Ko e Masivá ko ha Fakaʻilonga Ia ʻo e Taʻefakahōifua ki he ʻOtuá?
NAʻE tala ʻe he ʻOtuá ki ʻIsileli ʻo e kuonga muʻá: “Ke oua naa ai ha kau majiva iate kimoutolu.” Naʻe ʻuhinga ení koeʻuhi ʻi he Lao naʻe ʻoange ʻe he ʻOtuá kia kinautolú, naʻe ʻi ai ʻa e ngaahi tokonaki ke tokangaʻi ʻa e kau masivá ʻo aʻu ki hono tuku ʻo ʻikai totongi ʻa e ngaahi moʻuá. (Teutalonome 15:1-4, 7-10, PM) Ko ia ai, naʻe ʻikai totonu ke ʻi ai ha kakai masiva ʻi he lotolotonga ʻo e kau ʻIsilelí, he naʻe palōmesi ʻa Sihova te ne tāpuakiʻi kinautolu. Kae kehe, ko e tāpuaki ko iá naʻe fakatuʻunga ia ʻi he talangofua ki he Laó, ʻa ia naʻe ʻikai fai ki ai ʻa e kau ʻIsilelí.
Neongo ia, naʻe ʻikai ʻuhinga eni iá, ko e faʻahinga naʻe siʻi ʻenau meʻa fakamatelié naʻe ʻikai ʻaupito hōifua ki ai ʻa e ʻOtuá, ʻo tatau pē mo hono tāpuakiʻi ʻe he ʻOtuá ʻa e faʻahinga naʻe lahi ʻenau koloá. Ko e tokolahi ʻo e kau sevāniti faitōnunga ʻa e ʻOtuá naʻa nau masiva fakamatelie. Ko e palōfita ko ʻĒmosí ko ha tauhi sipi masiva ia pea ko ha tokotaha ngāue ʻi he faʻahitaʻu ʻo e sukaminó. (Emosi 1:1; 7:14) ʻI he ngaahi ʻaho ʻo e palōfita ko ʻIlaisiaá, ʻi he hoko ha honge ki ʻIsilelí, naʻe pau ke fakafalala ʻa ʻIlaisiā ki he anga-talitali kakai ʻa ha uitou masiva, ʻa ia ko ʻene kiʻi meʻi mahoaʻá mo e loló naʻe fakatolonga fakaemana ia lolotonga ʻa e hongé. Naʻe ʻikai ke koloaʻia ʻa ʻIlaisiā pe ko e uitoú; naʻe tokonaki ʻa Sihova ki heʻena ngaahi fiemaʻu tefitó pē.—1 Tuʻi 17:8-16.
Ko e hokonoa ʻa e ngaahi meʻá ʻoku fakatupunga taʻeʻamanekina nai ai ke masiva ʻa e kakaí. Ko e ngaahi fakatuʻutāmakí mo e puké ʻoku lava ke ne taʻofi fakataimi pe tuʻumaʻu ha tokotaha mei he ngāué. Pea ʻoku lava ʻi he maté ke tuku mai ai ha fānau paea mo e kau uitou. Naʻa mo e ngaahi tuʻunga kovi peheé ʻoku ʻikai fakahaaʻi ai ʻa e taʻehōifua ʻa e ʻOtuá. Ko e talanoa kia Nāomi mo Luté ko ha fakatātā fakalotomāfana ia ʻo e tokanga ʻofa ʻa Sihova ki he masivá. Neongo naʻe masiva ʻangoʻango ʻa Nāomi mo Lute ʻi he mate ʻa hona ongo husepānití, naʻe tāpuakiʻi kinaua ʻe he ʻOtua ko Sihová pea fai mo e tokonaki ke tokangaʻiʻaki ʻena ngaahi fiemaʻú.—Lute 1:1-6; 2:2-12; 4:13-17.
ʻOku hā mahino, ko e masivá ʻoku ʻikai ko ha fakamoʻoni ia ʻo e taʻefakahōifua ki he ʻOtuá. Ko e faʻahinga ʻoku faitōnunga kia Sihova ko e ʻOtuá ʻoku lava ke nau tuipau ki he ngaahi lea ʻa Tuʻi Tēvitá: “Naʻa ku talavou, pea kuo u motuʻa ni: Ka kuo teʻeki te u mamata ki ha maʻoniʻoni kuo liʻaki, pe ko hono hako ʻoku nofo ke kole meʻakai.”—Sāme 37:25.
[Fakatātā ʻi he peesi 8]
Neongo ʻena masiva ʻangoʻangó, naʻe tāpuakiʻi ʻa Nāomi mo Lute pea naʻe tokangaʻi anga-ʻofa kinaua ʻe he ʻOtuá