ʻE Lava Ke U Maʻu ha Ngaahi Lea Fakafiemālie ʻi he Tohi Tapú?
Tali ʻa e Tohi Tapú
ʻIo. (Loma 15:4) Fakakaukau ki he ngaahi fakatātā ʻe niʻihi ʻo e ngaahi konga Tohi Tapu kuó ne fakafiemālieʻi ʻa e tokolahi ke fekuki mo e ngaahi tuʻunga faingataʻá pe ngaahi ongoʻi taʻemanongá.
ʻI he kupu ko ení
Tuʻunga faingataʻa
Saame 23:4: “Neongo ʻeku ʻaʻeva ʻi he teleʻa ʻoku fakapoʻuli matolú, ʻoku ʻikai te u manavahē ki ha kovi, he ʻokú ke ʻiate au.”
ʻUhingá: ʻI he taimi ʻokú ke lotu ai ki he ʻOtuá pea falala ki heʻene Folofolá ʻa e Tohi Tapú ki ha tatakí, ʻe lava ke ke fekuki mo e faingataʻá ʻi he loto-toʻa.
Filipai 4:13: “ʻOku ou malava ʻa e meʻa kotoa pē koeʻuhi ʻoku ou maʻu ʻa e ivi fakafou ʻi he tokotaha ko ia ʻokú ne ʻomai kiate au ʻa e mālohí.”
ʻUhingá: ʻE lava ke ʻoatu ʻe he ʻOtuá ʻa e mālohi ke fekukiʻaki mo ha faʻahinga palopalema pē.
Mate ʻo ha taha ʻofeina
Tangata Malanga 9:10: “ʻOku ʻikai ha ngāue pe ha palani pe ha ʻilo pe ha poto ʻi he Faʻitoká.”
ʻUhingá: Ko e faʻahinga kuo nau maté ʻoku ʻikai ke nau faingataʻaʻia pe ʻe lava ke nau fai mai ha kovi kiate kitautolu. ʻOku ʻikai ke nau toe ʻilo ha meʻa.
Ngāue 24:15: “ʻE ʻi ai ʻa e toetuʻu.”
ʻUhingá: ʻE lava ʻe he ʻOtuá ke ne toe fokotuʻu hake ki he moʻuí ʻa e faʻahinga ʻofeina kuo nau maté.
Halaia tōtuʻa
Saame 86:5: “He ko koe, ʻe Sihova,a ʻokú ke lelei mo mateuteu ke fakamolemole; ʻokú ke mohu ʻi he ʻofa mateaki ki he faʻahinga kotoa ʻoku ui atu kiate koé.”
ʻUhingá: ʻOku fakamolemoleʻi ʻe Sihova ʻa kinautolu ʻoku nau fakatomala loto-moʻoni mei heʻenau ngaahi fehālaaki ʻi he kuohilí pea fakapapauʻi ke ʻoua ʻe toe fakahoko ia.
Saame 103:12: “Hangē ko e mamaʻo ʻa e hopoʻanga laʻaá mei he tōʻanga laʻaá, ʻoku pehē ʻa e mamaʻo ʻo ʻene ʻave meiate kitautolu ʻa ʻetau laka halá.”
ʻUhingá: ʻI he taimi ʻoku fakamolemoleʻi ai kitautolu ʻe he ʻOtuá ʻokú ne ʻave ʻetau angahalá ki he mamaʻo taha heʻikai lava ke tau fakakaukau atu ki aí. ʻOku ʻikai ke ne toutou ʻohake ia ke fakahalaiaʻi pe tauteaʻi ʻaki kitautolu.
Loto-mamahi
Saame 31:7: “Kuó ke ʻafioʻi ʻa ʻeku tuʻutāmakí; ʻokú ke lāuʻilo ki heʻeku fuʻu mamahí.”
ʻUhingá: ʻOku ʻafioʻi kakato ʻe he ʻOtuá ʻa e ngaahi mea kotoa ʻokú ke faingataʻaʻia aí. ʻOkú ne mahinoʻi ʻa hoʻo ngaahi ongoʻi loloto tahá—naʻa mo e ʻikai ke ʻiloʻi ia ʻe he niʻihi kehé.
Saame 34:18: “ʻOku ofi ʻa Sihova ki he loto-laveá; ʻokú ne fakahaofi ʻa e faʻahinga ʻoku laumālie mafesí.”
ʻUhingá: ʻOku talaʻofa mai ʻe he ʻOtuá te ne poupouʻi koe ʻi he taimi ʻokú ke ongoʻi loto-mamahi aí. ʻE lava ke ne ʻoatu kiate koe ʻa e mālohi ke fekuki mo e ongoʻi mamahí.
Mahamahaki
Saame 41:3: “ʻE tokoniʻi ia ʻe Sihova ʻi heʻene ʻi he mohenga ʻo e mamahí.”
ʻUhingá: ʻE lava ke tokoniʻi koe ʻe he ʻOtuá ke ke lava ʻo fekuki mo ha mahaki fakatupu mate ʻaki hono ʻoatu ʻa e nonga ʻi loto fakataha mo e mālohi, kātaki pea mo e poto ke fai ʻaki ʻa e ngaahi fili fakapotopoto.
ʻAisea 33:24: “ʻE ʻikai ha taha ʻoku nofo ai te ne pehē: ‘ʻOku ou puke.’”
ʻUhingá: ʻOku talaʻofa ʻe he ʻOtuá ʻe ʻi ai ʻa e taimi ko e faʻahinga kotoa ʻo e tangatá te nau fiefia ʻi he moʻui lelei.
Loto-mafasia mo e loto-moʻua
Saame 94:19: “ʻI hono lōmekina au ʻe he ngaahi loto-moʻuá, naʻá ke fakafiemālieʻi mo fakanonga au.”
ʻUhingá: Kapau te tau hanga ki he ʻOtuá ʻi he taimi ʻoku tau ongoʻi loto-mafasia aí, ʻe lava ke ne tokoniʻi kitautolu ke tau hanganaki nonga.
1 Pita 5:7: “Lī atu ʻa e kotoa hoʻomou loto-moʻuá kiate ia, koeʻuhí he ʻokú ne tokanga mai kiate kimoutolu.”
ʻUhingá: ʻOku tokanga mai ʻa e ʻOtuá ki heʻetau faingataʻaʻiá. ʻOkú ne fakaafeʻi mai ke tau lotu ange kiate ia ʻo fekauʻaki mo e meʻa ʻoku tau hohaʻa ki aí.
Tau
Saame 46:9: “ʻOkú ne fakangata ʻa e ngaahi taú ʻi he māmaní kotoa.”
ʻUhingá: Ko e Puleʻanga ʻo e ʻOtuá ʻoku vavé ni ke ne toʻo ʻosi kotoa atu ʻa e taú.
Saame 37:11, 29: “Ka ko e anga-vaivaí te nau maʻu ʻa e māmaní, pea te nau maʻu ʻa e fiefia lahi ʻi he melino hulu fau. . . . Ko e kau māʻoniʻoní te nau maʻu ʻa e māmaní, pea te nau nofo ai ʻo taʻengata.”
ʻUhingá: Ko e kakai leleí te nau fiefia ʻi he melino ʻi he māmaní ʻo taʻengata.
Hohaʻa fekauʻaki mo e kahaʻú
Selemaia 29:11: “‘ʻOku ou ʻiloʻi lelei ʻa e ngaahi fakakaukau ʻoku ou fakakaukau ʻaki kiate kimoutolú,’ ko e fakahaaʻi ia ʻe Sihová, ‘ko e ngaahi fakakaukau ʻo e melino, ʻo ʻikai ko ha kovi, ke ʻoatu kiate kimoutolu ha kahaʻu pea mo ha ʻamanaki.’”
ʻUhingá: ʻOku fakapapauʻi ʻe he ʻOtuá ki heʻene kakaí ʻe lava ke nau fakatuʻotuʻa atu ki ha kahaʻu fakaʻofoʻofa.
Fakahā 21:4: “Te ne holoholo ʻa e loʻimata kotoa pē mei honau matá, pea ʻe ʻikai ke toe ʻi ai ha mate, pe ha mamahi pe ha tangi pe ha langa. Kuo mole atu ʻa e ngaahi meʻa muʻá.”
ʻUhingá: ʻOku talaʻofa ʻe he ʻOtuá te ne toʻo ʻosi atu ʻa e ngaahi meʻa kovi kotoa pē ʻoku tau sio ki ai mo hokosia ʻi he ʻaho ní.
a Ko Sihová ko e huafa fakafoʻituitui ia ʻo e ʻOtuá. (Saame 83:18) Sio ki he kupu “Ko Hai ʻa Sihova?”