ʻOku Fekauʻaki ʻa e Tohi Tapú mo e Hā?
Tali ʻa e Tohi Tapú
Ko e Tohi Tapú ko hano fakatahatahaʻi ia ʻo e ngaahi tohi toputapu iiki ʻe 66. Naʻe hiki eni ʻi ha vahaʻa taimi ko e taʻu nai ʻe 1,600. ʻOku maʻu ʻi he Tohi Tapú ha pōpoaki fakaʻotua—“ko e folofola ia ʻa e ʻOtuá.”—1 Tesalonaika 2:13.
ʻI he kupu ko ení
Ngaahi moʻoni fekauʻaki mo e Tohi Tapú
Ko hai naʻá ne hiki ʻa e Tohi Tapú? Ko e ʻOtuá ko e Faʻutohi ia ʻo e Tohi Tapú, ka naʻá ne ngāueʻaki ʻa e kau tangata kehekehe ʻe toko 40 nai ke hiki ia. Ko e niʻihi ʻi he kau tangata ko ení ko Mōsese, Tuʻi Tēvita, Mātiu, Maʻake, Luke mo Sione.a Naʻe ʻai ʻe he ʻOtuá ʻene ngaahi fakakaukaú ki he ʻatamai ʻo e kau hiki-tohí ke nau hiki ʻene pōpoakí.—2 Tīmote 3:16.
Ke fakatātāʻí: Kapau ʻe fekauʻi ʻe ha tangata pisinisi ʻene sekelitalí ke hiki ʻene pōpoakí, naʻa mo e poini tefito ʻo e pōpoakí, ʻe kei hoko pē ʻa e tangata pisinisí ko e faʻutohi ʻo e pōpoakí. ʻI he tuʻunga meimei tatau, neongo naʻe ngāueʻaki ʻe he ʻOtuá ʻa e kau tangata ke nau hiki ʻene pōpoakí, ko ia ʻa e Faʻutohi moʻoni ʻo e Tohi Tapú.
ʻOku ʻuhinga ki he hā ʻa e foʻi lea “Tohi Tapu”? Ko e “Tohi Tapu” ʻoku haʻu ia mei he foʻi lea faka-Kalisi ko e biblia, ʻo ʻuhingá ko e “ngaahi tohi iiki.” ʻI he faai mai ʻa e taimí, naʻe ngāueʻaki ʻa e biblia ke fakamatalaʻiʻaki ʻa e ngaahi tohi iiki ange ʻoku faʻuʻaki ʻa e Tohi Tapú.
Naʻe hiki ʻanefē ʻa e Tohi Tapú? Naʻe kamata hono hiki ʻa e Tohi Tapú ʻi he 1513 K.M. pea naʻe kakato ia hili ha taʻu nai ʻe 1,600 ki mui ai, fakafuofua ki he 98 T.S.
ʻOku ʻi fē ʻa e muʻaki Tohi Tapú? ʻOku ʻikai ke kei maʻu ha ngaahi muʻaki tohi Tohi Tapu ʻi he ʻahó ni. Koeʻuhí naʻe ngāueʻaki ʻe he kau hiki Tohi Tapú ʻa e ngaahi naunau ʻauhangofua naʻe ala maʻu ʻi he taimi ko iá, hangē ko e pepailó mo e kiliʻimanú. Neongo ia, naʻe hiki fakamākukanga ʻe ha kau sikalaipe pōtoʻi ha ngaahi hiki-tatau ʻo e Tohi Tapú ʻi he laui senituli, ʻo fakatolonga ia ki he kau lautohi ʻi he kahaʻú.
Ko e hā ʻa e “Fuakava Motuʻa” mo e “Fuakava Foʻou”? Ko e Fuakava Motuʻá ʻokú ne fakamatalaʻi ʻa e konga ʻo e Tohi Tapú naʻe hiki ʻo fakatefito ʻi he lea faka-Hepeluú,b ʻoku toe ui ia ko e Ngaahi Konga Tohi Tapu Faka-Hepelū. Ko e Fuakava Foʻoú ʻoku ʻuhinga ia ki he konga naʻe hiki ʻi he lea faka-Kalisí, ʻoku ui ia ko e Ngaahi Konga Tohi Tapu Faka-Kalisi Kalisitiane. Ko e ongo konga ko ení ʻoku fakatahaʻi ia ʻi ha tohi pē ʻe taha, ʻa ia ʻoku toe ui foki ko e Tohi Tapu Māʻoniʻoni.c
Ko e hā ʻoku ʻi he Tohi Tapú? ʻOku maʻu ʻi he ngaahi konga kehekehe ʻo e Tohi Tapú ʻa e hisitōlia, ngaahi lao, kikite, taʻanga, palōveepi, ngaahi hiva, mo e ngaahi faitohi.—Sio ki he “Lisi ʻo e ngaahi tohi ʻi he Tohi Tapú.”
ʻOku fekauʻaki ʻa e Tohi Tapú mo e hā?
ʻOku kamataʻaki ʻa e Tohi Tapú ha fakamatala nounou fekauʻaki mo hono fakatupu ʻe he ʻOtua Māfimafi-Aoniú ʻa e langí mo e māmaní. Fakafou ʻi he Tohi Tapú, ʻoku fakahaaʻi mai ai ʻe he ʻOtuá ʻa hono huafá, ko Sihova, ʻo fakaafeʻi ʻa e faʻahinga ʻo e tangatá ke nau hoko ʻo ʻiloʻi ia.—Saame 83:18.
ʻOku fakamatalaʻi ʻi he Tohi Tapú kuo fakafofongahalaʻi ʻa e ʻOtuá, pea ʻoku fakahaaʻi mai ai ʻa e founga te ne fakafoki mai ai hono ongoongó.
ʻOku fakahaaʻi ʻe he Tohi Tapú ʻa e taumuʻa ʻa e ʻOtuá ki he faʻahinga ʻo e tangatá mo e māmaní. ʻOku fakahaaʻi ai ʻa e founga ʻe toʻo atu ai ʻe he ʻOtuá ʻi he kahaʻú ʻa e tupuʻanga ʻo e faingataʻaʻia ʻa e faʻahinga ʻo e tangatá.
ʻOku ʻomai ʻe he Tohi Tapú ʻa e faleʻi ʻaonga ki he moʻui fakaʻahó. Ko e fakatātā ʻo e meʻá ni ʻoku kau ki ai hono:
Tauhi maʻu ha ngaahi vahaʻangatae lelei. “Ko ia ai, ko e ngaahi meʻa kotoa pē ʻoku mou loto ke fai atu ʻe he kakaí kiate kimoutolú, kuo pau foki ke mou fai ia kiate kinautolu.”—Mātiu 7:12.
ʻUhinga: ʻOku totonu ke tau fakafeangai ki he niʻihi kehé ʻi he founga ʻoku tau loto ke nau fakafeangai mai ʻakí.
Fekuki mo e loto-mafasiá. “ʻOua ʻaupito naʻa mou loto-moʻua ʻo fekauʻaki mo e ʻaho hono hokó, he ko e ʻaho hono hokó ʻe ʻi ai pē hono ngaahi loto-moʻua ʻoʻona.”—Mātiu 6:34.
ʻUhinga: ʻI he ʻikai ke hohaʻa tōtuʻa fekauʻaki mo e meʻa ʻe hoko ʻi he kahaʻú, ʻoku lelei ke tau tokangataha pē ki he moʻui ʻi he ʻaho ko iá.
Fiefia ʻi he nofo malí. “Kuo pau ki he tokotaha taki taha ʻo kimoutolu ke ne ʻofa ki hono uaifí ʻo hangē pē ko ʻene ʻofa ʻiate iá; ʻi he tafaʻaki ʻe tahá, ʻoku totonu ki he uaifí ke ne fakaʻapaʻapa loloto ki hono husepānití.”—ʻEfesō 5:33.
ʻUhinga: Ko e ʻofá mo e fakaʻapaʻapá ʻoku mātuʻaki mahuʻinga ia ki ha nofo mali lavameʻa.
Kuo liliu ʻa e Tohi Tapú?
ʻIkai. Kuo fakahoa fakalelei ʻe he kau mataotaó ʻa e ngaahi muʻaki tatau tohinima ʻo e Tohi Tapú mo e Tohi Tapu ʻi he ʻaho ní pea ʻiloʻi kuo ʻikai liliu ʻa e muʻaki pōpoaki ʻo e Tohi Tapú. ʻOku moʻoni eni—he ko ē, kapau naʻe loto ʻa e ʻOtuá ke lau mo mahinoʻi ʻene pōpoakí, ʻikai ʻoku ʻuhinga lelei ke ne fakapapauʻi ke ʻoua ʻe liliu ʻene pōpoakí?d—ʻAisea 40:8.
Ko e hā ʻoku lahi ai ʻa e ngaahi liliu ʻo e Tohi Tapú?
Ko e tokolahi taha ʻo e kau lautohi ʻi onopōní ʻoku ʻikai lava ke nau mahinoʻi ʻa e ngaahi lea motuʻa ʻo e Tohi Tapú. Neongo ia ʻoku ʻi ai ha “ongoongo lelei” ‘i he Tohi Tapú ki he “puleʻanga mo e matakali mo e lea . . . kotoa pē.” (Fakahā 14:6) ʻI he ʻuhinga ko iá, ʻoku fiemaʻu ʻe he kakaí ha liliu ʻo e Tohi Tapú ʻi ha lea ʻa ia ʻoku nau mahinoʻi koeʻuhí ke lava ke nau lau mo mahinoʻi lelei ange ʻa e pōpoaki ʻa e ʻOtuá.
ʻOku fakahaaʻi mai ʻe he ngaahi liliu Tohi Tapú ʻa e founga liliu tefito ʻe tolu:
Ko hono liliu fakafoʻilea ki he ofi taha ʻe ala lavá.
Ko hono liliu ʻa e fakakaukaú ʻo ngāueʻaki ʻa e ngaahi lea ʻokú ne fakafofongaʻi ʻa e ʻuhinga ʻo e kupuʻi lea ʻi he muʻaki leá.
Ko hono liliu ʻo ngāueʻaki ha ngaahi lea kehe, ʻo fakataumuʻa ke fakafiefia ange hono laú. Neongo ia, ko e liliu ko ení ʻe lava ke ne toʻo ʻa e ʻuhinga moʻoni ʻo e fakamatalá.
Ko ha liliu Tohi Tapu lelei te ne ʻai ke mafamafatatau ʻa e liliu fakafoʻileá mo e lea ʻi onopōní ke fakahaaʻi tonu mātē ʻa e pōpoaki ʻa e ʻOtuá ki he faʻahinga ʻo e tangatá.e
Ko hai naʻá ne fili ʻa e meʻa ke fakakau ʻi he Tohi Tapú?
ʻI he tuʻunga ko e Faʻutohi, ko e ʻOtuá naʻá ne fili ʻa e meʻa ke fakakau ʻi he Tohi Tapú. Naʻá ne ʻuluaki fili ʻa e puleʻanga ʻo ʻIsileli ʻo e kuonga muʻá ke “tuku kiate kinautolu ʻa e ngaahi foʻi folofola toputapu ʻa e ʻOtuá,” ʻo ngāue ko e kau maluʻi ʻo e Ngaahi Konga Tohi Tapu Faka-Hepelū.—Loma 3:2.
ʻOku ʻi ai ha ngaahi tohi kuo mole mei he Tohi Tapú?
ʻIkai. ʻOku kakato pē ʻa e Tohi Tapú; ʻoku ʻikai ha ngaahi tohi ʻi ai ʻoku “mole.” Ko e niʻihi ʻoku nau taukaveʻi nai ʻoku ʻi ai ʻa e ngaahi tohi pau ʻi he kuonga muʻá naʻe fuoloa hono fūfūʻí ʻoku totonu ke fakakau ʻi he Tohi Tapú.f Neongo ia, ʻoku ʻi he Tohi Tapú ʻa e fakamoʻoni alafalalaʻangá ki heʻene kakató. (2 Tīmote 1:13) ʻI hono ngāueʻaki ʻa e sīpinga ko ení, ko e ngaahi tohi Tohi Tapu ʻoku fakamānavaʻi ʻe he ʻOtuá ʻoku nau fekaukauʻaki. Heʻikai lava ke leaʻaki eni ki he kotoa ʻo e ngaahi tohi ʻi he kuonga muʻá ʻa ia ʻoku taukaveʻi ʻe he niʻihi ʻoku kau ʻi he Tohi Tapú.g
Founga hono kumi ʻa e ngaahi veesi ʻi he Tohi Tapú
Lisi ʻo e ngaahi tohi ʻi he Tohi Tapú
a Ke maʻu ha lisi kakato ʻo e kotoa ʻa e ngaahi tohi ʻi he Tohi Tapú, tokotaha naʻá ne hiki iá mo e taimi naʻa nau hiki ai iá, kātaki ʻo sio ki he “Tēpile ʻo e Ngaahi Tohi ʻo e Tohi Tapú.”
b Ko e ngaahi konga iiki ʻo e Tohi Tapú naʻe hiki ia ʻi he lea faka-Alameá, ko ha lea naʻe fekauʻaki vāofi mo e lea faka-Hepeluú.
c Ko e kau lau Tohi Tapu tokolahi ʻoku nau saiʻia ange ʻi he kupuʻi lea “Ngaahi Konga Tohi Tapu Faka-Hepelū” mo e “Ngaahi Konga Tohi Tapu Faka-Kalisi Kalisitiane.” Ko e ongo kupuʻi lea ko ení ʻokú na fakaʻehiʻehi mei hono ʻai ke pehē ko e “Fuakava Motuʻá” ʻoku ʻolokuonga pea naʻe fetongiʻaki ia ʻa e “Fuakava Foʻoú.”
d Sio ki he “Kuo Liliu ʻa e Tohi Tapú?”
e ʻOku fiefia ʻa e tokolahi ʻi hono lau ʻa e Liliu Tohi Tapu ʻo e Māmani Foʻoú ʻo e Tohi Tapu Māʻoniʻoní koeʻuhí ʻoku tonu mātē mo faingofua ke lau ia. Sio ki he “ʻOku Tonu Mātē ʻa e Liliu Tohi Tapu Māmani Foʻoú?”
f Ko e ngaahi tohi ko ení naʻe fakatahaʻi ia ʻo ui ko e ʻApokalifa. Fakatatau ki he Encyclopædia Britannica, “ʻi he ʻū tohi Fakatohitapú, [ko e kupuʻi lea ko ení ʻoku ʻuhinga ia ki he] ngaahi ngāue ʻi tuʻa ʻi he ngaahi tohi fakamānavaʻí”—ʻa ia, ʻi tuʻa ʻi he lisi falalaʻanga ʻo e ngaahi tohi ʻoku kau ʻi he Tohi Tapú.
g Ke ako lahi ange, sio ki he “Ngaahi Kōsipeli Fakaʻapokalifá—Ko ha Ngaahi Moʻoni Fufū Fekauʻaki mo Sīsū?”