ʻE Tokoni Fēfē ʻa e Ongo Mātuʻá?

KO E kautaha fakaeako ʻe taha ʻi ʻAmelika ʻokú ne fakaʻaiʻai ʻa e kau ako ʻi he ako māʻolungá: “Fakahaaʻi hoʻomou loto-lelei ke teke mālohi ke aʻu ki he ngataʻangá.” ʻI he fakaʻaiʻai ke aʻusia ʻenau ngaahi taumuʻá, ʻoku fakalaka ai ʻa e toʻutupu ʻe niʻihi ʻi he ngataʻanga ʻo honau iví. Ko Madeline Levine, naʻe lave ki ai ʻi he kupu ki muʻá, naʻá ne tohi: “ʻI he vahaʻa ʻo e ngaahi koosi ʻoku kāpui ai ʻa e meʻa lahí, ngaahi meʻa ʻoku fai ʻi he tuku ʻa e akó, teuteu tōmuʻa ki he ako māʻolungá pe kolisí, ko hono totongiʻi mai ʻa e kau faiako mo e kau tiuta makehe ke tokoniʻi kinautolu ke nau fai ʻenau lelei tahá, ʻoku moʻumoʻua ai e taimi-tēpile ʻa e kau leka tokolahi ʻo fakatuʻutāmaki ki heʻenau tuʻunga moʻui leleí.” Ko e kau ako ʻi he tuʻunga ko iá ʻe lava ke nau tofanga ʻi he puke fakaesino mo fakaeongo.

Kapau ʻokú ke hohaʻa fekauʻaki mo e mafasia ʻoku fehangahangai mo hoʻo kiʻi tamá ʻi he ʻapiakó, ʻalu tonu ki ai. Talanoa mo e kau faiakó, kau faifaleʻí mo e kau pulé. Tala ange kia kinautolu ʻa e meʻa ʻokú ke fakatokangaʻí. ʻOku ʻi ai hoʻo totonu ke fai pehē.

ʻOku fakalototoʻaʻi ʻe he Tohi Tapú ʻa e ngaahi mātuʻá ke nau tokanga lelei ki he fakalakalaka ʻi he tupu hake ʻa ʻenau fānaú. Naʻe tala ʻe Mōsese ki he ngaahi mātuʻa ʻi he puleʻanga ʻIsilelí: “Te ke uhuʻi ki hoʻo fanau, pea te ke lea ki ai ʻi hoʻo nofo ʻi ho fale, pea ʻi hoʻo ʻalu ʻi he hala, pea ʻi hoʻo tokoto hifo, pea ʻi hoʻo tuʻu hake.”—Teutalonome 6:7.

Ko hoʻo mahuʻingaʻia lahi ʻi he ako ʻa hoʻo kiʻi tamá ʻoku ʻikai ko ha kaunoa ia. ʻOku fakahaaʻi ai ʻokú ke poupou anga-ʻofa ki hoʻo tamá. Pea ʻe lava ke tokoni lahi ia ke fakasiʻisiʻi ai ʻene mafasia ʻi he ʻapiakó.

[Fakatātā ʻi he peesi 9]

Talanoa fekauʻaki mo e tuʻunga mafasia ʻa hoʻo tamá ki heʻene kau faiakó mo e kau faifaleʻí