Mālohi ke Toe Fakafoki Mai​—Ko Sihova ʻOkú Ne “Ngaohi ke Foʻou ʻa e Ngaahi Meʻa Kotoa Pē”

1, 2. Ko e hā ʻa e ngaahi mole ʻokú ne fakamamahiʻi ʻa e fāmili fakaetangatá he ʻaho ní, pea ʻoku anga-fēfē hono uesia kitautolu ʻe he ngaahi meʻá ni?

ʻOKU mole pe maumauʻi ʻe ha kiʻi tama ha kiʻi meʻa-vaʻinga ʻokú ne manako ai pea tangi mamahi. Ko e foʻi ongo ko iá ʻoku fakalotomamahi! Neongo ia, kuó ke mātā ʻa e ulo ʻa e mata ʻo ha kiʻi tama ʻi hano toe fakafoki mai ʻe ha mātuʻa ʻa e meʻa naʻe molé? Ki he mātuʻá, mahalo pē ko ha meʻa faingofua pē ia ke ʻiloʻi ʻa e meʻa-vaʻingá pe naʻa mo hano ngaohi ia. Ka ʻoku fiefia ʻa e kiʻi tamá mo mātuʻaki ofoofo. Ko e meʻa ne ngali mole ʻaupitó kuo toe fakafoki mai!

² Ko Sihova, ʻa e Tamai lelei tahá, ʻokú ne maʻu ʻa e mālohi ke toe fakafoki mai ʻa e meʻa ʻoku vakai nai ki ai ʻene fānau fakaemāmaní ko ha mole ʻo ʻikai ha toe ʻamanaki ki ai. Ko hono moʻoní, ʻoku ʻikai ke tau lave heni ki ha ngaahi meʻa-vaʻinga pē. ʻI he “ngaahi taimi faingataʻa” ko ʻení, kuo pau ke tau fehangahangai ai mo e ngaahi mole ʻoku toe mafatukituki ange ia. (2 Tīmote 3:1-5) Ko e konga lahi ʻo e meʻa ʻoku koloaʻaki ʻe he kakaí ʻoku hā ngali ʻi he tuʻunga fakatuʻutāmaki maʻu pē​—ko e ʻapí, koloá, ngāué, naʻa mo e moʻuí. ʻOku tau toe ongoʻi loto-siʻi nai ʻi heʻetau fakakaukauloto atu ki he fakaʻauha ʻo e ʻātakaí pea iku ai ki he mole, ʻi he ʻauhamālie ʻa e faʻahinga lahi ʻo e meʻa moʻuí. Kae kehe, ʻoku ʻikai ha tā ʻe oʻo ange kiate kitautolu ka ko e mate ʻa ha taha ʻoku tau ʻofa ai. Ko e ngaahi ongoʻi ʻo e molé mo e ʻikai lava ke toe fai ha meʻá ʻoku malava ke fakatupu lōmekina.​—2 Samiuela 18:33.

3. Ko e hā ʻa e ʻamanaki fakafiemālie ʻoku ʻomai ʻi he Ngāue 3:21, pea ʻe fakahoko ia ʻe Sihova ʻi he founga fē?

³ Ko ia, he fakafiemālie lahi ē ke ako fekauʻaki mo e mālohi ʻo Sihova ke toe fakafoki maí! Hangē ko ia te tau vakai ki aí, ʻoku ʻi ai ha tafaʻaki fakaofo ki he meʻa ʻoku malava pea ʻe toe fakafoki mai ʻe he ʻOtuá ki heʻene fānau fakaemāmaní. Ko hono moʻoní, ʻoku fakahaaʻi ʻe he Tohitapú ʻoku fakataumuʻa ʻa Sihova ke “toe fakafoki [ʻa e] ngaahi meʻa kotoa pē.” (Ngāue 3:21, NW) Ke fakahoko ʻení, ʻe ngāueʻaki ʻe Sihova ʻa e Puleʻanga Faka-Mīsaiá, ʻoku pule ai hono ʻAló, ʻa Sīsū Kalaisi. ʻOku fakahāhaaʻi ʻe he fakamoʻoní ko e Puleʻanga ko ʻení naʻe kamata pule ia ʻi hēvani ʻi he 1914.a (Mātiu 24:3-14) Ko e hā ʻe toe fakafoki maí? Tau lāulea angé ki he niʻihi ʻo e ngaahi ngāue maʻongoʻonga ʻa Sihova fekauʻaki mo e toe fakafoki maí. Ko e taha ʻo e ngaahi meʻá ni kuo malava ke tau ʻosi mātā mo hokosia. Ko e niʻihi kehe ʻe toki hoko ia ʻi ha tuʻunga lahi ange ʻi he kahaʻú.

Ko e Toe Fakafoki Mai ʻo e Lotu Maʻá

4, 5. Ko e hā naʻe hoko ki he kakai ʻa e ʻOtuá ʻi he 607 K.M., pea ko e hā ʻa e ʻamanaki naʻe ʻoange ʻe Sihova kiate kinautolú?

⁴ Ko e meʻa ʻe taha kuo ʻosi toe fakafoki mai ʻe Sihová ko e lotu maʻá. Ke makupusi ʻa e meʻa ʻoku ʻuhinga ki ai ʻení, tau sivisiviʻi nounou angé ʻa e hisitōlia ʻo e puleʻanga ʻo Siutá. Ko hono fai iá te tau maʻu ai ʻa e fakamaama fakatupu fiefia ki he ngāue ʻa e mālohi ʻo Sihova ke toe fakafoki maí.​—Loma 15:4.

⁵ Sioloto atu angé ki he anga ʻo e ongoʻi ʻa e kau Siu loto-tōnungá ʻi he 607 K.M. ʻi he taimi naʻe fakaʻauha ai ʻa Selusalemá. Naʻe fakaʻauha honau kolo ʻofeiná, naʻe holoki ki lalo hono ngaahi ʻaá. Ko e meʻa naʻe toe kovi angé, ko e temipale lāngilangiʻia ko ia naʻe langa ʻe Solomoné, ʻa e senitā ko ia ʻe taha ki he lotu maʻa ʻa Sihová ʻi he kotoa ʻo e māmaní, naʻe liʻaki ia ko e koto maumau. (Sāme 79:1) Ko e kau haó naʻe ʻave ʻo fakaheeʻi ʻi Pāpilone, ʻo tuku honau fonua totonú ko ha nofoʻanga maomaonganoa ʻo e fanga manu kaivaó. (Selemaia 9:11) Mei he anga ʻo e vakai fakaetangatá, ne hā ngali mole ʻa e meʻa kotoa. (Sāme 137:1) Ka ko Sihova, ʻa ia naʻá ne tomuʻa tala fuoloa ʻa e fakaʻauha ko ʻení, naʻá ne tokonaki mai ʻa e ʻamanaki ʻoku toka mei muʻa ha taimi ʻo e toe fakafoki mai.

6-8. (a) Ko e hā ʻa e kaveinga toutou ʻohake ʻoku maʻu ʻi he ngaahi tohi ʻa e kau palōfita Hepeluú, pea naʻe anga-fēfē hono muʻaki fakahoko ʻo e ngaahi kikite lahi ko iá? (e) ʻI he ngaahi taimi ʻi onopōní, kuo anga-fēfē hono hokosia ʻe he kakai ʻa e ʻOtuá ha fakahoko ʻo e ngaahi kikite ki he toe fakafoki maí?

⁶ Ko hono moʻoní, ko e toe fakafoki maí ko ha kaveinga toutou ʻohake ia ʻi he ngaahi tohi ʻa e kau palōfita Hepeluú.b Fakafou ʻiate kinautolú, naʻe talaʻofa ai ʻe Sihova ha fonua ʻe toe fakafoki mai pea ʻe toe nofoʻi, maʻuiʻui, maluʻi mei he fanga manu fekaí mo e ʻoho mei he filí. Naʻá ne fakamatalaʻi honau fonua ʻe toe fakafoki maí ko ha palataisi moʻoni! (Aisea 65:25; ʻIsikeli 34:25; 36:35) Hiliō he meʻa kotoa, ko e lotu maʻá ʻe toe fokotuʻu, pea ʻe toe langa ʻa e temipalé. (Maika 4:1-5) Naʻe hanga ʻe he ngaahi kikité ni ʻo ʻoange ki he kau Siu naʻe fakahēʻí ha ʻamanaki, ʻo tokoniʻi kinautolu ke nau kātekina ʻenau ngāue pōpula taʻu ʻe 70 ʻi Pāpiloné.

⁷ Faai atu pē, naʻe hoko mai ʻa e taimi ʻo e toe fakafoki maí. ʻI hono fakatauʻatāinaʻi mei Pāpiloné, naʻe foki ʻa e kau Siú ki Selusalema pea toe langa ʻa e temipale ʻo Sihová ʻi ai. (ʻĒsela 1:1, 2) ʻI heʻenau pīkitai pē ki he lotu maʻá, naʻe tāpuakiʻi kinautolu ʻe Sihova pea ʻai honau fonuá ke maʻuiʻui mo mahu. Naʻá ne maluʻi kinautolu mei he ngaahi filí pea mei he fanga manu fekai ko ia naʻa nau maʻu honau fonuá ʻi he ngaahi hongofuluʻi taʻu. He fiefia lahi ē kuo pau naʻa nau maʻu ʻi he mālohi ʻo Sihova ke toe fakafoki maí! Ka naʻe fakafofongaʻi pē ʻe he ngaahi meʻa ko iá ha tomuʻa fakahoko fakangatangata ʻo e ngaahi kikite ki he toe fakafoki maí. Ko ha fakahoko lahi ange ʻe hoko mai ia “i he gaahi aho amui,” ko hotau taimí tonu, ʻa ia ʻe fakanofo tuʻi ai ʻa e ʻEa ʻo Tuʻi Tēvita naʻe fuoloa hono talaʻofaʻaki maí.​—Aisea 2:2-4, PM; 9:6, 7 (5, 6, PM).

⁸ ʻI he hili pē ha taimi siʻi mei hono fakanofo tuʻi ʻo Sīsū ʻi he Puleʻanga fakahēvaní ʻi he 1914, naʻá ne fakahanga ʻene tokangá ki he ngaahi fiemaʻu fakalaumālie ʻa e kakai faitōnunga ʻa e ʻOtuá ʻi he māmaní. Hangē pē ko hono fakatauʻatāinaʻi ʻe he tokotaha-ikuna Pēsia ko Kōlesí ha toenga ʻo e kau Siú mei Pāpilone ʻi he 537 K.M., naʻe fakatauʻatāinaʻi ʻe Sīsū ha toenga ʻo e kau Siu fakalaumālié​—ʻa hono kau muimui topuvaʻe taha mo iá​—mei he tākiekina ʻa “Pāpilone ko e Lahi,” ko e ʻemipaea fakaemāmani ʻo e lotu loí. (Fakahā 18:1-5, NW; Loma 2:29) Mei he 1919 ʻo faai mai, kuo toe fakafoki mai ʻa e lotu maʻá ki hono tuʻunga totonú ʻi he moʻui ʻa e kau Kalisitiane moʻoní. (Malakai 3:1-5) Talu mei he taimi ko iá, kuo lotu ʻa e kakai ʻa Sihová kiate ia ʻi hono temipale fakalaumālie kuo fakamaʻá​—ko e fokotuʻutuʻu ʻa e ʻOtuá ki he lotu maʻá. Ko e hā ʻoku mahuʻinga ai ʻeni kiate kitautolu ʻi he ʻaho ní?

Toe Fakafoki Mai Fakalaumālie​—ʻUhinga ʻOku Mahuʻinga Aí

9. ʻI he hili atu ʻa e kuonga fakaʻapositoló, ko e hā naʻe fai ʻe he ngaahi siasi ʻo e Puleʻanga-Haʻa-Kalisitiané ki he lotu ʻa e ʻOtuá, ka ko e hā kuo fai ʻe Sihova ia ʻi hotau taimí?

⁹ Fakakaukau angé ki he vakai fakahisitōliá. Ko e kau Kalisitiane ʻi he ʻuluaki senitulí naʻa nau maʻu ʻa e ngaahi tāpuaki lahi fakalaumālie. Ka naʻe tomuʻa tala ʻe Sīsū mo e kau ʻapositoló ko e lotu moʻoní ʻe fakameleʻi pea ʻe mole atu. (Mātiu 13:24-30; Ngāue 20:29, 30) ʻI he hili atu ʻa e kuonga fakaʻapositoló, naʻe malanga hake ai ʻa e Puleʻanga-Haʻa-Kalisitiané. Naʻe ohi ʻe hono haʻa faifekaú ʻa e ngaahi akonaki mo e ngaahi tōʻonga fakapangani. Naʻa nau toe ʻai ʻa e fakaofiofi ki he ʻOtuá ʻo meimei taʻemalava, ʻo fakamatalaʻi ia ko ha Tolu-Tahaʻi-ʻOtua mahinongataʻa pea akoʻi ʻa e kakaí ke nau vetehia ki he kau pātelé pea ke lotu kia Mele mo e “kau sangato” kehekehe kae ʻikai kia Sihova. ʻI he taimi ní, ʻi he hili atu ʻa e ngaahi senituli lahi ʻo e fakameleʻi peheé, ko e hā kuo fai ʻe Sihová? ʻI he uhouhonga ʻo e māmani ʻo e ʻaho ní​—ʻi ha māmani ʻoku fonu ngutungutu ʻi he loi fakalotú pea ʻuliʻi ʻe he ngaahi tōʻonga taʻefakaʻotuá​—kuó ne tuʻu vahaʻa ʻo toe fakafoki mai ʻa e lotu maʻá! ʻI he ʻikai ko hano fakalahí, ʻoku malava ke tau pehē ko e toe fakafoki mai ko ʻení ko e taha ia ʻo e ngaahi meʻa mahuʻinga lahi taha ʻoku hoko ʻi he ngaahi taimi ʻi onopōní.

10, 11. (a) Ko e hā ʻa e ongo tafaʻaki ʻoku kau ki he palataisi fakalaumālié, pea ʻoku anga-fēfē ʻene kaunga kiate koé? (e) Ko e hā ʻa e faʻahinga kakai kuo fakatahatahaʻi ʻe Sihova ki he palataisi fakalaumālié, pea ko e hā ʻa e monū te nau maʻu ke sio tonu aí?

¹⁰ Ko ia ai, ʻoku fiefia ʻa e kau Kalisitiane moʻoni ʻi he ʻaho ní ʻi ha palataisi fakalaumālie ʻa ia ʻoku toe lelei ange mo laka ai pē ki muʻa ʻi ha toe taimi. Ko e hā ʻoku kau ʻi he palataisi ko ʻení? ʻI hono tefitó, ko e ongo tafaʻaki ʻe ua. Ko e ʻuluakí, ko e lotu maʻa ʻa e ʻOtua moʻoni ko Sihová. Kuó ne tāpuakiʻi kitautolu ʻaki ha founga ʻo e lotú ʻoku ʻatā mei he loí mo e ngaahi mioʻí. Kuó ne tāpuakiʻi kitautolu ʻaki ʻa e meʻakai fakalaumālié. ʻOku fakaivia kitautolu ʻe he meʻá ni ke tau ako fekauʻaki mo ʻetau Tamai fakahēvaní, ke fakahōifuaʻi ia, pea ke ʻunuʻunu ofi kiate ia. (Sione 4:24) Ko e tafaʻaki hono ua ʻo e palataisi fakalaumālié ʻoku kau ai ʻa e kakaí. Hangē ko ia naʻe tomuʻa tala ʻe ʻAiseá, “i he gaahi aho amui,” kuo ʻosi akoʻi ai ʻe Sihova ki heʻene kau lotú ʻa e ngaahi founga ʻo e melinó. Kuó ne toʻo atu ʻa e taú mei hotau lotolotongá. Neongo ʻetau ngaahi taʻehaohaoá, ʻokú ne tokoniʻi kitautolu ke tau ʻai “ʻa e tangata foʻou.” ʻOkú ne tāpuakiʻi ʻetau ngaahi feingá ʻaki hono laumālie māʻoniʻoní, ʻa ia ʻokú ne fakatupu hono fua fakaʻofoʻofá ʻiate kitautolu. (Efeso 4:22-24; Kalētia 5:22, 23) ʻI he taimi ʻokú ke ngāue ai ʻo fehoanaki mo e laumālie ʻo e ʻOtuá, ko e konga moʻoni koe ʻo e palataisi fakalaumālié.

¹¹ Kuo fakatahatahaʻi ʻe Sihova ki he palataisi fakalaumālie ko ʻení ʻa e faʻahinga kakai ʻokú ne ʻofa aí​—ʻa e faʻahinga ʻoku ʻofa kiate iá, ʻoku nau ʻofa ʻi he melinó, pea ʻoku nau “ʻiloʻi ʻa ʻenau fiemaʻu fakalaumālié.” (Mātiu 5:3, NW) Ko e kakai peheé te nau maʻu ʻa e monū ke sio tonu ʻi ha toe fakafoki mai fakaofo lahi ange​—ʻa ia ʻoku fekauʻaki mo e faʻahinga ʻo e tangatá pea mo e foʻi māmaní fakakātoa.

“Vakai! ʻOku Ou Ngaohi ke Foʻou ʻa e Ngaahi Meʻa Kotoa Pē”

12, 13. (a) Ko e hā kuo pau ai ke fakahoko ʻa e ngaahi kikite ʻo e toe fakafoki maí ʻi ha toe founga ʻe tahá? (e) Ko e hā ʻa e taumuʻa ʻa Sihova ki he foʻi māmaní naʻe fakahaaʻi ʻi ʻĪtení, pea ko e hā ʻoku ʻomai ai ʻe he meʻá ni kiate kitautolu ha ʻamanaki ki he kahaʻú?

¹² Ko e konga lahi ʻo e ngaahi kikite ki he toe fakafokí ʻoku ʻuhinga ia ki he meʻa lahi ange ʻi he toe fakafoki mai fakalaumālié pē. Ko e fakatātaá, naʻe tohi ʻa ʻAisea fekauʻaki mo ha taimi ʻa ia ko e puké, ko e heké, ko e kuí, pea mo e tulí ʻe fakamoʻui ia pea naʻa mo e maté tonu ʻe folofua ia ʻo taʻengata. (Aisea 25:8; 35:1-7) Naʻe ʻikai ke fakahoko moʻoni ʻa e ngaahi talaʻofa ia ko iá ʻi ʻIsileli ʻo e kuonga muʻá. Pea neongo kuo tau mātā ha fakahoko fakalaumālie ʻo e ngaahi talaʻofá ni ʻi hotau taimí, ʻoku ʻi ai ha makatuʻunga fefeka ke tui ai ʻi he kahaʻú, ʻe ʻi ai hano fakahoko moʻoni ai ʻi he tuʻunga kakato. ʻOku anga-fēfē ʻetau ʻilo iá?

¹³ ʻI ʻĪteni, naʻe ʻai ʻe Sihova ke mahino ʻene taumuʻa ki he foʻi māmaní: ʻE nofoʻi ia ʻe ha fāmili fiefia, moʻui lelei, mo fāʻūtaha ʻo e tangatá. Ko e tangatá mo e fefiné naʻe pau ke na tokangaʻi ʻa e foʻi māmaní pea mo e kotoa ʻo e ngaahi meʻa fakatupu ʻi aí, ke liliu ʻa e foʻi palanité fakakātoa ko ha palataisi. (Sēnesi 1:28) ʻOku fuʻu kehe ʻaupito ia mei he tuʻunga lolotonga ʻo e ngaahi meʻá. Neongo ia, ʻoku malava ke tau tuipau ko e ngaahi taumuʻa ʻa Sihová heʻikai ʻaupito ke taʻofi. (Aisea 55:10, 11) Ko Sīsū, ʻi he tuʻunga ko e Tuʻi Faka-Mīsaia naʻe fakanofo ʻe Sihová, te ne ʻomai ʻa e Palataisi fakalūkufuá ni.​—Luke 23:43.

14, 15. (a) ʻE anga-fēfē hono hanga ʻe Sihova ʻo “fakafoʻou ʻa e meʻa kotoa pe”? (e) ʻE fēfē ʻa e moʻui ʻi he Palataisí, pea ko fē ʻa e tafaʻaki ʻoku fakamānako lahi taha kiate koé?

¹⁴ Sioloto atu ki ha sio ki he foʻi māmaní fakakātoa ʻoku liliu ko ha Palataisi! ʻOku pehē ʻe Sihova ʻo fekauʻaki mo e taimi ko iá: “Ko eni ʻoku ou fakafoʻou ʻa e meʻa kotoa pe.” (Fakahā 21:5) Fakakaukau angé ki he meʻa ʻe ʻuhinga ki ai iá. ʻI he taimi ʻe ʻosi ai ʻa hono ngāueʻaki ʻe Sihova ʻa hono mālohi fakaefakaʻauhá ki he fokotuʻutuʻu fulikivanu motuʻá ni, ʻe toe pē ai ʻa e “ngaahi langi foʻou mo ha fonua foʻou.” ʻOku ʻuhinga ʻení ko ha founga-pule foʻou ʻe pule mai mei hēvani ki ha sōsaieti fakaemāmani foʻou ʻoku faʻuʻaki ʻa e faʻahinga ko ia ʻoku nau ʻofa kia Sihova mo fai hono finangaló. (2 Pita 3:13) Ko Sētane, fakataha mo ʻene kau tēmenioó, ʻe toʻo atu kinautolu. (Fakahā 20:3) Ko e ʻuluaki taimi ia ʻi he taʻu ʻe laui afe, ʻe ʻatā ai ʻa e faʻahinga ʻo e tangatá mei he tākiekina fakatupu fakameleʻi, tāufehiʻa, mo fakatupu maumau ko iá. ʻOku ʻikai ha veiveiua ʻe hulu fau ʻa e ongoʻi nongá.

¹⁵ Fakaʻosí, te tau malava ai ke tokangaʻi ʻa e palanite fakaʻofoʻofa ko ʻení ʻo hangē ko ia naʻe tomuʻa fakataumuʻa mai ke tau faí. ʻOku maʻu ʻe he foʻi māmaní ʻa e ngaahi mālohi fakanatula ke toe fakafoki mai. Ko e ngaahi anovai mo e ngaahi vaitafe kuo ʻuliʻí ʻe malava ke nau fakamaʻa ʻa kinautolu pē kapau ʻe toʻo atu ʻa e tupuʻanga ʻo e ʻulí; ko e ngaahi funga fonua kuo maumauʻi ʻe he taú ʻe malava ke fakaleleiʻi kapau ʻe ngata ʻa e ngaahi taú. Ko ha fiefia lahi ē ʻe hoko ʻi he ngāue ʻo fehoanaki mo e foʻi māmaní, ʻo tokoni ki hono liliu ia ko ha paʻake hangē ha ngoué, ko ha ʻĪteni fakalūkufua ʻo e ngaahi meʻa kehekehe taʻehanongataʻanga! ʻI he ʻikai ko hano fakaʻauha noaʻia pē ʻo e faʻahinga ʻo e fanga manú mo e ʻuluʻakaú, ʻe hoko ʻa e tangatá ia ʻo melino mo e meʻa fakatupu kotoa pē ʻi he foʻi māmaní. Naʻa mo e fānaú ʻe ʻikai ha ʻuhinga ke nau ilifia ai ki he fanga manu fekaí.​—Aisea 9:6, 7 (5, 6, PM); 11:1-9.

16. ʻI Palataisi, ko e hā ʻa e toe fakafoki mai ʻe kaunga ki he tokotaha faitōnunga tāutaha?

¹⁶ Te tau toe hokosia ʻa e toe fakafoki maí ʻi ha tuʻunga fakafoʻituitui. ʻI he hili ʻa ʻĀmaketoné, ʻe sio ai ʻa e kau hao moʻui atú ki ha ngaahi fakamoʻui fakaemana ʻi ha tuʻunga fakalūkufua. Hangē pē ko ia naʻá ne fai he lolotonga ʻene ʻi māmaní, ʻe ngāueʻaki ʻe Sīsū hono mālohi foaki faka-ʻOtuá ke toe fakafoki mai ʻa e mamatá ki he kuí, ʻa e fanongó ki he tulí, ʻa e sino moʻui leleí ki he heké mo e vaivaí. (Mātiu 15:30) Ko e taʻumotuʻá te ne fiefia ʻi he mālohi, moʻui lelei, mo e longomoʻui fakatalavou kuo toe fakafoʻou. (Siope 33:25) Ko e mingimingí ʻe puli atu, ko e pipikí ʻe mafao hangatonu, pea ko e ngaahi uouá ʻe ngaofengofua ʻi he mālohi kuo toe fakafoʻou. Ko e kotoa ʻo e faʻahinga faitōnunga ʻo e tangatá te nau ongoʻi ko e ngaahi nunuʻa ʻo e angahalá mo e taʻehaohaoá ʻe mole māmālie atu, ʻo puli ʻaupito. He fakamālō lahi ē ke tau fai kia Sihova ko e ʻOtuá koeʻuhi ko hono mālohi fakaofo ke toe fakafoki maí! Tau tokangataha he taimí ni ki he tafaʻaki mātuʻaki fakalotomāfana ʻe taha ʻo e taimi fakafiefia ko ʻeni ʻo e toe fakafoki maí.

Toe Fakafoki Mai ke Moʻui ʻa e Kau Maté

17, 18. (a) Ko e hā naʻe valokiʻi ai ʻe Sīsū ʻa e kau Sātusí? (e) Ko e hā ʻa e ngaahi tuʻunga naʻe taki atu ai ʻa ʻIlaisiā ke ne kole kia Sihova ke fakahoko ha toetuʻú?

¹⁷ ʻI he ʻuluaki senituli T.S., ko e kau taki lotu ʻe niʻihi, naʻe ui ko e kau Sātusí, naʻe ʻikai te nau tui ki he toetuʻú. Naʻe valokiʻi kinautolu ʻe Sīsū ʻaki ʻa e ngaahi leá ni: “Oku mou he, i he taeilo ki he gaahi tohi, moe malohi ae Otua.” (Mātiu 22:29, PM) ʻIo, ʻoku fakahaaʻi ʻe he ngaahi Konga Tohitapú ʻoku maʻu ʻe Sihova ʻa e mālohi pehē ke toe fakafoki mai. Anga-fēfē?

¹⁸ Sioloto atu ki he meʻa naʻe hoko ʻi he taimi ʻo ʻIlaisiaá. Ko ha uitou naʻá ne fua mai ʻa e sino ngāvaivai ʻo ʻene kiʻi tama pē ʻe toko tahá. Naʻe mate ʻa e tamasiʻí. Kuo pau pē naʻe ʻohovale ʻa e palōfita ko ʻIlaisiaá, ʻa ia naʻá ne hoko ʻi ha taimi ko ha tokotaha ʻaʻahi ʻa e uitoú. ʻI he taimi ki muʻá, naʻá ne tokoni ke fakamoʻui ʻa e kiʻi tamá ni mei he mate ʻi he fiekaiá. Ne kamata nai ʻa ʻIlaisiā ke ne hoko ʻo ʻofa ʻi he kiʻi tamá. Ko e faʻeé naʻá ne mātuʻaki loto-mamahi. Naʻe hoko ʻa e kiʻi tamasiʻí ni ko e fakamanatu moʻui pē ia ʻe taha ʻo hono husepāniti kuo maté. Mahalo pē naʻá ne ʻamanaki ko ʻene tamá te ne tokangaʻi ia ʻi heʻene taʻumotuʻá. ʻI he loto-moʻuá, naʻe manavasiʻi ai ʻa e uitoú naʻa ko hano tauteaʻi ia ʻi haʻane faihala ʻi he kuohilí. Naʻe ʻikai makātakiʻi ʻe ʻIlaisiā ke sio ki ha fakaʻau ke kovi ange ʻa e meʻa fakamamahí ni. Naʻá ne toʻo fakaalaala mai ʻa e ʻangaʻangá mei he fatafata ʻo e faʻeé, ʻo fua hake ia ki ʻolunga ki hono lokí, pea kole kia Sihova ko e ʻOtuá ke ne toe fakafoki mai ʻa e moʻui ʻa e kiʻi tamá.​—1 Tuʻi 17:8-21.

19, 20. (a) Naʻe anga-fēfē hono fakahāhā ʻe ʻĒpalahame naʻá ne tui ki he mālohi ʻo Sihova ke toe fakafoki maí, pea ko e hā ʻa e makatuʻunga ki he tui peheé? (e) Naʻe anga-fēfē hono fakapaleʻi ʻe Sihova ʻa e tui ʻa ʻIlaisiaá?

¹⁹ Naʻe ʻikai ko ʻIlaisiā ʻa e fuofua tokotaha ke tui ki he toetuʻú. ʻI he ngaahi senituli ki muʻá, naʻe tui ʻa ʻĒpalahame naʻe maʻu ʻe Sihova ʻa e mālohi pehē ki he toe fakafoki maí​—pea ʻi he ʻuhinga lelei. ʻI he taimi naʻe taʻu 100 ai ʻa ʻĒpalahame pea taʻu 90 ai ʻa Selá, naʻe toe fakafoki mai ʻe Sihova hona ngaahi mālohi fakafanau naʻe maté, ʻo fakamafeia fakaemana ai ʻa Sela ke ne maʻu ha tama. (Sēnesi 17:17; 21:2, 3) Ki mui ai, ʻi he taimi naʻe tupu kakato hake ai ʻa e tamasiʻí, naʻe kole ange ʻe Sihova kia ʻĒpalahame ke feilaulauʻaki hono fohá. Naʻe fakahāhā ʻe ʻĒpalahame ʻa e tui, ʻi hono ʻiloʻi ʻe malava ʻe Sihova ke toe fakafoki mai ke moʻui ʻa hono ʻofaʻanga ko ʻAisaké. (Hepelū 11:17-19) ʻOku fakahaaʻi mai nai ʻe he tui mālohi peheé ʻa e ʻuhinga naʻe hanga ai ʻe ʻĒpalahame, ʻi he ki muʻa ke na ʻalu hake ki he moʻungá ke foaki atu ai ʻa hono fohá, ʻo fakapapauʻi ange ki heʻene ongo sevānití ʻo pehē ko ia mo ʻAisaké te na toe foki mai pē.​—Senesi 22:5.

²⁰ Naʻe fakahaofi ʻe Sihova ʻa ʻAisake, ko ia naʻe ʻikai ha fiemaʻu ia ki ha toetuʻu ʻi he taimi ko iá. Kae kehe, ʻi he meʻa fekauʻaki mo ʻIlaisiaá, ne ʻosi mate ʻa e tama ia ʻa e uitoú​—ka naʻe ʻikai ke fuʻu fuoloa. Naʻe fakapaleʻi ʻe Sihova ʻa e tui ʻa e palōfitá ʻaki hono toe fokotuʻu mai ʻa e kiʻi tamá! Naʻe ʻoange leva ʻe ʻIlaisiā ʻa e kiʻi tamasiʻí ki heʻene faʻeé, fakataha mo e ngaahi lea fakangalongataʻá ni: “Vakai ʻoku moʻui hoʻo tama”!​—1 Tuʻi 17:22-24.

21, 22. (a) Ko e hā ʻa e taumuʻa ʻo e ngaahi toetuʻu naʻe lēkooti ʻi he ngaahi Konga Tohitapú? (e) ʻI Palataisí, ʻe lahi fēfē ʻa e toetuʻú, pea ko hai te ne fakahoko iá?

²¹ Ko ia ko e fuofua taimi ʻeni ʻi he lēkooti ʻa e Tohitapú, ʻoku tau sio ai ki hono ngāueʻaki ʻe Sihova hono mālohí ke toe fakafoki mai ha moʻui fakaetangatá. Ki mui mai ai, naʻe toe fakaivia ʻe Sihova ʻa ʻIlaisa, Sīsū, Paula, mo Pita ke nau toe fakafoki mai ʻa e maté ki he moʻuí. Ko e moʻoni, ko e faʻahinga ko ia naʻe fokotuʻu mei he maté naʻe faai mai pē ʻo nau toe mate. Ka neongo ia, ʻoku ʻomai ʻe he ngaahi fakamatala Tohitapu peheé kiate kitautolu ha tomuʻa vakai fakaofo ki he ngaahi meʻa ʻe hoko maí.

²² ʻI Palataisí, ʻe fakahoko ai ʻe Sīsū hono ngafa ko ia “ko e Toetuʻu, pea mo e Moʻui.” (Sione 11:25) Te ne fokotuʻu mai ʻa e laui miliona taʻefaʻalaua, ʻo ʻoange kiate kinautolu ha faingamālie ke moʻui taʻengata ʻi he Palataisi ʻi he māmaní. (Sione 5:28, 29) Sioloto atu ki he toe feohi ʻi he tuʻunga ko e ngaahi kaumeʻa mo e ngaahi kāinga ʻofeina, ne fuoloa hono fakamāvaeʻi ʻe he maté, ʻo fefāʻofuaʻaki, ʻi he tuʻunga ʻo e fiefia lahi! Ko e kotoa ʻo e faʻahinga ʻo e tangatá te nau fakahīkihikiʻi ʻa Sihova ʻi hono mālohi ke toe fakafoki maí.

23. Ko e hā ʻa e fakahāhā lahi taha ʻo e mālohi ʻo Sihová, pea ʻoku anga-fēfē hono fakapapauʻi ʻe he meʻá ni ʻetau ʻamanaki ki he kahaʻú?

²³ Kuo ʻomai ʻe Sihova ha fakapapauʻiʻanga mālohi ko e ngaahi ʻamanaki peheé ʻoku pau. ʻI he fakahāhā lahi taha ʻo hono mālohí, naʻá ne fokotuʻu hake hono ʻAló, ʻa Sīsū, ko ha meʻamoʻui laumālie māfimafi, ʻo ʻai ia ke fika ua hake pē kiate Ia. Naʻe hā ʻa Sīsū heʻene toetuʻú ki he laui teau ʻo e kau fakamoʻoni sio tonu. (1 Kolinitō 15:5, 6) Naʻa mo e kau tui veiveiuá, ʻoku totonu ke feʻungaʻānoa ʻa e fakamoʻoni ko iá. ʻOku maʻu ʻe Sihova ʻa e mālohi ke toe fakafoki mai ʻa e moʻuí.

24. Ko e hā ʻoku malava ai ke tau tuipau ʻe fokotuʻu mai ʻe Sihova ʻa e kau maté, pea ko e hā ʻa e ʻamanaki ʻe koloaʻaki nai ʻe he tokotaha taki taha ʻo kitautolú?

²⁴ ʻOku ʻikai ngata pē ʻi hono maʻu ʻe Sihova ʻa e mālohi ke toe fakafoki mai ʻa e kau maté ka ʻokú ne toe maʻu ʻa e holi ke fai pehē. Naʻe fakamānavaʻi ʻa e tangata anga-tonu ko Siopé ke ne pehē ʻoku holi moʻoni ʻa Sihova ke fakafoki mai ʻa e kau maté. (Siope 14:15) ʻIkai ʻoku tohoaki koe ki hotau ʻOtuá, ʻa ia ʻokú ne vēkeveke ke ngāueʻaki hono mālohi ke toe fakafoki maí ʻi ha founga ʻofa pehē? Neongo ia, manatuʻi, ko e toetuʻú ko e tafaʻaki pē ia ʻe taha ʻo e ngāue lahi ʻa Sihova ke toe fakafoki maí ʻoku toka mei muʻá. ʻI hoʻo ʻunuʻunu ke toe ofi ange kiate iá, koloaʻaki maʻu pē ʻa e ʻamanaki mātuʻaki mahuʻinga ko ia ʻo e malava ke ke ʻi ai ke sio ki hono hanga ʻe Sihova ʻo “fakafoʻou ʻa e meʻa kotoa pe.”​—Fakahā 21:5.