Mahuʻinga Ola Lelei ʻo e Ongoongo Leleí ki Ho Feituʻú

ʻI HE māmani ʻo e ʻaho ní ʻoku tau faʻa fanongo ai ki he fakakaukau ʻoku fakahaaʻi: “Ko e ngaahi tefitoʻi moʻoni ʻa e lotu faka-Kalisitiané ʻoku ʻikai ke ʻaonga ia. ʻE ʻikai pē te nau lavameʻa kinautolu ʻi he sōsaieti fihituʻu ʻo e ʻaho ní.” Kae kehe, ʻi ha fetalanoaʻaki naʻe hiki ʻi he vahaʻa ʻo e taki Hinitū ko Mohandas K. Gandhi pea mo e Kōvana Pilitānia ki muʻa ʻo ʻInitia, ko Lord Irwin, naʻe fakahaaʻi ai ha fakakaukau mātuʻaki kehe. ʻOku pehē ai naʻe ʻeke ange ʻe Lord Irwin kia Gandhi ʻa e meʻa ʻa ia ʻokú ne fakakaukau ki ai te ne solova ʻa e ngaahi palopalema ʻi he vahaʻa ʻo Pilitānia Lahi mo ʻInitiá. Naʻe toʻo hake ai ʻe Gandhi ha Tohitapu ʻo fakaava ki he vahe hono nima ʻo e Mātiú peá ne pehē: “ʻO ka fakataha ho fonuá mo hoku fonuá ʻi he ngaahi akonaki naʻe fakatoka ʻe Kalaisi ʻi he Malanga ko eni ʻi he Moʻungá, te ta solova ai ʻa e ngaahi palopalemá ʻo ʻikai ngata pē ʻi hota ongo fonuá ka ʻi he māmaní kotoa.”

ʻOku lāulea ʻa e malanga ko iá ki he kumi ki he tuʻunga lelei fakalaumālié pea mo e hoko ʻo anga-malū, fakamelino, faimeesi, ko ha tokotaha ʻofa ki he māʻoniʻoní. ʻOkú ne fakahalaiaʻi ʻo ʻikai ngata pē ʻi he fakapoó ka ko e hoko ʻo ʻita ki he niʻihi kehé, ʻikai ko e tonó pē kae pehē foki ki he ngaahi fakakaukau holi koví. ʻOku lau ai ki he ngaahi vete mali taʻeʻuhinga ʻokú ne ʻai ke movetevete ʻa e ngaahi ʻapí pea ngaohikovia ai ʻa e fānaú. ʻOkú ne tala mai kiate kitautolu: ‘ʻOfa ʻo aʻu ki he faʻahinga ʻoku nau fehiʻa ʻiate koé, foaki ki he masivá, tuku ʻa hono fakamāuʻi taʻefaimeesi ʻa e niʻihi kehé, fai ki he niʻihi kehé ʻo hangē ko ia te ke saiʻia ke fai mai kiate koé.’ Ko e faleʻí ni kotoa, kapau ʻe ngāueʻaki, te ne ʻomai ʻa e ngaahi ʻaonga lahi. Ko e tokolahi ange ʻa e kakai ʻi ho feituʻú ʻoku nau fai iá, ko e hoko ia ʻo lelei ange ʻa ho feituʻú!

Ko e Kau Fakamoʻoni ʻa Sihová ʻoku nau ʻiloa ʻi he fakahinohino ko ení. ʻOku akoʻi kinautolu ʻe he Tohitapú ke ʻapasiaʻi ʻa e nofo malí. ʻOku akoʻi ʻenau fānaú ʻi he ngaahi tefitoʻi moʻoni totonu. ʻOku fakamamafaʻi ʻa e mahuʻinga ʻo e fāmilí. Ko e ngaahi fāmili fāʻūtahá ko ha tāpuaki ia ki ho feituʻú, naʻa mo ho fonuá. ʻOku fonu ʻa e hisitōliá ʻi he ngaahi fakatātā ʻo e ngaahi puleʻanga hau ʻi he māmaní naʻe movete ʻi he taimi naʻe vaivai ai ʻa e ngaahi haʻi fakafāmilí pea tupulaki ʻa e ʻulungaanga taʻetāú. Ko e lahi ange ʻa e faʻahinga tāutaha mo e ngaahi fāmili ʻoku tākiekina ʻe he Kau Fakamoʻoni ʻa Sihová ke nau moʻuiʻaki ʻa e ngaahi tefitoʻi moʻoni faka-Tohitapú, ko e siʻi ange ia ʻa e faihia ʻa e toʻutupú, ʻulungaanga taʻetāú, pea mo e faihia te ke maʻu ʻi ho feituʻú.

Ko e taha ʻo e ngaahi palopalema lahi ʻokú ne taaʻi ʻa e ngaahi feituʻú mo e ngaahi puleʻangá ko e tomuʻa fehiʻa fakamatakalí. ʻI hono kehé, naʻe pehē ʻe he ʻapositolo ko Pitá: “Ko ʻene toki mahino mai e kiate au, ʻoku ʻikai ke filifilimanako ʻa e ʻOtua: ka neongo pē ko e fēʻia ʻa e kakai, ka ʻilonga ʻa ia ʻoku ʻapasia kiate ia, pea ngāue fai ki he totonu, ʻoku ngofua ke ne aʻu mai kiate ia.” Pea naʻe tohi ʻe Paula: “ʻOku ʻikai ai ha Siu pe ha Kalisi, ʻoku ʻikai ai ha popula pe ha tauʻataina, ʻoku ʻikai ai ke tangata mo fefine: he ko kimoutolu katokatoa ko e toko taha tofu pe ʻia Kalaisi Sisu.” (Ngāue 10:​34, 35; Kaletia 3:28) ʻOku tali eni ʻe he Kau Fakamoʻoni ʻa Sihová. Ko e matakali mo e lanu kotoa pē ʻoku nau nofo mo ngāue fakataha ʻi honau ngaahi ʻuluʻi ʻapitangá, ʻi he ngaahi vaʻá, pea ʻi he ngaahi fakatahaʻangá.

ʻI ʻAfilika ʻoku ʻikai lava ke feohi fakataha ai ʻa e ngaahi haʻa ʻe niʻihi ʻo taʻefepaki. Kae kehe, ʻi he ngaahi ʻasemipilī ʻa e Kau Fakamoʻoni ʻa Sihová ʻi aí, ʻoku kai, mohe, mo lotu fakataha ai ʻa e kakai mei he ngaahi faʻahinga kehekehe lahi ʻi he feongoongoi kakato mo e feohi māfana. ʻOku ʻohovale ʻa e kau ʻōfisa fakapuleʻangá ʻi heʻenau sio ki he meʻá ni. Ko ha fakatātā ʻo e ola lelei ʻo e fāʻūtaha ʻa e lotu faka-Kalisitiane moʻoní naʻe fakamatala ki ai ʻa e Amsterdam News ʻi Niu ʻIoke ʻo ʻAokosi 2, 1958. Naʻe fakatupunga ʻa e fakamatalá ʻi ha mamata he ʻasemipilī fakavahaʻapuleʻanga naʻe lave ki ai ki muʻá ʻa ia naʻe fakatahataha ai ʻa e Kau Fakamoʻoni laka hake ʻi he kuata milioná ʻi Kolo Niu ʻIoke.

“ʻI he feituʻu kotoa ko e kau ʻUliʻuli, hinehina mo e faʻahinga ʻo e Hahaké, mei he ngaahi tuʻunga kotoa pē ʻo e moʻuí pea mei he tapa kotoa ʻo e māmaní, naʻa nau feohi fiefia mo tauʻaetāina . . . Ko e kau lotu ʻa ia ko e Kau Fakamoʻoni mei he ngaahi fonua ʻe 120 naʻa nau nofo mo lotu fakataha ʻi he melino, ʻo fakahaaʻi ai ki he kau ʻAmeliká ʻa e lava ke faingofua ʻa hono fai ʻa e meʻá ni. . . . Ko e ʻasemipilií ko ha fakatātā ʻilonga ia ʻo e malava ke ngāue mo nofo fakataha ʻa e kakaí.”

ʻE pehē nai ʻe he tokolahi ko e ngaahi tefitoʻi moʻoni ʻo e lotu faka-Kalisitiané ʻoku ʻikai ke ʻaonga ia ki he māmani fakaeonopooni ko ení. Kae kehe, ko e hā ha toe meʻa kuo lavameʻa pe ʻe lavameʻa? Ko e ngaahi tefitoʻi moʻoni faka-Kalisitiané ʻe lava ke hoko ia ʻo mahuʻinga moʻoni kapau ʻe ngāueʻaki ia he taimí ni ʻi ho feituʻú, pea te nau hoko ai ko e makatuʻunga ki hono fakafāʻūtahaʻi ʻa e kotoa ʻo e ‘ngaahi matakali, ngaahi faʻahinga, mo e ngaahi lea’ ʻi he māmaní kotoa ʻi he malumalu ʻo e pule ʻa e Puleʻanga ʻo e ʻOtuá ki he faʻahinga ʻo e tangatá.​—Fakahā 7:​9, 10.

[Fakamatala ʻi he peesi 23]

ʻOku ngāue fakataha ʻa e ngaahi matakali mo e lanu kotoa pē

[Fakamatala ʻi he peesi 24]

ʻOku ʻaonga ʻa e lotu faka-Kalisitiané. Ko e hā mo ha toe meʻa kehe kuo lavameʻa?