“Ko e Maté Naʻe ʻIkai Te U Fou Ai”

● ʻOkú ke ʻiloʻi e foʻi maau ko ení? Kuó ke fanongo ʻi hano hivaʻi? Lolotonga e ngaahi hongofuluʻi taʻu siʻi fakamuimuí, ne ʻomai ai ʻe he foʻi maau ko ení ʻa e fakafiemālie ki he kakai takatakai ʻi he māmaní. Kuo tuku ia ki he kau faʻu-maau kehekehe ʻi he faai mai e ngaahi taʻú. Kuo aʻu ʻo taukaveʻi ʻe he niʻihi ko ha lotu ia ʻi he tanu ʻo ha putu ʻa e kau ʻInitia Navajo. ʻI he faka-Pilitāniá ʻoku ʻiloa ia, ʻo ʻikai ʻi hono sētesi fakaʻosi naʻe lave ki ai ʻi ʻolungá, ka ʻi hono sētesi ʻuluakí: “ʻOua ʻe tuʻu ʻi hoku faʻitoká ʻo tangi.”

Naʻe hoko ʻa e foʻi māú ko ha foʻi hiva manakoa ʻaupito ia ʻi Siapani he ngaahi taʻu siʻi kuo maliu atú, ka naʻe toe fakatupunga ai ha puputuʻu lahi. Ko e kau Siapaní ʻoku nau faʻa ʻaʻahi ki honau faʻitoka fakafāmilí ke fakahā e fakaʻapaʻapa ki he ngaahi kāingá ʻa ia ʻoku pehē tokua ʻoku nau kei moʻui ai. Tupu mei he foʻi hiva ko ení ʻoku akoʻi ai e meʻa kehe ia, ʻo ʻeke ai ʻe he tokolahi, “Ka ʻoku ʻi fē koā e kau maté ia?”

Ko e kau Siapani lotu-Putá kuo fuoloa ʻenau fai mai e ngaahi putu, ngaahi ʻāpō, mo e ngaahi ouau fakamanatu. Ka ko e tokolahi taha ʻo e kau lotu-Putá ʻoku ʻikai malava ke nau tali ʻa e fehuʻi, ʻOku ʻi fē ʻa e kau maté? Pe ko e ngaahi fehuʻi kehe, hangē ko ení, ʻOku ʻalu ʻa e kau mate ʻo e ngaahi lotu mo e ngaahi fonua kehé ki he feituʻu tatau? Ko e hā ʻoku ʻikai fai mai ai ha tali ʻe he kau maté?

ʻOku fakakaukau ʻa e tokolahi ko e ngaahi fehuʻi ko iá ʻoku ʻikai lava ke tali pea ʻoku fakamole taimi naʻa mo e fekumi ki he talí. Neongo ia, ʻokú ke fifili nai, ‘Ko e hā ʻoku hoko he taimi ʻoku tau mate aí?’ Ko fē nai e feituʻu tonu ʻe lava ke maʻu mei ai ʻa e talí? ʻOku pehē ʻe he Tohi Tapú naʻe fakatupu ʻe he ʻOtuá ʻa e ʻuluaki ongo meʻa fakaetangatá ʻo na haohaoa pea ʻoange kia kinaua ha ʻapi ngoue fakaʻofoʻofa. Naʻá na maʻu ʻa e ʻamanaki ko e moʻui taʻengata ʻi Palataisi he māmaní kapau naʻá na talangofua ki he ʻOtuá. Ka naʻe ʻikai te na fai pehē.

Ko ia naʻe fai ai ʻe he ʻOtuá ʻa e meʻa. Naʻá ne kapusi ʻa e ongo meʻá mei hona ʻapi Palataisí pea taʻofi hono fakatolonga atu ʻena moʻuí. Naʻá ne fakamatalaʻi e ngaahi nunuʻa ʻo ʻena talangataʻá: “He ko e efu koe, pea ko e efu te ke foki ki ai.” Naʻe ngaohi ʻa e tangatá mei he efú, pea ʻe faifai atu pē​—ʻi he maté​—te ne toe foki ki ai.​—Sēnesi 2:7; 3:​19.

Ko ha tangata ʻi Kofu, Siapani, ʻa ia ʻokú ne tokangaʻi ha fuʻu faʻitoka lahi naʻá ne pehē: “ʻOku fonu e ʻū ʻaiʻanga meʻá ʻi he efuefu mo e hui ʻi he taimi ʻoku ou tuku ai ki he faʻitoká. Hili nai ha taʻu ʻe nima, ʻoku nau vaeua. Hili ha taʻu ʻe hongofulu ʻoku ʻikai ʻaupito ke toe toe ha meʻa ʻi he lahi ʻo e ngaahi ʻaiʻanga meʻá.” Ko hotau sinó ʻoku faʻuʻaki ia e ngaahi ʻelemēniti ʻi he kelekelé, pea ʻi he faai atu ʻa e taimí ʻoku nau movete ʻo toe foki ki he efú. Ko ia, ko e hā e meʻa ʻoku toé?

Neongo ko e ʻilo kotoa pē ʻoku ngata ia ʻi he maté, ko hotau Tokotaha-Ngaohí, ʻa ia ʻoku aʻu ʻo ne ʻiloʻi e mate ʻa e foʻi manupuna taki taha, ʻokú ne manatu ʻofa kia kitautolu. (Mātiu 10:​29-​31) Hangē ko ia kuó ne palōmesí, te ne fokotuʻu hake kitautolu, ʻio, ʻo fakafoki kitautolu ki he moʻuí. Te ne ui mai kitautolu mei he mohe ʻi he maté.​—Siope 14:​13-​15; Sione 11:​21-​23, 38-​44.

Kapau te ke saiʻia ke ʻilo lahi ange fekauʻaki mo e kaveinga ko ení, ʻoku fakaafeʻi atu koe ke ke tohi ki he kau faipulusi ʻo e makasini ko ení, ʻa ia te nau fiefia ke ʻoatu ha fakamatala lahi ange, pe ʻaʻahi ki heʻemau Uepisaití ʻi he www.watchtower.org.