ʻE Anga-Fēfē Hono Manatuʻi Koe ʻe Sihová?
“ʻE HOKU ʻOtua, manatuʻi au.” Naʻe tuʻo lahi ʻa e kole ʻa Nehemaia ki he ʻOtuá ʻaki ʻa e ngaahi lea ko iá. (Nehemaia 5:19; 13:14, 31) ʻOku mātuʻaki fakaenatula ʻi he taimi ʻoku hokosia ai ʻe he kakaí ʻa e loto-mamahí, ʻoku nau hanga ki he ʻOtuá mo e ngaahi fakalea ʻo e kole hangē ko iá.
Ka, ko e hā ʻoku ʻi he fakakaukau ʻa e kakaí ʻi he taimi ʻoku nau kole ai ki he ʻOtuá ke manatuʻi kinautolú? ʻOku hā mahino, ʻoku nau ʻamanaki ki he ʻOtuá ke Ne fai ʻa e meʻa lahi ange ʻi hono manatuʻi pē honau ngaahi hingoá. ʻOku nau ʻamanaki taʻetoeveiveiua ʻi he founga tatau hangē ko ia naʻe fai ʻe he taha ʻo e ongo faihia naʻe fakapoongi he tafaʻaki ʻo Sīsuú. Ko e tokotaha ko ʻení, ʻi he ʻikai hangē ko e tokotaha ko ē, naʻá ne kole kia Sīsū: “Manatuʻi au, oka ke ka hoko ki ho buleaga.” Naʻá ne fiemaʻu ʻa Sīsuú ke ʻoua ʻe ngata pē ʻi heʻene manatuʻi ko hai iá ka ke ne toe fai foki ha meʻa maʻana—ke fokotuʻu hake ia.—Luke 23:42, PM.
ʻI he faitatau maʻu pē, ʻoku fakahā mai ʻe he Tohitapú fekauʻaki mo e ʻOtuá, ko e “manatuʻi” ʻoku ʻuhingá ko hono fai ha ngāue pau. Ko e fakatātaá, ʻi he hili ʻa e lōmekina ʻo e foʻi māmaní ʻe he ngaahi vai lōmakí ʻi he ʻaho ʻe 150, “naʻe manatu ʻa e ʻOtua kia Noa . . ., pea naʻe fakaangi ʻe he ʻOtua ha matangi ki he funga fonua, pea taumatala ai ʻa e vai.” (Senesi 8:1) ʻI he ngaahi senituli ki mui aí, ko Samisoni, ʻa ia naʻe fakakuihi pea haʻi sēini ʻe he kau Filisitiá, naʻá ne lotu: “Atonai Sihova e, manatuʻi au; ʻio, fakamalohiʻi au, Elohimi e, ʻa e ta tuʻo taha ko eni.” Naʻe manatuʻi ʻe Sihova ʻa Samisoni ʻaki hono ʻoange kiate ia ʻa e mālohi kehe ange koeʻuhí ke ne malava ʻo sāuni maʻana ki he ngaahi fili ʻo e ʻOtuá. (Fakamaau 16:28-30) Ka kia Nehemaiá, naʻe tāpuakiʻi ʻe Sihova ʻa ʻene ngaahi feingá, pea naʻe toe fakafoki mai ʻa e lotu moʻoní ki Selusalema.
“ʻIlonga ha meʻa naʻe tohi muʻa naʻe tohi moʻotau akonekina; koeʻuhi ko e meʻa ʻi he fakakataki mo e poupou ʻoku fai ʻe he folofola ke tau maʻu ai ʻa e ʻamanaki lelei,” ko e tohi ia ʻa e ʻapositolo ko Paulá. (Loma 15:4) Kapau te tau manatuʻi ʻa Sihova ʻaki ʻa e kumi ke fai hono finangaló, ʻo hangē ko ia naʻe fai ʻe heʻene kau sevāniti anga-tonu ʻi he kuohilí, ʻoku malava ke tau falala ʻe manatuʻi kitautolu ʻe Sihova ʻaki hono tokoniʻi kitautolu ke tau maʻu ʻetau ngaahi fiemaʻu fakaʻahó, ʻaki hono poupouʻi kitautolu ʻi hotau ngaahi ʻahiʻahí, pea ʻaki hono fakahaofi kitautolu ʻi he taimi te ne ʻomai ai ʻa e fakamaau ki he kau anga-taʻefakaʻotuá.—Mātiu 6:33; 2 Pita 2:9.