Ngaahi Fehuʻi mei he Kau Lautohí

Ko e hā ʻa e lēsoni ʻoku ʻomai ʻi he Palovepi 24:27?

ʻI he fai ʻo ha faleʻi ki ha talavou, ʻoku fakahaaʻi ʻe he tokotaha-tohi ʻo e Palovepí: “Tokonaki hoʻo ngaue ʻi tuʻa, pea teuteu maʻau ʻi he vao; hili ia pea ke nofo ke langa hao fale.” Ko e hā ʻa e poini ʻoku ʻomai ʻi he palōveepi fakamānavaʻi ko ení? ʻOku totonu ke teuteu lelei ha tangata ki muʻa ke mali ʻo kamata ha fāmili pē ʻoʻoná, ʻi he ʻiloʻi ʻa e ngaahi fatongia ʻoku hoko ʻi he tukupā ko iá.

ʻI he kuohilí, kuo fakamatalaʻi ʻa e veesi ko ení ʻi he taimi ʻe niʻihi ʻo ʻuhingá ko ha husepāniti mo ha tamai kuo pau ke ʻoua ʻe ngata pē ʻi heʻene tokanga ki heʻene ngāue paʻangá ka te ne toe langa hake foki, pe fakalototoʻaʻi ʻa hono fāmilí, ko e fakatātaá fakafou ʻi he fakahinohino fakalaumālié. Lolotonga ko e moʻoni ʻoku tonu ʻa e fakakaukau ko iá mo Fakatohitapu, ʻoku ʻikai hā ngali ko e poini tefito ia ʻo e veesi ko ení. Ko e hā hono ʻuhingá? Fakakaukau angé ki he ʻuhinga ʻe ua.

ʻUluakí, ʻoku ʻikai talanoa ʻa e vēsí ia fekauʻaki mo e langa hake ʻi he ʻuhinga ko e fakalototoʻa, pe fakaivimālohi ha fāmili ʻoku lolotonga ʻi ai. ʻI hono kehé, ko e foʻi fakakaukaú ki hono langa moʻoni ʻo ha fale. Ko e foʻi lea ʻoku liliu ko e “langa” ʻe lava ke toe tuʻu fakaefakatātā ia, ʻi he ʻuhinga ko hono langa, pe faʻu ha fāmili—ʻa ia ko e mali pea maʻu fānau.

Uá, ʻoku fakamamafaʻi ʻe he vēsí ʻa hono fai ʻa e ngaahi meʻá ʻi he founga totonú, ʻo hangē ia ha pehē, “Te ke ʻuluaki fai eni; pea toki fai leva ena.” Ko ia ai, ʻe lava ke pehē ʻoku fakahuʻunga mai ʻi he palōvēpí ko e ngaahi fatongia fakamāmaní ʻe muʻomuʻa ia ʻi he ngaahi fatongia fakalaumālié? ʻIkai ʻaupito!

ʻI he taimi ʻo e Tohi Tapú, kapau naʻe loto ha tangata ke “langa [hano] fale,” pe faʻu ha fāmili ʻaki haʻane mali, naʻe fiemaʻu ke ne ʻeke hifo kiate ia, ‘ʻOku ou mateuteu ke tokangaʻi mo tokoniʻi ha uaifi mo ha fānau pē nai te ma maʻu ʻamui?’ Ki muʻa ke kamata ha fāmilí, naʻe ʻi ai ʻa e ngāue ke ne fai, ko hono tokangaʻi ʻene ngoué pe ko e fua ʻene ngoué. Ko ia ai, naʻe liliu mahino ʻe he Today’s English Version ʻa e foʻi vēsí ʻo peheni: “ʻOua ʻe langa ho falé pe faʻu ha fāmili kae ʻoua kuo maau hoʻo ngoué, pea ʻokú ke fakapapauʻi ʻe lava ke ke ngāue ke maʻu ha moʻui.” ʻOku ngāueʻaki he ʻahó ni ʻa e tefitoʻi moʻoni tatau?

ʻIo. Ko ha tangata ʻoku loto ke mali ʻoku fiemaʻu ke ne teuteu lelei ki he fatongia ko iá. Kapau ʻokú ne malava fakaesino, kuo pau ke ne ngāue. Ko e moʻoni, ko e ngāue mālohi ʻa ha tangata ʻi hono tokangaʻi ʻa hono fāmilí ʻoku ʻikai totonu ke fakangatangata pē ia ki hono tokonaki mai ʻo e ngaahi meʻa fakamatelié. ʻOku fakahaaʻi ʻi he Folofola ʻa e ʻOtuá ko ha tangata ʻoku ʻikai tokanga ki he ngaahi fiemaʻu fakaesino, fakaeongo mo fakalaumālie ʻa hono fāmilí ʻoku kovi ange ia ʻi he tokotaha taʻetuí! (1 Tim. 5:8) Ko ia ai, ʻi he teuteu ki he nofo malí mo e moʻui fakafāmilí, ʻoku totonu ke ʻeke hifo ʻe ha talavou kiate ia ʻa e ngaahi fehuʻi hangē ko ení: ‘ʻOku ou mateuteu lelei ke tokonaki fakamatelie ki ha fāmili? ʻOku ou mateuteu ke hoko ko e ʻulu fakalaumālie ʻo ha fāmili? Te u fakahoko ʻa e fatongia ʻo hono fai ha ako Tohi Tapu tuʻumaʻu mo hoku uaifí mo e fānaú?’ Ko e Folofola ʻa e ʻOtuá ʻoku fakamamafaʻi moʻoni ai ʻa e ngaahi fatongia mātuʻaki mahuʻinga ko iá.—Teu. 6:6-8; Ef. 6:4.

Ko ia ai, ko ha talavou ʻoku kumi ki ha uaifi ʻoku totonu ke ne fakakaukau fakalelei fekauʻaki mo e tefitoʻi moʻoni ʻoku maʻu ʻi he Palovepi 24:27. ʻI he tuʻunga tatau, ʻoku lelei ki ha finemui ke ne ʻeke hifo kiate ia pe ʻoku mateuteu ki he ngaahi fatongia ʻo e hoko ko ha uaifi mo ha faʻē. ʻE ʻeke nai ʻe ha ongo meʻa mali kei siʻi ʻa e ngaahi fehuʻi meimei tatau ʻi he taimi ʻokú na fakakaukau ai fekauʻaki mo e malava ke tauhi hake ha fānau. (Luke 14:28) Ko e moʻuiʻaki ʻa e tataki fakamānavaʻi peheé ʻe lava ke tokoniʻi ai ʻa e kakai ʻa e ʻOtuá ke nau fakaʻehiʻehi mei he loto-mamahi lahi pea ke nau maʻu ai ha moʻui fakafāmili fakafiemālie.

[Fakatātā ʻi he peesi 12]

Ko e hā ʻa e ngaahi fehuʻi fekauʻaki mo e nofo malí ʻoku totonu ke ʻeke hifo kiate ia ʻe ha talavou?