ʻI he hili ʻa e hoko ʻa Solomone ko e tuʻi ʻo ʻIsilelí, naʻe ʻeke ange ʻe Sihova kiate ia: ‘Ko e hā te ke saiʻia ke u ʻoatu maʻaú?’ Naʻe pehē ʻe Solomone: ‘ʻOku ou kei siʻi, pea ʻoku ʻikai te u ʻilo ʻa e meʻa ʻoku ou faí. ʻOmai muʻa kiate au ha poto ke u tokangaʻi ʻaki ho kakaí.’ Naʻe pehē ange ʻe Sihova: ‘Koeʻuhi ko hoʻo kole mai ʻa e potó, te u ʻai koe ke ke hoko ko e tangata poto taha ʻi he māmaní. Te u toe ʻai foki koe ke ke koloaʻia lahi. Pea kapau te ke talangofua kiate au, te ke maʻu ha moʻui fuoloa.’

Naʻe kamata hono langa ʻe Solomone ʻa e temipalé. Naʻá ne ngāueʻaki ʻa e koula lelei tahá, siliva, papa, mo e maka. Naʻe ngāue ʻa e kau tangata mo e kau fefine pōtoʻi ʻe laui afe ʻi he temipalé. Hili ʻa e taʻu ʻe fitu naʻe maau ai ʻa e temipalé ke fakatapui kia Sihova. Naʻe ʻi ai hono ʻōlita, pea naʻe fai ʻi ai ʻa e ngaahi feilaulau. Naʻe punou ʻa Solomone ʻi muʻa ʻi he ʻōlitá ʻo ne lotu: ‘ʻE Sihova, ko e temipalé ni ʻoku ʻikai ke lahi feʻunga pe fakaʻofoʻofa feʻunga ia kiate koe, ka ke tali muʻa ʻemau ngaahi lotú pea fanongo mai ki ai.’ Naʻe fēfē ʻa e fakakaukau ʻa Sihova ki he temipalé mo e lotu ʻa Solomoné? ʻI he ʻosi pē ʻa e lotu ʻa Solomoné, naʻe ʻalu hifo ʻa e afi mei he langí ʻo ne tutu ʻa e ngaahi feilaulau ʻi he ʻōlitá. Naʻe leleiʻia ʻa Sihova ʻi he temipalé. ʻI he sio ki he meʻá ni ʻa e kau ʻIsilelí, naʻa nau fiefia.

Naʻe ʻiloa ʻa Tuʻi Solomone ʻi hono potó ʻi ʻIsileli kotoa pea aʻu ki he ngaahi feituʻu mamaʻó. Naʻe omi ʻa e kakaí kia Solomone ke ne tokoniʻi kinautolu ʻi heʻenau ngaahi palopalemá. Naʻa mo e kuini ʻo Sipá naʻá ne haʻu ke siviʻi ia ʻaki ʻa e ngaahi fehuʻi faingataʻa. ʻI heʻene fanongo ki heʻene ngaahi talí, naʻá ne pehē: ‘Naʻe ʻikai te u tui ki he meʻa naʻe tala mai ʻe he kakaí fekauʻaki mo koé, ka ʻoku ou ʻiloʻi he taimí ni ʻokú ke toe poto ange koe ʻi he meʻa naʻa nau leaʻakí. Ko ho ʻOtua ko Sihová kuó ne tāpuakiʻi koe.’ Naʻe lelei ʻa e moʻui ʻa e puleʻanga ʻo ʻIsilelí, pea naʻe fiefia ʻa e kakaí. Ka naʻe ʻamanaki ke liliu ʻa e ngaahi meʻá.

Lolotonga ʻa e lotu ʻa Solomone kia Sihová, naʻe ʻi ai ha melino ʻi ʻIsileli. Ka naʻe mali ʻa Solomone mo e kakai fefine tokolahi mei he ngaahi fonua kehé, pea naʻe lotu ʻa e ngaahi uaifi ko ení ki he ngaahi ʻaitoli. Naʻe liliu māmālie ʻa Solomone, pea naʻe kamata ke ne lotu mo ia foki ki he ngaahi ʻaitolí. Naʻe ʻita ʻa Sihova. Naʻá ne tala kia Solomone: ‘ʻE toʻo ʻa ʻIsileli mei ho fāmilí ʻo vahe ua. Te u foaki ʻa e konga lahí ki he taha ʻo hoʻo kau sevānití, pea ʻe pule ho fāmilí ki he konga siʻí pē.’

Naʻe ʻai foki ʻe Sihova ke hā mahino ʻa ʻene filí ʻi ha toe founga ʻe taha. Naʻe fononga ʻa Selopoame ko e taha ʻo e kau sevāniti ʻa Solomoné, ʻi he halá peá ne fetaulaki ai mo e palōfita ko ʻĀhisá. Naʻe hae ʻe ʻĀhisa ʻa hono kofú ki he konga ʻe 12 peá ne tala ange kia Selopoame: ‘ʻE toʻo ʻe Sihova ʻa e puleʻanga ʻo ʻIsilelí mei he fāmili ʻo Solomoné ʻo vahe ua. Toʻo ʻa e konga ʻe hongofulu koeʻuhí te ke pule ki he matakali ʻe hongofulú.’ Naʻe fanongo ʻi he meʻá ni ʻa Tuʻi Solomone peá ne loto ke tāmateʻi ʻa Selopoame! Ko ia naʻe hola ʻa Selopoame ki ʻIsipite. Naʻe faai atu pē ʻo mate ʻa Solomone pea naʻe hoko ko e tuʻi ʻa hono foha ko Lehopoamé. Naʻe fakakaukau leva ʻa Selopoame kuó ne hao pea ke ne foki ki ʻIsileli.

Naʻe tala ʻe he kau mātuʻa ʻi ʻIsilelí kia Lehopoame: ‘Kapau te ke ngaahi lelei ʻa e kakaí, te nau mateaki atu kiate koe.’ Ka naʻe pehē ange ʻe he ngaahi kaumeʻa kei siʻi ʻo Lehopoamé: ‘ʻOku fiemaʻu ke ke anga-fefeka ki he kakaí! ʻAi ke nau ngāue ke toe lahi ange!’ Naʻe muimui ʻa Lehopoame ki he fakahinohino ʻa hono ngaahi kaumeʻa kei siʻí. Naʻá ne anga-fakamamahi ki he kakaí, pea naʻa nau angatuʻu. Naʻa nau fakanofo ʻa Selopoame ke ne tuʻi ki he matakali ʻe hongofulú, ʻa ia naʻe ui ko e puleʻanga ʻo ʻIsilelí. Ko e matakali ʻe uá naʻe ui ia ko e puleʻanga ʻo Siutá, pea naʻe hokohoko atu ʻenau mateaki kia Lehopoamé. Naʻe mavaeua he taimi ko ení ʻa e matakali ʻe 12 ʻo ʻIsilelí.

Naʻe ʻikai fiemaʻu ʻe Selopoame ke ʻalu hono kakaí ʻo lotu ʻi Selusalema, ʻa ia naʻe ʻi he puleʻanga ʻo Lehopoamé. ʻOkú ke ʻiloʻi ʻa hono ʻuhingá? Naʻe ilifia ʻa Selopoame naʻa nau tafoki meiate ia ʻo poupou kia Lehopoame. Ko ia naʻá ne ngaohi ha ongo kiʻi pulu koula pea tala ki hono kakaí: ‘ʻOku fuʻu mamaʻo ʻa Selusalema. ʻE lava ke mou lotu pē ʻi heni.’ Naʻe kamata ke lotu ʻa e kakaí ki he ongo kiʻi pulu koulá pea toe ngalo ai ʻiate kinautolu ʻa Sihova.