Naʻe mavahe ʻa e kau ʻIsilelí mei Moʻunga Sainai ʻo nau fononga ʻo fou ʻi he toafa Pēlaná ki ha feituʻu ko Kētesi. Naʻe tala ai ʻe Sihova kia Mōsese: ‘Fekauʻi ha kau tangata ʻe toko 12, ko e toko taha mei he matakali taki taha, ke nau asiasi ʻi Kēnani, ʻa e fonua te u foaki ki he kau ʻIsilelí.’ Ko ia naʻe fili ʻe Mōsese ʻa e kau tangata ʻe toko 12 peá ne pehē kiate kinautolu: ‘Mou ō ki Kēnani, pea ʻai ke ʻiloʻi pe ʻoku lelei ʻa e fonuá ke tō ai ha meʻakai. Sio pe ko e kakaí ʻoku nau vaivai pe mālohi pea sio pe ʻoku nau nofo tēniti pe ʻi ha ngaahi kolo.’ Naʻe mavahe ʻo ō ki Kēnani ʻa e kau asiasi ʻe toko 12, ʻo kau ai ʻa Siosiua mo Kēlepi.

Hili ʻa e ʻaho ʻe 40, naʻe foki mai ʻa e kau asiasí, ʻo nau omi mo e fiki, pomikānite, mo e kālepi. Naʻe fakamatala ʻa e kau asiasí: ‘Ko ha fonua lelei ia, ka ko e kakaí ʻoku nau mālohi pea ʻoku māʻolunga ʻa e ʻā ʻo e ngaahi koló.’ Hili iá naʻe pehē ʻe Kēlepi: ‘ʻE lava ke tau ikunaʻi kinautolu. Tau ō leva he taimí ni!’ ʻOkú ke ʻiloʻi ʻa e ʻuhinga naʻe lea pehē ai ʻa Kēlepí? Koeʻuhí ko ia mo Siosiua naʻá na falala kia Sihova. Ka naʻe pehē ʻe he kau asiasi ʻe toko hongofulú: ‘ʻIkai! Ko e kakaí ʻoku nau lalahi, ʻo hangē ha kau saianití! Naʻa mau hangē ha fanga heʻe ʻi honau tafaʻakí.’

Naʻe loto-siʻi ai ʻa e kau ʻIsilelí. Naʻe kamata ke nau lāunga ʻo fepehēʻaki: ‘Tau fili ha taki kehe pea tau foki ki ʻIsipite. Ko e hā ke tau ō ai ki he feituʻu ko ení ʻo mate ai?’ Naʻe pehē ʻe Siosiua mo Kēlepi: ‘ʻOua ʻe talangataʻa kia Sihova, pea ʻoua ʻe ilifia. ʻE maluʻi kitautolu ʻe Sihova.’ Ka naʻe ʻikai ke fanongo ki ai ʻa e kau ʻIsilelí. Naʻe aʻu ʻo nau loto ke tāmateʻi ʻa Siosiua mo Kēlepi!

Ko e hā naʻe fai ʻe Sihová? Naʻá ne pehē kia Mōsese: ‘Hili ʻa e meʻa kotoa pē kuó u fai maʻá e kau ʻIsilelí, ʻoku ʻikai pē ke nau talangofua kiate au. Ko ia te nau nofo ʻi he toafá ʻi he taʻu ʻe 40, pea te nau mate ai. Ko ʻenau fānaú pē mo Siosiua mo Kēlepi te nau nofo ʻi he fonua naʻá ku palōmesi ke ʻoange kiate kinautolú.’

ʻI ha taimi ki mui, lolotonga ʻa e nofo ʻa e kau ʻIsilelí ʻi he toafá naʻe angatuʻu ai kia Mōsese ʻa Kola, Tētani, ʻApilami, mo e faʻahinga kehe ʻe toko 250. Naʻa nau pehē kiate ia: ‘Kuo mau fiu ʻiate koe! Ko e hā ke ke hoko ai ko homau taki pea hoko ʻa ʻĒlone ko e taulaʻeiki lahí? ʻOku ʻiate kitautolu kotoa ʻa Sihova, ʻo ʻikai ko koe pē mo ʻĒlone.’ Naʻe ʻikai ke fiefia ʻa Sihova. Naʻá ne vakai ki he meʻa ko iá ko ha angatuʻu kiate ia!

Naʻe tala ʻe Mōsese kia Kola mo hono kau poupoú: ‘Mou omi ki he tāpanekalé ʻapongipongi, pea toʻo mai hoʻomou ʻaiʻanga afí mo e ʻinisēnisí. ʻE fakahaaʻi mai ʻe Sihova pe ko hai kuó ne filí.’

ʻI he ʻaho hono hokó, naʻe ʻalu atu ai ʻa Kola mo e kau tangata ʻe toko 250 ke fakafetaulaki kia Mōsese ʻi he tāpanekalé. Naʻa nau tutu ai ʻa e ʻinisēnisí ʻo hangē ko kinautolu ʻa e kau taulaʻeikí. Naʻe tala ʻe Sihova kia Mōsese mo ʻĒlone: ‘Mou mavahe meia Kola mo ʻene kau tangatá.’

Neongo naʻe ʻalu ʻa Kola kia Mōsese ki he tāpanekalé, naʻe ʻikai ke ʻalu ʻa Tētani, mo ʻApilami pea mo hona fāmilí. Naʻe tala ʻe Sihova ki he kau ʻIsilelí ke nau mavahe mei he tēniti ʻo Kola, Tētani pea mo ʻApilamí. Naʻe mavahe he taimi pē ko iá ʻa e kau ʻIsilelí. Naʻe tuʻu ʻa Tētani, mo ʻApilami mo hona fāmilí ʻi tuʻa ʻi honau tēnití. Fakafokifā pē naʻe mavaeua ʻa e kelekelé ʻo ne folo kinautolu! ʻI he tāpanekalé, naʻe ʻalu hifo ai ha afi ʻo ne tutu ʻa Kola mo ʻene kau tangata ʻe toko 250.

Naʻe tala leva ʻe Sihova kia Mōsese: ‘Toʻo ha tokotoko mei he taki ʻo e matakali taki taha, pea tohi ai ʻa hono hingoá. Kae tohi ʻa e hingoa ʻo ʻĒloné ʻi he tokotoko ʻo e matakali Līvaí. Faʻo ia ʻi loto ʻi he tāpanekalé, pea ko e tokotoko ʻo e tangata kuó u filí ʻe tupu ai ʻa e matalaʻiʻakau.’

ʻI he ʻaho hono hokó, naʻe toʻo mai ai ki tuʻa ʻe Mōsese ʻa e tokotokó kotoa ʻo fakahaaʻi ki he kau takí. Naʻe tupu ʻa e matalaʻiʻakau ʻi he tokotoko ʻo ʻĒloné, pea naʻe ʻi ai ha fuaʻi ʻalimoni ʻoku motuʻa. Naʻe fakapapauʻi heni ʻe Sihova kuó ne fili ʻa ʻĒlone ke ne hoko ko e taulaʻeiki lahí.