Hili ʻa e pekia ʻa Sīsuú, naʻe kole kia Pailato ʻe ha tangata koloaʻia ko Siosifa ke fakaʻatā ia ke ne ʻohifo ʻa e sino ʻo Sīsuú mei he ʻakaú. Naʻe kofuʻaki ʻe Siosifa ʻa e sinó ʻa e tupenu līneni lelei mo e ngaahi sipaisi pea fakatokoto ia ʻi ha fonualoto foʻou. Naʻá ne ʻai ke tekaʻi ha fuʻu maka lahi ʻo tāpuni ʻaki ʻa e hūʻangá. Naʻe tala ange ʻe he houʻeiki taulaʻeikí kia Pailato: ‘ʻOku mau ilifia naʻa ʻave ʻe he niʻihi ʻo e kau ākonga ʻa Sīsuú ʻa hono sinó pea nau pehē kuó ne toe moʻui.’ Ko ia naʻe tala ange ʻe Pailato kiate kinautolu: ‘Tāpuni malu ʻa e fonualotó pea leʻohi ia.’

ʻI ha ʻaho ʻe tolu ki mui ai, naʻe ʻalu pongipongia ha kau fefine ki he fonualotó ʻo nau ʻilo ai kuo tekaʻi ʻa e fuʻu maká ki he tafaʻakí. Naʻe tala ange ʻe ha ʻāngelo naʻe ʻi he loto fonualotó ki he kau fefiné: ‘ʻOua ʻe ilifia. Kuo fokotuʻu hake ʻa Sīsū. Mou ō ʻo tala ki heʻene kau ākongá te nau feʻiloaki mo ia ʻi Kāleli.’

Naʻe fakavave ʻa Mele Makitala ʻo kumi ʻa Pita mo Sione. Naʻá ne tala ange kiate kinaua: ‘Kuo ʻave ʻe ha taha ʻa e sino ʻo Sīsuú!’ Naʻe lele ʻa Pita mo Sione ki he fonualotó. ʻI heʻena sio ʻoku ʻikai ha taha aí, naʻá na foki ki hona ʻapí.

ʻI he foki atu ʻa Mele ki he fonualotó, naʻá ne sio ki ha ongo ʻāngelo ʻi loto peá ne pehē ange kiate kinaua: ‘ʻOku ʻikai te u ʻiloʻi pe kuo nau ʻave ki fē ʻa hoku ʻEikí.’ Naʻá ne sio leva ki ha tangata, pea ʻi heʻene pehē ko e tauhi ngoué iá, naʻá ne pehē ange kiate ia: ‘Tangataʻeiki, tala mai muʻa pe kuó ke ʻave ia ki fē.’ Ka ʻi he pehē ange ʻe he tangatá, “Mele!” Naʻá ne ʻiloʻi ai ko Sīsū ia. Naʻe pehē ʻe Mele: “Faiako!” Peá ne piki kiate ia. Naʻe tala ange ʻe Sīsū: ‘ʻAlu ʻo tala ki hoku fanga tokouá kuó ke sio kiate au.’ ʻI he taimi pē ko iá, naʻe lele ʻa Mele ki he kau ākongá ʻo tala ange kuó ne sio kia Sīsū.

Ki mui ʻi he ʻaho ko iá, naʻe lue ai ʻa e toko ua ʻo e kau ākongá mei Selusalema ki ʻEmeasi. Naʻe ʻalu atu ha tangata kiate kinaua ʻi he halá peá ne ʻeke ange pe ko e hā ʻa e meʻa ʻokú na talanoa ki aí. Naʻá na pehē ange: ‘Kuo teʻeki koā ke ke fanongo ai? ʻI he ʻaho ʻe tolu ki muʻá, naʻe tāmateʻi ai ʻe he houʻeiki taulaʻeikí ʻa Sīsū. Ko eni ʻoku pehē ʻe he kau fefine ia ʻe niʻihi ʻokú ne moʻui!’ Naʻe ʻeke ange ʻe he tangatá: ‘ʻOku ʻikai koā te mo tui ki he kau palōfitá? Naʻa nau pehē ʻe pekia ʻa Kalaisi pea ʻe toe fokotuʻu hake ia.’ Naʻá ne hoko atu ʻo fakamatalaʻi kiate kinaua ʻa e Folofolá. ʻI heʻenau aʻu ki ʻEmeasí, naʻe kole ange ʻe he ongo ākongá ki he tangatá ke nau ʻalu. ʻI he kai efiafí hili ʻene lotu ʻo tāpuakiʻi ʻa e maá, naʻá na ʻiloʻi ai ko Sīsū ia. Pea naʻá ne puli.

Naʻe fakavave ʻa e ongo ākongá ki he fale ʻi Selusalema ʻa ia naʻe fakatahataha ai ʻa e kau ʻapositoló ʻo tala kiate kinautolu ʻa e meʻa naʻe hokó. Lolotonga ʻenau ʻi aí, ʻi loto ʻi he falé, naʻe hā ʻa Sīsū kiate kinautolu kotoa. ʻI he kamatá, naʻe ʻikai lava ke tui ʻa e kau ʻapositoló ko Sīsū ia. Peá ne toki pehē ange leva: ‘Sio mai ki hoku ongo nimá; ala mai kiate au. Naʻe tohi ʻo pehē ʻe toetuʻu ʻa Kalaisi mei he pekiá.’

ʻI ha taimi hili ʻa e hā ʻa Sīsū ki he kau ʻapositoló, naʻe fakakaukau ai ʻa Pita ke ne ʻalu ʻo toutai ʻi he Tahi Kālelí. Naʻá ne ʻalu mo Tōmasi, Sēmisi, Sione, pea mo e kau ākonga kehe. Naʻa nau toutai ʻi he poó kotoa ka naʻe ʻikai te nau maʻu ha meʻa.

Pongipongia ʻi he ʻaho hono hokó, naʻa nau sio atu ai ki ha tangata ʻokú ne tuʻu ʻi he matātahí. Naʻá ne ui atu kiate kinautolu: ‘Naʻa mou maʻu ha ika?’ Naʻa nau tala ange: “ʻIkai!” Naʻe pehē ange ʻe he tangatá: “Lī ʻa e kupengá ki he tafaʻaki toʻomataʻu ʻo e vaká.” ʻI heʻenau fai iá, naʻe fonu ʻa e kupengá ʻi he ika lahi ʻaupito ʻo ʻikai ke nau lava ai ʻo fusi hake ki he vaká. Naʻe ʻiloʻi leva ai ʻe Sione ko Sīsū ʻa e tangatá peá ne pehē: “Ko e ʻEikí!” Naʻe puna ʻa Pita ki tahi ʻi he taimi pē ko iá ʻo ne kakau ki ʻuta. Naʻe muimui atu ʻa e kau ākongá ʻi he vaká.

ʻI heʻenau aʻu atu ki he matātahí, naʻa nau sio ki ha mā mo e ika ʻoku tunu ʻi ha afi. Naʻe tala ange ʻe Sīsū ke ʻomi haʻanau ika ke fakalahi ʻaki ʻa e meʻakaí. Peá ne pehē ange: ‘Mou omi ʻo kai pongipongi.’

Hili ʻenau kai pongipongí, naʻe ʻeke ʻe Sīsū kia Pita: ‘ʻOkú ke ʻofa ʻiate au ʻo laka hake ʻi he toutaí?’ Naʻe pehē ange ʻe Pita: ‘ʻIo, ʻEiki, ʻokú ke ʻiloʻi ʻoku ou ʻofa ʻiate koe.’ Naʻe pehē ʻe Sīsū: ‘Peʻi fafanga ʻeku fanga lamí.’ Naʻe toe ʻeke ange ʻe Sīsū: ‘Pita, ʻokú ke ʻofa ʻiate au?’ Naʻe pehē ʻe Pita: ‘ʻEiki, ʻokú ke ʻiloʻi ʻoku ou ʻofa ʻiate koe.’ Naʻe pehē ange ʻe Sīsū: “Tauhi ʻeku fanga kiʻi sipí.” Naʻe toe ʻeke ange ʻe Sīsū ko hono tuʻo tolú ia. Naʻe ongoʻi mamahi ʻaupito ai ʻa Pita. Naʻá ne pehē: ‘ʻEiki, ʻokú ke ʻiloʻi ʻa e meʻa kotoa pē. ʻOkú ke ʻiloʻi ʻoku ou ʻofa ʻiate koe.’ Naʻe pehē ange ʻe Sīsū: “Fafanga ʻeku fanga kiʻi sipí.” Hili iá naʻá ne tala ange kia Pita: “Hokohoko atu hoʻo muimui kiate aú.”