“Hanganaki Leʻo!” — LAIPELI Taua Le‘o ‘I HE ‘INITANETÍ

“Hanganaki Leʻo!”

Fakataha-Lahi Fakavahe ʻa e Kau Fakamoʻoni ʻa Sihová

◼ ʻE fai ʻi he kotoa ʻo e māmaní ʻa e ngaahi fakataha-lahi fakavahe ʻaho ʻe tolu ʻe laui afe, ʻa ia ʻoku fakataimitēpileʻi ke kamata ʻi ʻAmelika ʻi he fakaʻosinga uike ʻo Mē 22-24, ʻo hokohoko atu ai ʻi ha ngaahi māhina. ʻI ʻAmelika, ʻe kamata ai ʻa e polokalamá ʻi he ʻaho taki taha he 9:20 pongipongi ʻaki ha tā fasi. Ko e kaveinga ʻo e Falaité ko e “Toka Teuteu ʻa Kimoutolu” ʻoku toʻo ia mei he Mātiu 24:44. Ko e malanga ʻa e seá ʻe hoko atu ai ʻa e ongo malanga ko e “Tokoniʻi Kitautolu ʻe he Ngaahi Fakataha-Lahí Ke Tau Hanganaki Leʻo” mo e “Sihova—Ko e ʻOtua ʻo e ‘Kuonga mo e Taimi.’” Pea ʻi he malanga fakakongokonga ko e “Faʻifaʻitaki ki he Faʻahinga Faitōnunga Naʻa Nau Hanganaki Leʻo” ʻe lāulea ai ki he founga naʻe fai pehē ai ʻa Noa, Mōsese pea mo Selemaiá. Ko e polokalama pongipongí ʻe fakaʻosiʻaki ia ʻa e malanga he tefitoʻi fakakaukaú, “Founga ʻOku Tokoniʻi Ai Kitautolu ʻe Sihova ke ‘Hanganaki Leʻó.’”

Ko e ʻuluaki konga ʻi he efiafi Falaité ko e “Tali ki he Ngaahi Fehuʻi Fekauʻaki mo e ‘Gaahi Aho Fakamui,’” ʻo hoko atu ai ʻa e ongo malanga “‘ʻOku ʻIkai Te Mou ʻIlo Hono ʻAho, ʻUmaʻā Hono Houa’—Ko e Hā Hono ʻUhingá?” mo e “Mou ʻIlo Kuo Ofi ʻa e Ngataʻangá.” ʻE hoko atu ai ʻa e malanga fakakongokonga konga ʻe ono ko e “‘Hanganaki ʻĀʻā’ ʻi he Tuʻunga ko e Ngaahi Fāmili Kalisitiane!” Ko e ʻuluaki konga ʻe tolú ʻoku lave fakahangatonu ai ki he ngaahi husepānití, uaifí mo e fānaú. Ko e konga ʻe tolu fakaʻosí kuo fakakaveinga ia ko e “Tauhi Ho Matá ke Huʻufataha,” “Tuli Ai Pē ki he Ngaahi Taumuʻa Fakalaumālié,” mo e “Tauhi Maʻu ha Efiafi Lotu Fakafāmili.” ʻE fakaʻosiʻaki ʻa e konga he efiafí ʻa e malanga ko e “Ngaahi Kupuʻi Hiva ʻOku Ueʻi Ai Kitautolu Ke Tau ‘Hanganaki Tokanga Lahi.’”

Ko e kaveinga ʻo e Tokonakí ko e “Mou Laka Fakaʻehiʻehi, Mou ʻĀ” ko e toʻo mei he 1 Pita 5:8. Ko e malanga fakakongokonga konga ʻe nima ko e “Tokoniʻi ʻa e Kakaí Ke Nau ‘ʻĀ Leva mei he Mohe’” ʻe kau ai ʻa e ngaahi konga “Ko ʻEtau Ngāue Fakafaifekaú—Ko e Hā ʻOku Mātuʻaki Mahuʻinga Aí?,” “Fakatokanga Meʻa ʻi he Ngāue Fakafaifekaú,” “Tokangataha ki Hono Fakaleleiʻi ʻa Hoʻo Ngaahi Pōtoʻí,” “ʻOua Naʻa Ngalo ʻa Ho Kāingá!,” mo e “Tauhi Maʻu ʻa Hoʻo Ongoʻi ʻo e Fakavavevavé!” Hili ʻa e ongo malanga ko e “Faʻifaʻitaki ki he Faʻa Leʻo ʻa Sīsuú” mo e “Leo ke Lotu,” ʻe fakaʻosiʻaki ʻa e kongá ha malanga papitaiso, ʻa ia ʻi he hili iá ko e faʻahinga tāú te nau maʻu ai ʻa e faingamālie ke papitaiso.

Ko e polokalama ʻi he efiafi Tokonakí ʻe fakaeʻa ai ha malanga fakakongokonga konga ʻe nima ko e “Tokanga Fekauʻaki mo e Ngaahi Tauhele ʻa Sētané!”—“Ko e Afi,” “Ko e Luo,” “Ko e Tauhele Noʻounu,” “Ko e Tauhele Kāsia,” “Ko e Tauhele Laiki.” ʻE hoko atu ai ʻa e konga makehe, “Teu Mate Be ka e Ikai Teu Tukuage Eku Agatonu Meiate Au!” ʻE fakaʻosiʻaki ʻa e polokalama ʻo e ʻahó ʻa e ongo malanga ko e “ʻOua ʻe Sio ‘ki he Ngaahi Meʻa ʻi Mui’” mo e “Ako ke Hanganaki Leʻo mei he Kau ʻApositolo ʻa Sīsuú.”

Ko e kaveinga ʻo e Sāpaté, ko e toʻo ia mei he Hapakuke 2:3 (NW), ko e “Hanganaki ʻAmanaki . . . ʻE ʻIkai ke Tōmui.” Hili ha malanga ʻi he kaveinga ʻo e ʻahó, ʻe lāulea ai ʻi he malanga fakakongokonga ko e “Hanganaki Sio ki he Meʻa ʻOku ʻIkai Hā Maí” ki he ngaahi kaveinga ko ení: “Ko e Nifo ʻe Hongofulu . . . Te Nau Fehiʻa ki he Fefine Feʻauaki,” “ʻE ʻIlo ʻa e Ngaahi Puleʻangá kia Sihova,” “Ko e ‘Ngaahi Puleʻanga Ko Ia’ ʻE Laiki” “Ko e Tēvoló ʻe Haʻi ʻi he Taʻu ʻe Taha Afe,” “Te Nau Langa Fale mo Tō Ngoue Vaine,” “Ko e Ulofi mo e Lami . . . Te Na Kaikai Fakataha,” “Ko e ʻOtua . . . Te Ne Holoholo ʻa e Loʻimata Kotoa Pē,” “Ko e Kakai Kotoa Pe ʻOku ʻi he Ngaahi Faʻitoka, Te Nau ʻAlu Atu mei Ai,” mo e “ʻE Hoko ʻa e ʻOtuá ʻo ‘Tāfataha ʻi he Meʻa Kotoa Pe.’” Ko e malanga maʻá e kakaí, “ʻE Lava Fēfē Ke Ke Hao ʻi he Ngataʻanga ʻo e Māmaní?,” ʻe fakaʻosiʻaki ʻa e konga pongipongí.

Ko ha konga makehe ʻi he efiafi Sāpaté ko e tulama fakaeonopooni fakaueʻiloto “Ko Siʻo Tehina ʻEni Naʻe Mate, pea Kuo Moʻui,” ko e toʻo mei he pealapeli ʻa Sīsū fekauʻaki mo e foha maumaukoloá. Hili ʻa e fakanounou ʻo e Ako Taua Leʻo ʻi he uiké, ʻe fakaʻosiʻaki ai ʻa e fakataha-lahí ʻa e malanga “Hanganaki ʻAmanaki, ʻo Leʻo Fekauʻaki mo e ʻAho ʻo Sihová!”

Fai ha palani he taimí ni ke maʻu ʻa e fakatahá. Ke maʻu ʻa e feituʻu ofi taha kiate koé, fetuʻutaki ki he Fale Fakatahaʻanga ʻo e Kau Fakamoʻoni ʻa Sihova ʻi ho feituʻú pe tohi ki he kau faipulusi ʻo e makasini ko ení. ʻI he ngaahi fonua ʻe niʻihi ʻe fai ai ʻa e ngaahi fakataha-lahi fakavahaʻapuleʻanga ʻaho ʻe fā. Ko e ʻīsiu ʻo e Taua Leʻo ʻo ʻEpeleli-Sune, ʻa ʻemau makasini ʻe tahá, ʻoku ʻi ai ha lisi ʻo e ngaahi feituʻu ʻo e fakataha-lahi kotoa ʻi he Pasifiki Sauté, ʻo kau ai ha ongo fakataha-lahi fakavahaʻapuleʻanga.

[Fakatātā ʻi he peesi 32]