Naʻe pehē ʻe Sihova kia Mōsese: ‘ʻAlu hake kiate au ki he moʻungá. Te u tohi ʻeku ngaahi laó ʻi ha ongo lauʻimaka pea ʻoatu kiate koe.’ Naʻe kaka ʻa Mōsese ʻi he moʻungá peá ne nofo ai ʻi he ʻaho mo e pō ʻe 40. Lolotonga ʻene ʻi aí, naʻe tohi ʻe Sihova ʻa e Fekau ʻe Hongofulú ʻi he ongo lauʻimaká pea ʻoange ia kia Mōsese.

Hili mei ai ha taimi, naʻe pehē ʻe he kau ʻIsilelí ia kuo liʻaki kinautolu ʻe Mōsese. Naʻa nau pehē ange kia ʻĒlone: ‘ʻOku mau fiemaʻu ha taha ke ne taki kimautolu. Ngaohi ha ʻotua maʻamautolu!’ Naʻe pehē ʻe ʻĒlone: ‘ʻOmai hoʻomou koulá.’ Naʻá ne ʻai ke vaia ʻa e koulá pea ngaohiʻaki ha ʻīmisi ʻo ha kiʻi pulu. Naʻe pehē ange ʻe he kakaí: ‘Ko e kiʻi pulu ko ení ko homau ʻOtua ia naʻá ne taki kimautolu ki tuʻa mei ʻIsipité!’ Naʻe kamata ke nau lotu ki he kiʻi pulu koulá, pea fai ʻenau fakafiefia. Naʻe hala ʻa e meʻa ko iá? ʻIo, he naʻe palōmesi ʻa e kakaí te nau lotu pē kia Sihova. Ka ʻi he taimi ko ení naʻa nau maumauʻi ʻa e palōmesi ko iá.

Naʻe vakai mai ʻa Sihova ki he meʻa naʻe hokó, peá ne tala ange kia Mōsese: ‘ʻAlu hifo ki he kakaí. ʻOku nau talangataʻa kiate au pea nau lotu ki ha ʻotua loi.’ Naʻe ʻalu hifo ʻa Mōsese mei he moʻungá, ʻokú ne toʻo ʻa e ongo lauʻimaká.

ʻI he ofi ʻa Mōsese ki he tēnití, naʻá ne fanongo atu ki he hiva ʻa e kakaí. Pea naʻá ne sio ʻoku nau hula mo punou ki he kiʻi pulú. Naʻe ʻita lahi ʻa Mōsese. Naʻá ne tolongi ʻa e ongo lauʻimaká ki he kelekelé, ʻo mapakipaki. Naʻá ne fakaʻauha he taimi pē ko iá ʻa e ʻīmisí. Pea naʻá ne ʻeke kia ʻĒlone: ‘Naʻe anga-fēfē hono fakalotoʻi koe ʻe he kakaí ke ke fai ʻa e meʻa kovi ʻaupito ko ení?’ Naʻe pehē ange ʻe ʻĒlone: ‘ʻOua te ke ʻitá. ʻOkú ke ʻiloʻi pē ʻa e anga ʻo e kakaí ni. Naʻa nau fiemaʻu ha ʻotua, ko ia naʻá ku lī ʻenau koulá ki he afí pea maʻu mei ai ʻa e kiʻi pulu ko ení!’ Naʻe ʻikai totonu ke fai ia ʻe ʻĒlone. Naʻe foki hake ʻa Mōsese ki he moʻungá ʻo kole kia Sihova ke ne fakamolemoleʻi ʻa e kakaí.

Naʻe fakamolemoleʻi ʻe Sihova ʻa e faʻahinga naʻa nau loto-lelei ke talangofua kiate iá. ʻOku lava ke ke sio ki he mahuʻinga ke muimui ʻa e kau ʻIsilelí ʻi he taki ʻa Mōsesé?

ʻI he taimi naʻe ʻi Moʻunga Sainai ai ʻa Mōsesé, naʻe tala ange ʻe Sihova ke ne langa ha tēniti makehe, naʻe ui ko ha tāpanekale, ʻa ia naʻe lava ke lotu ai ʻa e kau ʻIsilelí kiate Ia. Naʻe malava ke nau ʻave ʻa e tāpanekalé ʻi heʻenau hikihiki holó.

Naʻe pehē ʻe Sihova: ‘Tala ki he kakaí ke nau foaki ha meʻa pē ʻoku nau malava ke tokoni ki hono langa ʻa e tāpanekalé.’ Naʻe foaki ʻe he kau ʻIsilelí ʻa e koula, siliva, kopa, maka mahuʻinga mo e meʻa-teuteu. Naʻa nau toe foaki ʻa e fulufuluʻisipi, līneni, kiliʻimanu, mo e ngaahi meʻa lahi kehe. Naʻa nau nima-homo ʻaupito he naʻe tala ʻe Mōsese kiate kinautolu: ‘Kuo feʻunga ʻa e meʻa ʻoku maʻú! ʻOua ʻe toe ʻomai ha ngaahi meʻa.’

Naʻe tokoni ʻa e kakai tangata mo e kakai fefine pōtoʻi ʻi hono langa ʻa e tāpanekalé. Naʻe ʻai ʻe Sihova ke nau poto ʻi he ngāué. Ko e niʻihi, naʻa nau takatakai filo, lalanga tupenu, pe teuteuʻi ia. Naʻe tō maka ʻa e niʻihi, ngāue ki he koulá, pe tā tongitongi ʻa e papá.

Naʻe ngaohi ʻe he kakaí ʻa e tāpanekalé ʻo hangē pē ko e meʻa naʻe tala ange ʻe Sihová. Naʻa nau ngaohi ʻa e puipui fakaʻofoʻofa ke vaheʻi ʻaki ʻa e tāpanekalé ki he konga ʻe ua, ko e Potu Toputapu mo e Potu Fungani Toputapu. Naʻe ʻi he Potu Fungani Toputapú ʻa e puha ʻo e fuakavá, ʻa ia naʻe ngaohi mei he papa sitimí mo e koulá. Naʻe ʻi he Potu Toputapú ha tuʻuʻanga maama koula, ko ha tēpile, mo ha ʻōlita ki he tutu ʻinisēnisí. Naʻe ʻi he lotoʻaá ha pēsoni kopa mo ha fuʻu ʻōlita. Ko e puha ʻo e fuakavá naʻe fakamanatu ai ki he kau ʻIsilelí ʻenau palōmesi te nau talangofua kia Sihová. ʻOkú ke ʻiloʻi pe ko e hā ʻa e fuakava? Ko ha palōmesi makehe ia.

Naʻe fili ʻe Sihova ʻa ʻĒlone mo hono ngaahi fohá ke nau ngāue ko e kau taulaʻeiki ʻi he tāpanekalé. Naʻe pau ke nau tokangaʻi ia pea fai ʻi ai ʻa e ngaahi feilaulau kia Sihová. Ko ʻĒlone pē tokotaha, ʻa e taulaʻeiki lahí, naʻe ngofua ke ne hū ki he Potu Fungani Toputapú. Naʻá ne fai eni tuʻo taha ʻi he taʻu ʻi hono ʻoatu ha feilaulau koeʻuhi ko ʻene angahalá, ko e angahala ʻa hono fāmilí, mo e angahala ʻa e puleʻanga kotoa ʻo ʻIsilelí.

Naʻe ʻosi hono langa ʻe he kau ʻIsilelí ʻa e tāpanekalé ʻi he taʻu ʻe taha hili ʻenau mavahe mei ʻIsipité. Naʻa nau maʻu he taimi ko ení ha feituʻu ke nau lotu ai kia Sihova.

Naʻe fakafonu ʻe Sihova ʻa e tāpanekalé ʻaki hono lāngilangí pea naʻe ʻasi ha konga ʻao ʻi ʻolunga ai. ʻI he taimi naʻe ʻi ʻolunga ai ʻa e konga ʻaó ʻi he tāpanekalé naʻe nofo ai pē ʻa e kau ʻIsilelí ʻi he feituʻu naʻa nau ʻi aí. Ka ʻi he ngaʻunu ʻa e konga ʻaó, naʻa nau ʻiloʻi kuo taimi ke nau hiki. Naʻa nau veteki ʻa e tāpanekalé pea muimui ʻi he konga ʻaó.