Ko e Hā Naʻe Hoko ki he Kau Fakamoʻoni ʻa Sihová Lolotonga ʻa e Taimi ʻo e Tāmate Fakatokolahí?
Fakafuofua ki he Kau Fakamoʻoni ʻa Sihova ʻe toko 1,500 mei he toko 35,000 naʻa nau mate lolotonga ʻa e taimi ʻo e Tāmate Fakatokolahí, ʻa ia naʻa nau nofo ʻi Siamane mo e ngaahi fonua naʻe puleʻi ʻe he kau Nasí. Ko e tupuʻanga ʻo e maté ʻi he ngaahi keisí kotoa ʻoku ʻikai ʻiloʻi. Koeʻuhi ʻoku kei hokohoko atu pē ʻa e fakatotoló, ko e ngaahi fiká mo e fakaikiiki kehé ʻe toki tuku atu nai ʻamui ange.
Naʻe anga-fēfē ʻenau maté?
Ko e mīsini tuʻusi ʻulu naʻe ngāueʻaki ʻe he kau Nasí
Tautea mate: Ofi ki he Kau Fakamoʻoni ʻe toko 400 naʻe tāmateʻi ʻi Siamane pea ʻi he ngaahi fonua naʻe puleʻi ʻe he kau Nasí. Ko e tokolahi taha ʻo e faʻahingá ni naʻe fakamāuʻi ʻi he fakamaauʻangá, tautea mate, pea tuʻusi honau ʻulú. Ko e niʻihi naʻe fanaʻi pe tautau ʻo ʻikai toe ʻave ki he fakamaauʻangá.
Tuku pōpula anga-fakamamahi: Laka hake ʻi he Kau Fakamoʻoni ʻe toko 1,000 naʻa nau mate ʻi he ngaahi kemi fakamamahí mo e ngaahi pilīsone Nasí. Naʻe fakangāueʻi kinautolu ke nau mate pe ko haʻanau mate tupunga mei hono fakamamahiʻi, fakaʻaukaiʻi, maʻu ʻe he momokó, puke, pe ʻikai lelei ʻa e tokoni fakafaitoʻó. Ko e ola ʻo e anga-fakamamahí, naʻe mate ai ʻa e niʻihi taimi nounou pē ʻi he hili hono fakatauʻatāinaʻi kinautolu ʻi he ngata ʻa e Tau II ʻa Māmaní.
Ngaahi founga kehe: Ko e Kau Fakamoʻoni ʻe niʻihi naʻe tāmateʻi ʻi ha ngaahi loki naʻe tuku ange ki ai ha kasa kona, mate hili hono ngāueʻaki ki he ngaahi ʻahiʻahi fakafaitoʻó, pe huhu ki ai ha faitoʻo fakatupu mate.
Ko e hā naʻe fakatangaʻi ai kinautolú?
Ko e Kau Fakamoʻoni ʻa Sihová naʻe fakatangaʻi koeʻuhí naʻa nau muimui ki he ngaahi akonaki ʻa e Tohi Tapú. ʻI he taimi naʻe kounaʻi ai ʻe he kau Nasí ʻa e Kau Fakamoʻoní ke nau fai ʻa e meʻa naʻe tapui ʻe he Tohi Tapú, naʻe fakafisi ʻa e Kau Fakamoʻoní ke talangofua ki ai. Naʻa nau fili ke “talangofua ki he ʻOtuá ko e pulé ia kae ʻikai ki he tangatá.” (Ngāue 5:29) Fakakaukau ki he tafaʻaki ʻe ua naʻa nau fai ai ʻa e fili ko iá.
Hanganaki tuʻu-ʻatā fakapolitikale. Hangē pē ko e Kau Fakamoʻoni ʻi he ngaahi fonua kotoa he ʻaho ní, ko e Kau Fakamoʻoni ʻa Sihova naʻa nau moʻui ʻi he malumalu ʻo e pule ʻa e kau Nasí naʻa nau tuʻu-ʻatā ʻi he ngaahi ʻīsiu fakapolitikalé. (Sione 18:36) Ko ia ai, naʻa nau fakafisi ke
Kau ki he ngāue fakakautaú pe poupou ki he ngaahi feingataú.—ʻAisea 2:4; Mātiu 26:52.
Kau ʻi he ngaahi filí pe kau ki he ngaahi kautaha ʻa e kau Nasí.—Sione 17:16.
Salute ki he fuka faka-Nasí pe lea “Heil Hitler!”—Mātiu 23:10; 1 Kolinitō 10:14.
Fakahāhā ʻenau tuí. Neongo hono taʻofi ʻa e Kau Fakamoʻoni ʻa Sihová mei hono fakahāhā ʻenau tuí, naʻa nau hokohoko atu ke
Fakatahataha ke lotu.—Hepelū 10:24, 25.
Malangaʻi ʻa e pōpoaki ʻo e Tohi Tapú pea tufaki ʻa e ʻū tohi makatuʻunga ʻi he Tohi Tapú.—Mātiu 28:19, 20.
Fakahāhā ʻa e anga-lelei ki honau ngaahi kaungāʻapí, kau ai ʻa e kau Siú.—Maʻake 12:31.
Piki maʻu ki heʻenau tuí, ʻo fakafisi ke fakamoʻoni ʻi ha tohi ke tuku ange ʻenau tuí.—Maʻake 12:30.
Ko Palōfesa Robert Gerwarth ʻokú ne fakaʻosiʻaki ʻo pehē ko e Kau Fakamoʻoni ʻa Sihová “ʻa e kulupu pē ʻe taha ʻi Siamane Nasi naʻe fakatangaʻi ʻo makatuʻunga ʻataʻatā pē ʻi heʻenau tui fakalotú.”a Ko honau ngaahi kaungā-pōpula ʻi he kemi fakamamahí naʻe maongo kiate kinautolu ʻa e tuʻu maʻu ʻa e Kau Fakamoʻoni ʻa Sihová. Naʻe pehē ʻe ha tangata pōpula ʻAositulia: “ʻOku ʻikai ke nau ʻalu ʻi he taú. ʻE laka ange ke tāmateʻi kinautolu ʻi haʻanau tāmateʻi ha taha kehe.”
Ko fē ʻa e feituʻu naʻa nau mate aí?
Kemi fakamamahi: Ko e tokolahi taha ʻo e Kau Fakamoʻoni ʻa Sihová naʻa nau mate ʻi he ngaahi kemi fakamamahí. Naʻe tuku pilīsone kinautolu ʻi he ngaahi kemi hangē ko Auschwitz, Buchenwald, Dachau, Flossenbürg, Mauthausen, Neuengamme, Niederhagen, Ravensbrück, mo Sachsenhausen. ʻI Sachsenhausen ʻataʻatā pē, ʻoku fakafuofua ki he kau mate ʻe toko 200 ʻo e Kau Fakamoʻoni ʻa Sihová kuo ʻosi fakapapauʻí.
Pilīsone: Ko e Kau Fakamoʻoni ʻe niʻihi naʻe fakamamahiʻi ki he mate ʻi he ngaahi pilīsoné. Naʻe mate ʻa e niʻihi ko e tupu mei he ngaahi lavea naʻe hoko lolotonga hono fakaʻeke kinautolú.
Feituʻu faiʻanga tāmate: Ko e Kau Fakamoʻoni ʻa Sihová naʻe lahi taha hono tāmateʻi kinautolú ʻi he pilīsone Berlin-Plötzensee, Brandenburg, mo Halle/Saale. Tānaki atu ki ai, kuo fakamoʻoniʻi mo e ngaahi feituʻu kehe ʻe 70 ʻa ia naʻe tāmateʻi ai ʻa e Kau Fakamoʻoní.
Faʻahinga naʻe tāmateʻí
Hingoa: Helene Gotthold
Feituʻu faiʻanga tāmate: Plötzensee (Pēlini)
Ko Helene, ko ha uaifi mo e faʻē ki he fānau ʻe toko ua, naʻe tuʻo lahi hono puke iá. ʻI he 1937, lolotonga hono fakaʻekeʻeke ia ʻe taha, naʻe fuʻu kovi hono ngaohikoviʻi iá ʻo mate ai ʻene kiʻi pēpē teʻeki fanauʻí. ʻI Tīsema 8, 1944, naʻe tāmateʻi ia ʻaki hono tuʻusi hono ʻulú ʻi he pilīsone Plötzensee ʻi Pēlini.
Hingoa: Gerhard Liebold
Feituʻu faiʻanga tāmate: Brandenburg
Ko e taʻu 20 ko Gerhard naʻe tuʻusi hono ʻulú ʻi Mē 6, 1943, ʻi he hili ʻa e taʻu ʻe ua mei hono tuʻusi ʻa e ʻulu ʻene tamaí ʻi he pilīsone tatau. Naʻá ne tohi ʻo lea māvae ki hono fāmilí mo e taʻahine naʻá ne teu mali mo iá: “Ka ne taʻeʻoua ʻa e mālohi ʻo e ʻEikí, naʻe ʻikai mei malava ke u fou ʻi he ʻalunga ko ení.”
Hingoa: Rudolf Auschner
Feituʻu faiʻanga tāmate: Halle/Saale
Ko Rudolf naʻá ne taʻu 17 pē ʻi he taimi naʻe tuʻusi ai hono ʻulú ʻi Sepitema 22, 1944. ʻI heʻene tohi ʻo lea māvae ki heʻene faʻeé, naʻá ne tohi: “Ko e fanga tokoua tokolahi kuo nau fou ʻi he ʻalunga ko ení, pea te u fai pehē foki mo au.”
a Hitler’s Hangman: The Life of Heydrich, peesi 105.