ʻOkú Ke Falala ki he Founga Hono Fai ʻe Sihova ʻa e Ngaahi Meʻá?

1-2. (a) Ko e hā ʻoku faingataʻa ai ki he tokolahi ke nau falala ki he faʻahinga ʻoku maʻu mafaí? (e) Ko e hā te tau lāulea ki ai ʻi he kupu ko ení?

ʻI HE ʻahó ni ʻoku faingataʻa ki he tokolahi ke falala ki ha taha pē ʻoku maʻu mafai. Kuo nau vakai ki he ngaahi faʻunga fakalaó mo e fakapolitikalé ʻoku nau hehema ke saiʻia ange ʻi he koloaʻiá mo e mālohí pea fakafisi ke fakamaau totonu ki he masivá. ʻOku tonu ʻa e fakamatala ʻa e Tohi Tapú: “Lolotonga ʻa e taimi kuo pule ai ha tangata ki ha tangata ko e kovi pē ʻokú ne ʻomi kiate iá.” (Tml. 8:9) Tānaki atu ki aí, ko e kau taki lotu ʻe niʻihi kuo nau fai ʻa e ngaahi tōʻonga kovi ʻa ia kuo ʻai ai ʻa e kakai ʻe niʻihi ke mole ʻenau falala ki he ʻOtuá. Ko ia ʻi he taimi ʻoku loto ai ha taha ke ako ʻa e Tohi Tapú mo kitautolú, ʻoku tau fehangahangai mo ha pole ke tokoniʻi ia ke langa hake ʻene falala kia Sihova mo Hono kau fakafofonga ʻi he māmaní.

² Ko e moʻoni, ʻoku ʻikai ko e kau ako Tohi Tapú pē ʻoku fiemaʻu ke nau ako ke falala kia Sihova pehē foki ki heʻene kautahá. Naʻa mo e faʻahinga ʻo kitautolu kuo tau kau ki he moʻoní ʻi he ngaahi taʻu lahi kuo pau ke ʻoua ʻaupito naʻa ngalo ko e founga hono fai ʻe Sihova ʻa e ngaahi meʻá ko e lelei tahá pē ia. ʻI he taimi ʻe niʻihi, ʻe malanga hake ha ngaahi tuʻunga ʻe ʻahiʻahiʻi nai ai ʻetau falala pau ki he meʻa ko iá. ʻI he kupu ko ení, te tau lāulea ai ki he tafaʻaki ʻe tolu ʻa ia ʻe lava ke ʻahiʻahiʻi ai ʻetau tuí: (1) ʻI heʻetau lau ha fakamatala Fakatohitapu pau, (2) ʻi heʻetau maʻu ha tataki mei he kautaha ʻa Sihová, pea (3) ʻi heʻetau fehangahangai mo e ngaahi pole ʻi he kahaʻú.

FALALA KIA SIHOVA ʻI HOʻO LAU ʻA E TOHI TAPÚ

3. ʻE lava fēfē ke ʻahiʻahiʻi ʻe ha fakamatala Fakatohitapu pau ʻetau falala kia Sihová?

³ ʻI heʻetau lau ʻa e Folofola ʻa e ʻOtuá, te tau fehuʻia nai ʻa e founga ʻo e fakafeangai ʻa Sihova ki he kakai ʻe niʻihi pea mo e ngaahi faituʻutuʻuni ʻe niʻihi naʻá ne fai. Ko e fakatātaá, ʻi he tohi ʻa Nōmipá, ʻoku tau lau ai naʻe tautea mate ʻe Sihova ha tokotaha ʻIsileli naʻá ne tufi fefie ʻi he Sāpaté. ʻI he tohi hono ua ʻa Sāmiuelá, ʻoku tau ako ai ʻi ha laui senituli ki mui ai, naʻe fakamolemoleʻi ʻe Sihova ʻa Tuʻi Tēvita ʻi heʻene fai ha tono mo ha fakapō. (Nōm. 15:32, 35; 2 Sām. 12:9, 13) Te tau fifili nai, ‘Ko e hā naʻe fakamolemoleʻi ai ʻe Sihova ʻa Tēvita ʻi he fakapō mo e tonó ka ne tautea mate ha tangata ki haʻane laka hala naʻe ʻikai fuʻu mafatukituki?’ Ke tali ʻa e fehuʻi ko ení, fakakaukau ki ha moʻoniʻi meʻa ʻe tolu ʻoku lelei ke tau manatuʻi ʻi heʻetau lau ʻa e Tohi Tapú.

4. ʻOku anga-fēfē hono fakaivimālohiʻi ʻe he Sēnesi 18:20, 21 mo e Teutalōnome 10:17 ʻetau falala pau ki he fakamaau ʻa Sihová?

⁴ ʻOku ʻikai ke ʻomai maʻu pē ʻi he Tohi Tapú ʻa e ngaahi fakaikiiki kotoa ki ha fakamatala. Ko e fakatātaá, ʻoku tau ʻiloʻi naʻe fakatomala loto-moʻoni ʻa Tēvita ki heʻene ngaahi tōʻongá. (Saame 51:2-4) Ka ko e tokotaha fēfē ʻa e tangata naʻá ne maumauʻi ʻa e lao ʻo e Sāpaté? Naʻá ne fakaʻiseʻisa ʻi he meʻa naʻá ne faí? Naʻá ne talangataʻa nai ki he lao ʻa Sihová ʻi he kuohilí? Naʻá ne tukunoaʻi pe aʻu ʻo talitekeʻi ʻa e ngaahi fakatokanga ki muʻá? ʻOku ʻikai ke tala mai ia ʻe he Tohi Tapú. Kae kehe, ʻoku lava ke tau fakapapauʻi ʻa e meʻá ni: Ko Sihová “ʻoku ʻikai ʻaupito taʻefaitotonu.” (Teu. 32:4) ʻOku makatuʻunga ʻene faituʻutuʻuní ʻi he ngaahi moʻoniʻi meʻá kotoa​—ʻo ʻikai ʻi he fanongo talanoa, tomuʻa fehiʻa pe ʻi ha toe meʻa pē ʻokú ne faʻa mioʻi ʻa e fakamaau ʻa e tangatá. (Lau ʻa e Sēnesi 18:20, 21; Teutalōnome 10:17.) Ko e lahi ange ʻetau ako fekauʻaki mo Sihova mo ʻene ngaahi tuʻungá, ko e lahi ange ia ʻetau fakatupulekina ʻa e falala ki heʻene fakamāú. Neongo kapau ʻoku malanga hake ha ngaahi fehuʻi fekauʻaki mo ha fakamatala Fakatohitapu ʻa ia ʻoku ʻikai lava ke tau tali ʻi he taimí ni, ʻoku feʻungaʻānoa pē ʻa e meʻa ʻoku tau ʻiloʻi fekauʻaki mo hotau ʻOtuá ke tau fakapapauʻi ai ʻokú ne “māʻoniʻoni . . . ʻi heʻene ngaahi foungá kotoa.”​—Saame 145:17.

5. ʻOku anga-fēfē uesia ʻe he taʻehaohaoá ʻetau ongoʻi ki he fakamaau totonú? (Sio foki ki he puha “Fakanenefuʻi ʻe he Taʻehaohaoá ʻEtau Vakai ki he Fakamaau Totonú.”)

⁵ Ko ʻetau ongoʻi ki he fakamaau totonú ʻoku fakameleʻi ʻe he taʻehaohaoá. Naʻe ngaohi kitautolu ʻe he ʻOtuá ʻi hono ʻīmisí, ko ia ʻoku tau holi ke maʻu ʻe he kakaí ʻa e fakamaau totonú. (Sēn. 1:26) Ka koeʻuhí ʻoku tau taʻehaohaoa, ʻe lava ke tau fakamaauhalaʻi ʻa e ngaahi meʻá, neongo kapau ʻoku tau fakakaukau ʻoku tau maʻu ʻa e moʻoniʻi meʻá kotoa. Ko e fakatātaá, fakakaukau ki he mamahi ʻa Siona ʻi hono fakaaʻu atu ʻe Sihova ʻa e mēsí ki he kakai ʻo Ninivé. (Siona 3:10–4:1) Neongo ia, fakakaukau ki he olá. Naʻe fakahaofi ai ʻa e moʻui laka hake ʻi he 120,000 ʻo e kau Ninive fakatomalá! ʻI he ngataʻangá ko Siona​—ʻo ʻikai ko Sihova​—naʻe fiemaʻu ki ai ʻa e fakatonutonú.

6. Ko e hā ʻoku ʻikai fiemaʻu ai ke fakamatalaʻi mai ʻe Sihova ʻa e ʻuhinga ʻene ngaahi faituʻutuʻuní?

⁶ ʻOku ʻikai ke moʻuaʻaki ʻe Sihova ha fakamatala fekauʻaki mo ʻene faituʻutuʻuní ki he faʻahinga ʻo e tangatá. Ko e moʻoni, naʻe fakaʻatā ʻe Sihova ʻene kau sevāniti ʻi he kuohilí ke fakahaaʻi ʻenau ngaahi hohaʻa fekauʻaki mo e ngaahi faituʻutuʻuni naʻá ne faí pe naʻe ʻamanaki ke ne faí. (Sēn. 18:25; Siona 4:2, 3) Pea ʻi he taimi ʻe niʻihi, naʻá ne fakamatalaʻi ʻa e ʻuhinga ʻene faituʻutuʻuní. (Siona 4:10, 11) Neongo ia, ʻoku ʻikai ke moʻuaʻaki ʻe Sihova ha fakamatala kiate kitautolu. ʻI hono tuʻunga ko hotau Tokotaha-Fakatupú, ʻoku ʻikai fiemaʻu ia ke ne maʻu ha ngofua meia kitautolu ki muʻa pe ʻi he hili ʻene fai ha meʻa.​—ʻAi. 40:13, 14; 55:9.

FALALA KIA SIHOVA ʻI HOʻO MAʻU HA TATAKI

7. Ko e hā ʻa e pole te tau fehangahangai nai mo iá, pea ko e hā hono ʻuhingá?

⁷ ʻOku ʻikai ha veiveiua ʻoku tau tali ʻaufuatō ko Sihova ʻokú ne fai maʻu pē ʻa e meʻa ʻoku totonú. Kae kehe, ʻe hoko nai ko ha pole kiate kitautolu ke falala ki hono kau fakafofonga fakaetangatá. Te tau fifili nai pe ko e faʻahinga ʻoku nau maʻu ha mafai ʻi he kautaha ʻa Sihová ʻoku nau ngāue moʻoni ʻo fakatatau ki he tataki ʻa Sihová pe ko haʻanautolú pē. Ko e anga nai ia ʻo e fakakaukau ʻa e niʻihi naʻe moʻui ʻi he taimi ʻo e Tohi Tapú. Fakakaukau ki he fakatātā ʻi he palakalafi 3. Ko ha kāinga ʻo e tangata naʻá ne maumauʻi ʻa e lao ʻo e Sāpaté naʻá ne fifili nai pe naʻe kumi faleʻi ʻa Mōsese kia Sihova ki muʻa ke ne fanongonongo ʻa e tautea maté. Pea ko ha kaumeʻa nai ʻo ʻŪlaia ko e Hetí, ʻa ia ko hono uaifí naʻá ne fai ʻa e tono mo Tēvitá, te ne fakamulituku nai ko Tēvita naʻá ne ngāueʻaki hono tuʻunga ko ha tuʻí ke ne hao mei he tautea naʻá ne tuha moʻoni mo iá. Ka ko e foʻi moʻoní heʻikai lava ke tau pehē ʻoku tau falala kia Sihova kapau ʻoku ʻikai ke tau falala ki hono kau fakafofonga ʻi he māmaní​—ʻa e faʻahinga ʻoku falala ki ai ʻa Sihová.

8. Ko e hā ʻa e faitatau ʻi he meʻa ʻoku hiki ʻi he Ngāue 16:4, 5 mo e founga ʻoku ngāue ai ʻa e fakatahaʻanga Kalisitiané ʻi he ʻaho ní?

⁸ ʻI he ʻahó ni ʻoku tataki ʻe Sihova ʻa e konga fakaemāmani ʻo ʻene kautahá fakafou ʻi he “tamaioʻeiki anga-tonu mo potó.” (Māt. 24:45) Hangē ko e kulupu pule ʻo e ʻuluaki senitulí, ko e tamaioʻeiki ko ení ʻokú ne tokangaʻi ʻa e kakai ʻa e ʻOtuá ʻi māmani lahí pea ʻoange ʻa e tataki ki he kau mātuʻa ʻi he fakatahaʻangá. (Lau ʻa e Ngāue 16:4, 5.) Ko e kau mātuʻá leva ʻoku nau fakahoko ʻa e tataki ko ení ʻi he fakatahaʻangá. ʻOku tau fakahāhā ʻoku tau falala ki he founga hono fai ʻe Sihova ʻa e ngaahi meʻá ʻaki ʻa e talangofua ki he tataki ʻoku tau maʻu mei heʻene kautahá mo e kau mātuʻá.

9. Ko fē nai ʻa e taimi ʻe faingataʻa ai ke muimui ki ha fili ʻoku fai ʻe he kau mātuʻá, pea ko e hā hono ʻuhingá?

⁹ ʻI he taimi ʻe niʻihi, ʻe hoko nai ko ha pole ke muimui ki he fili ʻoku fai ʻe he kau mātuʻá. Ko e fakatātaá, ʻi he ngaahi taʻu ki muí ni maí ko e ngaahi fakatahaʻanga mo e sēketi lahi kuo fai hono toe fokotuʻutuʻu. ʻI he tuʻunga ʻe niʻihi, kuo kole ʻe he kau mātuʻá ki ha kau malanga ke nau poupou ki ha fakatahaʻanga kehe koeʻuhi ke ngāue lelei taha ʻaki ʻa e ngaahi nofoʻanga ʻi he Fale Fakatahaʻangá. Kapau ʻoku kole mai ke tau hiki ki ha fakatahaʻanga foʻou, ʻe faingataʻa nai ke tau mavahe mei he kaungāmeʻá mo e fāmilí. ʻOku maʻu nai ʻe he kau mātuʻá ha tataki fakaʻotua ki he feituʻu ke vaheʻi ki ai ʻa e tokotaha malanga taki taha? ʻIkai. Pea ko e moʻoniʻi meʻa ko iá te ne ʻai nai ke hoko ko ha pole ʻa e muimui ki he tataki ʻoku tau maʻú. Ka ʻoku falala ʻa Sihova ki he kau mātuʻá ke nau fai ʻa e fili ko iá, pea ʻoku fiemaʻu foki ke tau falala kiate kinautolu.b

10. ʻI he fehoanaki mo e Hepelū 13:17, ko e hā ʻoku totonu ai ke tau ngāue fakataha mo e kau mātuʻá?

¹⁰ Ko e hā ʻoku totonu ai ke tau ngāue fakataha mo e kau mātuʻá pea poupou ki heʻenau ngaahi filí naʻa mo e ngaahi fili ʻoku ʻikai ke tau saiʻia aí? Koeʻuhí ʻi hono fai iá, ʻoku tau tokoni ai ke tauhi ʻa e fāʻūtaha ʻi he haʻohaʻonga ʻo e kakai ʻa e ʻOtuá. (ʻEf. 4:2, 3) ʻOku tupulekina ʻa e fakatahaʻangá ʻi he taimi ʻoku fakamoʻulaloa anga-fakatōkilalo ai ʻa e tokotaha kotoa ki he ngaahi fili ʻoku fakahoko ʻe he kulupu ʻo e kau mātuʻá. (Lau ʻa e Hepelū 13:17.) Ko e mahuʻinga angé, ʻoku tau fakahāhā kia Sihova ʻoku tau falala kiate ia ʻi heʻetau ngāue fakataha mo e faʻahinga ʻoku tuku ki ai ʻene falala ke nau tokangaʻi kitautolú.​—Ngā. 20:28.

11. Ko e hā ʻe lava ke ne tokoniʻi kitautolu ke fakaivimālohiʻi ʻetau falala ki he tataki ʻoku tau maʻu mei he kau mātuʻá?

¹¹ ʻOku lava ke tau fakaivimālohiʻi ʻetau falala ki he tataki ʻoku tau maʻu mei he kau mātuʻá ʻaki ʻetau manatuʻi ʻoku nau lotu ki he tokoni ʻa e laumālie māʻoniʻoní ʻi heʻenau lāulea ki he ngaahi meʻa ʻoku kaunga ki he fakatahaʻangá. ʻOku nau toe fakakaukau fakalelei ki he ngaahi tefitoʻi moʻoni Fakatohitapu feʻungamālie pea vakai ki he ngaahi fakahinohino ʻoku tokonaki mai ʻe he kautaha ʻa Sihová. Ko ʻenau holi loto-moʻoní ke fakahōifuaʻi ʻa Sihova pea ke tokonaki ʻa e tokanga lelei taha ʻoku ala lavá ki heʻene kakaí. Ko e kau tangata faitōnunga ko ení ʻoku nau ʻilo kuo pau ke nau fai ha fakamatala ki he ʻOtuá ki he founga ʻoku nau fakahoko ai honau fatongiá. (1 Pita 5:2, 3) Fakakaukau ki he moʻoniʻi meʻa ko ení: ʻI ha māmani ʻoku māvahevahe fakamatakali, fakalotu mo fakapolitikale, ko e kakai ʻa Sihová ʻoku nau fāʻūtaha ʻi he lotu ki he ʻOtua moʻoni pē tahá. ʻOku malava ke fakahoko ení ʻi he tāpuaki pē ʻa Sihova ʻi heʻene kautahá!

12. Ko e hā ʻa e ngaahi moʻoniʻi meʻa kuo pau ke fakakaukau ki ai ʻa e kau mātuʻá ʻi heʻenau fakapapauʻi pe ʻoku fakatomala ha tokotaha?

¹² Kuo tuku ʻe Sihova ki he kau mātuʻá ʻa e fatongia mafatukituki ʻo hono tauhi ke maʻa ʻa e fakatahaʻangá. Kapau ʻoku fai ʻe ha Kalisitiane ha angahala mamafa, ʻoku ʻamanekina ʻe Sihova ʻa e kau mātuʻá ke nau fakapapauʻi pe ʻe lava ʻa e tokotahá ke kei nofo ai pē ʻi he fakatahaʻangá. ʻOku kau ʻi he ngaahi meʻa ko iá ʻa e fiemaʻu ke nau ʻiloʻi pe ʻoku fakaʻiseʻisa moʻoni ʻa e tokotahá ʻi he meʻa naʻá ne faí. Te ne taukaveʻi nai ʻokú ne fakatomala, ka ʻokú ne fehiʻa moʻoni ʻi he meʻa naʻá ne faí? ʻOkú ne fakapapauʻi heʻikai ke ne toe fakahoko ʻa e angahala ko iá? Kapau ko e feohi koví naʻe taki atu ki heʻene faihalá, ʻokú ne loto-lelei ke tuʻusi ʻa e ngaahi feohi ko iá? Ko e kau mātuʻá ʻoku nau fakakaukau ʻi he faʻa lotu ki he ngaahi moʻoniʻi meʻá ʻi he fakamaama ʻa e Folofolá, ʻo fakakaukau ki he vakai ʻa e tokotaha faihalá ki he meʻa naʻe hokó. ʻOku nau fili leva pe ʻe lava ke kei nofo ʻa e tokotaha faihalá ʻi he fakatahaʻangá. ʻI he ngaahi tuʻunga ʻe niʻihi, kuo pau ke tuʻusi ia.​—1 Kol. 5:11-13.

13. Ko e hā ʻa e hohaʻa ʻoku tau maʻu nai ʻi he taimi ʻoku tuʻusi ai ha kaumeʻa pe ko ha kāinga?

¹³ ʻE anga-fēfē nai hono ʻahiʻahiʻi ʻetau falala ki he kau mātuʻá? Kapau ko e tokotaha ʻoku tuʻusí ʻoku ʻikai ko ha kaumeʻa ofi pe ko ha kāinga, te tau tali loto-lelei nai ʻa e fili ʻa e kau mātuʻá. Ka tau pehē pē ko e tokotaha naʻe tuʻusí ko ha kaumeʻa ofi. Te tau hohaʻa nai ko e kau mātuʻá naʻe ʻikai ke nau fakakaukau ki he ngaahi moʻoniʻi meʻá kotoa pe te tau fifili nai pe naʻa nau faifakamaau moʻoni ʻi he founga ʻa Sihová. Ko e hā ʻe lava ke ne tokoniʻi kitautolu ke tauhi maʻu ʻa e vakai totonu ki he fili ko iá?

14. Ko e hā ʻe lava ke ne tokoniʻi kitautolu kapau ko e fili ʻa e kau mātuʻá fekauʻaki mo e faihalá ʻokú ne uesia fakafoʻituitui kitautolu?

¹⁴ ʻOku lelei ke tau manatuʻi ko e tuʻusí ko e fokotuʻutuʻu ia ʻa Sihova pea ʻoku ʻaonga ia ki he fakatahaʻangá pea ʻe ʻaonga nai ki he tokotaha faihalá. Kapau naʻe fakaʻatā ha tokotaha faihala taʻefakatomala ke nofo pē ʻi he fakatahaʻangá, ʻe lava ke ne hoko ko ha tākiekina kovi. (Kal. 5:9) Tānaki atu ki aí, heʻikai nai ke ne lāuʻilo ki he mafatukituki ʻene angahalá, pea ʻikai nai haʻane fakaueʻiloto ke fakatonutonu ʻene fakakaukaú mo e tōʻongá ke lava ʻo ne toe maʻu ʻa e hōifua ʻa Sihová. (Tml. 8:11) ʻOku lava ke tau fakapapauʻi ʻi he taimi ʻoku fakakaukauʻi ai pe ʻoku totonu ke tuʻusi ha tokotaha, ko e kau mātuʻá ʻoku nau fai fakamātoato honau fatongiá. ʻOku nau ʻiloʻi, hangē ko e kau fakamaau ʻi ʻIsileli ʻo e kuonga muʻá, ʻoku “ʻikai ke [nau] fakamaau maʻá e tangatá ka maʻa Sihova.”​—2 Kal. 19:6, 7.

KO E FALALA KIA SIHOVA HE TAIMI NÍ ʻOKÚ NE TEUʻI KITAUTOLU KI HE KAHAʻÚ

15. Ko e hā ʻoku fiemaʻu ai ke tau falala ʻo toe lahi ange ki he tataki ʻa Sihová ʻi he taimi ní?

¹⁵ ʻI he ofi ki he ngataʻanga ʻo e fokotuʻutuʻu ko ení, ʻoku fiemaʻu ke tau falala ʻo toe lahi ange ki he founga hono fai ʻe Sihova ʻa e ngaahi meʻá. Ko e hā hono ʻuhingá? Lolotonga ʻa e fuʻu mamahi lahí, te tau maʻu nai ha ngaahi fakahinohino ʻe hā ngali kehe, taʻefakapotopoto pe taʻeʻuhinga. Ko e moʻoni, heʻikai ke lea hangatonu mai ʻa Sihova kiate kitautolu. ʻOku ngalingali te ne tokonaki mai ʻa e tatakí fakafou ʻi hono kau fakafofonga kuo fakanofó. ʻOku ʻikai ko ha taimi ia ke fehuʻia ʻa e tatakí pe vakai ki ai ʻi he veiveiua, ʻo fifili, ‘Ko e haʻu moʻoni eni meia Sihova pe ko e ngāue pē eni ia ʻa e fanga tokoua fua fatongiá?’ ʻE fēfē hoʻo fakafeangaí ʻi he taimi faingataʻa ko ia ʻo e hisitōlia ʻo e tangatá? Ko e talí ʻe fakahaaʻi ia ʻi he anga hoʻo vakai ki he tataki fakateokalatí ʻi he taimí ni. Kapau ʻokú ke falala ki he tataki ʻoku tau maʻu ʻi he ʻaho ní pea mateuteu ke talangofua, ʻoku ngalingali te ke fai ʻa e meʻa tatau ʻi he lolotonga ʻa e fuʻu mamahi lahí.​—Luke 16:10.

16. ʻE lava fēfē ke ʻahiʻahiʻi ʻetau falala ki he faifakamaau ʻa Sihová ʻi he kahaʻu ofi maí?

¹⁶ ʻOku toe ʻi ai ha tafaʻaki ʻe taha ʻoku lelei ke tau fakakaukau ki ai​—ko e faifakamaau ʻa Sihova ʻi he ngataʻanga ʻo e fokotuʻutuʻu ko ení. ʻI he taimí ni, ʻoku tau ʻamanaki ko e tokolahi ʻoku ʻikai ke nau tauhi kia Sihová, kau ai hotau kāinga taʻetuí te nau tauhi kiate Ia. Ka ʻi ʻĀmaketone, ko Sihova, fakafou ʻia Sīsū, te ne fai ʻa e tuʻutuʻuni aofangatuku fekauʻaki mo honau kahaʻú. (Māt. 25:31-33; 2 Tes. 1:7-9) ʻOku ʻikai ʻatautolu ia ke fili pe ko hai te ne maʻu pe ʻikai maʻu ʻa e meesi ʻa Sihová. (Māt. 25:34, 41, 46) ʻE malava ke tau falala ki he faifakamaau ʻa Sihová pe ʻe hoko ia ko ha fakatūkiaʻanga kiate kitautolu? ʻOku hā mahino, ʻoku fiemaʻu ke tau fakaivimālohiʻi ʻetau falala kia Sihová ʻi he taimí ni koeʻuhi ke tau falala kakato ai kiate ia ʻi he kahaʻú.

17. ʻE anga-fēfē ʻetau maʻu ʻaonga mei he ngaahi faifakamaau ʻa Sihova ʻi he ngataʻanga ʻo e fokotuʻutuʻu ko ení?

¹⁷ Sioloto atu ki he anga ʻo ʻetau ongoʻi ʻi he māmani foʻou ʻa e ʻOtuá ʻi heʻetau sio ki he ola ʻo e ngaahi faifakamaau ʻa Sihová. Ko e lotu loí ʻe puli atu, pea pehē ki he fokotuʻutuʻu fakakomēsiale mānumanú fakataha mo e fokotuʻutuʻu fakapolitikale kuo nau lōmekina ʻa e kakaí pea fakatupunga ʻa e meʻa fakamamahi taʻefaʻalaua ʻi he kotoa ʻo e hisitōliá. Ko e mahamahakí, taʻumotuʻá, pea mo e mate ʻa e faʻahinga ʻofeiná heʻikai toe hoko ia ko ha konga ʻetau moʻui fakaʻahó. Ko Sētane mo e fanga tēmenioó ʻe tuku pōpula ʻi ha taʻu ʻe afe. Ko e ngaahi nunuʻa ʻenau angatuʻú ʻe mole atu. (Fkh. 20:2, 3) He houngaʻia ē ko kitautolu ʻi he taimi ko iá koeʻuhi ko ʻetau falala ki he founga hono fai ʻe Sihova ʻa e ngaahi meʻá!

18. Ko e hā ʻa e ngaahi lēsoni ʻe lava ke tau ako mei he faʻifaʻitakiʻanga ʻa e kau ʻIsilelí, hangē ko ia ʻoku hiki ʻi he Nōmipa 11:4-6 mo e 21:5?

¹⁸ ʻE ʻi ai nai ha ngaahi pole ʻi he moʻui ʻi he māmani foʻou ʻa e ʻOtuá te ne ʻahiʻahiʻi ʻetau falala ki he founga hono fai ʻe Sihova ʻa e ngaahi meʻá? Ko e fakatātaá, fakakaukau ki he meʻa naʻe hoko ʻi he hili pē hono fakatauʻatāinaʻi ʻa e kau ʻIsilelí mei he nofo pōpula ʻi ʻIsipité. Ko e niʻihi naʻe kamata ke nau lāunga koeʻuhí naʻa nau manatu ki he meʻakai naʻa nau kai ʻi aí, pea naʻa nau fehiʻa ʻi he mana naʻe tokonaki ʻe Sihová. (Lau ʻa e Nōmipa 11:4-6; 21:5.) Te tau maʻu nai ʻa e fakakaukau meimei tatau ʻi he ngata ʻa e fuʻu mamahi lahí? ʻOku ʻikai ke tau ʻilo ʻa e lahi ʻo e ngāue ʻe kau ki hono toʻo atu ʻa e ngaahi maumaú pea ngaohi māmālie ʻa e māmaní ke hoko ko ha palataisi. ʻOku ngalingali ʻe lahi ʻa e ngāue ke faí pea ʻe ʻi ai mo e feʻamokaki ʻi he kamatá. Te tau lāunga fekauʻaki mo e tokonaki ʻa Sihová ʻi he taimi ko iá? Ko e meʻa ʻe taha ʻoku paú: Ko e lahi ange ʻetau houngaʻia ʻi he ngaahi tokonaki ʻa Sihova ʻi he taimi ní, ʻoku ngalingali ko e lahi ange ia ʻetau fai pehē ʻi he taimi ko iá.

19. ʻE anga-fēfē haʻo fakamāʻopoʻopo ʻa e ngaahi poini tefito ʻo e kupu ko ení?

¹⁹ Ko e founga hono fai ʻe Sihova ʻa e ngaahi meʻá ʻoku tonu maʻu pē. ʻOku fiemaʻu ke tau falala pau ki ai. ʻOku fiemaʻu foki ke tau falala pau ki he faʻahinga ʻoku falala ki ai ʻa Sihova ke nau ʻoatu ʻene fakahinohinó. ʻOua ʻaupito naʻa ngalo ʻa e folofola ʻa Sihova fakafou ʻi heʻene palōfita ko ʻAiseá: “Ko hoʻomou mālohí ʻe hoko ia ʻi hoʻomou hanganaki nonga mo fakahāhā ʻa e falalá.”​—ʻAi. 30:15.