ʻE Lava ke Haofakiʻi ʻa Hoʻo Nofo Malí?

ʻOku ʻiloʻi ʻe he ongo meʻa ʻoku ʻanauá ko hona falé ʻoku ʻi he tuʻunga kovi, ka kuó na fili ke fakaleleiʻi ia.

TE KE saiʻia ke fai ʻa e meʻa tatau ki hoʻo nofo malí? Kapau ko ia, ʻe lava ke ke kamata ʻi fē? ʻAhiʻahi ʻa e ngaahi fokotuʻu ko ení.

1 Fai ha fakapapau.

ʻAi ke felotoi mo ho hoá te mo ngāue fakataha ke fakafoki mai ʻa e melinó ki hoʻomo nofo malí. ʻAhiʻahi tohiʻi ʻi ha pepa ʻa hoʻomo filí. ʻI he taimi ʻokú mo fakatou tukupā ai mo ho hoá, ko hono haofakiʻi hoʻomo nofo malí ʻoku hoko ia ko ha ngāue fakatimi.—Koheleti 4:9, 10.

2 ʻIloʻi ʻa e palopalemá.

Ko e hā ʻokú ne fakahohaʻasi ʻa hoʻo nofo malí? Tohiʻi ʻi ha sētesi ʻe taha ʻa e meʻa ʻokú ke fakakaukau ʻoku ʻikai ke maʻú pe ko e meʻa ʻokú ke fakaʻamu ʻe lava ke liliú. (Efeso 4:22-24) ʻOku mahinongofua, ko e palopalema ʻokú ke ʻiloʻí ʻoku kehe nai ia mei he meʻa ʻoku fakatokangaʻi ʻe ho hoá.

3 Fokotuʻu ha taumuʻa.

ʻOkú ke loto ke fēfē ʻa hoʻo nofo malí ʻi he māhina ʻe ono mei heni? Ko e hā ʻa e ngaahi fakalakalaka pau te ke saiʻia ke sio ki aí? Tohiʻi ʻi ha pepa ʻa hoʻo taumuʻá. ʻI hoʻo mahinoʻi lelei ʻa e meʻa ʻokú ke fiemaʻu ʻi hoʻo nofo malí, ʻe faingofua ange ai ke aʻusia ʻa hoʻo taumuʻá.—1 Kolinito 9:26.

4 Ngāueʻaki ʻa e akonaki ʻa e Tohi Tapú.

ʻI hoʻo ʻiloʻi pē hoʻo palopalemá pea fakapapauʻi ʻa e fakalelei te ke saiʻia ke faí, kumi faleʻi mei he Tohi Tapú. Ko ʻene ngaahi tefitoʻi moʻoní ʻoku tuʻuloa, pea ʻoku ʻaonga moʻoni. (Aisea 48:17; 2 Timote 3:17) Ko e fakatātaá, ʻoku fakalototoʻaʻi koe mo ho hoá ʻe he Tohi Tapú ke mo fefakamolemoleʻaki. Ko e moʻoni, ʻoku pehē ʻe he Tohi Tapú ko e “lakai ha angahala [ko e] langilangi ia.”—Palovepi 19:11; Efeso 4:32.

Neongo kapau ʻoku ʻuluaki hā ngali taʻeʻaonga ʻa hoʻo ngaahi feingá, ʻoua ʻe foʻi! Ko e tohi The Case for Marriage ʻoku līpooti ai ʻa e ngaahi ola fakalototoʻa ʻo ha fakatotolo ʻe taha, ʻo pehē: “Ko e foʻi moʻoní ʻoku fakaʻohovale: Ko e peseti ʻe 86 ʻo e kakai mali ʻikai ke fiefia ʻoku hokohoko atu pē ʻenau nofo malí ʻoku nau ʻiloʻi, ʻi he taʻu ʻe nima ki mui aí, ʻoku fakafiefia ange ai ʻenau nofo malí.” Naʻa mo e ngaahi hoa mali ʻoku nau fakahaaʻi ʻoku ʻikai ʻaupito te nau fiefiá ʻoku nau hokosia ha liliu.

Mahalo pē ʻoku lava ke hoko ʻa e meʻa tatau kiate koe. Ko e kau faipulusi ʻo e makasini ko ení, ʻa e Kau Fakamoʻoni ʻa Sihová, kuo nau ʻiloʻi ʻoku ʻomai ʻi he Tohi Tapú ʻa e ngaahi tefitoʻi moʻoni ʻaonga ki he ngaahi hoa malí. Hangē ko ení, ʻoku fakalakalaka ʻa e ngaahi nofo mali lahi ʻi he taimi ʻoku anga-lelei ai mo manavaʻofa pea fefakamolemoleʻaki maʻataʻatā ʻa e ngaahi hoa malí. Kuo ʻiloʻi ʻe he ngaahi uaifí ʻa e mahuʻinga ʻo hono fakahāhā ha “angava[i]vai mo angamalū,” pea kuo hokosia ʻe he ngaahi husepānití ʻa e ʻaonga ʻo e ʻikai ke ʻita tōlili ki honau ngaahi uaifí.—1 Pita 3:4; Kolose 3:19.

Ko e ngaahi tefitoʻi moʻoni Fakatohitapu ko ení ʻoku ola lelei ia koeʻuhi ko e Faʻu-Tohi ʻo e Tohi Tapú, ʻa e ʻOtua ko Sihová, naʻá ne kamataʻi ʻa e fokotuʻutuʻu ʻo e nofo malí. Fēfē ke ke kole ki he Kau Fakamoʻoni ʻa Sihová ki ha fakamatala lahi ange ki he founga ʻe lava ke tokoniʻi ai ʻe he Tohi Tapú ʻa hoʻo nofo malí.a

[Fakamatala ʻi laló]