Ko e Hā ʻOku Leaʻaki ʻe he Tohi Tapú ʻo Fekauʻaki mo e Fakatamaki Fakanatulá

Tali ʻa e Tohi Tapú

ʻOku ʻikai fakatupunga ʻe he ʻOtuá ʻa e ngaahi fakatamaki fakanatula ʻoku hoko ʻi he ʻaho ní, ka ʻokú ne tokanga ʻo fekauʻaki mo e kakai ʻoku uesia kinautolú. Ko e fakatamaki fakanatulá ko e taha ia ʻo e ngaahi tupuʻanga ʻo e faingataʻaʻiá ʻe toʻo ʻosi atu ia ʻe he Puleʻanga ʻo e ʻOtuá. Ka ʻi he taimí ni, ʻoku ʻomai ʻe he ʻOtuá ha fakafiemālie ki he faʻahinga ʻoku uesia ʻe he fakatamaki fakanatulá.​—2 Kolinitō 1:3.

• Ko e hā ʻoku lava ke tau fakapapauʻi ai ko e fakatamaki fakanatulá ʻoku ʻikai ko e tautea ia mei he ʻOtuá?

• Ko e fakatamaki fakanatulá ko ha fakaʻilonga ia ʻo e ngaahi ʻaho fakaʻosí?

• ʻE anga-fēfē hono tokoniʻi ʻe he ʻOtuá ʻa e faʻahinga ʻoku uesia ʻe he fakatamakí?

• ʻE lava ʻe he ngaahi tefitoʻi moʻoni ʻa e Tohi Tapú ʻo tokoniʻi kitautolu ke tau mateuteu ki he fakatamaki fakanatulá?

• Ngaahi veesi Tohi Tapu ke fakafiemālieʻi ʻa e faʻahinga ʻoku uesia ʻe he fakatamaki fakanatulá

Ko e hā ʻoku lava ke tau fakapapauʻi ai ko e fakatamaki fakanatulá ʻoku ʻikai ko e tautea ia mei he ʻOtuá?

Ko e fakatamaki fakanatulá ʻoku kehe ia mei hono ngāueʻaki ʻe he ʻOtuá ʻa e ngaahi mālohi ʻo natulá, hangē ʻoku hā ʻi he Tohi Tapú.

• Ko e fakatamaki fakanatulá ʻoku tāmate tavale. ʻI hono kehé, ko e ngaahi ngāue fakaefakamaau ʻa e ʻOtuá ʻoku hā ʻi he Tohi Tapú naʻe fakaʻauha pē ʻa e kau fulikivanú. Ko e fakatātaá, ʻi hono fakaʻauha ʻe he ʻOtuá ʻa e ongo kolo ʻo e kuonga muʻá ʻa Sōtoma mo Komolá, naʻá ne fakahaofi ai ʻa e tangata lelei ko Loté mo hono ongo ʻofefiné. (Sēnesi 19:29, 30) ʻOku ʻiloʻi ʻe he ʻOtuá ʻa e loto ʻo e faʻahinga tāutaha ʻi he taimi ko iá pea fakaʻauha pē ʻa e faʻahinga fulikivanú.​—Sēnesi 18:23-​32; 1 Samiuela 16:7.

• ʻOku faʻa hoko ʻa e fakatamaki fakanatulá ʻo ʻikai ha fakatokanga. Ka ʻi he tafaʻaki ʻe tahá, naʻe ʻoange ʻe he ʻOtuá ha fakatokanga ki he faʻahinga fulikivanú ki muʻa ke ne tukuange atu ʻa e mālohi ʻo natulá ke tauteaʻi ʻaki kinautolu. Ko e faʻahinga naʻa nau tokanga ki he ngaahi fakatokangá naʻa nau maʻu ha faingamālie ke hao mei he fakatamakí.​—Sēnesi 7:​1-5; Mātiu 24:38, 39.

• ʻI he tafaʻaki ʻe taha, ʻoku kaunga ʻa e tangatá ki hono fakatupunga ʻa e fakatamaki fakanatulá. ʻO anga-fēfē? ʻAki hono maumauʻi ʻa e ngaahi ʻātakai ʻo natulá pea mo langa ʻi he ngaahi feituʻu ʻoku laveangofua ʻi he mofuiké, tāfea mo e ngaahi matangi mālohí. (Fakahā 11:18) ʻOku ʻikai totonu ke tukuakiʻi ʻa e ʻOtuá ki he ngaahi fili ʻa e tangatá.​​—Palōveepi 19:3.

Ko e fakatamaki fakanatulá ko ha fakaʻilonga ia ʻo e ngaahi ʻaho fakaʻosí?

ʻIo, ʻoku fakahaaʻi mai ʻe he ngaahi kikite Fakatohitapú ʻe ʻi ai ha fakatamaki ʻi he lolotonga ʻo e “fakaʻosiʻosi ʻo e fokotuʻutuʻu lolotongá” pe ko e “ngaahi ʻaho fakaʻosí.” (Mātiu 24:3; 2 Tīmote 3:1) Ko e fakatātaá, ʻi he fekauʻaki mo hotau taimí, naʻe pehē ai ʻe Sīsū: “Pea ʻe ʻi ai ʻa e ngaahi nounou fakameʻatokoni mo e ngaahi mofuike ʻi he feituʻu ki he feituʻu.” (Mātiu 24:7) ʻE vavé ni, ke toʻo ʻosi atu ʻe he ʻOtuá mei he māmaní ʻa e ngaahi tupuʻanga ʻo e langá, mamahí, kau ai mo e fakatamaki fakanatulá.​—Fakahā 21:​3, 4.

ʻE anga-fēfē hono tokoniʻi ʻe he ʻOtuá ʻa e faʻahinga ʻoku uesia ʻe he fakatamakí?

• ʻOku fakafiemālieʻi ʻe he ʻOtuá ʻa e faʻahinga ʻoku uesiá fakafou ʻi heʻene Folofolá, ʻa e Tohi Tapú. ʻOku fakapapauʻi mei ʻe he Tohi Tapú ʻoku tokanga mai ʻa e ʻOtuá pea ʻokú ne ongoʻi kitautolu ʻi he taimi ʻoku tau faingataʻaʻia aí. (ʻAisea 63:9; 1 Pita 5:​6, 7) ʻOku toe fakahaaʻi ai ʻene talaʻofa ki ha taimi ʻe ʻikai ke toe ʻi ai ai ha fakatamaki fakanatula.​—Sio ki he “Ngaahi veesi Tohi Tapu ke fakafiemālieʻi ʻa e faʻahinga ʻoku uesia ʻe he fakatamaki fakanatulá.”

• Tokoni ʻa e ʻOtuá ki he faʻahinga ʻoku uesia ʻe he fakatamakí fakafou ʻi heʻene kau lotú. ʻOku ngāueʻaki ʻe he ʻOtuá ʻene kau lotu ʻi he māmaní ke faʻifaʻitaki ki he faʻifaʻitakiʻanga ʻa Sīsuú. Naʻe kikiteʻi ko Sīsū te ne fakafiemālieʻi ʻa e “kau loto-mafesí” mo “kinautolu kotoa ʻoku mamahi.” (ʻAisea 61:​1, 2) ʻOku feinga mālohi ʻa e kau lotu ʻa e ʻOtuá ke nau fai ʻa e meʻa tatau.​—Sione 13:15.

  ʻOku toe ngāueʻaki ʻe he ʻOtuá ʻene kau lotú ke ʻoatu ʻa e tokoni ʻaonga ki he faʻahinga ʻoku uesia ʻe he fakatamaki fakanatulá.​—Ngāue 11:28-30; Kalētia 6:​10.

ʻE lava ʻe he ngaahi tefitoʻi moʻoni ʻa e Tohi Tapú ʻo tokoniʻi kitautolu ke tau mateuteu ki he fakatamaki fakanatulá?

ʻIo. Neongo ʻoku ʻikai fakataumuʻa ʻa e Tohi Tapú ki ha tohi fakahinohino ki ha fakatamaki, ka ʻoku ʻi ai ha ngaahi tefitoʻi moʻoni ʻe lava ke hoko ko ha tokoni. Ko e fakatātaá:

• Teuteu ki muʻa ki ha fakatamaki. “Ko e tokotaha fakapotopotó ʻokú ne sio ki he fakatuʻutāmakí peá ne toi,” ko e lau ia ʻa e Tohi Tapú. (Palōveepi 22:3) ʻOku tau hoko ʻo poto ʻi hono fai ha palani tokamuʻa ki ha fakatamaki. Ko e ngaahi palani peheé ʻe kau nai ai ʻa e mateuteu mo ha kiʻi naunau ki ha fakatamaki fakatuʻupakē pea talanoaʻi ʻe he fāmilí ʻa e meʻa ke fai ʻi he hoko ʻa e fakatamakí.

• Fakamahuʻingaʻi ange hoʻo moʻuí ʻi he koloá. ʻOku fakahaaʻi ʻe he Tohi Tapú: “He kuo ʻikai ke tau ʻomai ha meʻa ki he māmaní, pea heʻikai lava ke tau ʻave mei ai ha meʻa.” (1 Tīmote 6:​7, 8) ʻOku fiemaʻu ke tau loto-lelei ke tukuange atu hotau ʻapí mo e koloá koeʻuhi ke hao mei he fakatamakí. ʻOku fiemaʻu ke tau manatuʻi ko ʻetau moʻuí ʻoku mahuʻinga mamaʻo ange ia ʻi ha toe meʻa fakamatelie.​—Mātiu 6:​25.