Ko e Hā e Vakai ʻa e Kau Fakamoʻoni ʻa Sihová Fekauʻaki mo e Putú?
ʻOku fakatuʻunga ʻemau fakakaukaú pea pehē ki he ngaahi meʻa ke fai ʻi he putú ʻi he ngaahi akonaki ʻa e Tohi Tapú hangē ko ení:
ʻOku fakanatula pē ke ongoʻi loto-mamahi ʻi ha mole atu ha taha ʻofeina. Naʻe tangi ʻa e kau ākonga ʻa Sīsuú ʻi he mate ha taha naʻa nau ʻofa ai. (Sione 11:33-35, 38; Ngāue 8:2; 9:39) Ko ia ai, ʻoku ʻikai ke mau fai e putú ke hangē ha kātoanga fakafiefiá. (Tangata Malanga 3:1, 4; 7:1-4) ʻI hono kehé, ʻoku mau vakai ki aí ko ha taimi ia ke fakahāhā ai ʻa e kaungāongoʻi.—Loma 12:15.
ʻOku ʻikai toe ʻilo ha meʻa ʻe he maté. Neongo pē ko e hā e matakali pe puipuituʻa fakafonua ʻoku tau ʻi aí, ʻoku tau kalofi ʻa e ngaahi anga fakafonua pe tōʻonga ʻoku ʻikai fakatohitapu ko ia ʻo pehē ʻoku kei lava pē ʻe he maté ʻo uesia ʻa e faʻahinga ʻoku moʻuí. (Tangata Malanga 9:5, 6, 10) ʻOku kau ki he ngaahi anga fakafonua ko ení ʻa e ʻāpoó, fakamoleki e paʻanga lahi ki he putú mo e kātoangaʻi hono fakamanatú, feilaulau ki he kau maté, talanoa mo kole ki he kau maté pea mo e ouau tukufakaholo ki he uitoú. ʻOku mau talitekeʻi ʻa e ngaahi anga fakafonua mo e tōʻonga ko ení, ʻi he talangofua ki he tuʻutuʻuni ʻa e Tohi Tapú: “Fakamavaheʻi kimoutolu, . . . pea tuku ʻa e ala ki he meʻa taʻemaʻá.”—2 Kolinitō 6:17.
ʻOku ʻi ai e ʻamanaki ki he kau maté. ʻOku akoʻi ʻe he Tohi Tapú ʻe ʻi ai ʻa e toetuʻu pea ʻe aʻu ki ha taimi ʻe ʻikai toe ʻi ai ha mate. (Ngāue 24:15; Fakahā 21:4) ʻOku tokoniʻi kitautolu ʻe he ʻamanaki ko iá ke tau fakaʻehiʻehi ai mei he ngaahi tōʻonga tengihia tōtuʻá, ʻo hangē ko hono tokoniʻi ʻo e muʻaki kau Kalisitiané ʻi he meʻa tatau.—1 Tesalonaika 4:13.
ʻOku naʻinaʻi ʻa e Tohi Tapú ke anga-fakanānā. (Palōveepi 11:2) ʻOku ʻikai ke mau fakakaukau ko e putú ko ha faingamālie ia ke “fiehāʻaki” hoto tuʻungá pe koloá. (1 Sione 2:16) ʻOku ʻikai ke mau fokotuʻutuʻu ha ngaahi putu tōtuʻa, ʻo fakataumuʻa ki he fakafiefia pe fakaeʻa ai e ngaahi puha mate totongi mamafa ʻaupito mo e ngaahi teuteu tōtuʻa ʻo e maté, ke tohoakiʻi ʻaki e tokanga ʻa e kau mamatá.
ʻOku ʻikai ke mau kounaʻi ʻa e niʻihi kehé ki heʻemau tui fekauʻaki mo e putú. ʻI he meʻá ni ʻoku mau muimui ai ki he tefitoʻi moʻoni ko ia: “Ko e tokotaha taki taha ʻo kitautolu te ne fai ha tali maʻana ki he ʻOtuá.” (Loma 14:12) Ka neongo ia, ʻi he maʻu ha faingamālié, ʻoku mau feinga ke fakamatalaʻi ʻemau tuí “ʻaki ha loto anga-malū mo e fakaʻapaʻapa loloto.”—1 Pita 3:15.
ʻOku fēfē fai putu ʻa e Kau Fakamoʻoni ʻa Sihová?
Feituʻu: Kapau ʻoku loto ha fāmili ke fakahoko ʻa e putú, ʻe lava ke fai ia ʻi he feituʻu ʻe fili ʻe he fāmilí, hangē ko ha Fale Fakatahaʻanga, ʻapi faiʻanga putu, ʻi ha ʻapi tāutaha, ʻi ha fakamomofiʻanga pe ʻi faʻitoka.
Malanga: ʻOku fakahoko ha malanga ke fakanonga ki he kau tau tonú ʻaki hono fakamatalaʻi e lau ʻa e Tohi Tapú fekauʻaki mo e maté pea mo e ʻamanaki ki ha toetuʻu. (Sione 11:25; Loma 5:12; 2 Pita 3:13) ʻOku fakamanatu nai ʻi he malangá ʻa e ngaahi ʻulungaanga lelei ʻo e tokotaha pekiá, ʻaki hono ʻohake ha ngaahi lēsoni fakalototoʻa mei heʻene faʻifaʻitakiʻanga anga-tonú.—2 Sāmiuela 1:17-27.
ʻE hivaʻi nai ha hiva Fakatohitapu. (Kolose 3:16) ʻOku fakaʻosi ʻa e malangá ʻaki ha lotu fakanonga.—Filipai 4:6, 7.
Totongi pe tānaki paʻanga: ʻOku ʻikai ʻeke ha totongi mei ha ouau fakalotu pē, kau ki ai ʻa e putú, pe ko e fai ha tānaki paʻanga ʻi heʻemau ngaahi fakatahá.—Mātiu 10:8.
Faʻahinga ʻoku ʻi aí: ʻOku talitali lelei ʻa e faʻahinga ʻikai ʻi he tuí ki ha putu ʻi he fale fakatahaʻangá. Hangē pē ko ʻetau ngaahi fakatahá, ko e putu ko iá ʻoku ʻatā pē ki ha taha.
ʻOku kau ʻa e Kau Fakamoʻoni ʻa Sihová ʻi he fai putu ʻa e ngaahi lotu kehé?
ʻOku fai pē ʻe he tokotaha taki taha ʻo e Kau Fakamoʻoni ʻa Sihová ʻe ne fili ʻo fakatatau ki hono konisēnisi kuo ʻosi akoʻi ʻe he Tohi Tapú. (1 Tīmote 1:19) Neongo ia, ʻoku ʻikai ke mau kau ʻi he ngaahi ouau fakalotu ʻoku ʻikai fehoanaki mo e Tohi Tapú.—2 Kolinitō 6:14-17.