Faleʻi Lelei ki he Toʻutupú

Lolotonga hono tuʻuaki ʻo e ʻū makasiní ofi ki ha fale hopo ʻi Kalefōnia, U.S.A., naʻe fakaofiofi atu ai kia Bill, ko e taha ʻo e Kau Fakamoʻoni ʻa Sihová, ha tangata ʻa ia naʻá ne kole ange ke ne sio ki he ʻū makasini ʻA Hake! kotoa naʻe maʻu ʻe Bill. ʻOku fakamatala ʻa Bill: “Ki muʻa angé naʻe ʻomai kiate au ʻe he niʻihi ʻi he fakatahaʻangá a e ʻū makasini motuʻa ange, ko ia naʻá ku malava ai ke fakahaaʻi ki he tangatá ha kalasi lahi kehekehe.

“Naʻe fakamavaheʻi vave ʻe he tangatá ʻa e ʻū makasiní pea fokotuʻu ʻa e ngaahi makasini naʻe teʻeki ai te ne laú. Naʻá ne kole mai pe ʻe lava ke ne maʻu ʻa e fokotuʻunga makasiní. Naʻá ne fakafeʻiloaki mai ia ko ha tokotaha ngāue ʻi he fakamaauʻanga fakakoló peá ne pehē ʻokú ne tokangaʻi ʻa hono faleʻi ʻa e toʻutupu ʻoku nau palopalemaʻiá. Naʻá ne fakamatala ʻokú ne maʻu ʻa e ʻĀ Hake! koeʻuhí ke fotokopi ʻa e ngaahi kupu ‘Fehuʻi ʻa e Toʻutupú.’ ʻOkú ne faile fakakaveinga leva ʻa e ngaahi kupú pea tauhi ia ke ala maʻu ke ʻoange ki he toʻutupu ʻokú ne faleʻí. Naʻe pehē ʻe he tangatá: ‘Ko e ngaahi kaveinga ʻoku lāulea ki aí ko e ngaahi palopalema tefito ia ʻokú ne uesia ʻa e toʻutupu he ʻaho ní.’ Naʻá ne fakaongoongoleleiʻi ʻa e Kau Fakamoʻoni ʻa Sihová ki hono pulusi ʻa e fakamatala lelei pehē ke tokoniʻi ʻa e toʻutupú. Naʻá ne tānaki mai te ne kumi mai kia au ʻi he ngaahi uike hoko maí ke ʻave ha ʻū makasini ʻĀ Hake! foʻou pē ʻe lava ke u ʻomaí.”

Ko e lahi ʻo e fakamatala ʻoku pulusi ʻi he holongā “Fehuʻi ʻa e Toʻutupú” ʻoku hā ia ʻi he tohi Questions Young People Ask​—Answers That Work. ʻE lava ke ke kole ha tatau ʻo e tohi peesi ʻe 320 ko ení ʻaki hono fakafonu ʻa e kūponi ʻoku ʻoatu hení pea lī ia ki he tuʻasila ʻoku ʻoatu he kūponí pe ki ha tuʻasila feʻungamālie ʻoku fakahokohoko ʻi he peesi 5 ʻo e makasini ko ení.

□ ʻOmai muʻa kiate au ha tatau ʻo e tohi Questions Young People Ask​—Answers That Work.

□ Kātaki fetuʻutaki mai kiate au ʻo fekauʻaki mo ha ako Tohitapu taʻetotongi ʻi ʻapi.