Naʻe toe liʻaki ʻe he kau ʻIsilelí ʻa Sihova pea kamata ke nau lotu ki he ngaahi ʻotua loí. ʻI hono ʻohofi ʻe he kau ʻĀmoní ʻo tauʻi ʻa e kau ʻIsilelí, naʻe halaʻatā ke fai ʻe he ngaahi ʻotua loi ko iá ha meʻa ke tokoniʻi kinautolu. Naʻe faingataʻaʻia ʻa e kau ʻIsilelí ʻi he ngaahi taʻu lahi. Naʻe faifai pē pea nau pehē kia Sihova: ‘Kuo mau faiangahala. Fakahaofi muʻa kimautolu mei homau ngaahi filí.’ Naʻe fakaʻauha ʻe he kau ʻIsilelí ʻenau ngaahi ʻaitolí pea kamata ke nau toe lotu kia Sihova. Naʻe ʻikai loto ʻa Sihova ke sio ʻoku hokohoko atu ʻenau faingataʻaʻiá.

Naʻe fili ha tangata tau ko Sēfita ke ne taki ʻa e kakaí ʻi he tau mo e kau ʻĀmoní. Naʻá ne pehē kia Sihova: ‘Kapau te ke tokoniʻi kimautolu ke mau ikuna ʻi he tau ko ení, ʻoku ou palōmesi ʻi heʻeku foki ki ʻapí, te u foaki atu maʻau ʻa e ʻuluaki tokotaha ʻe hū mai mei hoku falé ʻo fakafetaulaki kiate aú.’ Naʻe fanongo ʻa Sihova ki he lotu ʻa Sēfitá peá ne tokoniʻi ia ke ne ikuna ʻi he taú.

ʻI he foki ʻa Sēfita ki ʻapí, ko e ʻuluaki tokotaha naʻe hū mai ke fakafetaulaki kiate iá ko hono ʻofefiné, ʻa ʻene tama pē ʻe tahá. Naʻá ne hula mo tā nafa. Ko e hā ʻe fai ʻe Sēfitá? Naʻá ne manatuʻi ʻa ʻene palōmesí peá ne pehē: ‘ʻOiauē, ʻe hoku ʻofefine! Kuó ke fakalotomamahiʻi au. Kuó u fai ha palōmesi kia Sihova. Ke fai ki aí, kuo pau ke u ʻave koe ke ke ngāue ʻi he tāpanekale ʻi Sailó.’ Ka naʻe pehē ange ʻe hono ʻofefiné kiate ia: ‘Siʻeku tamai, kapau kuó ke fai ha palōmesi kia Sihova, kuo pau ke ke fai ki ai. Ko e meʻa pē ʻoku ou kole atú ke tuku mai ke u ʻalu ʻi he māhina ʻe ua ki he ngaahi moʻungá mo hoku ngaahi kaungāmeʻa fefiné. Pea te u toki ʻalu leva.’ Naʻe tauhi faitōnunga ʻa e ʻofefine ʻo Sēfitá ʻi he tāpanekalé ʻi he toenga ʻo ʻene moʻuí. ʻI he taʻu kotoa pē naʻe ʻalu ai hono ngaahi kaungāmeʻá ki Sailo ʻo ʻaʻahi kiate ia.

Ko e Taulaʻeiki Lahi ko ʻĪlaí naʻe ʻi ai hono ongo foha naʻá na ngāue ko e ongo taulaʻeiki ʻi he tāpanekalé. Ko hona hingoá ko Hofinai mo Fineasi. Naʻe ʻikai te na talangofua ki he ngaahi lao ʻa Sihová, pea naʻá na ngaohikoviʻi lahi ʻa e kakaí. ʻI hono ʻomai ʻe he kau ʻIsilelí ʻa e ngaahi feilaulau kia Sihová, naʻe toʻo ʻe Hofinai mo Fineasi ʻa e kakanoʻi-manu lelei tahá maʻanaua. Naʻe fanongo ʻa ʻĪlai ʻi he meʻa naʻe fai ʻe hono ongo fohá, ka naʻe halaʻatā ke ne fai ki ai ha meʻa. ʻE fakaʻatā ʻe Sihova ke hokohoko atu ʻa e meʻá ni?

Neongo naʻe kei siʻi ʻaupito ʻa Sāmiuela ʻia Hofinai mo Fineasi, naʻe ʻikai te ne faʻifaʻitaki kiate kinaua. Naʻe hōifua ʻa Sihova kia Sāmiuela. ʻI he pō ʻe taha lolotonga ʻene mohé, naʻe fanongo ai ʻa Sāmiuela ki ha leʻo ʻokú ne ui ʻa hono hingoá. Naʻá ne tuʻu hake, ʻo ne lele kia ʻĪlai, ʻo pehē: ‘Ko au eni!’ Ka naʻe pehē ange ʻe ʻĪlai: ‘Naʻe ʻikai te u ui koe. Foki ʻo mohe.’ Naʻe foki ʻa Sāmiuela ʻo mohe. Pea naʻe toe fai mai ʻa e uí. ʻI he fanongo ʻa Sāmiuela ki he leʻó ko hono tuʻo tolú ia, naʻe ʻiloʻi ʻe ʻĪlai ko Sihova ʻokú ne ui ʻa Sāmiuelá. Naʻá ne tala ange kia Sāmiuela kapau te ne toe fanongo ki he leʻó, peá ne pehē: ‘Lea mai ʻe Sihova. ʻOku fanongo atu ʻa hoʻo sevānití.’

Naʻe foki ʻa Sāmiuela ʻo mohe. Pea naʻá ne fanongo ki he ui: ‘ʻE Sāmiuela! ʻE Sāmiuela!’ Naʻá ne tali: ‘Lea mai, he ʻoku fanongo atu ʻa hoʻo sevānití.’ Naʻe tala ange ʻe Sihova kiate ia: ‘Tala kia ʻĪlai te u tauteaʻi ia mo hono fāmilí. ʻOkú ne ʻiloʻi ʻa hono fai ʻe hono ongo fohá ʻa e ngaahi meʻa kovi ʻi hoku tāpanekalé, ka ʻoku halaʻatā ke ne fai ha meʻa ki ai.’ ʻI he pongipongi hono hokó naʻe fakaava ai ʻe Sāmiuela ʻa e ngaahi matapā ʻo e tāpanekalé, ʻo hangē pē ko ia ʻokú ne faʻa faí. Naʻá ne ilifia ke tala ki he taulaʻeiki lahí ʻa e meʻa naʻe tala ange ʻe Sihová. Ka naʻe ui ia ʻe ʻĪlai ʻo ne ʻeke ange: ‘ʻE hoku foha, ko e hā naʻe tala atu ʻe Sihova kiate koé? Tala mai kiate au ʻa e meʻa kotoa pē.’ Ko ia naʻe tala ʻe Sāmiuela kia ʻĪlai ʻa e meʻa kotoa pē.

ʻI he tupu hake ʻa Sāmiuelá, naʻe hokohoko atu ʻa e kau mo ia ʻa Sihová. Mei he ngataʻanga ʻe taha ʻo e fonuá ki he ngataʻanga ʻe tahá, naʻe ʻiloʻi ai ʻe he kau ʻIsilelí kotoa kuo fili ʻe Sihova ʻa Sāmiuela ke ne hoko ko ha palōfita mo ha fakamaau.