Feʻiloaki mo e Coati Fieʻiló

MEI HE TOKOTAHA-TOHI ʻĀ HAKE! ʻI PELĒSILA

TAU pehē pē ʻokú ke ʻeveʻeva holo ʻi he loto vaó pea fakafokifā pē ʻokú ke fakatokangaʻi atu ha potanga coati ʻoku nau haʻu kiate koe. ʻI he ilifiá, ʻokú ke fifili nai pe te nau ʻohofi koe. Fiemālie pē! Neongo kuo nau uʻu ʻa e kakaí, ko e fanga kiʻi manu fieʻilo ko ení ko ʻenau siofi pē ʻe kinautolu ʻa e kato ʻokú ke toʻó. ʻOku nau kumi maʻu pē ki ha meʻa ke kai. Ko hono moʻoní te nau kai ha meimei meʻa pē ʻoku lava ke nau ʻilo, ʻo kau ai ʻa e fanga kiʻi ʻunufe, moko, hina, kumā, fuaʻiʻakau pea naʻa mo e fuaʻi manupuná.

Ko e coati ko e fāmili pē ia ʻo e raccoon, ka ʻoku lōloa ange ʻa hono sinó mo e hikú pea pehē ki hono ihu lōloá ʻa ia ʻoku ngauengofua holo pē. ʻI he feʻunga hono lōloá mo e senitimita ʻe 66—ko hono hikú ʻoku meimei lōloa tatau pē mo e sinó—ko e mēmolo ko eni ʻi he feituʻu māfana ʻo ʻAmeliká ʻoku meimei maʻu pē ia ʻi he feituʻu fakatonga-hihifo ʻo ʻAmeliká ki he fakatokelau ʻo ʻĀsenitiná.

Ko e fanga manu fefiné ʻoku nau fakapotanga holo ʻo aʻu ki he toko 20, lolotonga ia ko e fanga manu tangatá ʻoku nau ʻalu tāutaha holo pē. ʻI he taʻu taki taha lolotonga ʻa e faʻahitaʻu fakatouʻiá, ʻoku ʻalu ai ha manu tangata ʻe taha ki ha potanga manu fefine. ʻI he vahaʻa ko e uike ʻe fitu mo e valu ki mui aí, ʻoku mavahe ai ʻa e fanga manu fefine kuo nau touʻiá mei he potangá ke halufanau ʻi he ʻulu ʻakaú. Ko e manu fefine taki taha te ne fāʻeleʻi ha ʻuhiki ʻe tolu pe fā. ʻI he uike nai ʻe ono hili ʻene fāʻelé, ʻoku toe foki ai ʻa e ngaahi faʻē foʻoú—fakataha mo honau ʻuhikí—ki he potangá. Ko e fanga kiʻi ʻuhiki valevalé ʻoku nau hangē ha fanga kiʻi foʻi pulu fulufulu ʻoku teka takai holó.

ʻOku toutou fakanamunamu ʻe he fanga coati ʻa e ʻeá pea vaku ʻa e kelekelé ʻaki honau pesipesí ʻi heʻenau fononga takai holo ʻi he loto vaó. ʻOku ʻikai ʻaupito fiefia ʻa e kau ngoué ʻi he sio kia kinautolú, koeʻuhi ʻoku lava ke nau fai ʻa e maumau lahi ki he ngaahi ngoue koané pea mo e ngaahi fale moá. ʻI hono kumi kinautolú, ʻoku ʻiloʻi ʻe he fanga coati ʻa e founga ke maluʻi ai kinautolú. Ko e fanga kiʻi manu poto ko ení ʻoku nau ngāueleleiʻaki ʻa honau ngaahi toitoiʻanga ʻi he ʻulu ʻakaú. ʻOku toe ʻi ai foki ha founga ʻe taha ke nau hao ai. ʻI heʻenau fanongo ki ha fana pe ko ha pasipasi, ʻoku nau tō leva ki lalo ʻo fakangalingali ʻoku nau mate! ʻI he taimi ʻoku fakaofiofi atu ai ʻa e tokotaha tuli manú ke puke kinautolú, kuo fakafokifā pē ʻenau pulí!

Ko e taimi hono hoko pē te ke ʻaʻahi ai ki Pelēsilá, mahalo pē te ke fetaulaki ai mo ha potanga ʻo e fanga coati. Kapau ko ia, ʻoua ʻe ilifiá. ʻOku ngalingali ʻe ʻikai te nau fakalaveaʻi koe. Ka te nau talitali lelei ʻaupito kapau te ke lī ange ha meʻi meʻakai!