Maʻuʻanga Fakamatala ki he Polokalama Ngāue ki he Fakataha Moʻuí mo e Ngāue Fakafaifekaú
© 2025 Watch Tower Bible and Tract Society of Pennsylvania
MĒ 5-11
KOLOA MEI HE FOLOFOLA ʻA E ʻOTUÁ PALŌVEEPI 12
Ko e Ngāue Mālohí ʻOku Fakakoloa
Ko ha ʻUlungaanga Fakaʻotua ʻOku Mahuʻinga Ange Ia ʻi he Taiamoní
ʻE mātuʻaki faingataʻa nai ki he niʻihi ʻo e kau sevāniti ʻa Sihová ke nau maʻu ha paʻanga feʻunga ki heʻenau ngaahi fiemaʻu tefitó. Kae kehe, ʻi he ʻikai ke nau feinga ke kumi ki ha fakaleleiʻanga faingofua kae taʻefaitotonú, ʻoku nau ngāue mālohi mo tōtōivi. ʻI heʻenau fai ení, ʻoku fakahaaʻi atu ai ko e ngaahi ʻulungaanga fakaofo ʻa e ʻOtuá ʻo kau ai ʻa e faitotonú, ʻoku mahuʻinga ange ia kiate kinautolu ʻi ha faʻahinga meʻa fakamatelie pē.—Pal. 12:24; ʻEf. 4:28.
Founga ke Fiefia Ai ʻi he Ngāue Mālohí
Ko e foʻi fehuʻi fakaʻosí ʻoku tautefito ʻa e lelei ke fakakaukau ki aí, he ko e ngāué ʻoku mātuʻaki fakafiemālie ʻi heʻetau sio ki he maʻu ʻaonga mei ai ʻa e kakai kehé. Ko Sīsū tonu naʻá ne pehē: “ʻOku ʻi ai ʻa e fiefia lahi ange ʻi he foaki atú ʻi he maʻu maí.” (Ngāue 20:35) ʻIkai ngata pē ʻi he maʻu ʻaonga fakahangatonu ʻa e faʻahinga ko iá mei heʻetau ngaahi ngāué—hangē ko e kau kasitomaá mo e kau pule ngāué—ʻoku ʻi ai ʻa e niʻihi kehe ʻoku nau maʻu ʻaonga mei heʻetau ngāue mālohí. ʻOku kau ʻi he faʻahingá ni ʻa e ngaahi mēmipa ʻo hotau fāmilí mo e faʻahinga ʻoku masivá.
Ngaahi mēmipa ʻo hotau fāmilí. ʻI he taimi ʻoku ngāue mālohi ai ha ʻulu ʻo e fāmilí ke tokonaki ki he ngaahi mēmipa ʻo hono fāmilí, ʻokú ne ʻai ke nau maʻu ʻaonga ʻo ʻikai siʻi hifo ʻi he founga ʻe ua. ʻUluakí, ʻokú ne fakapapauʻi ʻoku nau maʻu ʻa e ngaahi meʻa fakamatelie ki he moʻuí—ʻa e meʻakai, vala, mo e maluʻanga. ʻOkú ne fakahoko ai ʻa hono fatongia kuo ʻomai ʻe he ʻOtuá ke ne “fai ha tokonaki maʻá e faʻahinga ʻoku ʻoʻoná tonu.” (1 Tīmote 5:8) Uá, ko ha tokotaha ngāue paʻanga tōtōivi ʻokú ne akoʻi ai ʻaki ʻene faʻifaʻitakiʻangá ʻa e mahuʻinga ʻo e ngāue mālohí. “Ko ʻeku tamaí ko ha faʻifaʻitakiʻanga lelei ia ʻo e tokotaha ʻokú ne maʻu ʻa e fakakaukau lelei ki he ngāué,” ko e lau ia ʻa Shane, naʻe lave ki ai ʻi he kupu ki muʻá. “Ko ha tangata faitotonu ia ʻa ia kuó ne ngāue mālohi ʻi he kotoa ʻo ʻene moʻuí, ʻi he tuʻunga lahi ko ha tufunga. Mei heʻene faʻifaʻitakiʻangá, kuó u ako ai ʻa e mahuʻinga ʻo e ngāue ʻaki ho nimá, ʻi hono faʻu ʻo e ngaahi meʻa ʻa ia ʻe ʻaonga ke ngāueʻaki ʻe he kakai kehé.”
Faʻahinga ʻoku masivá. Naʻe faleʻi ʻa e ʻapositolo ko Paulá ki he kau Kalisitiané ke nau “ngāue mālohi . . . ke [nau] maʻu ha meʻa ke vahevahe atu ki ha taha ʻoku masiva.” (ʻEfesō 4:28) Ko e moʻoni, ʻi he taimi ʻoku tau ngāue mālohi ai ke tokonaki maʻatautolu pea mo hotau fāmilí, te tau ʻi ha tuʻunga foki ai ke tokoni ki he faʻahinga ʻoku siʻi ʻa e meʻa ʻoku nau maʻú. (Palōveepi 3:27) Ko ia ko e ngāue mālohí ʻoku tau malava ai ke aʻusia ʻa e fiefia lahi ange ʻi he foaki atú.
Makakoloa Fakalaumālie
ijwyp kupu 95 ¶10-11
ʻOku Mālohi Fēfē ʻEku Kātekina ʻa e Ngaahi Meʻá?
● Maʻu ʻa e vakai totonu ki hoʻo ngaahi palopalemá. Ako ke fakafaikehekeheʻi ʻa e ngaahi palopalema lalahí mo e ngaahi meʻa īkí. ʻOku pehē ʻe he Tohi Tapú: “Ko e valé ʻokú ne fakahaaʻi vave ʻa ʻene ʻitá, ka ko e tangata fakapotopotó ʻokú ne tukunoaʻi ha fakalotomamahi.” (Palōveepi 12:16) ʻOku ʻikai fiemaʻu ia ke uesia koe ʻe he palopalema kotoa pē.
“ʻI he ʻapiakó, naʻe lāunga ʻa e tamaikí ʻi he fanga kiʻi meʻa laulaunoá ʻo hangē ia ʻoku lahi fēfeé. Naʻe toe ʻoatu ʻe honau ngaahi kaungāmeʻá ha ngaahi fakakaukau ʻi he mītia fakasōsialé—pea naʻe ʻai heni ke nau toe ʻāʻāsili ange ai, ʻo fakangatangata ai ʻenau malava ke maʻu ʻa e vakai totonu ki heʻenau ngaahi palopalemá.”—Joanne.
MĒ 12-18
KOLOA MEI HE FOLOFOLA ʻA E ʻOTUÁ PALŌVEEPI 13
ʻOua ʻe Hoko ʻo Takihalaʻi ʻe he “Tūhulu ʻa e Kau Fulikivanú”
it-2 196 ¶2-3
Maama
Ngāueʻaki Fakaefakatātā. ʻOku fakatātaaʻi ʻe he māmá ʻa e meʻa ʻoku fakafalala ki ai ha tokotaha ke fakamaama ʻa hono halá. ʻOku ngāueʻaki ʻe he palōvēpí ʻa e fakatātā ko ení ke fakafaikehekeheʻi ʻa e kau māʻoniʻoní mo e kau fulikivanú, ʻo pehē: “Ko e maama ʻa e kau māʻoniʻoní ʻoku ulo ngingila, ka ko e tūhulu ʻa e kau fulikivanú ʻe tāmateʻi.” (Pal. 13:9) Ko e maama ʻa e kau māʻoniʻoní ʻoku fakaʻaʻau ke toe ulo ngingila ange, pea neongo pe ko e hā ʻa e lahi ʻo e ulo ngingila ʻa e tūhulu ʻa e kau fulikivanú pe ko e hā ngali lakalakaimonū honau halá, ʻe fakapapauʻi ʻe he ʻOtuá te nau iku ki he fakapoʻuli, ʻa ia ʻe tūkia moʻoni ai honau vaʻé. Ko ha ikuʻanga pehē ʻe hoko mai ia ki he tokotaha ʻokú ne talatukiʻi ʻa ʻene tamaí mo ʻene faʻeé.—Pal. 20:20.
ʻI hono ‘tāmateʻi ʻa e maama’ ʻa ha taha ʻoku ʻuhinga iá ʻoku ʻikai ha kahaʻu kiate ia. ʻOku toe pehē ʻi ha palōveepi ʻe taha: “ʻOku ʻikai ha kahaʻu ki ha taha pē ʻoku anga-kovi; ko e maama ʻa e kau fulikivanú ʻe tāmateʻi.”—Pal. 24:20.
Tauhi ki he ʻOtua ʻo e Tauʻatāiná
3 Kapau naʻe lava ʻa Sētane ʻo fakaʻaiʻai ha ongo meʻa fakaetangata haohaoa ʻe toko ua—taʻelau ai ha ngaahi meʻamoʻui laumālie tokolahi—ke talitekeʻi ʻa e tuʻunga-hau ʻo e ʻOtuá, te ne malava foki ke kākaaʻi mo kitautolu. ʻOku kei tatau ai pē ʻene founga ngāué. ʻOkú ne feinga ke takihalaʻi kitautolu ke tau fakakaukau ko e ngaahi tuʻunga ʻa e ʻOtuá ʻoku fakamafasia mo kaihaʻasi meia kitautolu ʻa e fiefiá mo e nēkeneká. (1 Sio. 5:3) Ko e fakakaukau ko iá ʻe lava ke ne fakahūhū ha mālohi lahi kapau te tau toutou eʻa atu ki ai. “Ko e feohi koví naʻá ne tākiekina lahi au, tautefito koeʻuhí naʻá ku manavahē ʻi hono maʻu ha fakakaukau kehe mei hoku ngaahi toʻumeʻá,” ko e lau ia ʻa e tuofefine taʻu 24 ʻa ia naʻá ne kau ʻi he fehokotaki fakasino taʻetāú. Mahalo kuó ke hokosia ha tenge pehē mei ho toʻumeʻá.
“ʻIlonga ha Fakapoto ʻOku Ne Ngaue Atu, ko e Poto Ai Pe”
Ko ha tokotaha fakapotopoto mo anga-tonu ʻa ia ʻokú ne ngāue fakataha mo e ʻilo moʻoní ʻe tāpuakiʻi. ʻOku fakapapauʻi mai ʻe Solomone kia kitautolu: “Oku kai e he maonioni ke fakamakona hono laumalie: ka e fiekaia ae kete oe agahala.” (Palōveepi 13:25, PM) ʻOku ʻafioʻi ʻe Sihova ʻa e meʻa ʻoku lelei kia kitautolu ʻi ha tafaʻaki pē ʻo e moʻuí—ko ʻetau ngaahi meʻa fakafāmilí, ko hotau vahaʻangatae mo e niʻihi kehé, ko ʻetau ngāue fakafaifekaú, pe ko e taimi ʻoku akonakiʻi ai kitautolú. Pea ʻi hono ngāueʻaki fakapotopoto ʻa e akonaki ʻoku maʻu ʻi heʻene Folofolá, te tau maʻu taʻetoefehuʻia ai ʻa e founga moʻui lelei tahá.
Makakoloa Fakalaumālie
it-2 276 ¶2
ʻOfa
ʻE lava ke takihalaʻi ʻa e ʻofá. Koeʻuhi ko e ngaahi ʻuhinga ko ení, ʻoku hā mahino ʻe toki lava pē ke maʻu ʻe ha tokotaha ʻa e ʻofa ʻoku moʻoni mo tataki leleí ʻi heʻene kumi pea muimui ki he laumālie ʻo e ʻOtuá pea mo e ʻilo ʻoku maʻu ʻi Heʻene Folofolá. Ko e fakatātaá, ʻe ʻofa nai ha mātuʻa ʻi heʻene kiʻi tamá. Ka te ne fakaʻatā nai ʻa e ʻofa ko iá ke hōloa pe takihalaʻi koeʻuhi ko ʻene ʻofa valé, ʻo ʻoange ki he kiʻi tamá ʻa e meʻa kotoa ʻokú ne fiemaʻú. Heʻikai nai ke ne fakahoko hono fatongia ko ha mātuʻa ke akonakiʻi ʻa e kiʻi tamá pea ʻi he taimi ʻe niʻihi ko hono tauteaʻi ia. (Pal. 22:15) Ko hono moʻoní ko e ʻofa lau ko iá ko ha pōlepole nai ia mo e siokita ʻi he lotoʻi fāmilí. ʻOku pehē ʻe he Tohi Tapú ko ha tokotaha pehē ʻokú ne fakahāhā ʻe ia ʻa e fehiʻá kae ʻikai ko e ʻofá, koeʻuhi ʻoku ʻikai ke ne fou ʻi he ʻalunga ʻe fakahaofi ai ʻa e moʻui ʻene kiʻi tamá.—Pal. 13:24; 23:13, 14.
MĒ 19-25
KOLOA MEI HE FOLOFOLA ʻA E ʻOTUÁ PALŌVEEPI 14
Fakakaukauʻi ʻa e Laka Taki Taha ʻi he Hoko ha Fakatamaki
Koloaʻaki ʻa e Meʻaʻofa ʻa e ʻOtuá ko e Moʻuí
10 ʻI he taimi ʻe niʻihi, ʻoku ʻikai malava ke tau kalofi ʻa e ngaahi meʻa ʻokú ne fakamanamanaʻi ʻa e moʻuí. ʻOku tautefito ʻene moʻoni ení ʻi he hoko ʻa e ngaahi fakatamaki fakaenatulá, ngaahi mahaki mafolalahiá mo e ngaahi fepaki fakamālohí. Kae kehe, ʻi he hoko ʻa e ngaahi fakatamaki peheé, ʻe lava ke tau feinga ke fakasiʻisiʻi hono ngaahi nunuʻá pea feinga ke tau hao moʻui ʻaki ʻa e talangofua ki he tuʻutuʻuni fekauʻaki mo e feʻaluʻakí, ko e fetukutuku mei ʻapí pea mo e ngaahi fakangatangata fakavavevave kehe. (Loma 13:1, 5-7) Ko e ngaahi fakamanamana ʻe niʻihi ʻoku tau tomuʻa ʻilo ʻe hoko, ko ia ʻoku lelei ke tau muimui ki ha fakahinohino pē ʻoku ʻomai ʻe he kau maʻu mafai fakalotofonuá ke tokoniʻi kitautolu ke mateuteu ki ha fakatamaki. Ko e fakatātaá, ʻe ʻaonga nai ke tau maʻu ha vai feʻunga pea mo e meʻakai ʻoku tolonga pea mo ha naunau fakafaitoʻo fakavavevave.
11 Ko e hā ʻoku totonu ke tau fai kapau ʻoku mafola ha mahaki pipihi ʻi he feituʻu ʻoku tau nofo aí? ʻOku totonu ke tau talangofua ki he ngaahi fakahinohino ki he tuʻunga fakavavevavé, hangē ko e fanofanó, tauhi ʻa e vā mamaʻó, tui ha meʻa maluʻi ʻi he matá mo e kolonitiní. Ko ʻetau fai tōtōivi ʻa e ngaahi meʻa ko ení ʻoku fakahaaʻi ai ʻetau houngaʻia loloto ʻi he meʻaʻofa ʻa e ʻOtuá ko e moʻuí.
12 Lolotonga ʻa e ngaahi tuʻunga fakavavevavé, ko e fakamatala taʻetotonú ʻe tufaki holo nai ʻi he ngaahi kaungāmeʻá, kaungāʻapí pea ʻi he mītiá. ʻI he ʻikai tui ki he “lea kotoa pē” ʻoku tau fanongo ki aí, ʻoku lelei ke tau fanongo ki he ngaahi maʻuʻanga fakamatala alafalalaʻanga taha mei he puleʻangá mo e potungāue moʻuí. (Lau ʻa e Palōveepi 14:15.) Ko e Kulupu Pulé mo e ngaahi ʻōfisi vaʻá ʻoku nau feinga lahi ke maʻu ʻa e fakamatala totonú ki muʻa ke ʻoatu ʻa e fakahinohino fekauʻaki mo e fakataha ʻa e fakatahaʻangá mo e ngāue fakamalangá. (Hep. 13:17) ʻI he fengāueʻaki fakatahá, ʻoku tau maluʻi ai kitautolu mo e niʻihi kehé mei he fakatuʻutāmakí. Te tau toe pouaki ai ʻa e ongoongo lelei ʻo e fakatahaʻangá ʻi he komiunitií.—1 Pita 2:12.
Hoko ʻo Loto-Toʻa Hangē ko Sātokí
11 Kapau ʻoku kole mai ke tau tokoni ki hotau fanga tokouá ʻi he ngaahi taimi fakatuʻutāmakí, ʻe lava fēfē ke tau fakahāhā ʻa e loto-toʻa hangē ko Sātokí? (1) Muimui ki he fakahinohinó. ʻI he ngaahi tuʻunga peheé, ʻoku mahuʻinga ke tau nofoʻaki fāʻūtaha. Ngāue ʻo fakatatau ki he fakahinohino mei hoʻo ʻōfisi vaʻa fakalotofonuá. (Hep. 13:17) Ko e kau mātuʻá ʻoku totonu ke nau vakaiʻi maʻu pē ʻa e ngaahi fokotuʻutuʻu fakalotofonua ki he mateuteu ki he fakatamakí pea pehē ki he tataki fakaekautaha fekauʻaki mo e meʻa ke fai ʻi he teu ke hoko ha fakatamaki. (1 Kol. 14:33, 40) (2) Loto-toʻa kae fakapotopoto. (Pal. 22:3) Ngāueʻaki ʻa e fakakaukau leleí. ʻOua ʻe fai ha meʻa ʻe hoko ai ha fakatuʻutāmaki ʻikai fiemaʻu. (3) Falala kia Sihova. Manatuʻi ʻoku mahuʻingaʻia loloto ʻa Sihova ʻi hoʻo moʻuí mo ho fanga tokouá. ʻE lava ke ne poupouʻi koe ke ke tokoniʻi ho fanga tokouá ʻi ha founga malu.
Makakoloa Fakalaumālie
it-2 1094
Malava Fakaefakakaukau
Kae kehe, ko e tokotaha ʻokú ne ngāueʻaki ʻene malava fakaefakakaukaú te ne toe hoko nai ko ha meʻa ke fehiʻanekinaʻi. Ko e foʻi fakakaukau eni naʻe fakahaaʻi ʻi he Palōveepi 14:17: “Ko e tangata ʻokú ne fakakaukauʻi ʻa e ngaahi meʻá ʻoku fehiʻanekina.” Ko e meʻa ʻoku faʻa hokó ko e faʻahinga ʻoku ʻikai ke nau toe fakakaukau fakalelei ki he ngaahi meʻá ʻoku ʻikai ke nau saiʻia ʻi he faʻahinga ʻoku nau ngāueʻaki ʻenau mafai fakaefakakaukaú. Pehē foki, ʻoku fehiʻanekinaʻi ʻa e faʻahinga ʻoku nau ngāueʻaki ʻenau fakakaukaú ke fai ʻa e finangalo ʻo Sihová. Hangē ko ia naʻe leaʻaki ʻe Sīsū Kalaisí: “Koeʻuhi ʻoku ʻikai ko ha konga kimoutolu ʻo e māmaní, ka kuó u fili kimoutolu mei he māmaní, ko e ʻuhinga ia ʻoku fehiʻa ai ʻa e māmaní ʻiate kimoutolú.” (Sione 15:19) Ko e moʻoni, ʻi he muʻaki leá ko e foʻi lea “malava fakaefakakaukau” ʻi he Palōveepi 14:27 ʻe lava ke ʻuhinga ia ki he fakakaukau kovi. Ko ia ai, ʻe toe ʻuhinga nai ʻa e konga tohí ʻoku fehiʻanekinaʻi ha tangata ʻokú ne faʻufaʻu ha kovi, pea ʻoku fakalea ʻi he ngaahi liliu ʻe niʻihi: “Pea ʻoku fehiʻanekinaʻi ha tangata ʻoku filioʻi kovi.”—JP, Ro.
MOʻUI KO HA KALISITIANE
Nofoʻaki Mateuteu ki ha Fakatamaki
Nouti ako ʻi he nwtsty ʻo e Māt. 24:8
mamahi: ʻOku ʻuhinga fakafoʻilea ʻa e foʻi lea faka-Kalisí ki he langa lahi ʻoku hokosia ʻi he lolotonga ʻo e fāʻelé. Neongo ʻoku ngāueʻaki heni ʻo ʻuhinga ki he mamahi, langa mo e faingataʻaʻia ʻi ha ʻuhinga fakalūkufua, ʻoku toe ʻuhinga nai ko e ngaahi faingataʻa mo e faingataʻaʻia hangē ha langā fāʻelé ʻa ia naʻe tomuʻa talá ʻe tupulaki ʻi heʻene toutou hokó, lahí, mo hono lōloá ʻi he vahaʻa taimi ki muʻa ʻi he fuʻu mamahi lahi ʻoku lave ki ai ʻi he Māt. 24:21.
g17.5 4
ʻI he Tō ha Fakatamaki—Ngaahi Sitepu ʻe Fakahaofi ai ʻa e Moʻuí
ʻOKU ʻikai ha taha ʻe hao mei he fakatamakí. Ko e mateuteú ʻa e kī mahuʻinga taha ki hoʻo haó. Ka ko e hā ʻoku kau ki he mateuteú?
• Mateuteu fakaeʻatamai. Mahinoʻi ko e ngaahi fakatamakí ʻe hoko pea ko koe mo e faʻahinga ʻokú ke ʻofa aí ʻoku mou tuʻu laveangofua. ʻOku fuʻu tōmui ia ke toki mateuteu hili ʻa e tō ʻa e fakatamakí.
• Feinga ke ʻiloʻi ʻa e ngaahi fakatamaki ʻe lava ke hoko ʻi ho feituʻú. Feinga ke ʻiloʻi ʻa e ngaahi feituʻu toitoiʻangá. Vakaiʻi pe ko e langa ʻo ho falé pea mo hono tuʻuʻangá ʻoku malu ʻi he lelei taha ʻe ala lavá. Fakamavaheʻi ʻa e ngaahi meʻa te ne ala fakatupunga ha vela. Fokotuʻu ha ngaahi meʻa fakatokanga kohu, pea fetongi hono maká ʻo ʻikai siʻi hifo ʻi he tuʻo tahá ʻi he taʻu, pe tuʻo lahi kapau ʻoku malava.
• Teuteu ʻa e ngaahi naunau ki he fiemaʻu fakavavevavé. ʻE lava ke motuhia ʻa e ʻuhilá, vaí, telefoní mo e fefonongaʻakí. Kapau ʻoku ʻi ai haʻo meʻalele, feinga ke ʻutu maʻu pē ia ke ʻoua ʻe toe siʻi hifo ʻi he vaeuá, pea tuku tauhi maʻu pē ʻi ho ʻapí ha meʻakai, vai, mo ha naunau tokoni fakavavevave. Sio ki he puha “ʻOkú Ke Maʻu ʻa e Meʻa ʻOkú Ke Fiemaʻú?”
• ʻAi ke ke maʻu ʻa e fika telefoni ho ngaahi kaungāmeʻá, fakatouʻosi ʻa e faʻahinga ʻoku nofo ofi mo nofo mamaʻo meiate koé.
• ʻAi ha palani ki he taimi holá pea ʻahiʻahiʻi ia. Feinga ke ʻiloʻi ʻa e hūʻanga ki tuʻa ʻi ho falé ʻoku ofi taha kiate koé pehē ki he ngaahi palani fakavavevave ʻa e ʻapiako hoʻo fānaú. Fokotuʻu ha ngaahi feituʻu pau ke fakatahataha ki ai ʻa e fāmilí—hangē ko ha ʻapiako pe ko ha laipeli—ko ha feituʻu ʻoku ofi mo ha feituʻu ʻoku mamaʻo mei homou koló. ʻOku fokotuʻu mai ʻe he kau maʻu mafaí ʻoku totonu ke ke ʻahiʻahi luelue mo ho fāmilí ki he ngaahi feituʻu pau ko iá.
• Palani ke tokoni ki he niʻihi kehé, kau ai ʻa e kau taʻumotuʻá mo e kau mahamahakí.
MĒ 26–SUNE 1
KOLOA MEI HE FOLOFOLA ʻA E ʻOTUÁ PALŌVEEPI 15
Tokoniʻi ʻa e Niʻihi Kehé Ke Nau Maʻu ha Loto-Fiefia
Te Tau ʻEveʻeva ʻi Heʻetau Anga-Tonú!
16 Naʻe fakaafe ʻāunofo ʻa Siope. (Siope 31:31, 32) Neongo ʻoku ʻikai nai ke tau koloaʻia, ʻe lava ke tau “nofo ki he fakaafe ʻāunofo.” (Loma 12:13) ʻE lava ke tau fevahevaheʻaki ha kai maʻamaʻa mo e niʻihi kehé, ʻo manatuʻi “ʻoku lelei ha ʻumu lu ʻoku kiki ʻaki ʻa e ʻofa, ʻi ha pulu fafanga ʻoku ʻomi mo e fehiʻa.” (Pal. 15:17) Ko e kai mo ha kaungā tauhi anga-tonu ʻi ha ʻātakai ʻofá te ne ʻai naʻa mo ha kai maʻamaʻa ke fakafiefia pea te ne ʻai moʻoni ke tau maʻu ʻaonga fakalaumālie.
Ke ‘Toe ʻĀsili Ange’ Hoʻomou Fefakalototoʻaʻakí
16 Fēfē kapau ʻoku ʻikai faingofua kiate koe ke ke tala ki he niʻihi kehé ʻa e anga hoʻo ongoʻi fekauʻaki mo kinautolú? Ko hono moʻoní, ʻoku ʻikai fuʻu faingataʻa ke fakalototoʻaʻi ʻa e niʻihi kehé. ʻAhiʻahi malimali pē ki ha taha. Kapau heʻikai ke malimali mai, ʻe lava pē ke pehē ʻoku ʻi ai nai haʻane palopalema pea ʻokú ne fiemaʻu ke talanoa mo ha taha. Te ke fakafiemālieʻi nai ia ʻaki pē hoʻo fanongo.—Sēm. 1:19.
17 Ko ha kiʻi talavou ko Henri naʻe loto-mamahi lahi ʻi he ʻikai ke toe tauhi kia Sihova ʻa hono kāinga ofi ʻe niʻihi. Ko e taha ʻo e faʻahingá ni ko ʻene tamaí, ʻa ia naʻe hoko ko ha mātuʻa. Naʻe fakatokangaʻi ʻe ha ʻovasia sēketi ʻa e loto-mamahi ʻa Henri peá ne ʻave ia ke na ʻalu ʻo inu kofi. Naʻá ne fanongo lelei ʻi hono fakahāhā ʻe Henri ʻa ʻene ongoʻí. Naʻe ʻiloʻi ʻe Henri ko e founga pē ʻe taha ʻe lava ke ne tokoniʻi ai ʻa hono fāmilí ke nau foki mai ki he moʻoní ko ʻene hanganaki faitōnunga. Naʻe toe fakafiemālieʻi ia ʻi heʻene lau ʻa e Saame 46, Sēfanaia 3:17, mo e Maʻake 10:29, 30.
18 Ko e hā ʻe lava ke tau ako mei he hokosia ʻa Marthe mo Henri? ʻE lava ʻe ha taha pē ʻo kitautolu ʻo fakafiemālieʻi mo fakalototoʻaʻi ha tokoua pe ko ha tuofefine ʻokú ne fiemaʻu ia. Naʻe tohi ʻe Tuʻi Solomone: “Ko ha lea ʻoku leaʻaki ʻi he taimi totonú—hono ʻikai lelei! Ko ha hila fiefia ʻokú ne ʻai ʻa e lotó ke fiefia; ko ha ongoongo ʻoku lelei ʻoku fakatupu moʻui ia ki he huí.” (Pal. 15: 23, 30, fakamatala ʻi lalo.) ʻE lava ke ke fakakaukau ki ha taha ʻokú ke ʻiloʻi ʻokú ne ongoʻi loto-siʻi pe loto-mamahi? Ko e hā ʻoku ʻikai ke ke fai ai ha meʻa faingofua hangē ko e lautohi kiate ia mei he Taua Leʻo pe ko ʻetau uepisaití? Pehē foki, naʻe akoʻi ʻe Paula ko hono hivaʻi fakataha ʻa e ngaahi hiva ʻo e Puleʻangá ʻe lava ke ne ʻai ke tau ongoʻi lelei ange. Naʻá ne tohi: “Hanganaki feakoʻaki mo fefakalototoʻaʻaki ʻaki ʻa e ngaahi saame, ʻa e ngaahi fakahīkihiki ki he ʻOtuá, ʻa e ngaahi hiva fakalaumālie ʻoku hivaʻaki fakataha mo e houngaʻia, ʻo mou hiva mei homou lotó kia Sihova.”—Kol. 3:16; Ngā. 16:25.
Makakoloa Fakalaumālie
ijwbq kupu 39 ¶3
ʻE Lava ke Tali ʻe ha Kalisitiane ha Tokoni Fakafaitoʻo?
2. ʻOku totonu ke u toe kumi ki ha faleʻi fakafaitoʻo ʻe taha pe lahi ange? Ko e “tokolahi ʻa e kau faleʻí” ʻe lava ke ʻaonga, tautefito kapau ko ho tuʻungá ʻoku mafatukituki.—Palōveepi 15:22.
SUNE 2-8
KOLOA MEI HE FOLOFOLA ʻA E ʻOTUÁ PALŌVEEPI 16
Fehuʻi ʻe Tolu ʻOku Taki Atu ki Hono Fai ha Fili Lelei
Fai ʻa e Ngaahi Fili Fakapotopoto Lolotonga ʻa e Kei Talavoú
11 Ko e fiefia lahi tahá ʻoku maʻu ia mei he ngāue kia Sihová. (Pal. 16:20) ʻOku hā ngali ko Palukí, ʻa e sekelitali ʻa Selemaiá, naʻe mole ʻene fiefiá ʻi he taimi ʻe taha ʻi heʻene moʻuí. Naʻe kamata fakakaukau ʻa Paluki fekauʻaki mo e meʻa naʻá ne loto ki aí ʻo lahi ange ia ʻi he meʻa naʻe loto ki ai ʻa Sihová. Naʻe ʻafioʻi eni ʻe Sihova, ko ia naʻá ne tala kia Paluki ke tuku ʻene ‘kumi ha ngaahi meʻa lalahi’ maʻana. Kapau naʻá ne talangofua, te ne hao ʻi hono fakaʻauha ʻa Selusalemá. (Sel. 45:3, 5) Ko e hā te ne ʻai ʻa Paluki ke fiefia angé? Ko hono fai ʻa e meʻa naʻá ne loto ki aí pea ʻauha, pe ko hono fai ʻa e meʻa naʻe loto ki ai ʻa Sihová pea hao ʻi hono fakaʻauha ʻa Selusalemá?—Sēm. 1:12.
12 Ko e tokoua ʻe taha naʻá ne fiefia ʻi he ngāue maʻá e niʻihi kehé ko Ramiro. ʻOkú ne pehē: “ʻOku ou haʻu mei ha fāmili masiva ʻoku nofo ʻi ha kolo ʻi he ʻOtu Moʻunga ʻEnitesí. Ko ia ʻi he taimi naʻe tala mai ai ʻe hoku tokoua lahí te ne totongi ʻeku ako ʻunivēsití, ko ha faingamālie lahi ia. Ka naʻá ku toki papitaiso ko e taha ʻo e Kau Fakamoʻoni ʻa Sihová, pea naʻá ku maʻu ha fakaafe ʻe taha—ko e fakaafeʻi au ʻe ha tāimuʻa ke malanga fakataha mo ia ʻi ha kiʻi kolo siʻisiʻi. Naʻá ku ʻalu ki ai, ako ki he founga ʻo e kosi ʻulú, pea fakalele ha fale kosi ʻulu ke poupouʻi au.” Naʻe tali ʻe he kakai tokolahi ʻi he kolo ko iá ʻa e ako Tohi Tapú. Ki mui ai, naʻe kamata ha fakatahaʻanga foʻou ʻi ha lea fakalotofonua. Ko ia naʻe fili ʻa Ramiro ke kau ʻi he fakatahaʻangá pea kuó ne ngāue ai ʻi he taʻu ʻe hongofulu. ʻOkú ne pehē kuo ʻikai ha ngāue kehe ʻe lava ke ne ʻoange kiate ia ha fiefia lahi ange ʻi hono tokoniʻi ʻa e kakaí ke nau ako ʻa e Tohi Tapú ʻi heʻenau leá tonu.
Kuó Ke Liliu?
ʻOKU tākiekina kotoa kitautolu ʻe hotau ʻātakaí mo e founga naʻe ʻohake ai kitautolú, ʻa ia ko hotau ngaahi kaungāmeʻá, hotau anga fakafonuá, mo e feituʻu ʻoku tau nofo aí. Ko e ʻuhinga ia ʻoku tau saiʻia ai ʻi he ngaahi meʻakai pau mo e ʻuhinga ʻoku tau ʻai vala mo tōʻonga ai ʻi ha founga pau.
2 Ka ʻoku ʻi ai ʻa e ngaahi meʻa ʻe niʻihi ʻoku mahuʻinga ange ia ʻi he founga ʻoku tau ʻai vala aí pe ko e meʻa ʻoku tau kaí. Ko e fakatātaá, ʻi heʻetau tupu haké, naʻe akoʻi kitautolu ʻoku tonu ʻa e ngaahi meʻa ʻe niʻihi pea ʻoku hala ʻa e ngaahi meʻa ʻe niʻihi. Ka ʻoku maʻu ʻe he kakai kehekehe ʻa e ngaahi fakakaukau kehekehe fekauʻaki mo e meʻa ʻoku tonú mo e meʻa ʻoku halá. ʻOku toe tākiekina ʻe hotau konisēnisí ʻa e ngaahi fili ʻoku tau faí. ʻOku pehē ʻe he Tohi Tapú ko e ‘kakai ʻo e ngaahi puleʻangá ʻa ia ʻoku ʻikai te nau maʻu ʻa e laó ʻoku nau faʻa fai fakanatula ʻa e ngaahi meʻa ʻo e laó.’ (Loma 2:14) Ka ʻo kapau ʻoku ʻikai ke ʻi ai ha lao pau mei he ʻOtuá, ʻe lava ke tau muimui pē ki he ngaahi tuʻunga ʻa hotau fāmilí pe muimui ki he ngaahi tuʻunga ʻoku angamaheniʻaki ʻi he feituʻu ʻoku tau nofo aí?
3 ʻOku ʻi ai ʻa e ʻuhinga mahuʻinga ʻe ua ʻoku ʻikai ke fai pehē ai ʻa e kau Kalisitiané. ʻUluakí, ʻoku pehē ʻe he Tohi Tapú: “ʻOku ai ha hala ʻoku matamata totonu ki he tangata, ka ʻoku tuʻulu atu ki he ngaahi hala ʻoku fakatau ki he mate.” (Pal. 16:25) Koeʻuhí ʻoku tau taʻehaohaoa, ʻoku ʻikai malava ke tau tataki haohaoa hotau ngaahi halá. (Pal. 28:26; Sel. 10:23) Uá, ʻoku pehē ʻe he Tohi Tapú ko Sētané ko e “ʻotua ʻo e fokotuʻutuʻu ko ʻení.” ʻOkú ne puleʻi ʻa e ngaahi tuʻunga ʻo e māmaní, ʻa ia, ko e meʻa ʻoku fakakaukau ʻa e māmaní ʻoku tonú pe halá mo e meʻa ʻoku manakoá. (2 Kol. 4:4; 1 Sio. 5:19) Kapau ʻoku tau loto ke ʻai ke fiefia ʻa Sihova pea loto ke ne tāpuakiʻi kitautolu, kuo pau ke tau talangofua ki he meʻa ʻoku leaʻaki ʻi he Loma 12:2.—Lau.
Makakoloa Fakalaumālie
it-1 629
Akonaki
Ola ʻo e Fanongó pea mo Hono Tukunoaʻí. Ko e kau fulikivanú, kau valé pe faʻahinga ʻoku nau taʻetokaʻi ʻa e tuʻunga maʻa fakaeʻulungāngá, ʻoku nau fakahaaʻi ʻenau fakaliliʻa ʻi he akonaki ʻa Sihová ʻaki ʻenau mātuʻaki fakataleʻi fakaʻaufuli ia. (Saame 50:16, 17; Pal. 1:7) Ko e ola kovi ʻo e tōʻonga ko iá ko e toe tānaki atu ki ai ʻa e akonaki lahi ange, pea ʻoku faʻa tautea mamafa ia. Hangē ko e lau ʻa e palōvēpí: “Ko e kau valé ʻoku akonakiʻi pē kinautolu ʻe heʻenau seselé.” (Pal. 16:22) Te nau ʻomi kiate kinautolu ʻa e masiva, fakamā, mahamahaki, pea naʻa mo e mate mutukia. Ko e hisitōlia ʻo e kau ʻIsilelí ʻokú ne fakahaaʻi ʻa e maumau lahi ʻe lava ke hokó. Naʻe ʻikai ke nau tokanga ki he akonaki naʻe ʻoange fakafou ʻi he valoki mo e fakatonutonu naʻe fai ʻe he kau palōfitá. Naʻe akonakiʻi kinautolu ʻe Sihova ʻaki hono toʻo ʻene maluʻí mo e tāpuakí meiate kinautolu, ka naʻe ʻikai ke nau tokanga ki ai. Ko e ikuʻangá, naʻa nau hokosia ʻa e akonaki fakamamahi naʻe tomuʻa talá—naʻe ikunaʻi pea ʻave fakamālohi kinautolu.—Sel. 2:30; 5:3; 7:28; 17:23; 32:33; Hōs. 7:12-16; 10:10; Sēf. 3:2.
SUNE 9-15
KOLOA MEI HE FOLOFOLA ʻA E ʻOTUÁ PALŌVEEPI 17
Maʻu ʻa e Melino ʻi Hoʻo Nofo Malí
g 9/14 11 ¶2
Founga ke Tuku Ange Ai ʻa e ʻItá
Sivisiviʻi faitotonu koe. ʻOku fakahaaʻi ʻe he Tohi Tapú ko e kakai ʻe niʻihi ʻoku nau “hehema ki he ʻitá” mo “hehema ki he ʻita tōlilí.” (Palōveepi 29:22) ʻOkú ke pehē? ʻEke hifo: ‘ʻOku ou hehema ke loto-kona? ʻOku ou vave ke ‘ita? ʻOku ou hehema ke fakatupunga ha fekīhiaki ʻi he fanga kiʻi meʻa īkí?’ ʻOku pehē ʻe he Tohi Tapú “ko e tokotaha ʻokú ne toutou langaʻi ha meʻá ʻokú ne fakamavahevaheʻi ʻa e ngaahi kaungāmeʻa ofí.” (Palōveepi 17:9; Tangata Malanga 7:9) ʻE lava ke hoko foki ia ʻi ha nofo mali. Ko ia kapau ʻokú ke maʻu ha hehema ke ʻita, ʻeke hifo, ‘ʻE lava ke u anga-kātaki ange ki hoku hoá?’—Tefitoʻi moʻoni Fakatohitapu: 1 Pita 4:8.
Fakaleleiʻi ʻo e Ngaahi Palopalemá
1. Fokotuʻu ha taimi ke talanoa ai ki he palopalemá. “Ko e meʻa kotoa ʻoku ai hano taimi, . . . ko e ʻaho ke silongo, mo e ʻaho ke lea.” (Koheleti 3:1, 7) Hangē ko ia ne fakahāhā ʻi he fekīhiaki naʻe lave ki ai ki muʻá, ko e ngaahi palopalema ʻe niʻihi ʻe langaʻi nai ai ha ngaahi ongoʻi mālohi. Kapau ʻe hoko ia, maʻu ha mapuleʻi-kita ke kiʻi taʻofi fakataimi ʻa e fetalanoaʻakí—ke “silongo”—ki muʻa ke fakalalahi ʻa e ʻitá. ʻE lava ke ke fakahaofi ʻa homo vahaʻangataé mei ha maumau lahi kapau te ke tokanga ki he faleʻi ʻa e Tohi Tapú: “Ko hono kamata ha felāuaki ʻoku hangē ia ko ha mama ʻi ha fakatafenga vai, ko ia taʻofi ia ki muʻa ke kamata ha keé.”—Palovepi 17:14, New Century Version.
Kae kehe, ʻoku toe ʻi ai ʻa e “ʻaho ke lea” ai. Ko e ngaahi palopalemá, ʻi heʻene hangē ko e vaó, ʻoku tupu ʻāfaʻafa ia ʻi he taimi ʻoku taʻetokangaʻi aí. Ko ia ʻoua ʻe tukunoaʻi ʻa e palopalemá, ʻi he ʻamanaki ʻe mole atu pē iá. Kapau ʻokú ke kiʻi taʻofi ha fetalanoaʻaki, fakahaaʻi ʻa e fakaʻapaʻapa ki ho hoá ʻaki hono fili ha taimi ʻi he kahaʻu vave maí ʻa ia te mo talanoa ai fekauʻaki mo e palopalemá. Ko ha palōmesi pehē ʻe lava ke ne tokoniʻi fakatouʻosi ai kimoua ke ngāueʻaki ʻa e fakakaukau ʻi he akonaki ʻa e Tohi Tapú: “ʻOua ʻe tuku ke to ʻa e laʻa ʻoku mou kei mamahi [pe ʻita].” (Efeso 4:26) Ko e moʻoni, ʻe fiemaʻu leva ke ke fai ki hoʻo palōmesí.
Makakoloa Fakalaumālie
it-1 790 ¶2
Mata
Ko e fakafōtunga ʻo e matá ʻoku lava ke ne fakahaaʻi mālohi ʻa e ngaahi ongoʻi ʻa ha tokotaha. Te ne fakahaaʻi nai ʻa e ongoʻi fakaʻofaʻia pe ʻikai (Teu. 19:13); te ne ‘fakakuitaha’ pe ‘kakamo’ ʻi he manuki pe ʻi he faʻufaʻu taʻemoʻoni. (Saame 35:19; Pal. 6:13; 16:30) Ko ha tokotaha ʻoku ʻikai ke ne loto ke sio pe ʻoku ʻikai ke ne holi ke fai ha ngāue maʻa ha taha kehe ʻe lave nai kiate ia ʻokú ne tāpuni pe fakakuikui hono matá. (Māt. 13:15; Pal. 28:27) Ko e tokotaha valé ʻoku pehē ko hono matá “ʻoku hē atu ia ki he ngaahi ngataʻanga ʻo e māmaní” ʻo ʻikai tuʻu maʻu, pea ko ʻene ngaahi fakakaukaú ʻoku tākakau holo ʻo ʻikai ke ʻi he feituʻu ʻoku totonu ke ʻi aí. (Pal. 17:24) Naʻa mo e tuʻunga moʻui lelei, mālohi pe fiefia ʻa ha tokotaha ʻoku lava ke hā mai ia ʻi hono matá. (1 Sām. 14:27-29; Teu. 34:7; Siope 17:7; Saame 6:7; 88:9) Naʻe lea ʻa Tuʻi Sihosafate kia Sihova: “ʻOku hanga atu homau matá kiate koe.”—2 Kal. 20:12.
SUNE 16-22
KOLOA MEI HE FOLOFOLA ʻA E ʻOTUÁ PALŌVEEPI 18
Lea Fakaivifoʻou ki he Faʻahinga ʻOku Fekuki mo e Mahamahakí
ʻOku Kalanga Leʻo-Lahi ʻa e Poto Moʻoní
17 Fakakaukau ki muʻa ke ke lea. Kapau heʻikai ke tau tokanga, ʻe lava ke tau fakatupunga ha maumau lahi ʻaki ʻetau leá. ʻOku pehē ʻe he Tohi Tapú: “Ko e lea taʻefakakaukaú ʻoku hangē ia ko hano hokohokaʻi ʻe ha heletaá, ka ko e ʻelelo ʻo e potó ko ha faitoʻo.” (Pal. 12:18) ʻOku tau tauhi maʻu ʻa e ngaahi vahaʻangatae leleí ʻi heʻetau fakaʻehiʻehi mei hono lauʻi ʻa e tōnounou ʻa e niʻihi kehé. (Pal. 20:19) Ke hoko ʻetau leá ko ha faitoʻo kae ʻikai fakalotomamahí, kuo pau ke tau fakafonu ʻaki hotau lotó ʻa e ʻilo mei he Folofola ʻa e ʻOtuá. (Luke 6:45) ʻI he taimi ʻoku tau fakalaulauloto ai ki he meʻa ʻoku leaʻaki ʻe he Tohi Tapú, ʻe lava ke hoko ʻetau leá ʻo hangē ko ha “matavai ʻo e potó” ʻo fakaivifoʻou ki he niʻihi kehé.—Pal. 18:4.
mrt kupu 19 puha
Founga ke Fekuki Ai mo ha Puke Taʻeʻamanekina
Hoko ko ha tokotaha fanongo lelei. Ko e taha ʻo e ngaahi founga lelei taha ke tokoni ai ki ho kaumeʻá ko e fanongo ʻi he taimi ʻokú ne fie talanoa aí. ʻOua ʻe ongoʻi kuo pau ke ke fai ha tali ki he meʻa kotoa ʻokú ne leaʻakí. ʻOku faʻa feʻunga pē ʻa e fanongó. ʻAi ke ʻataʻatā hoʻo fakakaukaú pea fakaʻehiʻehi mei he faifakamāú. ʻOua ʻe fakamahalo ʻokú ke ʻiloʻi ʻa e anga ʻo e ongoʻi ho kaumeʻá, tautefito kapau ko ʻene puké ʻoku ʻikai ke hā ki tuʻa.—Palōveepi 11:2.
Lea fakatupu langa hake. Heʻikai nai ke ke ʻiloʻi ʻa e meʻa ke leaʻakí, ka naʻa mo hono leaʻaki ha meʻa ke fakahaaʻi ʻokú ke lāuʻilo ki he tuʻunga ʻoku ʻi ai ho kaumeʻá ʻoku ngalingali ʻe fakafiemālie ange ia ʻi he ʻikai ke leaʻaki ha meʻá. Kapau ʻoku faingataʻa ke ke fakakaukau ki ha meʻa ke leaʻaki, feinga ke leaʻaki ha meʻa faingofua pē kae loto-moʻoni, hangē ko e “ʻOku ʻikai ke u fakapapauʻi ʻa e meʻa ke leaʻakí, ka ʻoku ou loto ke ke ʻiloʻi ʻoku ou tokanga atu.” Fakaʻehiʻehi mei he pehē “Naʻe mei toe kovi ange ia hena” pe “Koloa pē ʻoku ʻikai ke ke . . . ”
ʻE lava ke ke fakahaaʻi hoʻo mahuʻingaʻia fakafoʻituituí ʻaki hoʻo ako ke ke ʻilo fekauʻaki mo e puke ʻoku maʻu ʻe ho kaumeʻá. ʻOku ngalingali te ne houngaʻia ʻi hoʻo feinga ke mahinoʻi ʻa e meʻa ʻokú ne fouá, pea ʻe mohu ʻuhinga ange ai ʻa e ngaahi meʻa te ke leaʻakí. (Palōveepi 18:13) Kae kehe, tokanga ke ʻoua te ke fai ha faleʻi naʻe ʻikai fiemaʻu.
Fai ha tokoni ʻaonga. ʻI he ʻikai fakamahalo ʻokú ke ʻiloʻi ʻa e founga ke tokoni aí, ʻeke ange ʻa e meʻa ʻe lava ke ke faí. Kae kehe, manatuʻi heʻikai nai ke tala atu ʻe ho kaumeʻá ʻokú ne fiemaʻu tokoni, koeʻuhí ʻoku ʻikai ke ne loto ke hoko ko ha fakakavenga. Kapau ʻoku hoko ia, feinga ke fokotuʻu ange ha ngāue ʻaonga ʻe lava ke mo fai, hangē ko e ʻalu ʻo fai ha fakatau, fakamaʻa, pe ko ha meʻa kehe pē.—Kalētia 6:2.
ʻOua ʻe foʻi. ʻI he fekuki ho kaumeʻá mo ʻene puké, te ne kaniseli nai ʻi he taimi ʻe niʻihi hoʻomo ngaahi palaní pe ongoʻi ʻoku ʻikai ke ne fie talanoa mo koe. Hoko ʻo kātaki pea mahinoʻi ia. Hokohoko atu ke ʻoange ʻa e poupou ʻokú ne fiemaʻú.—Palōveepi 18:24.
Founga ke Tokoni Ai ki he Faʻahinga ʻOku Puke Fakaʻatamaí
“Lea fakanonga.”—1 TESALONAIKA 5:14.
ʻE ongoʻi loto-moʻua nai ho kaumeʻá pe ʻokú ne fāinga nai mo e ongoʻi ʻoku ʻikai hano mahuʻingá. ʻI hono fakapapauʻi ange kiate ia ʻokú ke tokanga fekauʻaki mo iá, ʻe lava ke hoko ʻo fakafiemālie mo fakalototoʻa, neongo kapau ʻoku ʻikai te ke ʻilo ʻa e meʻa ʻoku totonu ke leaʻakí.
“Ko ha kaumeʻa moʻoni ʻokú ne ʻofa ʻi he taimi kotoa pē.”—PALŌVEEPI 17:17.
Fai ʻa e tokoni ʻaonga. ʻI he ʻikai fakamahalo ʻokú ke ʻiloʻi ʻa e founga ke tokoni aí, ʻeke ʻa e meʻa ʻe lava ke ke faí. Kapau ʻoku faingataʻa ki ho kaumeʻá ke fakahaaʻi ʻa e meʻa ʻokú ne fiemaʻú, feinga ke fokotuʻu ange ha meʻa ʻaonga ʻe lava ke mo fai fakataha, hangē ko e ʻalu ʻo luelue. Pe ʻe lava ke ke tala ange te ke tokoni ʻi hono fai ʻene fakataú, fakamaʻa pe ko ha toe ngāue kehe.—Kalētia 6:2.
“Mou kātaki.”—1 TESALONAIKA 5:14.
Heʻikai nai ke mateuteu maʻu pē ho kaumeʻá ke talanoa. Fakapapauʻi ki ho kaumeʻá te ke fiefia ke fanongo ʻi he taimi ʻokú ne ongoʻi ai ʻokú ne fie talanoá. Koeʻuhi ko ʻene puké, ʻe leaʻaki pe fai nai ʻe ho kaumeʻá ha meʻa ʻe fakalotomamahi kiate koe. Te ne kaniseli nai ha palani naʻá mo fai pe te ne ʻita. Hoko ʻo kātaki pea mahinoʻi ia ʻi hoʻo ʻoatu ʻa e poupou ʻokú ne fiemaʻú.—Palōveepi 18:24.
Makakoloa Fakalaumālie
it-2 271-272
Foʻi Lulu, Ngaahi
ʻI he anga fakafonua ʻo e kuonga muʻá, naʻe fai ha lulu ke veteki ʻaki ha ʻīsiu naʻe tālangaʻi. Ko e founga naʻe ngāueʻakí ko hono fakatahatahaʻi ha fanga kiʻi maka pe fanga kiʻi kongokonga papa pe maka ki he pelu ʻo e kofu ʻo ha taha, pe “ʻi hono fungá,” pe ki ha ʻaiʻanga meʻa, pea luluʻi leva. Ko e foʻi lulu naʻe tō ki ha taha pe naʻe tohoʻí ko e tokotaha ia kuo filí. Ko e lulú naʻe fai fakataha ia mo e lotu, ʻo hangē pē ko e fuakavá. Ko e lotú naʻe fai fakahāhā pe ʻikai fakahāhā, pea naʻe ʻamanekina ʻa e tokoni ʻa Sihová mo kumi ki ai. Ko e lulú (faka-Hepelū, goh·ralʹ) ʻoku ngāueʻaki hangatonu mo fakaefakatātā ia ʻo ʻuhingá ko e “ʻinasi.”—Sios. 15:1; Saame 16:5; 125:3; ʻAi. 57:6; Sel. 13:25.
Ngāueʻakí. ʻOku pehē ʻi he Palōveepi 16:33: “ʻOku fai nai ʻe ha taha ha lulu ʻi hono fungá, ka ko e fili kotoa pē ʻoku fai aí ʻoku meia Sihova ia.” ʻI ʻIsileli, ko hono ngāueʻaki totonu ʻo e lulú ke fakangata ha fakakikihi: “Ko hono fai ha lulú ʻoku fakangata ai ha ngaahi fakakikihi pea fai ai ha fili ʻi he vahaʻa ʻo ha ongo faʻahi mālohi ʻokú na fehangahangai.” (Pal. 18:18) Naʻe ʻikai ke ngāueʻaki ia ki ha sipoti, vaʻinga pe pelepaʻanga. Naʻe ʻikai ke fai ha peti—pea naʻe ʻikai ke ʻi ai ha ʻulungia pe ko ha mālohi. Naʻe ʻikai ke fai iá ke fakakoloaʻaki ʻa e temipalé pe ko e kau taulaʻeikí, pea naʻe ʻikai ke fai ia ko ha tokoni ʻofa. Ka neongo ia, hangē ko ia naʻe tomuʻa tala ʻi he Saame 22:18, naʻe fai ʻe he kau sōtia Lomá ha lulu ki he ngaahi kofu tuʻa ʻo Sīsuú ʻi he taumuʻa siokita ke maʻu mei ai haʻanau meʻa.—Māt. 27:35.
SUNE 23-29
KOLOA MEI HE FOLOFOLA ʻA E ʻOTUÁ PALŌVEEPI 19
Hoko ko ha Kaumeʻa Moʻoni ki Ho Fanga Tokouá
Tauhi ʻEtau Feʻofaʻakí ke Mālohi
16 Tokangataha ki he ngaahi tōʻonga lelei ʻa ho fanga tokouá mo e fanga tuofāfiné, ʻo ʻikai ko ʻenau tōʻonga ʻikai leleí. Fakakaukau ki he fakahoa ko ení. Sioloto atu ʻokú ke ʻi ha fakatahataha mo ha fanga tokoua mo e fanga tuofāfine. ʻOku mou maʻu ha taimi fakafiefia pea ʻi he ʻai ke mou mātukú, ʻoku mou ʻai hamou laʻitā. Ko hono moʻoní, ʻokú ke toe ʻai mo ha laʻitā kehe ʻe ua koeʻuhí pē naʻa ʻoku ʻikai ke sai ʻa e foʻi laʻitā ʻuluakí. Sai ʻokú ke maʻu he taimí ni ha laʻitā ʻe tolu. Ka ʻi he taha ai, ʻokú ke fakatokangaʻi ʻoku fakafulofula ha tokoua ʻe taha. Ko e hā ʻokú ke fai ki he laʻitā ko iá? ʻOkú ke tāmateʻi ia koeʻuhí ʻokú ke maʻu ha laʻitā kehe ʻe ua ʻa ia ko e tokotaha kotoa, kau ai ʻa e tokouá, ʻoku nau malimali.
17 Tau fakahoa angé ʻa e ngaahi tā ʻoku tau tauhí ki he ngaahi manatu ʻoku tau tuku tauhí. ʻOku tau faʻa maʻu ʻa e ngaahi manatu melie fekauʻaki mo e ngaahi taimi ʻoku tau fakamoleki mo hotau fanga tokouá mo e fanga tuofāfiné. Ka tau pehē pē ko e taha ʻi he ngaahi taimi ko iá, ko ha tokoua pe tuofefine ʻokú ne leaʻaki pe fai ha meʻa ʻoku taʻeʻofa. Ko e hā ʻoku totonu ke tau fai ki he manatu ko iá? Fēfē ke ke feinga ke tāmateʻi ia ʻo hangē pē ko hoʻo tāmateʻi ʻa e ngaahi tā ko iá? (Pal. 19:11; ʻEf. 4:32) ʻE lava ke tau tāmateʻi ʻa e manatu fekauʻaki mo e kiʻi faiangahala ʻa hotau kaungātuí koeʻuhí ʻoku tau maʻu ʻa e ngaahi manatu melie ʻo ʻetau feohi fiefia mo e tokotaha ko iá. Ko e ngaahi manatu ia ʻoku tau loto ke tauhi mo koloaʻakí.
Hanganaki Fakatupulekina Hoʻo ʻOfá
10 ʻE lava foki ke tau kumi ki ha ngaahi founga ke tokoni ai ki hotau fanga tokoua Kalisitiané. (Hep. 13:16) Fakakaukau ki he hokosia ʻa Anna, naʻe lave ki ai ʻi he kupu ki muʻá. Hili ha afā lahi, naʻá ne ʻaʻahi mo hono husepānití ki he ʻapi ʻo ha fāmili Fakamoʻoni pea ʻiloʻi naʻe haea ʻa e ʻato honau falé. Ko hono olá, naʻe ʻikai ke ʻi ai ha vala maʻa ʻo e fāmilí. ʻOku pehē ʻe Anna: “Naʻá ma ʻave honau valá, fō ia pea toki fakafoki kuo ʻosi haiane mo pelupelu. Kiate kimaua, ko ha ngāue siʻisiʻi pē ia, ka naʻe fakatupulekina ai ha haʻi ʻo e kaumeʻa ʻoku kei mālohi pē ʻo aʻu mai ki he ʻahó ni.” Ko e ʻofa ʻa Anna mo hono husepānití ki he fanga tokouá mo e fanga tuofāfiné naʻá ne ueʻi kinaua ke fai ʻa e tokoni ʻaongá.—1 Sio. 3:17, 18.
11 ʻI he taimi ʻoku tau fakafeangai anga-ʻofa mo anga-lelei ai ki he niʻihi kehé, ʻoku nau faʻa fakatokangaʻi ʻetau ngaahi feinga ke tapua atu ʻa e anga ʻo e fakakaukau mo e ngāue ʻa Sihová. Pea te nau houngaʻia nai ʻi heʻetau anga-leleí ʻo lahi ange ia ʻi he meʻa ʻoku tau ʻiloʻí. Ko Khanh, naʻe lave ki ai ki muʻá, ʻokú ne kei manatu ʻofa ki he faʻahinga naʻa nau tokoniʻi iá. ʻOkú ne pehē: “ʻOku ou houngaʻia lahi ki he kotoa ʻo e fanga tuofāfine ʻofeina naʻa nau ʻave au ʻi he ngāue fakafaifekaú. Naʻa nau haʻu ʻo ʻave au, fakaafeʻi au ke mau kai fakataha, pea fakafoki lelei au ki ʻapi. ʻOku ou ʻiloʻi he taimí ni ko e ngāue lahi ia. Pea naʻa nau fai ia ʻi he ʻofa.” Ko e moʻoni, heʻikai ke fakamālō mai ʻa e tokotaha kotoa ki he meʻa ʻoku tau fai maʻanautolú. ʻOku pehē ʻe Khanh fekauʻaki mo e faʻahinga naʻa nau tokoniʻi iá: “ʻOku ou fakaʻamu ʻe lava ke u totongi fakafoki kiate kinautolu ʻenau ngaahi ngāue anga-leleí, ka ʻoku ʻikai te u ʻilo pe ʻoku nau nofo ʻi fē he taimí ni. Kae kehe, ʻoku ʻiloʻi ia ʻe Sihova, pea ʻoku ou lotu te ne fai ʻa e totongi fakafoki kiate kinautolú maʻaku.” ʻOku moʻoni ʻa Khanh. ʻOku fakatokangaʻi ʻe Sihova naʻa mo e ngāue anga-ʻofa siʻisiʻi taha ʻoku tau fakahoko maʻá e niʻihi kehé. ʻOkú ne vakai ki ai ko ha feilaulau mahuʻinga pea ko ha nō ia te ne totongi fakafoki.—Lau ʻa e Palōveepi 19:17.
Hokohoko Atu ke Fefakahāhāʻaki ʻa e ʻOfa Mateakí
6 ʻI he ʻahó ni ʻoku tau fakamatalaʻi nai ha tokotaha kuo ngāue ki ha kautaha tatau ʻi he laui taʻu ko ha tokotaha ngāue mateaki. Neongo ia, ʻi hono taʻu kotoa ʻi he kautahá, kuo teʻeki ai nai ke ne fetaulaki mo ha taha ʻo e kau talēkitá. Heʻikai nai ke ne loto-tatau maʻu pē mo e ngaahi tuʻutuʻuni ngāué. ʻOku ʻikai ke ne ʻofa ʻi he kautahá, ka ʻokú ne fiefia ke maʻu ha ngāue mo ha vahe. Te ne hokohoko atu ke ngāue ʻo aʻu ki haʻane penisoni, tuku kehe kapau ʻe tuʻuaki ange ha ngāue lelei ange ʻi ha feituʻu kehe.
7 Ko e faikehekehe ʻi he mateakí naʻe lave ki ai ʻa e palakalafi 6 mo e ʻofa mateakí ko e fakaueʻiloto ʻa ha taha. ʻI he Tohi Tapú, ko e hā ʻa e fakaueʻiloto ʻoku hā mahino mei he ngaahi ʻofa mateaki ʻoku fakahāhā ʻe he kakai ʻa e ʻOtuá? Ko e faʻahinga naʻa nau fakahāhā ʻa e ʻofa mateakí naʻa nau fai ia, ʻo ʻikai koeʻuhí naʻe pau ke nau fai pehē, ka koeʻuhí naʻe ueʻi kinautolu ʻe honau lotó. Fakakaukau ki he faʻifaʻitakiʻanga ʻa Tēvitá. Naʻe ueʻi ia ʻe hono lotó ke fakahāhā ʻa e ʻofa mateaki ki hono kaumeʻa ʻofeina ko Sionatané neongo naʻe loto ʻa e tamai ʻa Sionatané ke tāmateʻi ʻa Tēvita. Hili ʻa e ngaahi taʻu mei he mate ʻa Sionatané, naʻe kei fakahāhā pē ʻe Tēvita ʻa e ʻofa mateakí ki he foha ʻo Sionatane ko Mefipōsetí.—1 Sām. 20:9, 14, 15; 2 Sām. 4:4; 8:15; 9:1, 6, 7.
Makakoloa Fakalaumālie
it-1 515
Akonaki, Tokotaha Faiakonaki
Ko Sihova ʻoku ʻaʻana ʻa e poto haohaoá mo fakaʻaufulí. ʻOku ʻikai ke ne fiemaʻu ʻe ia ha tokotaha ke faleʻi kiate ia. (ʻAi. 40:13; Loma 11:34) ʻOku malava ke ngāue ʻa hono ʻAló ko “Faleʻi Fakaofo,” ʻo tokonaki ʻa e tataki mo e fakahinohino, koeʻuhí naʻá ne maʻu ʻa e faleʻi mei heʻene Tamaí pea muimui ki ai pea naʻá ne maʻu foki ʻa e laumālie ʻo e ʻOtuá. (ʻAi. 9:6; 11:2; Sione 5:19, 30) ʻOku fakamamafaʻi mai heni kapau ʻoku fiemaʻu ke hoko ʻa e akonakí ʻo ʻaonga, kuo pau ke tomuʻa fakakaukau kia Sihova. Ko ha faleʻi pē ʻoku tuʻu ʻo fakafepaki ki he Fungani Māʻolungá ʻoku taʻeʻaonga ia. ʻOku ʻikai pē ko ha akonaki ia.—Pal. 19:21; 21:30.
SUNE 30–SIULAI 6
KOLOA MEI HE FOLOFOLA ʻA E ʻOTUÁ PALŌVEEPI 20
Kī ki he Faisō Lavameʻá
Founga ke Lavameʻa Ai ha Faisō
3 Neongo ko e faisoó ʻe lava ke fakafiefia, ko ha toe sitepu mafatukituki ia ʻe taki atu nai ki he nofo malí. ʻI he ʻaho mali ʻo ha ongo meʻa, ʻokú na fuakava ʻi he ʻao ʻo Sihová ke na feʻofaʻaki mo fefakaʻapaʻapaʻaki pe ko e hā pē hono fuoloa ʻena moʻuí. Ki muʻa ke fai ha faʻahinga fuakava pē, ʻoku totonu ke tau fakakaukau fakalelei ki he tuʻungá. (Lau ʻa e Palōveepi 20:25.) ʻOku moʻoni ʻaupito ia ʻi heʻene haʻu ki he fuakava malí. Ko e faisoó ʻoku fakaʻatā ai ki ha ongo meʻa ke na hoko ʻo feʻilongaki pea ke fai ha fili lelei. ʻI he taimi ʻe niʻihi ko e fili ko iá ko e mali; ʻi he taimi ʻe niʻihi ko e fili ko iá ko hono fakangata ʻa e faisoó. Kapau ʻe ʻosi ha ongo meʻa, ʻoku ʻikai ʻuhinga ia naʻe taʻelavameʻa ʻena faisoó. ʻI hono kehé, naʻe fakahoko ʻa e meʻa naʻe fakataumuʻa ki ai ʻa e faisoó—naʻe tokoniʻi ai kinaua ke na fai ha fili lelei.
4 Ko e hā ʻoku mahuʻinga ai ke maʻu ʻa e vakai totonu ki he faisoó? ʻI he taimi ʻoku maʻu ai ʻe he kakai taʻemalí ʻa e fakakaukau totonú, heʻikai te nau faialea mo ha taha ʻoku ʻikai haʻanau taumuʻa ke mali mo ia. Kae kehe, ʻoku ʻikai ko e kakai taʻemalí pē ʻoku fiemaʻu ke nau maʻu ʻa e vakai totonú. Ko kitautolu kotoa ʻoku totonu ke tau fakatupulekina ia. Ko e fakatātaá, ʻoku fakakaukau ʻa e niʻihi kapau ʻoku faialea ha ongo meʻa, kuo pau ke na mali. ʻOku anga-fēfē hono tākiekina ʻe he fakakaukau ko ení ʻa e kau Kalisitiane taʻemalí? Ko Melissa, ko ha tuofefine taʻemali ʻi ʻAmelika, ʻokú ne pehē: “ʻOku lahi ʻa e tenge ki he Kau Fakamoʻoni ʻoku nau faialeá. Ko hono olá, ko e kau faisō ʻe niʻihi ʻoku nau fakaʻehiʻehi mei hono fakangata ha faikaumeʻa ʻoku ʻikai ke ola lelei. Ko e faʻahinga taʻemali ʻe niʻihi ʻoku nau fakaʻehiʻehi fakaʻaufuli mei he faialeá. Ko e tengé ʻe lava ke hoko ʻo fakatupu lōmekina.”
Founga ke Kumi Ai ha Hoa Mali Feʻungamālie
8 ʻE lava fēfē ke ke siofi fakapotopoto ʻa e tokotaha ʻe tahá? ʻI he ngaahi fakataha ʻa e fakatahaʻangá pe ʻi he fakatahataha fakasōsialé, te ke fakatokangaʻi nai ai ʻa e tuʻunga fakalaumālie, ʻulungaanga mo e tōʻonga ʻa e tokotaha ko ení. Ko hai hono ngaahi kaungāmeʻá, pea ko e hā ʻa e meʻa ʻokú ne talanoa ki aí? (Luke 6:45) ʻOku faitatau hoʻomo ngaahi taumuʻá? ʻE lava ke ke talanoa ki he kau mātuʻa ʻi heʻene fakatahaʻangá pe ko e kau Kalisitiane matuʻotuʻa kehe ʻoku nau ʻiloʻi lelei iá. (Pal. 20:18) Te ke ʻeke ange nai fekauʻaki mo e ongoongo ʻo e tokotahá mo hono ngaahi ʻulungāngá. (Lute 2:11) ʻI hoʻo siofi ʻa e tokotahá, fakapapauʻi ke fakaʻehiʻehi mei hono ʻai ʻa e tokotahá ke ne ongoʻi taʻefiemālie. Fakaʻapaʻapaʻi ʻene ngaahi ongoʻí, fiemaʻú mo ʻene taimi fakafoʻituituí.
Founga ke Lavameʻa Ai ha Faisō
7 ʻE lava fēfē ke ke hoko ʻo ʻiloʻi ʻa e tuʻunga moʻoni ʻo e tokotaha ʻe tahá? Ko e taha ʻo e ngaahi founga lelei tahá ko e talanoa tauʻatāina mo faitotonu, ke ʻeke ha ngaahi fehuʻi pea fanongo tokanga. (Pal. 20:5; Sēm. 1:19) Ke fakahoko iá, ʻe tokoni nai ke mo fai ha ngaahi ngāue ʻe lava ai ke mo fetalanoaʻaki, hangē ko e kai fakataha, luelue fakataha ʻi he ngaahi feituʻu kakaí, pea malanga fakataha. ʻE lava foki ke mo feakoʻaki ʻi hoʻomo fakamoleki ʻa e taimi mo e ngaahi kaungāmeʻá mo e fāmilí. ʻIkai ko ia pē, palani ha ngaahi ngāue ʻe fakahaaʻi atu ai kiate koe ʻa e anga ʻo e fakafeangai ʻa e tokotaha ʻe tahá ki he ngaahi tuʻunga kehekehe pea ki he kakai kehekehe. Fakatokangaʻi ʻa e meʻa naʻe feinga ʻa Aschwin, mei Netaleni, ke ne faí. ʻOkú ne fakamatala fekauʻaki mo ʻene faisō mo Alicia: “Naʻá ma kumi ki ha ngaahi ngāue te ne tokoniʻi kimaua ke ma feakoʻaki ai. ʻOku anga-mahení ko e fanga kiʻi meʻa faingofua pē, hangē ko hono teuteu fakataha ha meʻatokoni pe fai fakataha ʻa e ngaahi ngāue fakaʻapí. Lolotonga ʻa e ngaahi ngāue peheé, naʻá ma sio ai ki homa ngaahi mālohingá mo e vaivaiʻangá.”
8 ʻE lava foki ke mo feʻilongaki ʻaki hono ako fakataha ʻa e ngaahi kaveinga fakalaumālié. Kapau te mo mali, ʻe fiemaʻu ke mo vaheʻi ha taimi ki he lotu fakafāmilí, koeʻuhí ke hoko ʻa e ʻOtuá ko ha konga mahuʻinga ʻi hoʻomo nofo malí. (Tml. 4:12) Ko ia fēfē ke fakataimitēpileʻi ha taimi ke mo ako fakataha he taimí ni, lolotonga hoʻomo faisoó? Ko e moʻoni, ko e ongo meʻa ʻokú na faisoó ʻoku teʻeki ai ke na hoko ko ha fāmili, pea ko e tokouá ʻoku teʻeki ai ke ne hoko ko e ʻulu ʻo e tuofefiné. Neongo ia, ʻi hoʻomo ako tuʻumaʻu fakatahá, ʻe lava ke mo ako ai fekauʻaki mo hoʻomo tuʻunga fakalaumālié. Ko Max mo Laysa, ko ha ongo meʻa mei ʻAmelika, naʻá na maʻu ha ʻaonga ʻe taha. ʻOku pehē ʻe Max: “ʻI he kamata ʻema faisoó, naʻe kamata ke ma ako ʻa e ʻū tohi ʻi he ngaahi kaveinga fekauʻaki mo e faialeá, nofo malí, mo e moʻui fakafāmilí. Ko e ʻū tohi ko iá naʻá ne fakaava ʻa e matapā ki he fetalanoaʻaki ʻi he ngaahi meʻa mahuʻinga lahi naʻe ʻikai ke ma mei fakakaukau ke talanoa ki ai.”
Makakoloa Fakalaumālie
it-2 196 ¶7
Maama
Fakatatau ki he Palōveepi 20:27, “ko e mānava ʻa ha tangata ko e maama ia ʻa Sihova, ʻokú ne fakamaama ai hono tangata ʻi lotó.” Ko e meʻa ʻoku “mānavaʻaki,” pe tuku ange atu ʻe ha tokotaha, pe ʻoku lelei pe kovi, ʻokú ne fakaeʻa pe fakamaama mai ʻa hono angaʻitangatá pe tangata ʻi lotó.—Fakafehoanaki mo e Ngā. 9:1.