Naʻe nofo ʻa Mōsese ʻi Mitiani ʻi he taʻu ʻe 40. Naʻá ne mali pea maʻu ʻene fānau. ʻI he ʻaho ʻe taha lolotonga ʻene tokangaʻi ʻa ʻene fanga sipí ofi ki Moʻunga Sainai, naʻá ne sio ai ki ha meʻa fakaofo. Naʻe ulo ha afi ʻi ha fuʻu ʻakau talatala, ka naʻe ʻikai ke vela! ʻI he ʻalu atu ʻa Mōsese ʻo ofi ke sio ki aí, naʻá ne fanongo ki ha leʻo mei he fuʻu ʻakaú ʻoku pehē mai: ‘Mōsese! ʻOua ʻe haʻu ke toe ofi ange. Vete ho senitoló he ʻokú ke tuʻu ʻi ha kelekele toputapu.’ Ko Sihova ia naʻe lea maí ʻo fakahoko mai ʻe ha ʻāngelo.

Naʻe ilifia ʻa Mōsese, ko ia naʻá ne fakapuliki hono matá. Naʻe pehē mai ʻe he leʻó: ‘Kuó u mamata ki he faingataʻaʻia ʻa e kau ʻIsilelí. Te u fakahaofi kinautolu mei he kau ʻIsipité pea ʻave kinautolu ki ha fonua lelei. Ko koe ʻa e tokotaha te ke taki ʻa hoku kakaí ki tuʻa mei ʻIsipité.’ ʻIkai ʻokú ke tui kuo pau pē naʻe ʻohovale ʻa Mōsese?

Naʻe ʻeke ʻe Mōsese: ‘Ko e hā te u leaʻaki ʻi hano ʻeke mai ʻe he kakaí pe ko hai naʻá ne fekauʻi ange aú?’ Naʻe tali ange ʻe he ʻOtuá: ‘Tala kiate kinautolu ko Sihova ko e ʻOtua ʻo ʻĒpalahame, ko e ʻOtua ʻo ʻAisake, pea ko e ʻOtua ʻo Sēkope kuó ne fekauʻi koé.’ Naʻe pehē leva ʻe Mōsese: ‘Fēfē kapau heʻikai ke fanongo mai ʻa e kakaí kiate au?’ Naʻe ʻoange ʻe Sihova kia Mōsese ha fakamoʻoni te Ne tokoniʻi ia. Naʻá ne tala ange kia Mōsese ke ne lī ki lalo hono tokotokó. Naʻe hoko leva ʻa e tokotokó ko ha ngata! ʻI hono puke ʻe Mōsese ʻa e hiku ʻo e ngatá, naʻe toe hoko ia ko ha tokotoko. Naʻe pehē ʻe Sihova: ‘ʻI hoʻo fakahoko ʻa e fakaʻilonga ko ení, ʻe fakamoʻoniʻi ai naʻá ku fekauʻi atu koe.’

Naʻe pehē ange ʻe Mōsese: ‘ʻOku ʻikai ko ha tokotaha pōtoʻi lea au.’ Naʻe palōmesi ʻa Sihova kiate ia: ‘Te u tala atu ʻa e meʻa ke ke leaʻakí, pea te u fekau ho tokoua ko ʻĒloné ke ne tokoni kiate koe.’ ʻI he ʻiloʻi naʻe kau mo ia ʻa Sihová, naʻe foki ʻa Mōsese mo hono uaifí mo hono ngaahi fohá ki ʻIsipite.

Naʻe fakamālohiʻi ʻa e kau ʻIsilelí ke nau ngāue lahi ko ha kau pōpula. Naʻe fekauʻi atu ʻe Sihova ʻa Mōsese mo ʻĒlone kia Felo mo e fekau ko ení: ‘Tuku ange hoku kakaí ke nau ō koeʻuhi ke nau lotu mai kiate au ʻi he toafá.’ Naʻe tali ange ʻe Felo ʻi he pōlepole: ‘ʻOku ʻikai haʻaku tokanga ki he meʻa ʻoku leaʻaki ʻe Sihová, pea heʻikai te u tuku ange ʻa e kau ʻIsilelí ke nau ō.’ Naʻe fakamālohiʻi leva ʻe Felo ke nau ngāue ʻo toe lahi ange. ʻE akoʻi ʻe Sihova kia Felo ha lēsoni. ʻOkú ke ʻiloʻi pe naʻe anga-fēfē? Naʻá ne ʻomi ʻa e Mala ʻe Hongofulu ki ʻIsipite. Naʻe tala ʻe Sihova kia Mōsese: ‘ʻOku ʻikai ke fanongo mai ʻa Felo kiate au. ʻI he pongipongí, te ne ʻi he Vaitafe Nailá. ʻAlu ʻo tala kiate ia koeʻuhi ko e ʻikai te ne tuku ange mai ke ō ʻa hoku kakaí, ʻe liliu ʻa e vai kotoa ʻi he Vaitafe Nailá ko e toto.’ Naʻe talangofua ʻa Mōsese ʻo ne ʻalu kia Felo. Naʻe sio ʻa Felo ki hono taaʻi ʻe ʻĒlone ʻa e vaitafé ʻaki hono tokotokó, pea naʻe liliu ʻa e vaitafé ko e toto. Naʻe kamata ke namukū ʻa e vaitafé, naʻe mate ʻa e fanga iká, pea naʻe ʻikai ha vai maʻa mei he vaitafé ke inu. Naʻe kei fakafisi pē ʻa Felo ke tuku ange ʻa e kau ʻIsilelí ke nau ō.

ʻI he ʻaho ʻe fitu ki mui ai, naʻe fekauʻi ʻe Sihova ʻa Mōsese ke ne foki kia Felo mo e fekau ko ení: ‘Kapau heʻikai te ke fekau ʻa hoku kakaí ke nau ō, ʻe fonu ʻa ʻIsipite ʻi ha fanga poto.’ Naʻe hiki hake ʻe ʻĒlone ʻa hono tokotokó, pea naʻe kamata ke ʻufiʻufi ʻe he fanga potó ʻa e fonuá. Naʻe sio ʻa e kakaí ki he fanga potó ʻi honau falé, ʻi honau mohengá, pea ʻi heʻenau ngaahi poulú. Naʻe ʻi he feituʻu kotoa pē ʻa e fanga potó! Naʻe ʻai ʻe Felo ʻa Mōsese ke ne kole kia Sihova ke taʻofi ʻa e mala ko ení. Naʻe palōmesi ʻa Felo te ne tuku ange ʻa e kau ʻIsilelí ke nau ō. Ko ia naʻe taʻofi ʻe Sihova ʻa e malá, pea naʻe tānaki ʻe he kau ʻIsipité ʻa e fanga poto naʻe maté, ʻi ha ngaahi fokotuʻunga. Naʻe kamata ke namukū ʻa e fonuá. Ka naʻe ʻikai pē ke tuku ange ʻe Felo ia ʻa e kakaí ke nau ō.

Naʻe tala leva ʻe Sihova kia Mōsese: ‘Kuo pau ke taaʻi ʻe ʻĒlone ʻa e kelekelé ʻaki hono tokotokó, pea ʻe liliu ʻa e efú ko e fanga namu, pe fanga kiʻi lango naʻe uʻu.’ ʻI he taimi pē ko iá naʻe ʻi he feituʻu kotoa pē ʻa e fanga namú. Naʻe tala ange ʻe he niʻihi ʻo e kakai ʻa Feló kiate ia: ‘Ko e haʻu ʻa e mala ko ení mei he ʻOtuá.’ Ka naʻe ʻikai pē ke tuku ange ʻe Felo ia ʻa e kau ʻIsilelí ke nau ō.