Mafasia ʻi he Kau Akó

KO E taʻu 17 ko Jennifer, naʻe kau maʻu pē ʻi he kau ako poto taha ʻi heʻene kalasí. Naʻá ne kau ʻi he ngaahi meʻa kehekehe naʻe fai ʻi he tuku ʻa e akó pea naʻe tokaʻi ia ʻe heʻene kau faiakó mo e kau faleʻi fakaakó. Ka ʻi he taʻu ki muʻa ke ne maʻu tohi fakamoʻoni akó, naʻe kamata ai ke ne langa ʻulu lahi pea faʻa ongoʻi tokotokakovi. ʻOkú ne ongoʻi ko e ngaahi houa lahi naʻá ne fakamoleki ʻi he nōfoʻi ki heʻene ngāue fakaakó fakataha mo e siʻi ʻa ʻene mohé naʻe ʻai ai ia ke ne puke.

ʻOku ʻikai ko Jennifer pē ʻoku hoko ki ai ení. Ko e tokolahi ʻo e kau ako ʻoku nau fehangahangai mo e tuʻunga lahi ʻo e mafasia ʻi he akó ʻoku hā ngali fakautuutu, ʻo kumi tokoni ai ʻa e niʻihi ki he kau toketā fakaʻatamaí. Ko hono olá, kuo fokotuʻu ai ʻe ha kulupu ʻo e kau faiako ʻAmeliká ha polokalama ke fakasiʻisiʻi ʻa e ʻātakai fakatupu mafasia ʻi he ngaahi ʻapiakó. ʻOku ui ʻa e polokalamá ko e Poleʻi ʻa e Lavameʻá.

Kapau ko ha tokotaha ako koe, mahalo pē ʻi he hangē ko Jennifer ʻokú ke fekuki mo e mafasiá. Pe kapau ko ha mātuʻa tauhi fānau koe, ʻokú ke sio nai ki he tenge hokohoko ʻoku fehangahangai mo ho fohá pe ʻofefiné ke lavameʻa ai ʻi he akó. ʻOku ʻi ai ha matavai ola lelei ʻo e tatakí ʻe lava ke hanga ki ai ki ha tokoni ʻa e kau akó mo ʻenau ngaahi mātuʻá?