita ki he matangí pea kamata ke ne ilifia. Naʻá ne ongoʻi ʻoku kamata ke ne melemo. Naʻe kaila ʻa Pita: ‘ʻEiki, fakahaofi au!’ Naʻe puke ʻe Sīsū ʻa hono nimá, peá ne pehē: ‘Ko e hā naʻe kamata ai ke ke veiveiuá? Ko fē ʻa hoʻo tuí?’

Naʻe kaka ʻa Sīsū mo Pita ki he vaká, pea ʻi he taimi pē ko iá, naʻe tuʻu ʻa e matangí. ʻE lava ke ke sioloto atu ki he anga ʻo e ongoʻi ʻa e kau ʻapositoló? Naʻa nau pehē: “Ko e ʻAlo moʻoni koe ʻo e ʻOtuá.”

Naʻe ʻikai ko e taimi pē eni ʻe taha naʻe puleʻi ai ʻe Sīsū ʻa e ʻeá. ʻI ha taimi ʻe taha, ʻi he heka ʻa Sīsū mo ʻene kau ʻapositoló ki he kauvai ʻe tahá, naʻe mohe ʻa Sīsū ʻi he muiʻi vaká. Lolotonga ʻene mohé, naʻe tō ha fuʻu matangi mālohi. Naʻe haʻahaʻaki ʻa e peaú ʻo hake ki he vaká, pea naʻe fonu tahi ʻa e vaká. Naʻe fafangu ʻe he kau ʻapositoló ʻa Sīsū mo nau kaila: ‘Faiako, ko eni te tau mate! Tokoni mai!’ Naʻe tuʻu hake ʻa Sīsū ʻo ne pehē ki he tahí: “Fakalongolongo!” ʻI he taimi pē ko iá, naʻe nonga ʻa e matangí mo e tahí. Naʻe ʻeke ʻe Sīsū ki he kau ʻapositoló: ‘Ko fē hoʻomou tuí?’ Naʻa nau fepehēʻaki: “Naʻa mo e matangí mo e tahí ʻokú na talangofua kiate ia.” Naʻe ʻiloʻi ʻe he kau ʻapositoló kapau naʻa nau falala kakato kia Sīsū, naʻe ʻikai fiemaʻu ke nau ilifia ki ha meʻa.

Naʻe fehiʻa ʻa e kau Fālesí ʻia Sīsū pea naʻa nau loto ke maʻu ha ʻuhinga ke nau puke ai ia. Naʻa nau pehē ʻoku ʻikai totonu ke ne fakamoʻui ʻa e kakai ʻoku puké ʻi he Sāpaté. ʻI he Sāpate ʻe taha, naʻe ʻilo ai ʻe Sīsū ha tangata kui naʻe kolekole ʻi he halá. Naʻá ne tala ange ki heʻene kau ākongá: ‘Sio ki he founga ʻe tokoniʻi ai ʻa e tangatá ni ʻe he mālohi ʻo e ʻOtuá.’ Naʻe ʻai ʻe Sīsū hono fāvaí ki ha meʻi kelekele, peá ne valiʻaki ia ʻa e mata ʻo e tangatá. Naʻe tala ange ʻe Sīsū: ‘ʻAlu ʻo tafitafi ho matá ʻi he vai ʻo Sailoamé.’ Naʻe fai ia ʻe he tangatá, pea ko e ʻuluaki taimi ia ʻi heʻene moʻuí, naʻe lava ai ke ne sió.

Naʻe ʻohovale ʻa e kakaí. Naʻa nau pehē: ‘ʻIkai ko e tangata eni naʻe faʻa tangutu ʻo kolekolé, pe ko ha taha pē ia ʻoku hangē ko iá?’ Naʻe pehē ʻe he tangatá: ‘Naʻe fanauʻi au ko e kui!’ Naʻe ʻeke ange ʻe he kakaí: ‘Ko e hā ʻokú ke lava ai ʻo sió?’ ʻI heʻene tala ange ʻa e meʻa naʻe hokó, naʻa nau ʻave ia ki he kau Fālesí.

Naʻe tala ange ʻe he tangatá ki he kau Fālesí: ‘Naʻe vali ʻaki ʻe Sīsū ha meʻa hoku matá pea tala mai ke u ʻalu ʻo tafitafi. Naʻá ku fai ia, pea ko eni ʻoku lava ke u sio.’ Naʻe pehē ʻe he kau Fālesí: ‘Kapau ʻoku fai fakamoʻui ʻa Sīsū ʻi he Sāpaté, ʻoku ʻikai ko e haʻu mei he ʻOtuá ʻa hono mālohí.’ Ka naʻe pehē ʻe he niʻihi: ‘Kapau ko hono mālohí ʻoku ʻikai mei he ʻOtuá, heʻikai ʻaupito ke ne malava ʻo fai ha fakamoʻui.’

Naʻe ui mai ʻe he kau Fālesí ʻa e ongo mātuʻa ʻa e tangatá ʻo ʻeke kiate kinaua: ‘Naʻe anga-fēfē ʻa e lava ke sio homo fohá he taimi ní?’ Naʻe ilifia ʻa ʻene ongo mātuʻá koeʻuhí naʻe pehē ʻe he kau Fālesí ʻe tuli mei he sinakoké ha taha pē ʻoku tui kia Sīsū. Ko ia naʻá na pehē ange: ‘ʻOku ʻikai te ma ʻiloʻi. Mou ʻeke pē kiate ia.’ Naʻe ʻeke ʻe he kau Fālesí ki he tangatá ha toe ngaahi fehuʻi peá ne pehē ange: ‘Kuó u ʻosi tala atu ʻa e meʻa kotoa ʻoku ou ʻiloʻí. Ko e hā ʻoku mou kei ʻeke mai aí?’ Naʻe ʻita ʻa e kau Fālesí, pea nau lī ia ki tuʻa.

Naʻe ʻalu ʻa Sīsū ʻo kumi ʻa e tangatá, peá ne ʻeke ange kiate ia: ‘ʻOkú ke tui ki he Mīsaiá?’ Naʻe pehē ʻe he tangatá: ‘Te u tui kapau te u ʻiloʻi ia.’ Naʻe pehē ange ʻe Sīsū: ‘Ko au ʻa e Mīsaiá.’ ʻIkai naʻe anga-ʻofa ʻa Sīsū? Naʻe ʻikai ke ngata pē ʻi heʻene fakamoʻui ʻa e tangatá ka naʻá ne toe tokoniʻi foki ia ke ne maʻu ʻa e tuí.