ʻI he taimi naʻe ʻi he loki ai ʻi ʻolungá ʻa Sīsū mo ʻene kau ʻapositoló, naʻá ne pehē kiate kinautolu: ‘Ko kimoutolú kotoa te mou liʻaki au ʻi he pooni.’ Naʻe pehē ange ʻe Pita: ‘ʻE ʻikai te u fai pehē! Neongo kapau ʻe liʻaki koe ʻe he niʻihi kehé kotoa, heʻikai ʻaupito te u liʻaki koe.’ Ka naʻe tala ange ʻe Sīsū kia Pita: ‘Ki muʻa ke ʻuʻua ha moá, te ke pehē tuʻo tolu ʻoku ʻikai te ke ʻiloʻi au.’

ʻI hono ʻave ʻe he kau sōtiá ʻa Sīsū ki he fale ʻo Kaiafasí, naʻe hola ʻa e tokolahi taha ʻo e kau ʻapositoló. Ka naʻe muimui ha toko ua ʻo kinautolu ʻi he fuʻu kakaí. Ko e toko taha ai ko Pita. Naʻá ne hū ki he lotoʻā ʻo e fale ʻo Kaiafasí ʻo fakamāfana ʻi ha veʻe afi. ʻI he māmá, naʻe sio ha taʻahine sevāniti ki he mata ʻo Pitá peá ne pehē: ‘ʻOku ou ʻiloʻi koe! Naʻá ke ʻia Sīsū!’

Naʻe pehē ʻe Pita: ‘ʻIkai, naʻe ʻikai ko au ia! ʻOku ʻikai te u ʻilo ʻa e meʻa ʻokú ke talanoa ki aí!’ Naʻá ne ʻalu ki he matapaá. Ka naʻe ʻikai fuoloa kuo sio kiate ia ha toe taʻahine sevāniti peá ne pehē ki he fuʻu kakaí: ‘Ko e tangatá ni naʻá ne ʻia Sīsū!’ Naʻe pehē ange ʻe Pita: ‘ʻOku ʻikai ʻaupito te u ʻiloʻi ʻa Sīsū!’ Naʻe pehē ange ʻe ha tangata: ‘Ko e taha koe ʻo kinautolu! ʻOku lava ke u tala mei he tō ho leʻó ko hoʻo haʻu mei Kāleli, ʻo hangē pē ko Sīsuú. Ka naʻe fakapapau ʻa Pita: ‘ʻOku ʻikai te u ʻiloʻi ia!’

ʻI he taimi pē ko iá, naʻe ʻuʻua ha moa. Naʻe sio atu ʻa Pita ʻoku tafoki ʻa Sīsū ʻo sio mai kiate ia. Naʻá ne manatuʻi ʻa e lea ʻa Sīsuú, pea naʻá ne hū ki tuʻa ʻo ne tangi mamahi.

Lolotonga iá, naʻe faʻufaʻu ʻa e Sanetalimí ke fakamāuʻi ʻa Sīsū ʻi he fale ʻo Kaiafasí. Naʻa nau ʻosi fakapapauʻi ke tāmateʻi ʻa Sīsū, pea naʻa nau kumi ʻi he taimi ko ení ki ha ʻuhinga ke tāmateʻi ai ia. Ka naʻe ʻikai lava ke nau maʻu ha meʻa ke tautea ai ia. Faifai atu pē naʻe ʻeke hangatonu ʻe Kaiafasi kia Sīsū: ‘Ko e ʻAlo koe ʻo e ʻOtuá?’ Naʻe pehē ange ʻe Sīsū: ‘Ko au ia.’ Naʻe pehē ʻe Kaiafasi: ‘ʻOku ʻikai ke tau toe fiemaʻu ha fakamoʻoni. Ko e lea fieʻotua eni!’ Naʻe loto-tatau mo ia ʻa e fakamaauʻangá: ‘Kuo pau ke mate ʻa e tangatá ni.’ Naʻa nau paaʻi ʻa Sīsū, ʻanuhi, fakapūlouʻi, pea tā ia, mo nau pehē: ‘Kapau ko ha palōfita koe, mateʻi mai angé pe ko hai naʻá ne taaʻi koé!’

ʻI heʻene ʻaho haké, naʻa nau ʻave ʻa Sīsū ki he holo ʻo e Sanetalimí ʻo toe ʻeke kiate ia: ‘Ko e ʻAlo koe ʻo e ʻOtuá?’ Naʻe tali ange ʻe Sīsū: ‘Ko kimoutolu ʻoku mou pehē ko au iá.’ Naʻa nau fakahalaiaʻi leva ia ki he lea fieʻotua pea ʻave ia ki he palasi ʻo Ponitō Pailato ko e kōvana Lomá. Ko e hā naʻe hoko atu aí? Tau vakai angé ki aí.

Naʻe ʻave ʻe he houʻeiki taulaʻeikí ʻa Sīsū ki he palasi ʻo e kōvaná. Naʻe ʻeke ange ʻe Pailato kiate kinautolu: ‘Ko e hā ʻa e tukuakiʻi ʻoku mou fai ki he tangatá ni?’ Naʻa nau pehē: ‘ʻOkú ne tala ko ha tuʻi ia!’ Naʻe ʻeke ʻe Pailato kia Sīsū: “Ko koe ʻa e Tuʻi ʻo e Kau Siú?” Naʻe tali ange ʻe Sīsū: “Ko hoku Puleʻangá ʻoku ʻikai ko ha konga ia ʻo e māmani ko ení.”

Naʻe ʻave leva ʻe Pailato ʻa Sīsū kia Hēlota, ko e pule ʻo Kālelí, ke sio pe ʻe lava ke ne maʻu ha meʻa ke tukuakiʻi ai ia. Naʻe ʻikai ke maʻu ʻe Hēlota ha hala ʻa Sīsū peá ne fakafoki ia kia Pailato. Naʻe tala leva ʻe Pailato ki he kakaí: ‘ʻOku ʻikai ke maʻu ʻe Hēlota pea mo au ha meʻa ke tukuakiʻi ʻaki ʻa e tangatá ni. Te u tuku ange ia.’ Naʻe kaila ʻa e fuʻu kakaí: ‘Tāmateʻi ia! Tāmateʻi ia!’ Naʻe haha ʻe he kau sōtiá ʻa Sīsū ʻaki ha uipi, pea nau ʻanuhi ia, mo tā ia. Naʻa nau ʻai ki hono ʻulú ha kalauni talatala pea nau lea manuki kiate ia: ‘Maʻu ha ʻaho lelei, Tuʻi ʻo e kau Siú.’ Naʻe toe tala ʻe Pailato ki he kakaí: ‘ʻOku ʻikai te u maʻu ha hala ʻa e tangatá ni.’ Ka naʻa nau kaila: “Tutuki ia!” Ko ia naʻe tuku atu ia ʻe Pailato ke tāmateʻi.

Naʻa nau ʻave ʻa Sīsū ki ha feituʻu ko Kolokota, ʻo tutuki ia ki ha ʻakau, pea fokotuʻu ki ʻolunga. Naʻe lotu ʻa Sīsū: ‘ʻE tamai, fakamolemoleʻi kinautolu, he ʻoku ʻikai te nau ʻiloʻi ʻa e meʻa ʻoku nau faí.’ Naʻe fakakataʻaki ʻe he kakaí ʻa Sīsū, ʻo nau pehē: ‘Kapau ko e ʻAlo koe ʻo e ʻOtuá, ʻalu hifo mei he ʻakaú! Fakahaofi koe.’

Naʻe pehē ange ʻe he taha ʻo e ongo faihia naʻe tautau ʻi hono tafaʻakí: “Manatuʻi au ʻi haʻo aʻu ki ho Puleʻangá.” Naʻe palōmesi ʻa Sīsū kiate ia: “Te ke ʻi Palataisi mo au.” ʻI he hoʻatā efiafí, naʻe tō ha fakapoʻuli ki he fonuá ʻi he houa ʻe tolu. Naʻe tuʻu ʻa e niʻihi ʻo e kau ākongá ʻo ofi ki he ʻakaú, naʻe kau ai ʻa Mele ko e faʻē ʻa Sīsuú. Naʻe tala ange ʻe Sīsū kia Sione ke ne tokangaʻi ʻa Mele ʻo hangē pē ko haʻane faʻeé.

Naʻe faifai atu pē pea pehē ʻe Sīsū: “Kuo lava!” Naʻá ne punou hifo ʻo ne mānava fakaʻosi. ʻI he taimi pē ko iá, naʻe ʻi ai ha fuʻu mofuike mālohi. ʻI he temipalé naʻe mahaeua ʻa e fuʻu puipui ʻi he vahaʻa ʻo e Potu Toputapú mo e Potu Fungani Toputapú. Naʻe pehē ʻe ha ʻōfisa fakakautau: ‘Ko e ʻAlo moʻoni eni ʻo e ʻOtuá.’