Hili ʻa e taki ʻe Siosiua ʻa e kakai ʻa Sihová ʻi he ngaahi taʻu lahi, naʻá ne mate ʻi hono taʻu 110. Lolotonga ʻene kei moʻuí, naʻe lotu ʻa e kau ʻIsilelí kia Sihova. Ka ʻi he hili ʻa e mate ʻa Siosiuá, naʻe kamata ke nau lotu ki he ngaahi ʻaitolí, ʻo hangē ko e kau Kēnaní. Koeʻuhi ko e ʻikai ke hokohoko atu ʻa e muimui ʻa e kau ʻIsilelí ʻia Sihová, naʻá ne fakaʻatā ha tuʻi Kēnani ko Siapini ke ne ʻai ke nau faingataʻaʻia. Naʻe kole tokoni ʻa e kakaí kia Sihova. Ko ia naʻe ʻoange ai ʻe Sihova hanau taki foʻou, ko Pēlake. Naʻá ne tokoniʻi ʻa e kakaí ke nau foki kia Sihova.

Naʻe fekau atu ha palōfita fefine ko Tēpola ke haʻu ʻa Pēlake kiate ia. Naʻá ne ʻoange kiate ia ha fekau meia Sihova: ‘ʻAve ha kau tangata ʻe toko 10,000, pea ʻalu ʻo fakafetaulaki ki he kau tau ʻa Siapiní ʻi he vaitafe Kīsoní. Te ke ikunaʻi ai ʻa Sīsela, ko e taki ʻo e kau tau ʻa Siapiní.’ Naʻe tala ange ʻe Pēlake kia Tēpola: ‘Te u toki ʻalu pē kapau te ke ʻalu mo au.’ Naʻá ne pehē ange: ‘Te u ʻalu mo koe. Ka ko e meʻa ke ke ʻiloʻí ʻoku ʻikai ko koe ʻa e tokotaha te ne tāmateʻi ʻa Sīselá. Kuo pehē ʻe Sihova ʻe tāmateʻi ia ʻe ha fefine.’

Naʻe ʻalu hake ʻa Tēpola mo Pēlake mo ʻene kau taú ki Moʻunga Tēpoa ke teuteu ki he taú. ʻI he fanongo pē ʻi he meʻá ni ʻa Sīselá, naʻá ne fakatahatahaʻi mai ʻene ngaahi saliote taú mo ʻene kau taú ki he teleʻa ʻi laló. Naʻe pehē ʻe Tēpola kia Pēlake: ‘Ko e ʻaho eni ʻe foaki atu ai ʻe Sihova kiate koe ʻa e ikuná.’ Naʻe ʻalu hifo ʻa Pēlake mo ʻene kau tangata ʻe toko 10,000 mei he moʻungá ke fakafetaulaki ki he fuʻu kau tau mālohi ʻa Sīselá.

Naʻe ʻai leva ai ʻe Sihova ke tāfea ʻa e vaitafe Kīsoní. Naʻe pipiki ʻa e ngaahi saliote tau ʻa Sīselá ʻi he pelepelá. Naʻe hifo ʻa Sīsela mei heʻene salioté ʻo kamata ke ne lele. Naʻe ikunaʻi ʻe Pēlake mo ʻene kau sōtiá ʻa e kau tau ʻa Sīselá, ka naʻe hola ʻa Sīsela! Naʻá ne lele ʻo toi ʻi he tēniti ʻo ha fefine ko Siaili. Naʻá ne ʻoange kiate ia ha huʻakau ke ne inu pea fakakafuʻi leva ia. Naʻe mohe ʻa e tangata tau helaʻiá. Naʻe tolotolo mai leva ʻa Siaili kiate ia ʻo tukiʻi ha pine tēniti ʻi hono foʻi ʻulú. Naʻá ne mate ai.

Naʻe haʻu ʻa Pēlake ʻo kumi ʻa Sīsela. Naʻe hū ki tuʻa ʻa Siaili mei hono tēnití ʻo ne pehē: ‘Hū mai. Te u fakahaaʻi atu ʻa e tangata ʻokú ke kumí.’ Naʻe hū atu ʻa Pēlake ʻo sio kia Sīsela ʻokú ne tokoto kuó ne ʻosi mate. Naʻe hiva fakamālō ʻa Pēlake mo Tēpola kia Sihova ʻi heʻene ʻai ke ikunaʻi ʻe he kau ʻIsilelí ʻa honau ngaahi filí. ʻI he taʻu ʻe 40 hono hokó, naʻe melino ai ʻa ʻIsileli.

Lolotonga ha taimi honge ʻi ʻIsileli, naʻe hiki ai ha fefine ʻIsileli ko Nāomi ki he fonua ko Mōapé mo hono husepānití mo ʻena ongo tamaiki tangata ʻe toko ua. Ki mui ai, naʻe mate ʻa e husepāniti ʻo Nāomí. Naʻe mali ʻa ʻene ongo tamaikí mo Lute pea mo ʻOpa, ʻa ia ko e ongo fefine Mōape. Ko e meʻa fakamamahí, ʻi he faai atu ʻa e taimí, naʻe mate mo e ongo tamaiki ʻa Nāomí.

ʻI he fanongo ʻa Nāomi kuo ʻosi ʻa e honge ʻi ʻIsilelí, naʻá ne fili ai ke foki ki hono fonuá. Naʻe fononga mo ia ʻa Lute mo ʻOpa, kae lolotonga ʻenau ʻi he halá, naʻe tala ange ʻe Nāomi kiate kinaua: ‘Naʻá mo hoko ko e ongo uaifi lelei ki heʻeku ongo tamaikí mo e ongo ʻofefine-ʻi-he-fono lelei kiate au. ʻOku ou loto ke mo toe mali. Mo foki ki homo ʻapí ki Mōape.’ Naʻe pehē ange ʻe he ongo fefiné: ‘ʻOkú ma ʻofa ʻiate koe! ʻOku ʻikai te ma loto ke liʻaki koe.’ Naʻe toutou tala ange ʻe Nāomi ke na ō. Naʻe faifai pē ʻo foki ʻa ʻOpa, ka naʻe nofo pē ʻa Lute. Naʻe tala ange ʻe Nāomi kiate ia: ‘Kuo foki ʻa ʻOpa ki hono kakaí pea ki hono ngaahi ‘otuá. Foki mo ia, pea ‘alu ki he ‘api ho‘o fa‘eé.’ Ka naʻe pehē ange ʻe Lute: ‘Heʻikai te u liʻaki koe. Ko ho kakaí te nau hoko ko hoku kakai, pea ko ho ʻOtuá te ne hoko ko hoku ʻOtua.’ ʻOkú ke pehē naʻe ongoʻi fēfē ʻa Nāomi ʻi hono leaʻaki ia ʻe Luté?

Naʻe aʻu ʻa Lute mo Nāomi ki ʻIsileli ʻi he kamata ʻa e tutuʻu ʻo e uité. ʻI he ʻaho ʻe taha, naʻe ʻalu atu ai ʻa Lute ke tufi ʻa e toenga uite ʻi he ngoue ʻa ha tangata ko Pōasi, ʻa ia ko e tama ʻa Lēhapi. Naʻá ne fanongo ko Luté ko ha fefine Mōape ʻa ia naʻe mateaki ʻo ne nofo mo Nāomi. Naʻá ne tala ki heʻene kau ngāué ke fakatoe ha uite ʻi he ngoué maʻa Lute ke ne tufi.

ʻI he efiafi ko iá, naʻe ʻeke ange ʻe Nāomi kia Lute: ‘Ko e ngoue ʻa hai naʻá ke ngāue ai ʻi he ʻaho ní?’ Naʻe pehē ʻe Lute: ‘Ko e ngoue ʻa ha tangata ko Pōasi.’ Naʻe tala ange ʻe Nāomi: ‘Ko Pōasí ko e taha ia ʻo e fāmili ʻo hoku husepānití. Hokohoko atu ʻa e ngāue mo e kau fefine kehe ʻi heʻene ngoué. Te ke malu ai.’

Naʻe hokohoko atu ʻa e ngāue ʻa Lute ʻi he ngoue ʻa Pōasí ʻo aʻu ki he ʻosi ʻa e taimi tutuʻu uité. Naʻe fakatokangaʻi ʻe Pōasi ko Luté naʻe ngāue mālohi pea ko ha fefine lelei moʻoni ia. ʻI he ngaahi ʻaho ko iá, kapau naʻe mate ha tangata pea ʻikai hano foha, naʻe mali hano fāmili mo e uitoú. Ko ia naʻe mali ai ʻa Pōasi mo Lute. Naʻe ʻi ai ʻena tamasiʻi ko ʻŌpeti, ʻa ia naʻe hoko ki mui ko e kui tangata ʻa Tuʻi Tēvitá. Naʻe fiefia ʻa e ngaahi kaungāmeʻa ʻo Nāomí. Naʻa nau pehē: ‘ʻUluakí, naʻe ʻoatu ʻe Sihova kiate koe ʻa Lute, ʻa ia kuó ne anga-lelei ʻaupito kiate koe, pea ko eni kuó ke maʻu ha mokopuna. ʻOfa ke fakamālōʻiaʻi ʻa Sihova.’