ʻAkaú—Ko ha Maʻuʻanga Mahuʻinga ʻo e Ngaahi Faitoʻó
ʻOku fakafuofua ʻe he kau mataotaó ko e vahe fā ʻe taha ʻo e ngaahi faitoʻo kotoa ko ia ʻi he fale tala-vai ʻi onopōní ʻa ia ʻoku fakafalala ki ai ʻa e kakaí naʻe kamata ia—fakakātoa pe ʻi hono konga—ʻi he ngaahi kemikale ko e maʻu mei he ʻakaú. Ko e moʻoniʻi meʻa ko ení ʻoku faʻa lave ki ai ʻa e faʻahinga ʻoku nau pouaki ʻa e ngaahi faitoʻo kehekehe mei he ʻakaú.
Ko e lahi taha ʻo e ngaahi fakatotolo ʻoku fai ki he ngaahi ʻakau fakafaitoʻó ʻoku fakahanga ia ki hono fakamavaheʻi ʻa e ngaahi komipauni ʻaongá. Ko ha fakatātā tuʻu-ki-muʻa ʻo ha komipauni pehē ko e ʻesipiliní, ʻa ia ʻoku toʻo ia mei he huhuʻa ʻoku maʻu ʻi he kili ʻo e uilou hinehiná.
ʻI hili pē hono fakamavaheʻí, ko e ngaahi komipauni ʻaonga ko ia ʻoku maʻu ʻi ha ʻakau ʻe lava ke ngāueʻaki ia ki ha faitoʻo kuo fakafuofuaʻi tonu ange pea feʻunga. ʻOku fakamatala ha tohi maʻuʻanga fakamatala ʻe taha: “Ke ngāueʻaki ha kiliʻi uilou feʻunga ke maʻu ai ʻa e ngaahi ʻaonga ʻoku ʻomai ʻe he ʻesipiliní pe ko hono ngāueʻaki ha ʻakau fafangu feʻunga ke maʻu ai ʻa e ngaahi ola kakato fakahaofi-moʻui ʻa e faitoʻo tikitālisí, ʻoku lavaʻi faingofua lahi ange ia ʻi hono maʻu pē ha foʻiʻakaú ʻi hono kai ʻo e meʻa fakanatulá.”
ʻI he tafaʻaki ʻe tahá, ko hono fakamavaheʻi ʻa e komipauni ʻaongá mei ha ʻakau fakafaitoʻo ʻe lava ke ʻi ai hono ngaahi kovi. Ko e taha hono koví, ʻe ʻuhinga nai iá ko e mole ʻo ha ngaahi ʻaonga fakaemeʻakai pē mo fakafaitoʻo ʻe malava ke ʻomai ʻe he ngaahi ʻelemēniti kehe ʻi he ʻakaú. Tānaki atu ki ai, ko e niʻihi ʻo e ngaahi meʻamoʻui ʻa ia ʻokú ne fakatupunga ʻa e mahakí kuo nau matengataʻa kinautolu ki he ngaahi faitoʻo ʻoku tāketi kia kinautolú.
Ko e kūniné, ʻa ia ko ha huhuʻa māsima ʻoku toʻo mei he kili ʻo e sinikoná, ʻoku ʻomai ai ha fakatātā ʻo e ngaahi kovi ʻo hono fakamavaheʻi ʻa e komipauni ʻaongá mei ha ʻakau fakafaitoʻo. Neongo ʻoku tāmateʻi ʻe he kūniné ha peseti lahi ʻo e fanga kiʻi meʻamoʻui kainikavea fakatupunga malēliá, ko e fanga kiʻi meʻamoʻui kainikavea ko ia ʻoku ʻikai te ne tāmateʻí ʻoku hoko ia ʻo fakautuutu lahi ʻi he mate ʻa e fanga kiʻi meʻamoʻui kainikavea kehé. ʻOku fakamatala ha tohi maʻuʻanga fakamatala ʻe taha: “Ko e matengataʻa peheé kuo hoko ia ko ha ʻīsiu lahi ʻi he faitoʻó.”
[Fakatātā ʻi he peesi 27]
Ko e ʻesipiliní ʻoku maʻu ia mei he uilou hinehina ko ení
[Maʻuʻanga]
USDA-NRCS PLANTS Database/Herman, D.E. et al. 1996. North Dakota tree handbook
[Fakatātā ʻi he peesi 27]
Ko e sinikoná, ʻa ia ʻoku maʻu mei ai ʻa e kūniné
[Maʻuʻanga]
Courtesy of Satoru Yoshimoto