“Ko ha Meʻa Ia Kuo Pau ke Lau”

Ko e anga ia ʻo hono fakamatalaʻi ʻe he toko taha lautohi ʻe taha mei Kalefōnia, U.S.A., ʻa e tohi ʻUnuʻunu Ofi kia Sihova. “ʻOku lelei hono hikí, ʻi ai e ngaahi fakatātā fakaʻofoʻofa, pea fakafonuʻaki ʻa e ngaahi makakoloa lahi fakalaumālie,” ko ʻene fakamatalá ia. Naʻá ne fakaʻosiʻaki leva ʻene pehē: “Fakamālō lahi atu ki he tohi fakaofo ko eni fekauʻaki mo hotau ʻOtua fisifisimuʻá.”

Kuo fai ʻe he niʻihi kehe ʻa e ngaahi fakamatala meimei tatau, hangē ko ení: “ʻI heʻeku lau kotoa ia he taimi ní, ko hono moʻoní, ʻoku ou kiʻi loto-mamahi ʻi heʻene ʻosí. Ka ʻoku ou fakatuʻotuʻa atu ki hano toe lau kotoa ia—ʻo ako fakalelei mo fakalaulauloto lahi he taimi ko ení ki he meʻa ʻoku ʻi lotó.”

Naʻe tohi ha toe toko taha ʻe taha: “Ko e fakamatala fekauʻaki mo e manavaʻofa ʻa hotau ʻOtuá pea mo ʻene mateuteu ke fakamolemolé naʻe aʻu ia ki he tefito ʻo hoku lotó pea naʻá ne ʻai au ke u ongoʻi ofi moʻoni ki heʻetau Tamai fakahēvaní mo e Toko Taha Foaki-Moʻuí.”

ʻOku mau tui te ke ʻunuʻunu ofi ange ki heʻetau Tamai fakahēvaní, ʻa Sihova, ʻi hono lau ʻa e tohí ni. ʻOku vahevahe ia ki he konga ʻe fā ʻoku fakakaveinga ko e “Longomoʻui ʻi he Mālohí,” “Ko ha Tokotaha ʻOfa ki he Fakamaau Totonú,” ‘Boto i Loto’ mo e “Ko e ʻOtua ko e ʻOfa.” Ko e ngaahi vahe kamata ʻe tolú ʻoku taki atu ia ki he ngaahi konga ko ení, ʻa ia ʻoku fakahangataha ai ki he ngaahi ʻulungāanga tefito ʻo e ʻOtuá. Ko e vahe ‘ʻUnuʻunu Ofi ki he ʻOtuá, pea Te Ne ʻUnuʻunu Ofi Mai Kiate Kimoutolu’ ʻoku fakaʻosiʻaki ʻa e tohi vahe ʻe 31 ko ení.

ʻE lava ke ke kole nai ki he tohi takafi-molū peesi ʻe 320 ko ení ʻaki hono fakafonu ʻa e kūponi ʻoku ʻoatu hení pea meiliʻi ia ki he tuʻasila ʻoku ʻoatú pe ki ha tuʻasila feʻungamālie ʻi he peesi 5 ʻo e makasini ko ení.

□ ʻOmai muʻa kiate au ha tatau ʻo e tohi ʻUnuʻunu Ofi kia Sihova.

Fakahaaʻi pe ko e lea fē.

□ Kātaki fetuʻutaki mai kiate au ʻo fekauʻaki mo ha ako Tohi Tapu taʻetotongi ʻi ʻapi.