ʻOku Ngāueʻaki ʻe Hoʻo Tamá ʻa e ʻInitanetí?
ʻI HE mōmeniti kotoa pē, ʻoku ngāueʻaki ai ʻe he toʻutupu ʻe laui miliona ʻa e ʻInitanetí, ʻi ʻapi, ʻi he ʻapiakó, ʻi ha fale ʻo ha kaumeʻa, pe—kapau ʻoku nau malava ke hū ki he ʻInitanetí ʻaki ha kiʻi meʻangāue fakaʻilekitulōnika pe telefoni toʻotoʻó—ʻi he meimei feituʻu kotoa pē. Kapau ko ha mātuʻa tauhi fānau koe, ʻokú ke fehangahangai mo ha foʻi moʻoni fakatupu fakakaukau: Ngalingali ʻoku fiemālie ange hoʻo fānaú ʻi hono ngāueʻaki ʻa e ʻInitanetí ʻiate koe, pea ʻoku aʻu nai ʻo nau ʻiloʻi ʻa e founga ke taʻofi ai hoʻo ʻiloʻi ʻa e meʻa ʻoku nau fai ʻi heʻenau ngāueʻaki ʻa e ʻInitanetí.
ʻOku fakatupunga ʻe he meʻá ni ha hohaʻa? Ko ia. ʻOku ʻikai ha toe ʻamanaki ki he tuʻunga ko ení? ʻIkai ʻaupito. Ko e moʻoni, ʻe hā nai ʻi he taimi ʻoku ngāueʻaki ai ʻa e ʻInitanetí, ko hoʻo kiʻi tamá ʻa e tokotaha taukeí ka ʻoku fakatupu ongoʻi taulōfuʻu ia kiate koe. Ka neongo ia, ʻe lava ke ke ako ʻa e ngaahi meʻa tefitó. Pea ʻoku ʻikai fiemaʻu ia ke ke hoko ko ha mataotao ʻi he ngaahi meʻa fakaʻilekitulōniká kotoa koeʻuhi ke tauhi ai ke malu ʻa hoʻo kiʻi tamá.
Ko e ngaahi kupu hokohoko ko ení ʻe ʻoatu ai kiate koe ha ngaahi ʻilo ʻaonga. Ko ia ʻuluakí, tau vakai angé ki he niʻihi ʻo e ngaahi fakatuʻutāmaki ʻoku fehangahangai nai mo hoʻo kiʻi tamá ʻi he ʻInitanetí.
[Fakatātā ʻi he peesi 3]
ʻI Kānata ko e meimei vaeua ʻo e toʻutupu kotoa ʻoku ʻi ai ʻenau telefoni toʻotoʻó ʻoku lava ke nau ngāueʻaki ia ʻo hū ai ki he ʻInitanetí