Palōveepi 3:5, 6—“Oua Naa Ke Faaki ki Ho Boto Oou”

“Falala kia Sihova ʻaki ho lotó kotoa, pea ʻoua naʻá ke falala ki hoʻo mahino pē ʻaʻaú. ʻI he kotoa ho ngaahi ʻalungá, tokanga kiate ia, pea te ne fakatonutonu ho ngaahi halá.”—Palōveepi 3:5, 6, Liliu Tohi Tapu Māmani Foʻoú.

“Falala kia Jihova aki ho loto kotoa; bea oua naa ke faaki ki ho boto oou. Ke ke fakaogoogo kiate ia i ho hala kotoabe, bea e fakatonutonu eia ho gaahi aluaga.”—Palōveepi 3:5, 6, Paaki Motuʻa.

ʻUhinga ʻo e Palōveepi 3:5, 6

ʻOku totonu ke tau hanga kia Sihovaa ki ha tataki kae ʻikai ko ʻetau fai pē ʻe kitautolu ʻa e ngaahi fili mahuʻingá.

“Falala kia Sihova ʻaki ho lotó kotoa.” ʻOku tau fakahaaʻi ʻoku tau falala ki he ʻOtuá ʻi heʻetau fai ʻa e ngaahi meʻá ʻi heʻene foungá. Kuo pau ke tau falala kakato ki he ʻOtuá, ʻaki hotau lotó kotoa. ʻI he Tohi Tapú, ko e lotó ʻoku faʻa lave ia ki hotau tangata ʻi lotó, ʻoku kau ki ai ʻa e ngaahi ongoʻi, fakaueʻiloto, fakakaukau mo e tōʻonga ʻo ha tokotaha. Ko ia ai, ke falala ki he ʻOtuá ʻaki ʻa e kotoa hotau lotó ʻoku kau ki ai ʻa e meʻa lahi ange ia ʻi heʻetau ngaahi ongoʻí. Ko ha fili ia ʻoku tau fai koeʻuhí ʻoku tau tuipau kakato ʻoku ʻiloʻi ʻe hotau Tokotaha-Fakatupú ʻa e meʻa ʻoku lelei taha kiate kitautolú.—Loma 12:1.

“ʻOua naʻá ke falala ki hoʻo mahino pē ʻaʻaú.” ʻOku fiemaʻu ke tau falala ki he ʻOtuá koeʻuhí heʻikai malava ke tau falala pē ki heʻetau mahinó he ʻoku tau taʻehaohaoa. Kapau te tau falala pē kiate kitautolu pe fakaʻatā ʻetau ngaahi ongoʻí ke ne tataki hotau halá, ʻe malava nai ke tau fai ʻa e ngaahi fili ʻe hā lelei ʻi he kamatá ka ʻe faifai atu pē te ne ʻomai ʻa e ngaahi ola kovi. (Palōveepi 14:12; Selemaia 17:9) Ko e poto ʻa e ʻOtuá ʻoku māʻolunga mamaʻo ange ia ʻi haʻatautolú. (ʻAisea 55:8, 9) ʻI he taimi ʻoku tataki ai kitautolu ʻe he ngaahi fakakaukau ʻa e ʻOtuá, ʻe lavameʻa ʻetau moʻuí.—Saame 1:1-3; Palōveepi 2:6-9; 16:20.

“ʻI he kotoa ho ngaahi ʻalungá, tokanga kiate ia.” ʻOku totonu ke tau maʻu ʻa e vakai ʻa e ʻOtuá ʻi heʻene haʻu ki he ngaahi fili mahuʻinga kotoa pē ʻoku tau fai pea ʻi he tafaʻaki kotoa pē ʻo ʻetau moʻuí. ʻOku tau fai eni ʻaki ʻa e lotu kiate ia ki ha tataki pea muimui ki he meʻa ʻoku leaʻaki ʻi heʻene Folofolá ko e Tohi Tapú.—Saame 25:4; 2 Tīmote 3:16, 17.

“Te ne fakatonutonu ho ngaahi halá.” ʻOku fakatonutonu ʻe he ʻOtuá hotau halá ʻaki hono tokoniʻi kitautolu ke moʻui ʻo fakatatau ki heʻene ngaahi tuʻunga māʻoniʻoní. (Palōveepi 11:5) ʻOku tau fakaʻehiʻehi ai mei he ngaahi palopalemá pea maʻu ʻa e moʻui fakafiefia ange.—Saame 19:7, 8; ʻAisea 48:17, 18.

Puipuituʻa ʻo e Palōveepi 3:5, 6

Ko e tohi Tohi Tapu ʻo Palōvēpí ʻoku ʻi ai ʻa e ngaahi tefitoʻi moʻoni ai ki he moʻui fiefia ʻoku fakahōifua ki he ʻOtuá. Ko e ʻuluaki vahe ʻe hivá naʻe tohi ia ko ha faleʻi fakaetamai ki ha foha ʻofeina. ʻOku fakamamafaʻi ʻi he vahe 3 ʻa e ngaahi ʻaonga ʻe maʻu ʻe he faʻahinga ʻoku nau fakamahuʻingaʻi pea ngāueʻaki ʻa e poto mei hotau Tokotaha-Fakatupú.—Palōveepi 3:13-26.