Ko ha Tohi mei he Kulupu Pulé
ʻI HE muimui he faʻifaʻitakiʻanga ʻa Sīsuú, ʻoku tau lotu fakamātoato ai ki he ʻOtuá: “Ke tapuhā ho Huafa.” Ko ʻetau holi mālohi ke moʻui ʻo fehoanaki mo e lotu ko iá ʻoku fakahāhā ia ʻi he anga ʻo ʻetau moʻui ʻi he tuʻunga ko e Kau Fakamoʻoni ʻa Sihová. Ko e moʻoni, ʻoku fiemaʻu ʻa e meʻa lahi ange ia meia kitautolu ʻi hono ʻiloʻi pē ʻa e huafa ʻo e ʻOtuá. Kuo pau ke tau ngāueleleiʻaki ʻa e faingamālie kotoa pē ke fakalāngilangiʻi ai ʻa e huafa ko iá. Ko e moʻoni, ko e lāngilangi lahi taha ʻe lava ʻe ha taha pē ʻo kitautolu ʻo maʻú ko hono ui ko e taha ʻo e Kau Fakamoʻoni ʻa Sihová.—Mt. 6:9; Ai. 43:10.
ʻI he moʻui ʻo fehoanaki mo e Sāme 110:3, ʻoku kau loto-lelei ai ʻa e kakai ʻa Sihová ʻi he ngāue naʻe tuʻutuʻuni ʻe Sihova kuo pau ke fakahokó. Ko e hā ʻoku hanga ai ʻe he kakai ʻo e taʻumotuʻa kotoa pē mo e puipuituʻa kotoa pē ʻo fakalahi ʻenau kau ʻi he ngāue fakamalangá? Ko e ʻuhinga tefitó, ko ʻenau ʻofa ki he ʻOtuá pea mo ʻenau līʻoa fakafoʻituitui kiate iá. ʻOku fekauʻi mai kitautolu ʻe he Teutalonome 6:5, 6 ke tau ʻofa kia Sihova ʻaki ʻa e kotoa ʻo ‘hotau lotó, laumalié mo e iví.’ Ko e ʻofa moʻoni ko ení ʻokú ne ueʻi kitautolu ke tau ngāueʻaki hotau taimí, iví mo e koloá ke fakalahi ʻaki ʻa e ngaahi meʻa ʻo e Puleʻanga ʻo e ʻOtuá, ʻa ia ʻoku kau ai ʻa e kau ʻi he ngāue fakafaifekaú ki he kakato tahá ʻo fakatatau ki hotau tuʻungá.
Ko e ʻofa ʻa Sihova ki he faʻahinga ʻo e tangatá ʻa e ʻuhinga ʻokú ne fakahinohino mai ai ke talaki ʻa e ongoongo lelei ʻo e Puleʻangá ki he kotoa ʻo e foʻi māmaní. ʻOku ʻikai te ne finangalo ke ʻauha ha taha ka ko hono finangaló ke fakatomalaʻi ʻe he tokotaha kotoa ʻa honau ʻalunga talangataʻá pea tafoki ki honau Tokotaha-Fakatupú ka nau moʻui. (2 Pita 3:9) ʻOku folofola mai ʻa Sihova: “Tangi ʻeku moʻui haʻaku fiefia ʻi he pekia ʻa e angahala; ka ʻi he tafoki ʻa e angahala mei hono ʻalunga ke ne moʻui.” (Isi. 33:11) ʻI heʻetau kau ʻi he ngāue fakafaifekaú, ko e fakamoʻoni hā mai kitautolu ʻo e ʻofa ʻa Sihova ki hotau kaungā faʻahinga ʻo e tangatá. ʻOku ʻikai ha veiveiua, ʻoku tānaki atu ʻa e foʻi moʻoni ko ení ki he fiefia mo e fiemālie ʻoku tau aʻusia ʻi heʻetau kau ki he ngāue mahuʻinga ko ení.
Ko ʻetau ʻofa lahi kia Sihová ʻoku toe tapua atu ia ʻi he anga ʻo ʻetau vakai ki heʻene Folofola fakamānavaʻí, ʻa e Tohi Tapu Māʻoniʻoní. Ka ne ʻikai ʻa e Tohi Tapú, ne ʻikai te tau mei hoko ʻo ʻiloʻi ʻa e ʻOtuá pea ʻunuʻunu ofi kiate ia, ʻo hangē ko ia ʻoku fakaafeʻi mai ʻe he Semisi 4:8 ke tau faí. Pea naʻe ʻikai ke tau mei ʻiloʻi ai ʻa e ʻuhinga ʻoku tau ʻi heni aí pea mo e meʻa ʻoku tuku tauhi mai ʻi he kahaʻú. Ne ʻikai ke tau mei ʻiloʻi ai ko ʻetau kui ko ʻĀtamá ʻa e tupuʻanga ʻo ʻetau ngaahi palopalemá. (Loma 5:12) Pea aʻu ʻo ʻikai ke tau mei ʻiloʻi ai ʻa e ʻofa lahi ʻa e ʻOtuá ʻi hono ʻomai hono ʻAlo tofu-pē-taha-ne-fakatupú ko ha huhuʻi maʻatautolu. ʻI he ngaahi founga lahi kehe, ʻoku vahevahe mai ai kia kitautolu ʻe Sihova ha tuʻunga ʻo ʻene ʻiló, potó mo e mahinó. He koloaʻaki moʻoni ʻe kitautolu ʻa e meʻaʻofa kuó ne ʻomaí, ʻa ʻene Folofola fakamānavaʻi ʻe he laumālié! Ko ʻetau fakahoungaʻi ʻa e meʻaʻofa fakaofo ko ení ʻoku ueʻi ai kitautolu ke tau “fakatau mai ʻa e taimi” ki he lau, ako mo fakalaulauloto ki heʻene folofolá. (Ef. 5:15, 16, NW; Sāme 1:1-3) ʻOku ʻikai ʻaupito totonu ke tau mamaeʻi ʻa e taimi ʻoku fakamoleki ki hono lau fakaʻaho ʻa e Folofola ʻa e ʻOtuá. ʻI hono kehé, ko ʻetau ʻofa ki he ʻOtuá ʻoku totonu ke ne tohoakiʻi kitautolu ki heʻene Folofolá, ʻo fakamafeia ai kitautolu ke fakatupulekina ʻetau mahinoʻi iá pea fakalahi ai ʻetau ʻofa kiate iá.
Kuo tau ako mei he Tohi Tapú ʻi he taimi naʻe faiangahala ai ʻa ʻĀtama kia Sihová, naʻá ne ʻomi ki he kotoa ʻo ʻene fānau he kahaʻú, kau ai ʻa kitautolu taki taha, ki ha tuʻunga kovi mo fakasiva ʻamanaki. Kae kehe, ʻoku malava ʻe he ʻOtuá pea naʻá ne tokonaki ha haoʻanga maʻá e faʻahinga ʻo e tangatá, ʻo foua ʻa e ngaahi sitepu ke fakapapauʻi ai ʻe fakahoko ʻene taumuʻa ki he māmani ko ení.—Sen. 3:15.
ʻOku ʻikai ha veiveiua ko e kotoa ʻo kitautolú ʻoku tau maʻu ha holi mālohi ke fakamāʻoniʻoniʻi ʻa e huafa fakaofo ʻo hotau ʻOtuá. ʻI heʻetau tupulaki ʻi he ʻilo ki he lelei lahi ʻa e ʻOtua ko Sihová, ʻoku ueʻi ai kitautolu ke tau ngāue fāitaha mo ia pea mo ʻene kautahá ʻi hono ʻai ke ʻiloa hono huafá mo ʻene taumuʻa maʻongoʻongá. ʻOku fakapapauʻi mai ai kia kitautolu ʻa ʻene hōifuá mo e tāpuakí ʻi he taimí ni pea mo ha kahaʻu taʻengata ʻi he māmani foʻoú.
Ko kimautolu kau mēmipa ʻo e Kulupu Pulé ʻoku mau fakaʻamu ke fakapapauʻi ʻemau ʻofa atu kiate kimoutolu siʻi fanga tokoua mo e fanga tuofāfine. ʻOku mau toe saiʻia foki ke fakahaaʻi ʻemau houngaʻia lahi ki hoʻomou ngaahi feinga tōtōivi ke ngāueʻaki ʻa e taimi ʻoku toe ki muʻa ʻi he “mamahi lahi” ke aʻu ai ki he kakai tokolahi ʻe ala malavá mo e ongoongo leleí. (Fkh. 7:14) ʻI hono fai iá, ʻoku mou ʻoange ai kia kinautolu ʻa e faingamālie tatau kuo mou maʻú, ko hono maʻu ʻa e ʻilo ki he ʻOtuá pea mo Kalaisi ʻa ia ʻoku taki atu ki he moʻui taʻengatá.—Sione 17:3.
Mei homou fanga tokoua,
Kulupu Pule ʻo e Kau Fakamoʻoni ʻa Sihová