Ko Siosifa ko e taha ia ʻo e ngaahi foha iiki ʻo Sēkopé. Naʻe sio ʻa hono fanga tokoua lalahí ko Siosifa naʻe ʻofa taha ai ʻa ʻenau tamaí. ʻOkú ke pehē naʻe fēfē ʻenau ongoʻí? Naʻa nau meheka kia Siosifa pea fehiʻa ʻiate ia. ʻI he ʻi ai ha ngaahi misi anga-kehe ʻa Siosifá, naʻá ne talanoaʻi ia ki hono fanga tokouá. Naʻa nau fakakaukau ʻoku ʻuhinga ʻa e ngaahi misí ʻe ʻi ai ʻa e ʻaho te nau punou ai kiate ia. Ko ia naʻe toe lahi ange ai ʻenau fehiʻa ʻiate iá!

ʻI he ʻaho ʻe taha naʻe tokangaʻi ai ʻe he fanga tokoua ʻo Siosifá ʻa e fanga sipí ofi ki he kolo ko Sīkemi. Naʻe fekau ʻe Sēkope ʻa Siosifa ke ʻalu ʻo sio pe ʻoku nau fēfē. ʻI heʻenau sio mai mei he mamaʻó ki he ʻalu atu ʻa Siosifá naʻa nau pehē: ‘Ko e tokotaha misí ena ʻoku haʻú. Tau tāmateʻi ia!’ Naʻa nau puke ia ʻo lī ki ha fuʻu luo. Ka ko Siuta, ʻa e taha ʻo hono fanga tokouá, naʻá ne pehē: ‘ʻOua ʻe tāmateʻi iá! Ka tau fakatau atu ia ko ha pōpula.’ Ko ia naʻa nau fakatau atu ʻa Siosifa ki ha konga siliva ʻe 20 ki he kau fefakatauʻaki Mitiani naʻa nau ō ki ʻIsipite.

Naʻe unu leva ʻe he fanga tokoua ʻo Siosifá ʻa hono kofú ʻi he toto ʻo ha kiʻi kosi, ʻave ʻa hono kofú ki heʻenau tamaí, pea nau pehē: ‘ʻIkai ko e kofu eni ʻo ho fohá?’ Ko ia naʻe fakakaukau ʻa Sēkope kuo tāmateʻi ʻa Siosifa ʻe ha manu fekai. Naʻá ne loto-mamahi lahi. Naʻe ʻikai lava ke fakafiemālieʻi ia ʻe ha taha.

Naʻe fakatau atu ʻi ʻIsipite ʻa Siosifa ko ha pōpula ki ha ʻōfisa māʻolunga ko Pōtifa. Ka naʻe kau ʻa Sihova mo Siosifa. Naʻe sio ʻa Pōtifa naʻe ngāue lelei ʻa Siosifa pea naʻe lava ke ne falala kiate ia. ʻIkai fuoloa naʻe ʻai ʻa Siosifa ke ne tokangaʻi ʻa e meʻa kotoa ʻa Pōtifá.

Naʻe sio ʻa e mali ʻo Pōtifá ʻoku talavou mo sino lelei ʻa Siosifa. Naʻá ne kole kia Siosifa ʻi he ʻaho ki he ʻaho ke na fehokotaki fakasino. Ko e hā naʻe fai ʻe Siosifá? Naʻe ʻikai te ne tali peá ne pehē: ‘ʻIkai! ʻOku hala ia. ʻOku falala mai ʻa hoku pulé kiate au, pea ko koe ʻa hono malí. Kapau te u mohe mo koe, te u angahala ai ki he ʻOtuá!’

ʻI he ʻaho ʻe taha naʻe feinga ʻa e mali ʻo Pōtifá ke fakamālohiʻi ʻa Siosifa ke na mohe. Naʻá ne puke ʻa hono kofú, ka naʻá ne hola. ʻI he foki mai ki ʻapi ʻa Pōtifá, naʻe tala ange ʻe hono malí naʻe ʻohofi ia ʻe Siosifa. Naʻe ʻikai te ne tala ʻa e moʻoní. Naʻe ʻita lahi ai ʻa Pōtifa, peá ne lī ʻa Siosifa ki he pilīsoné. Ka naʻe ʻikai ke ngalo ʻia Sihova ʻa Siosifa.

Lolotonga ʻa e nofo ʻa Siosifa ʻi he pilīsoné, naʻe misi ʻa Felo, ko e tuʻi ʻo ʻIsipité, pea naʻe ʻikai lava ʻe ha taha ke fakamatalaʻi ʻa hono ʻuhingá. Naʻe tala kia Felo ʻe ha taha ʻo ʻene kau sevānití ʻe lava ke tala ange ʻe Siosifa ʻa e ʻuhinga ʻo ʻene misí. Naʻe fekau leva ʻe Felo ke ʻomai ʻa Siosifa.

Naʻe ʻeke ange ʻe Felo: ‘ʻE lava ke ke fakamatala ʻa e ʻuhinga ʻo ʻeku misí?’ Naʻe pehē ʻe Siosifa kia Felo: ‘ʻE lahi ʻa e meʻakaí ʻi ʻIsipite ʻi he taʻu ʻe fitu, pea ʻe hoko atu ai ha honge ʻi he taʻu ʻe fitu. Fili ha tokotaha poto ke ne tānaki ʻa e meʻakaí koeʻuhi ke ʻoua ʻe fiekaia ho kakaí.’ Naʻe pehē ange ʻe Felo: ‘ʻOku ou fili koe! Te ke hoko ko e tangata maʻu mafai fika ua ʻi ʻIsipité!’ Naʻe anga-fēfē hono ʻiloʻi ʻe Siosifa ʻa e ʻuhinga ʻo e misi ʻa Feló? Naʻe tokoniʻi ʻe Sihova ʻa Siosifa.

ʻI he taʻu ʻe fitu hono hokó, naʻe tānaki ai ʻe Siosifa ʻa e meʻakaí. Pea naʻe hoko mai ʻa e honge ki he fonuá kotoa, ʻo hangē pē ko e meʻa naʻe tala ʻe Siosifá. Naʻe haʻu ʻa e kakai mei he feituʻu kotoa pē ke fakatau meʻakai meia Siosifa. Naʻe fanongo ʻa ʻene tamaí, ʻa Sēkope naʻe ʻi ai ha meʻakai ʻi ʻIsipite, ko ia naʻá ne fekau ʻa hono ngaahi foha ʻe toko hongofulú ke nau ō ki ai ʻo fakatau mai ha meʻakai.

Naʻe ʻalu ʻa e ngaahi foha ʻo Sēkopé kia Siosifa, ʻa ia naʻá ne ʻiloʻi kinautolu. Ka naʻe ʻikai ke ʻiloʻi ʻe hono fanga tokouá ko Siosifa ia. Naʻa nau punou kiate ia, ʻo hangē pē ko ʻene misi ʻi heʻene kei siʻí. Naʻe loto ʻa Siosifa ke ne ʻiloʻi pe ʻoku kei loto-tāufehiʻa pē ʻa hono fanga tokouá. Ko ia naʻá ne pehē ange: ‘Ko e kau asiasi kimoutolu. ʻOku mou feinga ke ʻilo ʻa e feituʻu ʻoku vaivai ʻi homau fonuá.’ Naʻa nau pehē: ‘ʻIkai! Ko e fanga tokoua kimautolu ʻe toko 12 mei Kēnani. Kuo mate homau tokoua ʻe taha, pea ko e siʻisiʻi tahá ʻoku nofo mo ʻemau tamaí.’ Naʻe pehē ange leva ʻe Siosifa: ‘ʻOmai kiate au homou tokoua siʻisiʻi tahá, pea te u tui kiate kimoutolu.’ Ko ia naʻa nau foki ki ʻapi ki heʻenau tamaí.

ʻI he toe ʻosi ʻa e meʻakai ʻa e fāmilí, naʻe fekau ʻe Sēkope ʻa hono ngaahi fohá ke nau foki ki ʻIsipite. Naʻa nau ʻave ʻi he taimi ko ení ʻa Penisimani, ko honau tokoua siʻisiʻi tahá ʻo nau ō. Ke ʻahiʻahiʻi ʻa hono fanga tokouá, naʻe fūfuuʻi ʻe Siosifa ʻa ʻene ipu silivá ʻi he tangai uite ʻa Penisimaní peá ne tukuakiʻi ʻoku kaihaʻasi ia ʻe hono fanga tokouá. ʻI hono maʻu ʻe he kau sevāniti ʻa Siosifá ʻa e ipú ʻi he tangai ʻa Penisimaní, naʻe ʻohovale ʻa hono fanga tokouá. Naʻa nau kole kia Siosifa ke ne tauteaʻi kinautolu kae ʻikai ko Penisimani.

Naʻe ʻilo heni ʻe Siosifa kuo liliu ʻa hono fanga tokouá. Naʻe ʻikai lava ke kei mataʻofi ʻe Siosifa ʻa ʻene ongoʻí. Naʻá ne tangi peá ne pehē kiate kinautolu: ‘Ko au ʻa homou tokoua ko Siosifá. ʻOku kei moʻui ʻa ʻeku tamaí?’ Naʻe ʻohovale ʻaupito ʻa hono fanga tokouá. Naʻá ne tala ange: ‘ʻOua te mou ongoʻi kovi ʻi he meʻa naʻa mou fai kiate aú. Naʻe fekauʻi mai au ʻe he ʻOtuá ki heni ke fakahaofi ʻa hoʻomou moʻuí. Sai mou fakavave ʻo ʻomai ki heni ʻa ʻeku tamaí.’

Naʻa nau ō ki ʻapi ʻo tala ki heʻenau tamaí ʻa e ongoongo leleí pea ke ʻave ia ki ʻIsipite. Hili ʻa e ngaahi taʻu lahi, naʻe faifai pē ʻo toe feʻiloaki ʻa Siosifa mo ʻene tamaí.