ʻI he faai atu ʻa e taimí, naʻe toe tafoki ʻa ʻIsileli meia Sihova pea kamata ke nau lotu ki he ngaahi ʻotua loí. ʻI he taʻu ʻe fitu, naʻe kaihaʻasi ai ʻe he kau Mitianí ʻa e fanga manu ʻa e kau ʻIsilelí pea fakaʻauha ʻenau ngaahi ngoué. Ke hola mei he kau Mitianí, naʻe toi ʻa e kau ʻIsilelí ʻi he ngaahi ʻana pea ʻi he ngaahi moʻungá. Naʻa nau kole kia Sihova ke ne fakahaofi kinautolu. Ko ia naʻe fekauʻi mai ʻe Sihova ha ʻāngelo ki ha kiʻi tangata ko Kitione. Naʻe pehē ange ʻe he ʻāngeló: ‘Kuo fili koe ʻe Sihova ke ke hoko ko ha tangata toʻa ʻi he taú.’ Naʻe ʻeke ange ʻe Kitione: ‘ʻE lava fēfē ke u fakahaofi ʻa ʻIsileli? Ko ha tokotaha au ʻoku ʻikai ke ʻiloa.’

ʻE ʻilo fēfē ʻe Kitione kuo fili ia ʻe Sihová? Naʻá ne tuku ha fulufuluʻisipi ʻi he kelekelé peá ne pehē kia Sihova: ‘ʻI he pongipongí, kapau ʻe viviku ʻi he hahaú ʻa e fulufuluʻisipí kae mōmoa pē ʻa e kelekelé, te u ʻiloʻi ai ʻokú ke fiemaʻu ke u fakahaofi ʻa ʻIsileli.’ ʻI he pongipongi hono hokó, naʻe viviku ʻo pīponu ʻa e fulufuluʻisipí pea naʻe mōmoa ʻa e kelekelé! Ka naʻe toe kole ʻe Kitione ke mōmoa ʻa e fulufuluʻisipí ʻi he pongipongi hono hokó kae viviku ʻa e kelekelé. ʻI he hoko iá, naʻe tui leva ai ʻa Kitione kuo fili ia ʻe Sihova. Naʻá ne fakatahatahaʻi mai ʻene kau sōtiá ke nau tau mo e kau Mitianí.

Naʻe tala ʻe Sihova kia Kitione: ‘Te u tuku ke ikuna ʻa e kau ʻIsilelí. Ka koeʻuhi ko e fuʻu tokolahi ʻa hoʻo kau sōtiá, te ke fakakaukau nai ai ʻokú ke ikunaʻi ʻa e taú ʻiate koe pē. Tala ki ha taha pē ʻoku ilifia ke ne foki ki ʻapi.’ Ko ia naʻe foki ʻa e kau sōtia ʻe toko 22,000 pea toe pē ʻa e toko 10,000. Naʻe toe pehē ange ʻe Sihova: ‘ʻOku kei fuʻu tokolahi pē ʻa e kau sōtiá. ʻAve kinautolu ki he vaitafé, pea tala ange ke nau inu ʻa e vai ʻi he vaitafé. Tuku pē ʻiate koe ʻa e faʻahinga te nau fakasio ki he filí lolotonga ʻenau inú.’ Ko e kau tangata pē ʻe toko 300 naʻa nau hanganaki tokanga lolotonga ʻenau inú. Naʻe palōmesi ʻa Sihova ʻe ikunaʻi ʻe he kau tangata tokosiʻi ko ení ʻa e kau sōtia Mitiani ʻe toko 135,000.

ʻI he pō ko iá, naʻe tala ai ʻe Sihova kia Kitione: ‘Kuo taimi ke ʻohofi ʻa e kau Mitianí!’ Naʻe ʻoange ʻe Kitione ki heʻene kau tangatá ʻa e ngaahi meʻaifi mo e ngaahi fuʻu siā naʻe ʻi loto ai ha ngaahi tūhulu. Naʻá ne tala ange: ‘Mou siofi au, pea fai ʻa e meʻa tofu pē ʻoku ou faí.’ Naʻe ifi ʻe Kitione ʻa ʻene meʻaifí, peá ne haʻaki ʻo momo ʻene siaá, hiki hake ʻene tūhulú, peá ne kaila: ‘Ko e heletā ʻa Sihová pea mo Kitione!’ Naʻe fai ʻe heʻene kau tangata kotoa ʻe toko 300 ʻa e meʻa tatau. Naʻe ilifia ʻa e kau Mitianí pea nau lele takai holo. ʻI heʻenau puputuʻú, naʻe kamata ke nau fetāmateʻaki. Naʻe toe tokoniʻi ai ʻe Sihova ʻa e kau ʻIsilelí ke nau ikunaʻi ʻa honau ngaahi filí.

Naʻe ʻi ai ha tangata ʻIsileli ko ʻElikena naʻe ʻi ai hono ongo uaifi, ko ʻAna mo Pēnina, ka naʻá ne ʻofa lahi ange ʻia ʻAna. Naʻe manukiʻi ʻe Pēnina ʻa ʻAna ʻi he taimi kotoa pē koeʻuhí naʻe ʻikai ha fānau ʻa ʻAna ka naʻe tokolahi ʻa e fānau ʻa Pēniná. ʻI he taʻu taki taha, naʻe ʻave ai ʻe ʻElikena ʻa hono fāmilí ke nau lotu ʻi he tāpanekale ʻi Sailó. ʻI heʻenau ʻi ai ʻi he taimi ʻe taha, naʻá ne fakatokangaʻi ai ʻoku loto-mamahi ʻaupito ʻa hono ʻofaʻanga ko ʻAná. Naʻá ne pehē ange: ‘ʻOua muʻa te ke tangí ʻAna. Ko au eni. ʻOku ou ʻofa ʻiate koe.’

Ki mui ai, naʻe ʻalu toko taha ai ʻa ʻAna ke fai ʻene lotu. Naʻe ʻikai lava ke tuku ʻene tangí pea naʻá ne kole kia Sihova ke ne tokoniʻi ia. Naʻá ne palōmesi ange: ‘ʻE Sihova, kapau te ke ʻomai haʻaku tama, te u foaki atu ia maʻau, pea te ne tauhi kiate koe ʻi he kotoa ʻo ʻene moʻuí.’

Naʻe sio ʻa e Taulaʻeiki Lahi ko ʻĪlaí ki he tangi mamahi ʻa ʻAná, pea naʻá ne pehē ʻe ia ʻokú ne konā. Naʻe tala ange ʻe ʻAna: ‘ʻIkai, ʻe hoku ʻeiki, ʻoku ʻikai te u konā. ʻOku ʻi ai ʻeku palopalema lahi, pea ʻoku ou talanoa kia Sihova ʻo fekauʻaki mo ia.’ Naʻe ʻiloʻi ai ʻe ʻĪlai ʻoku hala ʻene maʻú peá ne tala ange kiate ia: ‘ʻOfa ke ʻoatu ʻe he ʻOtuá ʻa e meʻa ʻokú ke fiemaʻú.’ Naʻe ongoʻi fiemālie ange ai ʻa ʻAna peá ne foki. Siʻi hifo ʻi ha taʻu ʻe taha mei ai, naʻá ne maʻu ha tamasiʻi peá ne fakahingoa ia ko Sāmiuela. ʻE lava ke ke sioloto atu ki he fiefia kuo pau naʻe hoko kia ʻAná?

Naʻe ʻikai ke ngalo ʻia ʻAna ʻa ʻene palōmesi kia Sihová. ʻI he hili pē ʻene mavaeʻi ʻa Sāmiuelá, naʻá ne ʻave ia ke ne ngāue ʻi he tāpanekalé. Naʻá ne tala ange kia ʻĪlai: ‘Ko e tamasiʻi eni naʻá ku lotu ʻo kolé. ʻOku ou foaki ia kia Sihova, ʻi he kotoa ʻo hono ngaahi ʻahó.’ Naʻe ʻaʻahi ʻa ʻElikena mo ʻAna kia Sāmiuela ʻi he taʻu kotoa pē ʻo ʻave kiate ia hano kiʻi kofu foʻou taʻenima. Naʻe toe ʻoange ʻe Sihova kia ʻAna ha toe tamaiki tangata ʻe toko tolu mo e ongo tamaiki fefine ʻe toko ua.